Maxsus avtotransport (axlat tashigichlar, ag‘darma mashinalar)ni o‘z vaqtida ishlab chiqarish va yetkazib berishni ta’minlash, mahalliy davlat hokimiyati organlari bilan kelishgan holda yetkazib berish jadvallarini tasdiqlash.

Sanitariya jihatidan tozalashning ixtisoslashtirilgan korxonalariga maxsus texnika sotib olish uchun qaytarish muddati kamida 5 yil bo‘lgan imtiyozli kreditlar ajratilishini tijorat banklari tomonidan ta’minlash.

Tumanlar va shaharlarda maxsus avtotransport vositalari (axlat tashigichlar, buldozerlar, yuk ortgichlar, ag‘darma mashinalar) va asbob-uskunalar (avtotarozilar) xarid qilinishini ta’minlash.

2014-2015-yillarda axlat to‘plash shoxobchalari, qattiq maishiy chiqindilarning yangi poligonlarini tashkil etish va ularni tegishli ravishda jihozlash dasturlariga muvofiq qattiq maishiy chiqindilar bilan ishlashning quyidagilarni nazarda tutuvchi sxemalarini ishlab chiqish:
‎1) axlat to‘plash maydonchalari va konteynerlarni joylashtirish;
‎2) yangidan tashkil etiladigan poligonlarni joylashtirish;
‎3) quyidagilarda:
‎tuman markazlarida, tuman markazidan 25 kilometrgacha radiusda joylashgan shahar posyolkalari va qishloq aholi punktlarida, bir haftada kamida ikki marta;
‎tuman markazidan 25 kilometrdan 80 kilometrgacha masofadagi qishloq aholi punktlarida — bir haftada kamida bir marta aholi punktlari hududlarini izchil qamrab olish va maxsus avtotransport harakatlanishi yo‘nalishlari hisobga olingan holda shaharlarda sanitariya jihatidan tozalash bo‘yicha ixtisoslashtirilgan tashkilotlar tomonidan va tumanlarda obodonlashtirish boshqarmalari tomonidan tuzilgan qattiq maishiy chiqindilarni tashib ketishning kundalik reja- jadvalini tuzish.
‎Yaqin joylashgan qishloq aholi punktlarida, biroq tuman markazidan 80 kilometrdan ortiq uzoqlikda yashaydigan aholiga xizmat ko‘rsatish uchun ayrim tumanlarda (asosan Qoraqalpog‘iston Respublikasi, Navoiy, Qashqadaryo, Jizzax va Toshkent viloyatlarida) tuman obodonlashtirish boshqarmalarining qattiq maishiy chiqindilar filiallarga biriktirilgan hududlarga tashib ketilishini ta’minlaydigan filiallari tashkil etiladi.

Quyidagilarni ta’minlash:
‎axlat to‘plash maydonchalari va qattiq maishiy chiqindilar poligonlari uchun yer ajratish;
‎poligonlar uchun tegishli sanitariya-ekologiya xulosalarini va kadastr hujjatlarini rasmiylashtirish;
‎tegishli texnik talablarga javob beradigan maxsus avtotransport vositalarini saqlash joylarini (garajlarni) tashkil etish (transport vositalari uchun yopiq to‘xtash joylari, haydovchilarni har kuni ko‘rikdan o‘tkazish uchun tibbiyot punktlari, transportni texnik ko‘rikdan o‘tkazish, qo‘riqlash joylari, ta’mirlash ustaxonalari);
‎sanitariya jihatidan tozalash bo‘yicha ixtisoslashtirilgan tashkilotlarining sanitariya jihatidan tozalash xizmati va obodonlashtirish boshqarmalarining xodimlarini maxsus kiyim-bosh (rasmiy kiyim) bilan ta’minlash.

Quyidagi hisob-kitoblardan kelib chiqib qo‘shimcha axlat to‘plash shoxobchalari qurish:
‎shaharlarda — 5 ta ko‘p kvartirali uy uchun 1 ta axlat to‘plash shoxobchasi, har bir punktni 4 ta konteyner bilan jihozlagan holda (hisoblab chiqilgani bo‘yicha 1480 ta axlat to‘plash shoxobchasi, 8389 ta konteyner);
‎tuman markazlarida — 5 ta ko‘p kvartirali uy uchun bitta axlat to‘plash shoxobchasi, har bir punktni 2 ta konteyner bilan jihozlagan holda (hisoblab chiqilgani bo‘yicha 2044 ta axlat to‘plash shoxobchasi, 4088 ta konteyner);
‎shahar posyolkalari va qishloq aholi punktlarida — 100 ta uy xo‘jaligiga bitta axlat to‘plash shoxobchasi (hisoblab chiqilgani bo‘yicha 49268 ta axlat to‘plash shoxobchasi).

