O‘zbekiston Respublikasi “Davlat soliq xizmati to‘g‘risida”gi Qonunining 7-moddasi (O‘zbekiston Respublikasi Oliy Majlisining Axborotnomasi, 1997-y., 9-son, 232-modda), O‘zbekiston Respublikasi “Davlat bojxona xizmati to‘g‘risida”gi Qonunining 6 va 7-moddalariga (O‘zbekiston Respublikasi Oliy Majlisining Axborotnomasi, 1997-y., 9-son, 230-modda), O‘zbekiston Respublikasi Prezidentining 2009-yil 3-avgustdagi PQ-1167-son “Qishloq joylarida uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-y., 32-33-son, 358-modda) va O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-y., 5-son, 38-modda) muvofiq O‘zbekiston Respublikasi Davlat soliq qo‘mitasi, Moliya vazirligi va Davlat bojxona qo‘mitasi qaror qiladilar:

1. “Qishloq qurilish invest” ixtisoslashtirilgan injiniring kompaniyasi va “Qishloq qurilish invest” injiniring kompaniyasi bilan tuzilgan shartnomalar bo‘yicha foydalanishga tayyor holda topshirish shartlari bilan yakka tartibda uy-joy qurish doirasida ular tomonidan amalga oshiriladigan ishlar hajmlari bo‘yicha pudrat tashkilotlari tomonidan imtiyozlarni qo‘llash tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom O‘zbekiston Respublikasi Prezidentining 2009-yil 3-avgustdagi PQ-1167-son “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-yil, 32-33-son, 358-modda) va O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-yil., 5-son, 38-modda) muvofiq “Qishloq qurilish invest” ixtisoslashtirilgan injiniring kompaniyasi va “Qishloq qurilish invest” injiniring kompaniyasi bilan tuzilgan shartnomalar bo‘yicha foydalanishga tayyor holda topshirish shartlari bilan yakka tartibda uy-joy qurish doirasida ular tomonidan amalga oshiriladigan ishlar hajmlari bo‘yicha pudrat tashkilotlari tomonidan imtiyozlarni qo‘llash tartibini belgilaydi.

1. O‘zbekiston Respublikasi Prezidentining 2009-yil 3-avgustdagi PQ-1167-son “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi qaroriga muvofiq “Qishloq qurilish invest” ixtisoslashtirilgan injiniring kompaniyasi 2014-yilning 1-yanvarigacha barcha turdagi soliqlardan hamda Respublika yo‘l jamg‘armasi va budjetdan tashqari Maktab jamg‘armasiga majburiy ajratmalarni to‘lashdan ozod qilinadi.

2. Yuridik shaxslarga soliqlar, bojxona va majburiy to‘lovlarni budjetga to‘lash bo‘yicha berilgan imtiyozlarni rasmiylashtirish va buxgalterlik hisobida aks ettirish tartibi to‘g‘risidagi nizomga (ro‘yxat raqami 1463-son, 2005-yil 2-aprel) (O‘zbekiston Respublikasi qonun hujjatlari to‘plami, 2005-y., 14-son, 105-modda) muvofiq bo‘shayotgan mablag‘larni maqsadli ishlatish nazarda tutilmagan soliqlar va bojxona imtiyozlari berilganda budjetga to‘lanadigan soliqlar, bojxona va majburiy to‘lovlar hisoblab chiqarilmaydi va mahsulotlar (tovarlar, ishlar, xizmatlar) hamda boshqa mol-mulkning sotish (xarid) qiymatiga kiritilmaydi.

Bo‘shayotgan mablag‘larni maqsadli ishlatishni nazarda tutmaydigan soliqlar va bojxona imtiyozlarini buxgalteriya hisobida aks ettirish tartibi yuqorida qayd qilingan Nizom bilan tartibga solinadi.

3. O‘zbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va ta’mirlash bo‘yicha pudrat ishlarini kengaytirishni rag‘batlantirishga doir qo‘shimcha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-yil., 5-son, 38-modda) asosan “Qishloq qurilish invest” injiniring kompaniyasi bilan tuzilgan shartnomalar bo‘yicha foydalanishga tayyor holda topshirish shartlari asosida yakka tartibda uy-joy qurish doirasida amalga oshiriladigan ishlar hajmlari bo‘yicha pudrat tashkilotlari 2014-yil 1-yanvargacha:

soliqlarning barcha turlarini davlat maqsadli jamg‘armalariga majburiy ajratmalarni to‘lashdan ozod qilinadi, budjetdan tashqari Pensiya jamg‘armasi bundan mustasno;

Vazirlar Mahkamasi tomonidan tasdiqlanadigan ro‘yxatlar bo‘yicha O‘zbekiston Respublikasi hududiga olib kiriladigan qurilish texnikasi va kichik mexanizatsiyalash vositalari uchun bojxona to‘lovlari to‘lashdan (bojxona rasmiylashtiruvi yig‘imlari bundan mustasno) ozod qilinadi.

4. Pudrat tashkilotlari tomonidan ushbu Nizomning 3-bandida ko‘rsatilgan soliq imtiyozlari faqat “Qishloq qurilish invest” injiniring kompaniyasi bilan tuzilgan shartnomalar bo‘yicha foydalanishga tayyor holda topshirish shartlari asosida yakka tartibda uy-joy qurish doirasida amalga oshiriladigan ishlar hajmlari bo‘yicha qo‘llaniladi.

5. Pudrat tashkilotlari tomonidan mazkur Nizomning 3-bandida ko‘rsatilgan bojxona imtiyozlari faqat O‘zbekiston Respublikasi Vazirlar Mahkamasi tomonidan tasdiqlanadigan ro‘yxatlar bo‘yicha O‘zbekiston Respublikasi hududiga olib kiriladigan qurilish texnikasi va kichik mexanizatsiyalash vositalari bo‘yicha qo‘llaniladi. Bojxona imtiyozlari pudrat tashkiloti “Qishloq qurilish invest” injiniring kompaniyasi bilan tuzilgan shartnomalar bo‘yicha yakka tartibda uy-joy qurishni amalga oshirishni tasdiqlovchi mazkur Nizomning ilovasida keltirilgan shaklda “Qishloq qurilish invest” ixtisoslashtirilgan injiniring kompaniyasi tomonidan beriladigan ma’lumotnomaga muvofiq taqdim etiladi. Ma’lumotnoma tovarlarni erkin muomalaga chiqarish rejimiga o‘tkazish bojxona rasmiylashtiruvi vaqtida taqdim etiladi.

6. Bo‘shayotgan mablag‘larni maqsadli ishlatishni nazarda tutmaydigan soliqlar va bojxona imtiyozlarini buxgalteriya hisobida aks ettirish Yuridik shaxslarga soliqlar, bojxona va majburiy to‘lovlarni budjetga to‘lash bo‘yicha berilgan imtiyozlarni rasmiylashtirish va buxgalterlik hisobida aks ettirish tartibi to‘g‘risidagi nizom (ro‘yxat raqami 1463, 2005-yil 2-aprel) (O‘zbekiston Respublikasi qonun hujjatlari to‘plami, 2005-y., 14-son, 105-modda) bilan tartibga solinadi.

7. Soliq va bojxona imtiyozlarining to‘g‘ri qo‘llanilishi ustidan nazorat davlat soliq xizmati va davlat bojxona xizmati organlari tomonidan amalga oshiriladi.

8. Mazkur Nizom “Qishloq qurilish invest” ixtisoslashtirilgan injiniring kompaniyasi bilan kelishilgan.