1-modda. “Mardlik” ordeni taʼsis etilsin.

2-modda. “Mardlik” ordeni toʻgʻrisidagi nizom tasdiqlansin (ilova qilinadi).

3-modda. “Mardlik” ordenining tavsifi tasdiqlansin (ilova qilinadi).

4-modda. Oʻzbekiston Respublikasining 1995-yil 22-dekabrda qabul qilingan “Davlat mukofotlari toʻgʻrisida”gi 176–I-sonli Qonunining (Oʻzbekiston Respublikasi Oliy Majlisining Axborotnomasi, 1995-yil, № 12, 266-modda; 1996-yil, № 5–6, 63-modda, № 9, 120-modda; 1998-yil, № 9, 163-modda; 2000-yil, № 7–8, 202-modda; 2003-yil, № 9–10, 140, 149-moddalar; 2005-yil, № 1, 18-modda; Oʻzbekiston Respublikasi Oliy Majlisi palatalarining Axborotnomasi, 2007-yil, № 6, 250-modda; 2008-yil, № 4, 193-modda) 11-moddasi quyidagi mazmundagi xatboshi bilan toʻldirilsin:

“Mardlik” ordeni”.

5-modda. Ushbu Qonun rasmiy eʼlon qilingan kundan eʼtiboran kuchga kiradi.

1. “Mardlik” ordeni bilan oʻzini Vatanni himoya qilishga va Ona yurt xizmatiga bagʻishlagan, bunda mardlik hamda jasorat koʻrsatgan Oʻzbekiston Respublikasi harbiy xizmatchilari va boshqa fuqarolari mukofotlanadi.

Alohida hollarda “Mardlik” ordeni bilan Oʻzbekiston Respublikasi fuqarosi boʻlmagan shaxslar ham mukofotlanishi mumkin.

2. “Mardlik” ordeni bilan Oʻzbekiston Respublikasining Prezidenti mukofotlaydi. Mukofotlash toʻgʻrisidagi farmon matbuotda va boshqa ommaviy axborot vositalarida eʼlon qilinadi.

3. “Mardlik” ordeni bilan mukofotlashga taqdim etish, mukofotlash, shuningdek uni topshirish “Davlat mukofotlari toʻgʻrisida”gi Oʻzbekiston Respublikasi Qonunida nazarda tutilgan tartibda amalga oshiriladi.

4. “Mardlik” ordeni bilan mukofotlangan shaxslar bazaviy hisoblash miqdorining oʻn besh baravari miqdorida bir yoʻla beriladigan pul mukofoti oladilar va qonunchilikda belgilab qoʻyiladigan imtiyozlardan foydalanadilar.

5. “Mardlik” ordeni koʻkrakning chap tomoniga taqiladi.

6. “Mardlik” ordeni bilan vafotidan keyin mukofotlangan taqdirda, orden, mukofotlash toʻgʻrisidagi hujjat va bir yoʻla beriladigan pul mukofoti mukofotlanganning oilasiga topshiriladi.

“Mardlik” ordeni 1 mikron qalinlikda oltin qoplangan mis qotishmasidan tayyorlanadi. Ordenning balandligi 50 millimetr, eni 41 millimetr, qalinligi 4,5 millimetr.

Orden nishoni yigʻma, uning asosi tilla rang naqshinkor parchinlari boʻlgan koʻk emal hoshiyali shakldor geraldik qalqon koʻrinishida boʻlib, unga Oʻzbekiston Respublikasining birligi ramzi boʻlgan qavariq sakkiz qirrali yulduz biriktiriladi. Yulduz qirralari taram-taram boʻlib taralayotgan zarrin ovalsimon nurlar koʻrinishida bajarilgan. Yulduzning qarama-qarshi qirralari oraligʻi 45 millimetr.

Sakkiz qirrali yulduzga naqshinkor parchinlari boʻlgan, qavariq, qadimiy uslubda aks ettirilgan dumaloq sharqona qalqon koʻrinishidagi diametri 30 millimetrli qoplama medalon biriktiriladi. Qalqonning har ikkala yon tomoni gʻalaba, shon-shuhrat va mukofot ramzi boʻlgan qavariq, tilla rangli dafna yaproqlaridan gulchambar koʻrinishida hoshiyalangan. Gulchambardan pastda tilla rang gardishli, oq emalli lenta koʻrinishida aks ettirilgan fonga “MARDLIK” ordeni nomi joylashtirilgan. Yozuv boʻrtma bosh harflar bilan toʻq qizil emalda bajarilgan. Shrifti “MILLENIUM BdExBT”, kegli 20.

Sharqona qalqondan yuqorida moviy rangda emallangan oltin hallangan yarim oy va yulduzli musamman — Oʻzbekiston Respublikasi Davlat gerbining muqaddas ramzlari tasvirlangan. Musamman yonlarida sakkiz qirrali yulduz fonida milliy or-nomus va qadr-qimmat, Ona yurtni himoya qilishga shaylik ramzi boʻlgan, oʻzaro koʻndalang kesishgan ikkita qadimiy sharqona qilich efesi (dasta belamagi), quyi tomonda esa, ularning uzun qayrilma tigʻlarining uchlari qavariqli tasvirlangan.

Orden nishoni kompozitsiyasini dala formali kiyimdagi askarning — Vatan himoyachisining hayot sarchashmasi ifodasi boʻlgan asosiy ramziy belgi — chor atrofga taralayotgan zarrin quyosh nurlari aks etgan oq rangli emal fonidagi qalqon markazida joylashgan boʻrtma, koʻkrakdan yuqori qismining yarim yon tomonlama olingan tasviri yakunlaydi.

Ordenning orqa tomonida diametri 22 millimetrli Oʻzbekiston Respublikasi Davlat gerbi qavariqli tasvirlangan. Pastki qismida ordenning raqami 2 millimetr oʻlchamdagi zarb qilingan shrift bilan yozilgan.

Orden toʻrt xil rangdagi yoʻllari boʻlgan muhayyar lenta bilan sirilgan besh qirrali qadagʻichga ilmoqcha va halqacha yordamida ulanadi. Lentaning eni 24 millimetr. Lenta markazidan eni 8 millimetrli oq yoʻl oʻtgan. Uning har ikkala tarafidan eni 3 millimetrli yashil yoʻllar joy olgan. Undan keyin eni 4 millimetrli moviy yoʻllar tushirilgan. Lentaning chekkalari eni 1 millimetrli qizil yoʻllar bilan hoshiyalangan. Qadagʻichning balandligi 48 millimetr, eni 46 millimetr.

Qadagʻichning orqa tomonida ordenni kiyimga taqib qoʻyish uchun toʻgʻnogʻich koʻrinishidagi moslama mavjud.