O‘zbekiston Respublikasi Prezidentining 2003-yil 27-martdagi PF-3227-son “2003-yilning 1-aprelidan boshlab uy-joy-kommunal xizmatlar haqini to‘lash bo‘yicha beriladigan imtiyozlar o‘rniga kompensatsiya pul to‘lovlarini joriy etish to‘g‘risida”gi, 2009-yil 21-dekabrdagi PF-4158-son “O‘zbekiston Respublikasi Prezidentining ayrim farmonlariga o‘zgartishlar kiritish to‘g‘risida”gi, 2009-yil 30-dekabrdagi PF-4161-son “Fuqarolarning pensiya ta’minoti tizimini yanada takomillashtirish chora-tadbirlari to‘g‘risida”gi hamda 2015-yil 14-apreldagi PF-4715-son “Keksalarni ijtimoiy himoya qilish va moddiy qo‘llab-quvvatlashni yanada kuchaytirish bo‘yicha qo‘shimchachora-tadbirlar to‘g‘risida”gi farmonlariga muvofiq buyuraman:

1. Uy-joy-kommunal xizmatlar haqini to‘lash bo‘yicha kompensatsiya pul to‘lovlarining mexanizmi to‘g‘risidagi nizom ilovaga muvofiq tasdiqlansin.

2. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom uy-joy-kommunal xizmatlar haqini to‘lash bo‘yicha kompensatsiya (bundan buyon matnda — kompensatsiya deb yuritiladi) pul to‘lovlarining mexanizmini belgilaydi.

1. Quyidagilar pensiyani hisoblash bazaviy miqdorining 45 foizi miqdorida oylik kompensatsiya pul to‘lovlari oluvchilari hisoblanadi:

a) 1941 — 1945-yillardagi urush oqibatida nogironligi bo‘lgan shaxslar va uning qatnashchilariga tenglashtirilgan shaxslar. Urush oqibatida nogironligi bo‘lgan shaxslar va uning qatnashchilariga tenglashtirilgan shaxslar doirasi O‘zbekiston Respublikasi Vazirlar Mahkamasining 2022-yil 13-oktabrdagi 592-son qarori bilan tasdiqlangan Davlat pensiyalarini tayinlash va to‘lash tartibi to‘g‘risidagi nizomning 1 va 2-ilovalarida belgilangan;

v) Sovet Ittifoqi Qahramonlari, Sotsialistik Mehnat Qahramonlari va “Slava” ordenining uchala darajasi bilan mukofotlangan shaxslar;

g) fashist konslagerlarining sobiq voyaga yetmagan mahbuslari;

d) Leningrad shahri qamali davrida ishlagan fuqarolar;

e) ko‘rish qobiliyati bo‘yicha I guruh nogironligi bo‘lgan shaxslar;

j) Chernobil halokati oqibatida jabrlangan fuqarolar;

z) yadro poligonlari va boshqa radiatsiya-yadro obyektlarida harbiy xizmatni o‘tagan shaxslar.

1¹. 1941 — 1945-yillardagi urush oqibatida nogironligi bo‘lgan shaxslar va uning qatnashchilari, ularga tenglashtirilgan shaxslardan tashqari, pensiyani hisoblash bazaviy miqdorining 50 foizi miqdorida oylik kompensatsiya pul to‘lovlari oluvchilari hisoblanadi.

2. Pensiyani hisoblash bazaviy miqdorining 25 foizi miqdorida oylik kompensatsiya pul to‘lovlari oluvchilari deb 1941 — 1945-yillardagi urush davridagi mehnat fronti qatnashchilari hisoblanadi.

3. O‘zbekiston Respublikasining Soliq kodeksiga muvofiq, uy-joy-kommunal xizmatlar haqini to‘lash bo‘yicha har oylik kompensatsiya pul to‘lovlari jami daromad tarkibiga kiritiladi va O‘zbekiston Respublikasi Iqtisodiyot va moliya vazirligi huzuridagi Pensiya jamg‘armasi (bundan buyon matnda — Pensiya jamg‘armasi deb yuritiladi) orqali pensiyalar to‘lanadigan tartib va muddatlarda to‘lanadi.

Bunda, O‘zbekiston Respublikasi respublika budjeti hisobidan pensiya oluvchi pensionerlarga kompensatsiyalar pensiyalarni to‘lash muddatlarida pensiya tayinlangan tashkilot orqali to‘lanadi.

5. Kompensatsiya olish huquqiga ega bo‘lgan shaxslarga kompensatsiya uni olish huquqini beruvchi hujjatni ilova qilgan holda kompensatsiya tayinlash to‘g‘risida ariza topshirilgan oydan keyingi oyning birinchi kunidan tayinlanadi.

