Ushbu Qonunning maqsadi tadbirkorlik faoliyati sohasidagi ruxsat berish tartib-taomillariga doir munosabatlarni tartibga solishdan iborat.

Tadbirkorlik faoliyati sohasidagi ruxsat berish tartib-taomillari toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Ushbu Qonunning amal qilishi tadbirkorlik faoliyati sohasidagi ruxsat berish tartib-taomillarining quyidagi turlariga nisbatan tatbiq etilmaydi:

tadbirkorlik subyektlarini, bitimlarni, huquqlarni va mol-mulkni davlat roʻyxatidan oʻtkazish hamda hisobga qoʻyish;

faoliyatning ayrim turlarini litsenziyalash;

akkreditatsiya qilish, sertifikatlashtirish, standartlashtirish, metrologiya va texnik jihatdan tartibga solish;

davlat ekologik ekspertizasi;

davlat sirlari muomalasi.

Agar Oʻzbekiston Respublikasining xalqaro shartnomasida Oʻzbekiston Respublikasining tadbirkorlik faoliyati sohasidagi ruxsat berish tartib-taomillari toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Ushbu Qonunda quyidagi asosiy tushunchalar qoʻllaniladi:

vakolatli organlar — qonunchilik hujjatlari bilan zimmasiga tadbirkorlik subyektlariga ruxsat etish xususiyatiga ega hujjatlarni berish vazifasi yuklatilgan davlat organlari va boshqa tashkilotlar;

ruxsat berishga doir talablar va shartlar — ruxsat etish xususiyatiga ega hujjat asosida harakatni bajarish va (yoki) muayyan faoliyatni amalga oshirishda tadbirkorlik subyekti tomonidan bajarilishi shart boʻlgan, qonunchilikda belgilangan talablar va shartlar yigʻindisi;

ruxsat etish xususiyatiga ega hujjat — vakolatli organ tomonidan qabul qilinadigan va tadbirkorlik subyektiga beriladigan, tadbirkorlik faoliyati sohasida harakatlarni bajarish va (yoki) muayyan faoliyatni amalga oshirish huquqini beradigan hamda ruxsatnoma, kelishuv, xulosa shaklida, shuningdek qonunchilikda nazarda tutilgan boshqa shakllarda ifodalanadigan qaror;

tadbirkorlik faoliyati sohasidagi ruxsat berish tartib-taomili (ruxsat berish tartib-taomili) — harakatlarni bajarish va (yoki) muayyan faoliyatni amalga oshirish uchun ruxsat etish xususiyatiga ega hujjatni berish toʻgʻrisidagi arizaning topshirilishi va koʻrib chiqilishi, ruxsat etish xususiyatiga ega hujjatning berilishi, amal qilish muddatining uzaytirilishi, toʻxtatib turilishi, qayta tiklanishi, tugatilishi, qayta rasmiylashtirilishi va bekor qilinishi jarayoni bilan bogʻliq tadbirlar majmui.

Bajarilishi va (yoki) amalga oshirilishi uchun ruxsat berish tartib-taomillaridan oʻtish zarur boʻlgan harakatlar va (yoki) faoliyat jumlasiga tadbirkorlik subyektlarining bajarilishi va (yoki) amalga oshirilishi tadbirkorlik subyektlarining huquqlariga va qonuniy manfaatlariga, fuqarolarning hayoti va sogʻligʻiga, jamoat xavfsizligiga ziyon hamda atrof-muhitga zarar yetkazilishiga sabab boʻlishi mumkin boʻlgan, tartibga solinishi ruxsat berish tartib-taomillaridan tashqari boshqa usullar bilan amalga oshirilishi mumkin boʻlmaydigan harakatlari va (yoki) faoliyati kiritilishi mumkin.

Tadbirkorlik faoliyati sohasidagi ruxsat berish tartib-taomillari qonunchiligida belgilanadi. Ruxsat berish tartib-taomillarining qonunda nazarda tutilmagan yangi turlarini joriy etish taqiqlanadi.

Ruxsat berish tartib-taomillarining asosiy prinsiplari quyidagilardir:

tadbirkorlik subyektlarining huquqlari va qonuniy manfaatlari, fuqarolarning hayoti va sogʻligʻi himoya qilinishining, jamoat xavfsizligining hamda atrof-muhit muhofaza qilinishining taʼminlanishi;

raqobatni cheklaydigan ruxsat berish tartib-taomillari belgilanishiga yoʻl qoʻyilmasligi;

ruxsat berish tartib-taomillarining oshkoraligi, ochiqligi va tushunarliligi;

ruxsat etish xususiyatiga ega hujjatlarning “bir darcha” orqali berilishi;

ruxsat etish xususiyatiga ega hujjatlarni berish tartibiga doir talablarning yagonaligi;

tadbirkorlik subyektlari huquqlarining ustuvorligi.

Ruxsat berish tartib-taomillari tadbirkorlik subyektlarining huquqlari va qonuniy manfaatlari, fuqarolarning hayoti va sogʻligʻi himoya qilinishini, jamoat xavfsizligini hamda atrof-muhit muhofaza qilinishini taʼminlashi kerak.

Ruxsat berish tartib-taomillari tadbirkorlik subyektlari harakatlarni bajarganda va (yoki) muayyan faoliyatni amalga oshirganda ular uchun tovarlar (ishlar, xizmatlar) bozoridagi raqobatni cheklaydigan imtiyozlar va afzalliklar belgilamasligi kerak.

Ruxsat berish tartib-taomillari tadbirkorlik subyektlari uchun oshkora, ochiq va tushunarli boʻlishi kerak.