Ishlab turgan qattiq maishiy chiqindilar poligonlarini:
‎145,5 ming p.m uzunlikdagi perimetr bo‘yicha atrofini o‘rash;
‎ularni buldozerlar, avtoyuklagichlar, ag‘darma mashinalar (469 ta) va avtotarozilar (175 ta) bilan jihozlash.

Qattiq maishiy chiqindilarning yangi poligonlarini qurish:
‎Buxoro shahri ehtiyojlari uchun 10 ga maydonda 1 ta poligon;
‎Andijon, Buloqboshi, Zafarobod, Yangiobod, Muborak, Namangan, Oqoltin, Xovos, Bo‘stonliq, Oqqo‘rg‘on, Ohangaron, Chinoz, Qo‘shtepa, Toshloq, Uchko‘prik va Hazorasp tumanlari ehtiyojlari uchun har birining maydoni 2 ga bo‘lgan 16 ta poligon;
‎tuman markazlaridan (80 kilometrdan 300 kilometrgacha) va qattiq maishiy chiqindilarni ko‘mish poligonlaridan (40 kilometrdan ortiq) ancha yiroq masofada joylashgan qishloq aholi punktlarida sanitariya qoidalari va normalari yo‘l qo‘yadigan minimal masofada (0,5 — 1,0 km) 0,5-1 ga maydonli 107 ta mini-poligon (1-ilova*);
‎tashkil etilayotgan yangi poligonlarning 30,5 ming p.m uzunlikda perimetr bo‘yicha atrofini o‘rash; shaharlar va tumanlar ehtiyojlari uchun tashkil etilayotgan yangi poligonlarni buldozerlar, avtoyuklagichlar va ag‘darma mashinalar (51 ta) va avtotarozilar bilan jihozlash.

Buxoro shahrida (Buxoro viloyati) va Buloqboshi (Andijon viloyati), Bo‘stonliq va Ohangaron (Toshkent viloyati) tumanlarida qattiq maishiy chiqindilarning to‘lgan poligonlarini to‘liq yopish.

Qattiq maishiy chiqindilarning egasiz poligonlarini tuman obodonlashtirish boshqarmalariga berish (2-ilova*).

Qattiq maishiy chiqindilarni sortlarga ajratish va qayta ishlash bo‘yicha tijorat tuzilmalarini tashkil etishni, ular o‘rtasida kooperatsiya aloqalari o‘rnatilishini nazarda tutuvchi transportda tashish xarajatlarini qisqartirish maqsadida qattiq maishiy chiqindilarni, keyinchalik chiqitsiz qayta ishlashni hisobga olgan holda, sortlarga ajratish va utilizatsiya qilish bo‘yicha kompleks tadbirlarni ishlab chiqish.

Sanitariya jihatidan tozalash bo‘yicha ixtisoslashtirilgan tashkilotlar, obodonlashtirish boshqarmalarining xo‘jalik hisobidagi uchastkalari va poligonlar foydalanishga topshirilishiga qarab qo‘shimcha ish o‘rinlari tashkil etish (boshqaruv va ishlab chiqarish xodimlari: uchastkalar boshliqlari, operatorlar, mexaniklar, chilangar-ta’mirlovchilar, haydovchilar, yuk ortuvchilar va shu kabilar) (hisoblab chiqilgani bo‘yicha 4 853 nafar).

Sanitariya jihatidan tozalash bo‘yicha ixtisoslashtirilgan tashkilotlarni va obodonlashtirish boshqarmalari xizmatlaridan foydalanuvchi jismoniy va yuridik shaxslarni quyidagi bosqichlarda yalpi xatlovdan o‘tkazish:

1-bosqich. Qarorga 9-10-ilovalarga muvofiq tegishli mutaxassislar tarkibida viloyat hokimining alohida qarori asosida ishchi guruhlar tashkil etish.

2-bosqich. Qattiq maishiy chiqindilarni tashib ketish xizmatlaridan amalda foydalanuvchi aholi sonini aniqlash.

3-bosqich. Xatlov natijasida aniqlangan aholi sonini shahar va tuman ichki ishlar boshqarmalarining fuqarolarning kirishi-chiqishi va rasmiylashtirish bo‘limlari, fuqarolarning o‘zini o‘zi boshqarish organlari, statistika boshqarmalari, oilaviy poliklinikalar hamda suv, issiqlik, gaz va elektr ta’minoti bo‘yicha kommunal xizmat ko‘rsatish korxonalarining ma’lumotlari bilan taqqoslash.

4-bosqich. Shahardagi mavjud yuridik shaxslarni xatlovdan o‘tkazish va xatlov natijasida olingan ma’lumotlarni statistika boshqarmalari va soliq organlarining ma’lumotlari bilan taqqoslash.

5-bosqich. Sanitariya jihatidan tozalash bo‘yicha ixtisoslashtirilgan korxonalar va obodonlashtirish boshqarmalarining xatlov natijasida aniqlangan iste’molchilar bilan shartnomalar tuzishi.

6-bosqich. Sanitariya jihatidan tozalash bo‘yicha tashkilotlarning abonent bazasini shakllantirish.

