Boshoqli don ekinlari hosilini oʻz vaqtida va sifatli yigʻishtirib olishni taʼminlash hamda davlat resurslariga gʻalla sotish boʻyicha kontraktatsiya shartnomalarini bajarish maqsadida:

1. Don hosili oʻrim-yigʻimini oʻz vaqtida va sifatli tashkil etish hamda oʻtkazish uchun shaxsiy javobgarlik Qoraqalpogʻiston Respublikasi Vazirlar Kengashining Raisi, viloyatlar hokimlari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi va uning mashina-traktor parklari hududiy birlashmalari rahbarlari zimmasiga yuklansin.

2. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi va uning mashina-traktor parklari hududiy birlashmalari, “Oʻzdonmahsulot” aksiyadorlik kompaniyasi:

gʻalla oʻrish kombaynlarini, don tashish uchun jalb etiladigan barcha turdagi transport vositalarini, shuningdek don yigʻiladigan xirmon va maydonlarni, don tozalash mashinalari hamda gʻallani dastlabki qayta ishlash uchun zarur boʻlgan boshqa moddiy-texnika bazasini tayyorlab qoʻyish boʻyicha tashkiliy-iqtisodiy kompleks chora-tadbirlarni joriy yilning 20-mayigacha tugallashni amalga oshirilishini;

tayyorlov korxonalari va punktlarida xoʻjaliklardan gʻallani faqat dastlabki tozalangandan keyin, iflosligi va namligi boʻyicha amaldagi standart va normativlarga qatʼiy rioya etgan holda qabul qilinishini;

idoraviy mansubligidan qatʼi nazar, korxonalar va tashkilotlarning don qabul qilish punktlariga gʻalla tashish uchun yaroqli boʻlgan transport vositalari shartnoma asosida jalb etilishini;

Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi bilan birgalikda xoʻjaliklar bilan — davlat ehtiyojlari uchun xarid qilinayotgan gʻalla uchun, mashina-traktor parklari bilan – koʻrsatilgan mexanizatsiya xizmatlari, shuningdek, gʻalla oʻrish kombaynlari operatorlariga ish haqi toʻlash uchun oʻz vaqtida hisob-kitob qilinishini taʼminlasin.

Belgilansinki, gʻallani don qabul qilish korxonalariga yetkazish boʻyicha transport xarajatlari avtokorxonalar, qishloq xoʻjalik korxonalari va non mahsulotlari korxonalari oʻrtasida tuzilgan shartnomaga muvofiq “Oʻzdonmahsulot” aksiyadorlik kompaniyasi tomonidan toʻlanadi.

3. Gʻalla yetishtiruvchi qishloq xoʻjalik ishlab chiqaruvchilar (fermyerlar) birinchi navbatda davlat ehtiyojlari uchun yetkazib beriladigan gʻallani xarid qilishga tuzilgan kontraktatsiya boʻyicha oʻz majburiyatlarini bajarishlari va shundan keyin gʻallaning yangi hosilini boshqa maqsadlarga yoʻnaltirilishini amalga oshirishlari toʻgʻrisida qatʼiy tartib oʻrnatilsin.

4. Oʻzbekiston Respublikasi Ichki ishlar vazirligi joriy yilning 1-iyunidan boshlab Ichki ishlar vazirligi taʼlim muassasalarining tinglovchilari va kursantlari kontingentini ilovaga* muvofiq ularni taqsimlagan holda viloyatlar ichki ishlar boshqarmalari ixtiyoriga yuborsin.

“Oʻzbekiston temir yoʻllari” davlat-aksiyadorlik kompaniyasi, “Toshshahartransxizmat” uyushmasi Oʻzbekiston Respublikasi Ichki ishlar vazirligi buyurtmanomalari boʻyicha, tinglovchilar va kursantlarni vaqtinchalik oʻrnashish joyiga tashish va don yigʻishtirish tugallangandan soʻng ularni qaytarib olib kelish uchun transport vositalari zarur miqdorda ajratilishini taʼminlasinlar.