Vakolatli organ tadbirkorlik subyektiga ruxsat etish xususiyatiga ega hujjatni berishi uchun boshqa vakolatli organlar tomonidan beriladigan ruxsat etish xususiyatiga ega hujjatlarni olishi talab qilingan hollarda, ruxsat etish xususiyatiga ega hujjatlarni berish soddalashtirilgan tartibda “bir darcha” orqali amalga oshiriladi, bunda vakolatli organ mazkur hujjatlarni tadbirkorlik subyektining ishtirokisiz mustaqil ravishda oladi.

Ruxsat etish xususiyatiga ega hujjatlarni berish tartibiga doir talablar Oʻzbekiston Respublikasining butun hududida barcha vakolatli organlar va tadbirkorlik subyektlariga nisbatan yagonadir.

Tadbirkorlik subyektlarining vakolatli organlar bilan oʻzaro munosabatlarida tadbirkorlik subyektlari huquqlarining ustuvorligi prinsipi amal qiladi, unga muvofiq ruxsat berish tartib-taomillari toʻgʻrisidagi qonunchiligidagi barcha bartaraf etib boʻlmaydigan ziddiyatlar va noaniqliklar tadbirkorlik subyektlarining foydasiga talqin qilinadi.

Oʻzbekiston Respublikasi Vazirlar Mahkamasi:

vakolatli organlarning ruxsat berish tartib-taomillariga doir faoliyatini muvofiqlashtirib boradi;

ruxsat berish tartib-taomillaridan oʻtish tartibi toʻgʻrisidagi nizomlarni tasdiqlaydi;

vakolatli organlar tomonidan berilgan ruxsat etish xususiyatiga ega hujjatlarning reyestrlarini yuritish tartibini belgilaydi;

ruxsat berish tartib-taomillari toʻgʻrisidagi qonunchilikning ijro etilishi ustidan nazoratni amalga oshiradi.

Oʻzbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

Vakolatli organlar:

tadbirkorlik subyektlarining ruxsat etish xususiyatiga ega hujjatni berish, amal qilish muddatini uzaytirish, toʻxtatib turish, qayta tiklash, tugatish, qayta rasmiylashtirish va bekor qilish toʻgʻrisidagi arizalarini qabul qiladi hamda koʻrib chiqadi;

ushbu Qonun talablariga va ruxsat berish tartib-taomillaridan oʻtish tartibi toʻgʻrisidagi nizomlarga muvofiq belgilangan muddatlarda ruxsat etish xususiyatiga ega hujjatni beradi yoki uni berishni asosli ravishda rad etadi;

berilgan ruxsat etish xususiyatiga ega hujjatlarning reyestrini yuritadi va uni oʻz rasmiy veb-saytlarida joylashtiradi;

ruxsat berish tartib-taomillari masalalari yuzasidan tadbirkorlik subyektlarining ogʻzaki yoki yozma, shu jumladan elektron hujjat tarzida yuborilgan soʻroviga koʻra bepul toʻliq axborot va malakali maslahatlar (tushuntirishlar) beradi;

tadbirkorlik subyektlari ruxsat berish tartib-taomillaridan oʻtish tartibi toʻgʻrisidagi nizomlar bilan moneliksiz tanishib chiqishi va ruxsat etish xususiyatiga ega hujjatlarni olish uchun zarur boʻlgan hujjatlar moneliksiz taqdim etilishi uchun shart-sharoitlar yaratadi;

ruxsat etish xususiyatiga ega hujjatni olish uchun zarur boʻlgan hujjatlarni tayyorlash va toʻldirishda tadbirkorlik subyektlariga yordam beradi;

tadbirkorlik subyektlarini va ularning arizalarini butun ish kuni davomida qabul qilish imkoniyatini beradigan ish vaqti rejimini taʼminlaydi;

ruxsat etish xususiyatiga ega hujjatlarni olish uchun zarur boʻlgan maʼlumotlarni oʻz rasmiy veb-saytlarida joylashtiradi;

ruxsat etish xususiyatiga ega hujjatlarni “bir darcha” orqali beradi;

ushbu Qonunning 22, 23 va 25-moddalarida nazarda tutilgan hollarda, ruxsat etish xususiyatiga ega hujjatlarning amal qilishini toʻxtatib turish, tugatish hamda ularni bekor qilish toʻgʻrisida qarorlar qabul qiladi va (yoki) mazkur masalalarni sud tartibida koʻrib chiqish tashabbusi bilan chiqadi.

Vakolatli organlar qonunchilikka muvofiq boshqa vakolatlarni ham amalga oshirishi mumkin.

Ruxsat etish xususiyatiga ega hujjatni olish uchun tadbirkorlik subyekti tegishli vakolatli organga quyidagilarni taqdim etadi:

yuridik shaxs boʻlgan tadbirkorlik subyektining nomi, joylashgan yeri (pochta manzili) va tashkiliy-huquqiy shakli; jismoniy shaxs boʻlgan tadbirkorlik subyekti uchun — familiyasi, ismi, otasining ismi, fuqaroning shaxsini tasdiqlovchi hujjat maʼlumotlari, tadbirkorlik subyekti bajarmoqchi yoki amalga oshirmoqchi boʻlgan harakat va (yoki) muayyan faoliyat koʻrsatilgan holda ruxsat etish xususiyatiga ega hujjatni berish toʻgʻrisidagi ariza;

ruxsat berish tartib-taomillaridan oʻtish tartibi toʻgʻrisidagi nizomlarda belgilangan boshqa hujjatlar. Ruxsat berish tartib-taomillaridan oʻtish tartibi toʻgʻrisidagi nizomlarda ruxsat etish xususiyatiga ega hujjatni olish uchun zarur boʻlgan hujjatlar sifatida faqat tadbirkorlik subyektining harakatni bajarish va (yoki) muayyan faoliyatni amalga oshirish imkoniyatini tasdiqlash bilan bevosita bogʻliq boʻlgan, shuningdek mavjud boʻlmasligi harakatni bajarish va (yoki) muayyan faoliyatni amalga oshirish chogʻida tadbirkorlik subyektlarining huquqlari va qonuniy manfaatlariga, fuqarolarning hayoti va sogʻligʻiga, jamoat xavfsizligiga ziyon hamda atrof-muhitga zarar yetkazilishiga sabab boʻlishi mumkin boʻlgan hujjatlar belgilanishi mumkin.