Bunda, ushbu Nizomning 1-bandi “e” va “z” kichik bandlarida keltirilgan imtiyozli shaxslar tomonidan kompensatsiya tayinlash to‘g‘risida ariza berilganda, arizaga kompensatsiya olish huquqini beruvchi hujjatni ilova qilish talab etilmasdan ushbu shaxslarning kompensatsiya olish huquqi “Elektron hukumat” tizimi idoralararo integratsiyalashuv platformasidan olingan elektron ko‘rinishdagi ma’lumotlar va O‘zbekiston Respublikasi Vazirlar Mahkamasining 2002-yil 31-maydagi 188-son qarori bilan tasdiqlangan Yadro poligonlarida va boshqa radiatsiya-yadro obyektlarida xizmatni o‘tagan, O‘zbekiston Respublikasi hududida yashayotgan O‘zbekiston Respublikasi fuqarolarining ro‘yxati asosida aniqlanadi.

7. Bir necha asosga ko‘ra kompensatsiya olish huquqiga ega bo‘lgan shaxslarga ularning tanlashi bo‘yicha eng ko‘p miqdordagi bitta kompensatsiya to‘lanadi.

8. Mehnat ta’tilida, ta’lim olish munosabati bilan ta’tilda, homiladorlik va tug‘ish bo‘yicha ta’tilda bo‘lish vaqti uchun, shuningdek vaqtincha mehnatga layoqatsizlik davri, bola ikki yoshga yetishiga qadar uni parvarish qilish bo‘yicha xodimlar ta’tilda bo‘lgan davr uchun ham kompensatsiyalar to‘lanadi.

9. Oluvchiga tegishli bo‘lgan va uning vafot etishi munosabati bilan to‘liq olinmay qolgan kompensatsiya summasi u vafot etgan kunda birga yashagan oila a’zolariga to‘lanadi. Mazkur holda kompensatsiya vafot etgan kuniga qadar to‘lanadi.

11. Tayinlangan kompensatsiyani to‘lash:

pensiya (nafaqa) to‘lash muddati tamom bo‘lganda;

ketma-ket uch oydan ortiq vaqt mobaynida kompensatsiyani yetkazib berish (topshirish) yuklatilgan tashkilot orqali kompensatsiya olinmaganda;

fuqaro ozodlikdan mahrum etilganda;

fuqaro ruhiy bemorlar internat uylarida yashaganda;

O‘zbekiston Respublikasi Prezidenti huzuridagi Ijtimoiy himoya milliy agentligi tomonidan “Yagona milliy ijtimoiy himoya” axborot tizimi orqali Pensiya jamg‘armasining “Pensiya” axborot tizimiga nafaqa oluvchining nafaqa to‘lovi to‘xtatib turilgani to‘g‘risidagi elektron ma’lumotlar kelib tushganida;

kompensatsiyani to‘lashni to‘xtatib turish to‘g‘risida fuqaro tomonidan ariza berilganda to‘xtatib turiladi.

Tayinlangan kompensatsiyani to‘lash qonunchilik hujjatlarida nazarda tutilgan boshqa hollarda ham to‘xtatib turilishi mumkin.

Kompensatsiyani to‘lash fuqaro yoki uning vasiysi tomonidan kompensatsiyani to‘lashni tiklash to‘g‘risida ariza taqdim etilgandan, shuningdek shaxsini tasdiqlovchi hujjatni ko‘rsatgan kundan boshlab tiklanadi.

Fuqaroning sud hukmi bo‘yicha ozodlikdan mahrum etish joylarida bo‘lgan vaqti uchun kompensatsiya to‘lanmaydi. Fuqaro ozod bo‘lgandan keyin kompensatsiya to‘lash kompensatsiyani to‘lashni tiklash to‘g‘risida ariza berilgan kundan boshlab tiklanadi.

11¹. Tayinlangan kompensatsiyani to‘lash:

fuqaro vafot etganda;

tayinlangan kompensatsiyaga huquqlar yo‘qolganda;

O‘zbekiston Respublikasi Prezidenti huzuridagi Ijtimoiy himoya milliy agentligi tomonidan “Yagona milliy ijtimoiy himoya” axborot tizimi orqali Pensiya jamg‘armasining “Pensiya” axborot tizimiga nafaqa oluvchining nafaqa to‘lovi to‘xtatilgani to‘g‘risidagi elektron ma’lumotlar kelib tushganida;

doimiy yashash uchun O‘zbekiston Respublikasi tashqarisiga chiqib ketilganda to‘xtatiladi.

13. Uy-joy-kommunal xizmatlar haqini to‘lash bo‘yicha qonunchilik hujjatlariga ko‘ra alohida toifadagi fuqarolarga beriladigan imtiyozlar o‘rniga oylik kompensatsiya pul to‘lovlari O‘zbekiston Respublikasi Davlat budjeti mablag‘lari hisobidan amalga oshiriladi.

Bunda ko‘rsatilgan to‘lovlar bo‘yicha xarajatlarni moliyalashtirish Pensiya jamg‘armasi hamda uning hududiy boshqarmalari orqali amalga oshiriladi.

14. Kompensatsiyalarni tayinlash va to‘lash ustidan nazorat Bosh prokuratura huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi hamda Pensiya jamg‘armasi tomonidan amalga oshiriladi.

15. Ushbu Nizom buzilishida aybdor bo‘lgan shaxslar qonunchilik hujjatlariga muvofiq javob beradilar.