Shartnomaviy-huquqiy ishlarni takomillashtirish:
‎jismoniy va yuridik shaxslar uchun sanitariya jihatidan tozalash bo‘yicha xizmatlar ko‘rsatish uchun namunaviy shartnomani ishlab chiqish;
‎mavjud qarzdorlikni fuqarolik sudlari va xo‘jalik sudlari orqali undirib olish yuzasidan zarur chora-tadbirlar ko‘rish.

“Billing” kompyuterlashtirilgan dasturini joriy etish yo‘li bilan sanitariya jihatidan tozalash bo‘yicha ixtisoslashtirilgan tashkilotlar va obodonlashtirish boshqarmalarining xo‘jalik hisobidagi bo‘linmalari tomonidan ko‘rsatiladigan xizmatlar hajmini va ularning abonentlarini hisobga olish tizimini avtomatlashtirish.

Maxsus avtotransport vositalarini “GPS” uzoqda turib nazorat qilishning avtomatlashtirilgan tizimi bilan jihozlash hisobiga ulardan samarali foydalanishni ta’minlash.

Sanitariya jihatidan tozalash bo‘yicha ixtisoslashtirilgan tashkilotlar va obodonlashtirish boshqarmalarining xo‘jalik hisobidagi bo‘linmalari tomonidan qo‘llaniladigan amaldagi tariflarning iqtisodiy asoslanganligini o‘rganish va o‘rganib chiqish yakunlari bo‘yicha tuman (shahar) hokimliklari tomonidan qattiq maishiy chiqindilarni tashib ketish xizmatlariga tariflarning yangi darajalarini tasdiqlash to‘g‘risida takliflar kiritish.

Obodonlashtirish boshqarmalarining xo‘jalik hisobidagi bo‘linmalari uchun G‘aznachilikning hududiy bo‘linmalarida alohida shaxsiy hisob raqamlari ochish. Obodonlashtirish boshqarmalarining xo‘jalik hisobidagi bo‘linmalari tomonidan daromad va xarajatning alohida hisobi yuritilishini, yuqori moliya organiga hisobotlar topshirilishini ta’minlash.

Obodonlashtirish boshqarmalarining sanitariya jihatidan tozalash bo‘linmalari uchun xodimlarning maqbul sonini aniqlash va shtat jadvalini belgilangan tartibda kelishish.

Sanitariya jihatidan tozalash bo‘yicha ixtisoslashtirilgan tashkilotlar va obodonlashtirish boshqarmalarining xo‘jalik hisobidagi bo‘linmalari tomonidan abonentlar to‘liq qamrab olinishi, daromadlar tushishi to‘liqligi, debitorlik-kreditorlik qarzlarning holati, hisob va hisobot yuritilishi ustidan doimiy ravishda monitoring olib borish.

IV. Qattiq maishiy chiqindilarni tashib ketishning tashkil etilishini nazorat qilish va monitoringini olib borish

Quyidagilar yo‘li bilan chiqindilar bilan ishlash masalalarida aholining huquqiy va sanitariya-ekologik savodxonligini oshirish maqsadida aholi o‘rtasida keng ko‘lamli tushuntirish ishlarini tashkil etish:
‎chiqindilarni to‘g‘ri to‘plash va tashib ketishning sanitariya-ekologik ahamiyatini ommaviy axborot vositalari orqali keng yoritish;
‎sanitariya jihatidan tozalash hamma joyda tashkil etilishini ommaviylashtiruvchi radioeshittirishlar va teleko‘rsatuvlarni, respublika matbuotida va mahalliy matbuotda maqolalar e’lon qilinishini muntazam ravishda tashkil etish;
‎sanitariya jihatidan tozalash tashkilotlariga reklama roliklarini joylashtirish uchun imtiyozli efir daqiqalarini belgilangan tartibda berish, qattiq maishiy chiqindilarni tashib ketish xizmatlari ko‘rsatish tartibi va qoidalarini namoy�sh qilish.

Qattiq maishiy chiqindilarni tashib ketish va ko‘mib tashlashni tashkil etish va nazorat qilish modeliga (3-ilova) muvofiq har bir shahar va tuman bo‘yicha aholi punktlarini sanitariya jihatidan tozalashni tashkil etish tadbirlari rejasini ishlab chiqish.

Mintaqalarda sanitariya jihatidan tozalashni tashkil etish masalalari bo‘yicha Qoraqalpog‘iston Respublikasi Vazirlar Kengashi Raisining va viloyatlar hokimlari o‘rinbosarlarining, O‘zbekiston Respublikasi Tabiatni muhofaza qilish davlat qo‘mitasi, Davlat statistika qo‘mitasi, Sog‘liqni saqlash vazirligi va “O‘zavtosanoat” AK rahbarlarining hisobotlarini O‘zbekiston Respublikasi Vazirlar Mahkamasi Prezidiumi majlislarida ko‘rib chiqish.