Ruxsat etish xususiyatiga ega hujjat berish toʻgʻrisidagi arizada tadbirkorlik subyektining elektron manzili koʻrsatilishi mumkin. Ruxsat etish xususiyatiga ega hujjat berish toʻgʻrisidagi arizada tadbirkorlik subyektining elektron manzili koʻrsatilganligi uning oʻz arizasi boʻyicha qabul qilingan qaror toʻgʻrisidagi xabarni axborot tizimi orqali elektron shaklda olishga boʻlgan roziligidir.

Tadbirkorlik subyektlari tomonidan taqdim etilgan ruxsat etish xususiyatiga ega hujjatni olish uchun zarur boʻlgan hujjatlar, vakolatli organ aksini isbotlaguniga qadar, barcha hollarda toʻgʻri hisoblanadi.

Tadbirkorlik subyektidan ushbu moddada va ruxsat berish tartib-taomillaridan oʻtish tartibi toʻgʻrisidagi nizomlarda nazarda tutilmagan hujjatlarni taqdim etishni talab qilishga yoʻl qoʻyilmaydi.

Ruxsat etish xususiyatiga ega hujjatni olish uchun zarur boʻlgan hujjatlar tadbirkorlik subyekti tomonidan vakolatli organga bevosita, pochta aloqasi vositalari orqali yoki elektron shaklda, ular olinganligi haqida xabardor qilingan holda taqdim etiladi. Elektron shaklda taqdim etilgan hujjatlar tadbirkorlik subyektining elektron raqamli imzosi bilan tasdiqlanadi.

Ruxsat etish xususiyatiga ega hujjatni olish uchun tegishli vakolatli organga taqdim etilgan hujjatlar roʻyxat boʻyicha qabul qilinib, roʻyxat mazkur organ tomonidan hujjatlar qabul qilingan sana toʻgʻrisida belgi qoʻyilgan holda, darhol tadbirkorlik subyektiga beriladi (yuboriladi).

Ruxsat etish xususiyatiga ega hujjatning amal qilish muddati, qoida tariqasida, cheklanmaydi.

Ruxsat etish xususiyatiga ega tegishli hujjat harakatni bajarish va (yoki) muayyan faoliyatni amalga oshirish xususiyati va shartlarini hisobga olgan holda cheklanmagan muddatga berilishi mumkin boʻlmagan hollarda, ruxsat berish tartib-taomillaridan oʻtish tartibi toʻgʻrisidagi nizomlarda ruxsat etish xususiyatiga ega ayrim hujjatlarga nisbatan amal qilish muddatlari belgilab qoʻyilishi mumkin.

Ruxsat etish xususiyatiga ega hujjatning amal qilish muddati tugagach, u tadbirkorlik subyektining arizasiga koʻra uzaytirilishi mumkin. Ruxsat etish xususiyatiga ega hujjatning amal qilish muddatini uzaytirish haqidagi ariza vakolatli organga mazkur hujjatning amal qilish muddati tugaguniga qadar topshirilishi kerak. Ruxsat etish xususiyatiga ega hujjatning amal qilish muddatini uzaytirish ruxsat etish xususiyatiga ega hujjatni berish uchun nazarda tutilgan tartibda amalga oshiriladi.

Agar ruxsat etish xususiyatiga ega hujjatni berish tanlov (tender) asosida amalga oshirilayotgan boʻlsa, ruxsat berishga doir talablar va shartlarga tegishli ravishda rioya etgan tadbirkorlik subyekti mazkur hujjatning amal qilish muddatini uzaytirishda ustuvor huquqqa ega boʻladi.

Ruxsat berish tartib-taomillaridan oʻtish tartibi toʻgʻrisidagi nizomlar Oʻzbekiston Respublikasi Vazirlar Mahkamasi tomonidan tasdiqlanadi.

Ruxsat berish tartib-taomillaridan oʻtish tartibi toʻgʻrisidagi nizomlarda quyidagilar koʻrsatilishi kerak:

ruxsat etish xususiyatiga ega hujjatning va uni berish zimmasiga yuklatilgan vakolatli organning nomi;

ruxsat etish xususiyatiga ega hujjatni berish maqsadi;

ruxsat etish xususiyatiga ega hujjatni olish uchun taqdim etiladigan hujjatlarning tugal roʻyxati;

tadbirkorlik subyektining ruxsat etish xususiyatiga ega hujjatni berish toʻgʻrisidagi arizasini koʻrib chiqish, hujjatni berish yoki uni berishni rad etish tartibi va muddatlari, shu jumladan, agar ruxsat etish xususiyatiga ega hujjatni berish tanlov (tender) asosida amalga oshirilayotgan boʻlsa, mazkur hujjatni berish uchun tanlov (tender) oʻtkazish tartibi;

ruxsat berishga doir talablar va shartlar;

