Dunyo tibbiyotiga ulkan hissa qoʻshgan shifokor, olim va faylasuf Abu Ali ibn Sinoning bashariyatga qoldirgan boy merosini chuqur oʻrganish va keng targʻib etish, xususan uning maʼnaviy-maʼrifiy merosi asosida vatandoshlarimizni, ayniqsa yoshlarni tarbiyalash, bu umumbashariy merosdan chet el fuqarolarini xabardor etish, insonparvarlik xayriya ishlarini amalga oshirish va sogʻliqni saqlash tizimi islohotida faol ishtirok etish maqsadida:

1. Ibn Sino xalqaro jamgʻarmasini tashkil etish toʻgʻrisida Oʻzbekiston vrachlar assotsiatsiyasi, Oʻzbekiston Respublikasi Sogʻliqni saqlash vazirligi tomonidan kiritilgan taklif qabul qilinsin.

2. Jamgʻarmaning asosiy vazifasi quyidagilardan iborat deb hisoblansin:

sogʻliqni saqlash tizimidagi islohotlarni tezlashtirishga koʻmaklashish;

sogʻliqni saqlash tizimini tuzilish jihatidan qayta qurishda, tibbiy-ijtimoiy xayriya tashkilotlarini, nuroniylar uchun gerontologiya (geriatriya) markazlarini ochish va Ibn Sino taʼlimoti hamda zamonaviy tibbiyot ilmu fani asosida Sharq tabobatini (xalq tabobatini) rivojlantirib borish;

Abu Ali ibn Sinoning ijodiy merosini chuqur oʻrganish ishlarini tashkil etish, maktablar va oliy oʻquv yurtlari uchun oʻquv dasturlarini ishlab chiqishda ishtirok etish, buyuk olim asarlarini tartibga solish va ularni nashr etishga koʻmaklashish, Ibn Sino kutubxonasini ochish;

buyuk olim asarlari asosida sogʻlom turmush tarzini targʻib qilish, kitoblar, risolalar, jurnal nashr etish, televideniye va radioda doimiy ishlab turadigan dasturlar ochish, Ibn Sino muzeyini barpo etish;

Ibn Sinoning tibbiy va ilmiy-maʼnaviy merosiga oid tadqiqotlar olib borishga, uning fandagi maktablarini oʻrganishga koʻmaklashish, xususan olimlarning bu boradagi ilmiy faoliyatini ragʻbatlantirish va muvofiqlashtirish;

tibbiyot va dorishunoslik sohasidagi eng yaxshi ishlar uchun Ibn Sino nomidagi mukofot taʼsis etish va isteʼdodli yoshlarni qoʻllab-quvvatlash;

chet el olimlari bilan aloqalar oʻrnatish, Ibn Sinoning ilmiy merosiga bagʻishlangan xalqaro simpoziumlar, konferensiyalar, kongresslar oʻtkazish;

mamlakatning barcha viloyatlarida va xorijiy oʻlkalarda Jamgʻarma boʻlinmalarini tashkil etish, buyuk vatandoshimiz tavallud topgan tuproq — Buxoro shahrida har yili Ibn Sino xalqaro oʻqishlarini oʻtkazib turish;

YUNESKO bilan har tomonlama hamkorlik qilib borish, Jamgʻarmaning ravnaq topib borishi uchun moddiy asos yaratish maqsadida xorijiy investitsiyalarni jalb etish.

3. Ibn Sino xalqaro jamgʻarmasi faoliyatini qoʻllab-quvvatlash uchun Oʻzbekiston Respublikasi Moliya vazirligi, Vazirlar Mahkamasining zaxira jamgʻarmasidan 10 million soʻm miqdorida mablagʻ ajratsin.

Belgilab qoʻyilsinki, Oʻzbekiston Respublikasining yuridik va jismoniy shaxslari, xorijiy yuridik va jismoniy shaxslar hamda xalqaro tashkilotlar tomonidan beriladigan xayriya mablagʻlari uchun Jamgʻarmaning hisob raqami doimo ochiq hisoblanadi.

Ibn Sino xalqaro jamgʻarmasi va uning boʻlimlari davlat budjetiga toʻlanadigan hamma turdagi soliqlar, boj toʻlovidan besh yil muddatga ozod qilinsin va bular Nizomda koʻzda tutilgan faoliyatlarni amalga oshirish uchun sarflansin.

4. Belgilab qoʻyilsinki, Jamgʻarma faoliyatini mablagʻlar bilan taʼminlashning asosiy manbalari quyidagilar boʻlib hisoblanadi: davlat grantlari, Oʻzbekistonlik va xorijiy yuridik va jismoniy shaxslarning homiylik mablagʻlari, xalqaro investitsiyalar, hayriya badallari va oʻz faoliyatidan tushadigan daromad mablagʻlari.

5. Oʻzbekiston Respublikasi Vazirlar Mahkamasi oʻn kunlik muddat ichida mazkur Farmonning bajarilishi yuzasidan qaror qabul qilsin.