Jizzax, Qashqadaryo, Sirdaryo va Toshkent viloyatlari hokimliklari:

fermer xoʻjaliklari tomonidan “Oʻzbekiston temir yoʻllari” davlat-aksiyadorlik kompaniyasi, “Toshshahartransxizmat” uyushmasi bilan Oʻzbekiston Respublikasi Ichki ishlar vazirligi tinglovchilari va kursantlarini vaqtinchalik oʻrnashish joyiga tashish va don yigʻishtirish tugallangandan soʻng ularni qaytarib olib kelish boʻyicha xizmatlar koʻrsatish toʻgʻrisida tegishli shartnomalar tuzilishini;

tinglovchilar hamda kursantlarni vaqtinchalik yashash joylari, shuningdek oziq-ovqatlar, ularni tashish uchun transport va yonilgʻi-moylash materiallari bilan — fermer xoʻjaliklari mablagʻlari hisobiga taʼminlasinlar.

5. Qoraqalpogʻiston Respublikasi Vazirlar Kengashi va viloyatlar hokimliklari Oʻzbekiston Respublikasi Ichki ishlar vazirligi bilan birgalikda yoʻllarda harakatlanish xavfsizligini taʼminlash, yongʻinlar kelib chiqishining oldini olish, shuningdek 2008-yilgi boshoqli don ekinlari hosilining talon-toroj qilinishiga va nobud boʻlishiga yoʻl qoʻymaslik yuzasidan zarur chora-tadbirlarni koʻrsinlar.

Yerlarni shudgorlashdan oldin tozalash maqsadida dalalardagi ekin poyalari va qoldiqlari yoqib yuborilishi taqiqlansin.

6. “Oʻzbekneftgaz” milliy xolding kompaniyasi va “Oʻzneftmahsulot” aksiyadorlik kompaniyasi yonilgʻi-moylash materiallarining zarur zaxirasini yaratsin hamda hosilni yigʻishtirib olish, tashish va tayyorlash bilan band boʻlgan qishloq xoʻjaligi korxonalari, mashina-traktor parklari va boshqa tashkilotlarga belgilangan tartibda uzluksiz yetkazib berilishini tashkil etsin.

7. Oʻzbekiston Respublikasi Qishloq va suv xoʻjaligi vazirligi, “Oʻzstandart” agentligi va “Oʻzdavdoninspeksiya” davlat ehtiyojlari uchun yetkazib beriladigan gʻalla va urugʻlik materiali sifati ustidan tegishli nazorat oʻrnatsinlar.

Urugʻlik gʻallani davlat resurslari uchun xarid qilinadigan tovar gʻallaning umumiy hajmi hisobiga topshirish, shuningdek oziq-ovqat gʻallasini urugʻlik maqsadida foydalanish taqiqlansin.

Belgilab qoʻyilsinki, Qoraqalpogʻiston Respublikasi Vazirlar Kengashining Raisi, viloyatlar va tumanlar hokimlari, “Oʻzdonmahsulot” aksiyadorlik kompaniyasi va uning joylardagi boʻlinmalari rahbarlari 2009-yil hosili uchun boshoqli don ekinlari urugʻligining oʻz vaqtida va sifatli gʻamlanishi, bunda alohida eʼtiborni Oʻzbekiston Respublikasi Prezidentining 2007-yil 13-sentabrdagi PQ–693-sonli Qaroriga muvofiq urugʻchilik fermer xoʻjaliklarida ishlab chiqarilgan superelita va elita urugʻini toʻliq hajmda xarid qilishi uchun shaxsan javobgardirlar.

8. Oʻzbekiston Respublikasi Davlat statistika qoʻmitasi xoʻjaliklar tomonidan don sotish toʻgʻrisidagi statistika hisobotlarining ishonchliligini don qabul qilib olish korxonalari boʻyicha muntazam ravishda tekshirib borilishini taʼminlasin va tezkorlik bilan Vazirlar Mahkamasiga axborot bersin.

9. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.