ruxsat etish xususiyatiga ega zarur hujjatlarni “bir darcha” orqali berishda vakolatli organlarning boshqa vakolatli organlar bilan oʻzaro hamkorligi tartibi;

ruxsat etish xususiyatiga ega hujjatning amal qilish muddatini uzaytirish, toʻxtatib turish, qayta tiklash, tugatish, mazkur hujjatni qayta rasmiylashtirish va bekor qilish tartibi;

agar tadbirkorlik subyekti tomonidan harakatlarni bajarish va (yoki) muayyan faoliyatni amalga oshirish imkoniyatini aniqlash uchun zarur boʻlsa, ruxsat berish tartib-taomili doirasida vakolatli organ yoki jalb qilingan uchinchi shaxs tomonidan oʻtkaziladigan oʻrganishlar, tadqiqotlar, tekshirishlarning yoki boshqa ilmiy va texnik baholashlarning tugal roʻyxati;

ruxsat etish xususiyatiga ega hujjatning shakli;

ruxsat etish xususiyatiga ega tegishli hujjat cheklanmagan muddatga berilishi mumkin boʻlmagan hollarda, ruxsat etish xususiyatiga ega hujjatning amal qilish muddati.

Ruxsat berish tartib-taomillaridan oʻtish tartibi toʻgʻrisidagi nizomlarda ushbu Qonunga muvofiq boshqa normalar ham koʻrsatilishi mumkin.

Oʻzbekiston Respublikasi Vazirlar Mahkamasi ruxsat berish tartib-taomillaridan oʻtishning soddalashtirilgan tartibini belgilashi mumkin.

Tadbirkorlik subyektining ruxsat etish xususiyatiga ega hujjatni berish toʻgʻrisidagi arizasi vakolatli organ tomonidan koʻrib chiqilganligi uchun yigʻim ruxsat berish tartib-taomillaridan oʻtish tartibi toʻgʻrisidagi nizomlarda belgilangan hollarda va miqdorlarda undiriladi. Yigʻim miqdori vakolatli organning ruxsat etish xususiyatiga ega hujjatni berish toʻgʻrisidagi arizani koʻrib chiqish uchun qilgan xarajatlari doirasida belgilanadi.

Ruxsat etish xususiyatiga ega hujjatni berganlik va uning amal qilish muddatini uzaytirganlik uchun yigʻim ruxsat berish tartib-taomillaridan oʻtish tartibi toʻgʻrisidagi nizomlarda belgilangan hollarda va miqdorlarda undiriladi.

Tadbirkorlik subyektining ruxsat etish xususiyatiga ega hujjatni berish toʻgʻrisidagi arizasini koʻrib chiqqanlik, hujjatni berganlik yoki uning amal qilish muddatini uzaytirganlik uchun yigʻim summalari vakolatli organlarning hisobvaragʻiga oʻtkaziladi.

Tadbirkorlik subyekti ruxsat etish xususiyatiga ega hujjatni berish toʻgʻrisida taqdim etgan arizasidan voz kechgan taqdirda, toʻlangan yigʻim summasi qaytarilmaydi.

Tadbirkorlik subyektining ruxsat etish xususiyatiga ega hujjatni berish toʻgʻrisidagi arizasini vakolatli organ tomonidan koʻrib chiqish, uni berish yoki berishni rad etish muddatlari ruxsat berish tartib-taomillaridan oʻtish tartibi toʻgʻrisidagi nizomlarda belgilab qoʻyiladi va tadbirkorlik subyektining arizasi barcha zarur hujjatlar bilan qabul qilib olingan sanadan eʼtiboran, shu jumladan ruxsat etish xususiyatiga ega zarur hujjatlar “bir darcha” orqali beriladigan hollarda oʻttiz ish kunidan oshmasligi kerak.

Oʻzbekiston Respublikasi Vazirlar Mahkamasi ayrim harakatlar va (yoki) muayyan faoliyat uchun ularning oʻziga xos xususiyatlarini hisobga olgan holda tadbirkorlik subyektining ruxsat etish xususiyatiga ega hujjatni berish toʻgʻrisidagi arizasini vakolatli organ tomonidan koʻrib chiqish, uni berish yoki berishni rad etish muddatlarini oʻttiz ish kunidan ortiq qilib belgilashi mumkin.

Vakolatli organ tegishli qaror qabul qilingan sanadan eʼtiboran bir ish kunidan kechiktirmay tadbirkorlik subyektiga ruxsat etish xususiyatiga ega hujjatni berishi (yuborishi) yoki bunday hujjatni berish rad etilganligi toʻgʻrisida uni yozma shaklda, shu jumladan axborot tizimi orqali elektron shaklda xabardor qilishi shart.

Agar vakolatli organ tadbirkorlik subyektining ruxsat etish xususiyatiga ega hujjatni berish toʻgʻrisidagi arizasini koʻrib chiqish, uni berish yoki berishni rad etish muddati mobaynida tadbirkorlik subyektiga ruxsat etish xususiyatiga ega hujjatni bermasa yoki uni berishni rad etmasa, tadbirkorlik subyekti ushbu moddaning birinchi qismida nazarda tutilgan muddat oʻtganidan keyin, bajarilishi va (yoki) amalga oshirilishi uchun ruxsat etish xususiyatiga ega hujjat olmoqchi boʻlgan harakatni bajarish va (yoki) muayyan faoliyatni amalga oshirish huquqiga, bu haqda vakolatli organni yozma ravishda xabardor qilgan holda, ega boʻladi, ushbu moddaning ikkinchi qismida nazarda tutilgan hollar va ruxsat berish tartib-taomillaridan oʻtish tartibi toʻgʻrisidagi nizomlarda belgilangan boshqa hollar bundan mustasno.

Ushbu moddaning toʻrtinchi qismida nazarda tutilgan holda vakolatli organ tadbirkorlik subyektining xabarnomasi olingandan keyin besh ish kuni ichida unga ruxsat etish xususiyatiga ega hujjatni berishi shart. Ruxsat etish xususiyatiga ega hujjat olinguniga qadar, taqdim etilgan hujjatlarning ular qabul qilib olingan sana haqida belgi qoʻyilgan roʻyxati va tadbirkorlik subyekti tomonidan vakolatli organga yoʻllangan xabarnoma ruxsat etish xususiyatiga ega hujjatga tenglashtiriladi hamda shunday harakatni bajarish va (yoki) shunday faoliyatni amalga oshirish uchun asos boʻladi. Bunda shaxs faoliyat bilan ruxsat etish xususiyatiga ega hujjatsiz shugʻullanganlik uchun javobgarlikka tortilishi mumkin emas.

Ruxsat berish tartib-taomillaridan oʻtish tartibi toʻgʻrisidagi nizomlarda tadbirkorlik subyektlari ushbu Qonun 14-moddasining birinchi qismida nazarda tutilgan hujjatlarni vakolatli organga taqdim etgan paytdan eʼtiboran ular tomonidan harakatlar bajarilganligining va (yoki) muayyan faoliyat amalga oshirilganligining xabardor qilish tartibi nazarda tutilishi mumkin. Bunday holda taqdim etilgan hujjatlarning ular qabul qilib olingan sana haqida belgi qoʻyilgan roʻyxati ruxsat etish xususiyatiga ega hujjatga tenglashtiriladi.

Ruxsat etish xususiyatiga ega hujjatni berishni rad etish uchun quyidagilar asos boʻladi:

ruxsat etish xususiyatiga ega hujjat berilishi uchun zarur boʻlgan hujjatlarning tadbirkorlik subyekti tomonidan toʻliq boʻlmagan hajmda taqdim etilganligi;

tadbirkorlik subyektining ruxsat berishga doir talablar va shartlarga muvofiq emasligi;

tadbirkorlik subyekti tomonidan taqdim etilgan hujjatlarda notoʻgʻri yoki buzib koʻrsatilgan maʼlumotlarning mavjudligi;

ruxsat berish tartib-taomillaridan oʻtish tartibi toʻgʻrisidagi nizomlarga muvofiq oʻtkazilishi shart boʻlgan oʻrganishlar, tadqiqotlar, tekshirishlar yoki boshqa ilmiy va texnik baholashlarning yakunlari boʻyicha asoslantirilgan salbiy xulosa olinganligi.

Ruxsat etish xususiyatiga ega hujjatni berishni boshqa asoslarga koʻra, shu jumladan maqsadga muvofiq emas degan vajlar bilan rad etishga yoʻl qoʻyilmaydi.

Ruxsat etish xususiyatiga ega hujjatni berish rad etilganligi haqidagi xabarnoma tadbirkorlik subyektiga rad etish sabablari, qonunchilikning aniq normalari va tadbirkorlik subyekti mazkur sabablarni bartaraf etib, hujjatlarni takroran koʻrib chiqish uchun taqdim etishi mumkin boʻlgan muddat koʻrsatilgan holda yozma shaklda, shu jumladan axborot tizimi orqali elektron shaklda yuboriladi (topshiriladi). Tadbirkorlik subyekti rad etish sabablarini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat ruxsat etish xususiyatiga ega hujjatni berish rad etilganligi haqidagi yozma yoki elektron xabar olingan kundan eʼtiboran oʻn ish kunidan kam boʻlmasligi kerak.

Tadbirkorlik subyekti ruxsat etish xususiyatiga ega hujjatni berish rad etilishi uchun asos boʻlgan sabablarni belgilangan muddatda bartaraf etgan taqdirda, hujjatlarni takroran koʻrib chiqish, ruxsat etish xususiyatiga ega hujjatni berish yoki uni berishni rad etish tadbirkorlik subyektining rad etish sabablari bartaraf etilganligi toʻgʻrisidagi arizasi va rad etish sabablari bartaraf etilganligini tasdiqlovchi tegishli hujjatlar olingan kundan eʼtiboran oʻn ish kunidan koʻp boʻlmagan muddatda vakolatli organ tomonidan amalga oshiriladi. Tadbirkorlik subyektining arizasi takroran koʻrib chiqilganligi uchun yigʻim undirilmaydi.

Hujjatlarni takroran koʻrib chiqishda vakolatli organ tomonidan ariza beruvchiga ilgari yozma shaklda, shu jumladan axborot tizimi orqali elektron shaklda bayon qilinmagan rad etish sabablarini vakolatli organ tomonidan keltirishga yoʻl qoʻyilmaydi, ilgari koʻrsatilgan sabablar bartaraf etilganligini tasdiqlovchi hujjatlar bilan bogʻliq rad etish sabablari keltirilishi bundan mustasno.

Ruxsat etish xususiyatiga ega hujjatni berish rad etilganligi haqidagi xabarnomada koʻrsatilgan muddat oʻtganidan keyin tadbirkorlik subyekti tomonidan topshirilgan ariza yangidan topshirilgan hisoblanadi va vakolatli organ tomonidan umumiy asoslarda koʻrib chiqiladi.

Tadbirkorlik subyekti ruxsat etish xususiyatiga ega hujjatni berish rad etilganligi, shuningdek vakolatli organ mansabdor shaxsining harakati (harakatsizligi) ustidan belgilangan tartibda shikoyat qilish huquqiga ega.

Ruxsat etish xususiyatiga ega hujjat yoʻqolgan yoki yaroqsiz holga kelgan taqdirda tadbirkorlik subyektining arizasiga koʻra uning dublikati beriladi.

Vakolatli organ ariza, shuningdek hujjat yaroqsiz holga kelgan taqdirda, ruxsat etish xususiyatiga ega hujjatning asl nusxasi hamda ruxsat etish xususiyatiga ega hujjatning dublikati berilganligi uchun tadbirkorlik subyekti tomonidan ushbu moddaning uchinchi qismida nazarda tutilgan holda yigʻim toʻlanganligini tasdiqlovchi hujjat olingan kundan eʼtiboran besh ish kunidan koʻp boʻlmagan muddatda ruxsat etish xususiyatiga ega hujjatning dublikatini berishi (yuborishi) shart.

Ruxsat berish tartib-taomillaridan oʻtish tartibi toʻgʻrisidagi nizomlarda belgilangan hollarda, ruxsat etish xususiyatiga ega hujjatning dublikatini berganlik uchun tadbirkorlik subyektining ruxsat etish xususiyatiga ega hujjatni berish toʻgʻrisidagi arizasi vakolatli organ tomonidan koʻrib chiqilganligi uchun, dublikatni berish haqidagi ariza topshirilgan sanadagi holatga koʻra, toʻlanadigan summaning yarmi miqdorida yigʻim undirilishi mumkin. Yigʻim summasi vakolatli organlar hisobvaragʻiga oʻtkaziladi.

Ruxsat etish xususiyatiga ega hujjatning amal qilishi quyidagi hollarda toʻxtatib turilishi mumkin:

ruxsat berishga doir talablar va shartlar tadbirkorlik subyekti tomonidan buzilganligi aniqlanganda;

tadbirkorlik subyekti tomonidan vakolatli organning tadbirkorlik subyekti zimmasiga aniqlangan qoidabuzarliklarni bartaraf etish majburiyatini yuklovchi qarori bajarilmaganda.

Ruxsat etish xususiyatiga ega hujjatning amal qilishini toʻxtatib turish sud tartibida amalga oshiriladi, favqulodda vaziyatlar, epidemiyalar hamda aholining hayoti va sogʻligʻi uchun boshqa haqiqiy xavf yuzaga kelishining oldini olish bilan bogʻliq holda oʻn ish kunidan koʻp boʻlmagan muddatga toʻxtatib turish hollari bundan mustasno.

Vakolatli organning ruxsat etish xususiyatiga ega hujjatning amal qilishini toʻxtatib turish toʻgʻrisidagi qarori tadbirkorlik subyektiga qaror qabul qilingan kundan eʼtiboran bir ish kunidan kechiktirmay, ruxsat etish xususiyatiga ega hujjatning amal qilishini toʻxtatib turish sabablari va qonunchilikning normalari aniq koʻrsatilgan holda, yozma shaklda yetkaziladi.

Sudning ruxsat etish xususiyatiga ega hujjatning amal qilishini toʻxtatib turish toʻgʻrisidagi qarori tadbirkorlik subyektiga qonunchilik belgilangan muddatlarda yetkaziladi.

Vakolatli organ yoki sud ruxsat etish xususiyatiga ega hujjatning amal qilishi toʻxtatib turilishiga sabab boʻlgan holatlarning tadbirkorlik subyekti tomonidan bartaraf qilinishi muddatini belgilashi shart. Ruxsat etish xususiyatiga ega hujjatning amal qilishini toʻxtatib turishga sabab boʻlgan holatlarning tadbirkorlik subyekti tomonidan bartaraf qilinishi muddati tadbirkorlik subyekti ruxsat etish xususiyatiga ega hujjatning amal qilishini toʻxtatib turish toʻgʻrisidagi qarorni olgan kundan eʼtiboran besh ish kunidan kam boʻlmasligi kerak.

Ruxsat etish xususiyatiga ega hujjatning amal qilishini toʻxtatib turishga sabab boʻlgan holatlar tadbirkorlik subyekti tomonidan bartaraf etilgan taqdirda, ruxsat etish xususiyatiga ega hujjatning amal qilishini toʻxtatib turish toʻgʻrisida qaror qabul qilgan vakolatli organ yoki sud koʻrsatilgan holatlar bartaraf etilganligi toʻgʻrisida tasdiqnoma olingan kundan eʼtiboran besh ish kuni ichida ruxsat etish xususiyatiga ega hujjatning amal qilishini qayta tiklash toʻgʻrisida qaror qabul qilishi shart.

Vakolatli organning ruxsat etish xususiyatiga ega hujjatning amal qilishini toʻxtatib turish toʻgʻrisidagi qarori ustidan belgilangan tartibda shikoyat qilinishi mumkin.

Ruxsat etish xususiyatiga ega hujjatning amal qilishini toʻxtatib turish sud tomonidan asossiz deb topilgan taqdirda, vakolatli organ tadbirkorlik subyekti oldida u koʻrgan zarar miqdorida javobgar boʻladi, ruxsat etish xususiyatiga ega hujjatning amal qilishi esa, uning toʻxtatib turilishi sud tomonidan asossiz deb topilgan paytdan eʼtiboran qayta tiklangan hisoblanadi.

Ruxsat etish xususiyatiga ega hujjatning amal qilishi quyidagi hollarda tugatiladi:

tadbirkorlik subyekti ruxsat etish xususiyatiga ega hujjatning amal qilishini tugatish toʻgʻrisida ariza bilan murojaat etganda;

yuridik shaxs boʻlgan tadbirkorlik subyekti tugatilganda — tugatilgan paytdan eʼtiboran yoki uning faoliyati qayta tashkil etish natijasida tugatilganda — qayta tashkil etilgan paytdan eʼtiboran, bundan uning oʻzgartirilishi, shuningdek yangidan vujudga kelgan yuridik shaxsni davlat roʻyxatidan oʻtkazish sanasida qayta tashkil etilayotgan yuridik shaxslarda ayni bir harakatni va (yoki) faoliyatni bajarish va (yoki) amalga oshirish uchun ruxsat etish xususiyatiga ega hujjat mavjud boʻlgan taqdirda qoʻshib yuborilishi mustasno;

jismoniy shaxs boʻlgan tadbirkorlik subyekti davlat roʻyxatidan oʻtkazilganligi toʻgʻrisidagi guvohnomaning amal qilishi tugatilganda;

jismoniy shaxs boʻlgan tadbirkorlik subyekti vafot etganda, uning muomalaga layoqatliligi belgilangan tartibda cheklanganda, u muomalaga layoqatsiz deb topilganda;

tadbirkorlik subyekti ruxsat berishga doir talablar va shartlarni bir yil davomida muntazam ravishda (ikki va undan ortiq marotaba) yoki bir marotaba qoʻpol ravishda buzganda, agar mazkur qoidabuzarliklar tadbirkorlik subyektining huquqlari va qonuniy manfaatlariga, fuqarolarning hayoti va sogʻligʻiga, jamoat xavfsizligiga ziyon hamda atrof-muhitga zarar yetkazilishiga olib kelgan boʻlsa. Ruxsat etish xususiyatiga ega hujjatning amal qilishi tugatilishiga asos boʻladigan qoʻpol qoidabuzarliklarning roʻyxati ruxsat berish tartib-taomillaridan oʻtish tartibi toʻgʻrisidagi nizomda nazarda tutiladi;

tadbirkorlik subyekti ruxsat etish xususiyatiga ega hujjatning amal qilishi toʻxtatib turilishiga sabab boʻlgan holatlarni vakolatli organ yoki sud tomonidan belgilangan muddatda bartaraf etmaganda;

vakolatli organning ruxsat etish xususiyatiga ega hujjatni berish toʻgʻrisidagi qarori qonunga xilof ekanligi aniqlanganda;

ruxsat etish xususiyatiga ega hujjatning amal qilish muddati tugaganda;

bajarilishi uchun ruxsat etish xususiyatiga ega hujjat berilgan bir martalik harakat bajarilganda.

Ushbu modda birinchi qismining uchinchi, toʻrtinchi, beshinchi, toʻqqizinchi va oʻninchi xatboshilarida koʻrsatilgan hollar yuzaga kelishi bilan ruxsat etish xususiyatiga ega hujjatning amal qilishi tugatilgan hisoblanadi.

Ruxsat etish xususiyatiga ega hujjatning amal qilishi ushbu modda birinchi qismining ikkinchi xatboshisida koʻrsatilgan holda vakolatli organ tomonidan, ushbu modda birinchi qismining oltinchi, yettinchi va sakkizinchi xatboshilarida koʻrsatilgan hollarda esa, sud tomonidan tugatiladi.

Sudning ruxsat etish xususiyatiga ega hujjatning amal qilishini tugatish toʻgʻrisidagi qarori tadbirkorlik subyektiga va vakolatli organga qonunchilikda belgilangan muddatlarda yetkaziladi.

Vakolatli organning ruxsat etish xususiyatiga ega hujjatning amal qilishini tugatish toʻgʻrisidagi qarori tadbirkorlik subyektiga ushbu qaror qabul qilingan kundan eʼtiboran bir ish kunidan kechiktirmay yozma shaklda, ruxsat etish xususiyatiga ega hujjatning amal qilishini tugatish sabablari va qonunchilikning aniq normalari koʻrsatilgan holda yetkaziladi. Ruxsat etish xususiyatiga ega hujjatning amal qilishini tugatish toʻgʻrisidagi qaror tadbirkorlik subyekti tomonidan olingan kundan eʼtiboran oʻn kun ichida ruxsat etish xususiyatiga ega hujjat vakolatli organga qaytarilishi va yoʻq qilinishi kerak.

Yuridik shaxs boʻlgan tadbirkorlik subyekti oʻzgartirilganda, uning nomi yoki joylashgan yeri (pochta manzili) oʻzgargan taqdirda, tadbirkorlik subyekti yoxud uning huquqiy vorisi qayta roʻyxatdan oʻtgandan keyin yetti ish kuni ichida vakolatli organga ruxsat etish xususiyatiga ega hujjatni qayta rasmiylashtirish toʻgʻrisidagi arizani koʻrsatilgan maʼlumotlarni tasdiqlovchi hujjatlarni ilova qilgan holda topshirishi shart.

Jismoniy shaxs boʻlgan tadbirkorlik subyektining unga davlat roʻyxatidan oʻtkazilganligi haqida berilgan guvohnomada koʻrsatilgan familiyasi, ismi, otasining ismi yoki faoliyat koʻrsatadigan joyi oʻzgargan taqdirda, tadbirkorlik subyekti qayta roʻyxatdan oʻtgandan keyin yetti ish kuni ichida vakolatli organga ruxsat etish xususiyatiga ega hujjatni qayta rasmiylashtirish toʻgʻrisidagi arizani koʻrsatilgan maʼlumotlarni tasdiqlovchi hujjatlarni ilova qilgan holda topshirishi shart.

Yangidan vujudga kelgan yuridik shaxsni davlat roʻyxatidan oʻtkazish sanasida ayni bir harakatni va (yoki) faoliyatni bajarish va (yoki) amalga oshirish uchun ruxsat etish xususiyatiga ega hujjati mavjud yuridik shaxslar boʻlgan tadbirkorlik subyektlari qoʻshib yuborilgan taqdirda, ruxsat etish xususiyatiga ega hujjatning ushbu moddaning birinchi qismida belgilangan tartibda qayta rasmiylashtirilishiga yoʻl qoʻyiladi.

Ruxsat etish xususiyatiga ega hujjatdagi mavjud maʼlumotlar ushbu moddaning birinchi — uchinchi qismlarida nazarda tutilmagan hollarda oʻzgargan taqdirda, ruxsat etish xususiyatiga ega hujjatni qayta rasmiylashtirish tadbirkorlik subyektining tegishli hujjatlar ilova qilingan arizasi boʻyicha amalga oshiriladi.

Hujjatlar tadbirkorlik subyekti tomonidan vakolatli organga bevosita, pochta aloqa vositalari orqali yoki elektron shaklda, ular olinganligi haqida xabardor qilingan holda taqdim etiladi. Elektron shaklda taqdim etilgan hujjatlar tadbirkorlik subyektining elektron raqamli imzosi bilan tasdiqlanadi.

Ruxsat etish xususiyatiga ega hujjat qayta rasmiylashtirilguniga qadar, ruxsat etish xususiyatiga ega hujjatni qayta rasmiylashtirish toʻgʻrisida ariza bergan tadbirkorlik subyekti yoki uning huquqiy vorisi (merosxoʻr) ruxsat etish xususiyatiga ega hujjatni qayta rasmiylashtirish toʻgʻrisida berilgan, qabul qilib olingan sanasi haqida vakolatli organning belgisi qoʻyilgan ariza asosida unda koʻrsatilgan harakatni va (yoki) faoliyatni bajaradi yoki amalga oshiradi.

Ruxsat etish xususiyatiga ega hujjat qayta rasmiylashtirilganda vakolatli organ berilgan ruxsat etish xususiyatiga ega hujjatlar reyestriga tegishli oʻzgartishlar kiritadi.

Ruxsat etish xususiyatiga ega hujjatni qayta rasmiylashtirish va berish ruxsat etish xususiyatiga ega hujjatni qayta rasmiylashtirish toʻgʻrisidagi ariza tegishli hujjatlar ilova qilingan holda vakolatli organ tomonidan qabul qilib olingan kundan eʼtiboran besh ish kunidan koʻp boʻlmagan muddatda amalga oshiriladi.

Ruxsat berish tartib-taomillaridan oʻtish tartibi toʻgʻrisidagi nizomlarda belgilangan hollarda, ruxsat etish xususiyatiga ega hujjatni qayta rasmiylashtirganlik uchun tadbirkorlik subyektining ruxsat etish xususiyatiga ega hujjatni berish toʻgʻrisidagi arizasi vakolatli organ tomonidan koʻrib chiqilganligi uchun qayta rasmiylashtirish toʻgʻrisida ariza topshirilgan sanadagi holatga koʻra, toʻlanadigan summaning yarmi miqdorida yigʻim undiriladi. Yigʻim summasi vakolatli organlar hisobvaragʻiga oʻtkaziladi.

Tadbirkorlik subyektidan ushbu moddada nazarda tutilmagan hujjatlarni taqdim etishni talab qilishga yoʻl qoʻyilmaydi.

Bajarilishi va amalga oshirilishi uchun ruxsat etish xususiyatiga ega hujjatlar olish lozim boʻlgan harakatni va (yoki) muayyan faoliyatni ushbu moddaning birinchi va ikkinchi qismlari talablarini buzgan holda bajarish va amalga oshirish belgilangan tartibda javobgarlikka sabab boʻladi.

Ruxsat etish xususiyatiga ega hujjat quyidagi asoslarda bekor qilinadi:

tadbirkorlik subyektining ruxsat etish xususiyatiga ega hujjatni bekor qilish toʻgʻrisidagi arizasiga koʻra;

ruxsat etish xususiyatiga ega hujjat qalbaki hujjatlardan foydalangan holda olinganligi fakti aniqlanganda.

Ruxsat etish xususiyatiga ega hujjat ushbu modda birinchi qismining ikkinchi xatboshisida koʻrsatilgan holda vakolatli organ tomonidan, ushbu modda birinchi qismining uchinchi xatboshisida koʻrsatilgan holda esa, sud tomonidan bekor qilinadi.

Sudning ruxsat etish xususiyatiga ega hujjatni bekor qilish toʻgʻrisidagi qarori tadbirkorlik subyekti tomonidan olingan kundan eʼtiboran oʻn kun ichida ruxsat etish xususiyatiga ega hujjat vakolatli organga qaytarilishi va yoʻq qilinishi kerak.

Ruxsat etish xususiyatiga ega hujjat bekor qilinganligi toʻgʻrisidagi axborot ommaviy axborot vositalarida, shuningdek vakolatli organning rasmiy veb-saytida eʼlon qilinishi kerak.

Sudning ruxsat etish xususiyatiga ega hujjatni bekor qilish toʻgʻrisidagi qarori ruxsat etish xususiyatiga ega hujjat berilgan sanadan eʼtiboran amal qiladi.

Sudning ruxsat etish xususiyatiga ega hujjatni bekor qilish toʻgʻrisidagi qarori ustidan belgilangan tartibda shikoyat qilinishi mumkin.

Ruxsat berish tartib-taomillari sohasidagi nizolar qonunchilikda belgilangan tartibda hal etiladi.

Ruxsat berish tartib-taomillari toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran olti oy oʻtgach kuchga kiradi.