Oʻzbekiston Respublikasi Prezidentining “Iqtisodiyotning real sektori korxonalarini qoʻllab-quvvatlash, ularning barqaror ishlashini taʼminlash va eksport salohiyatini oshirish chora-tadbirlari dasturi toʻgʻrisida” 2008-yil 28-noyabrdagi PF–4058-son Farmonida nazarda tutilgan chora-tadbirlarni amalga oshirishni taʼminlash maqsadida Vazirlar Mahkamasi qaror qiladi:

1. Belgilansinki, 2009-2010-yillarda xoʻjalik yurituvchi subyektlar tomonidan Vazirlar Mahkamasining 1997-yil 31-martdagi 165-son qarori bilan tasdiqlangan Narxlar (tariflar)ni shakllantirish va ularning qoʻllanishini nazorat qilish tartibi hamda Vazirlar Mahkamasining 2000-yil 21-sentabrdagi 364-son qarori bilan tasdiqlangan Tabiiy monopoliya subyektlarining tovarlari (ishlari, xizmatlari)ga narxlar (tariflar) belgilash tartibi toʻgʻrisidagi nizom doirasida texnologik jarayonlarni va xomashyo, materiallar va energiya resurslari sarfi normalarini maqbullashtirish boʻyicha chora-tadbirlarni amalga oshirish hisobiga tannarxni pasaytirish, quvvatlardan foydalanish darajasini va mehnat unumdorligini oshirish, foydalanish xarajatlari va qoʻshimcha xarajatlarni qisqartirish, xarid qilinadigan xomashyo, materiallar va butlovchi buyumlar narxini kamaytirish, xodimlar sonini maqbullashtirish natijasida qoʻshimcha daromad (foyda) olinishi qonun buzilishlari deb hisoblanmaydi.

2. Belgilab qoʻyilsinki, xoʻjalik yurituvchi subyektlar tomonidan mazkur qarorning 1-bandiga muvofiq olingan qoʻshimcha daromad (foyda):

Oʻzbekiston Respublikasi Prezidentining va Oʻzbekiston Respublikasi Hukumatining inqirozga qarshi tadbirlarga doir qarorlarida nazarda tutilgan ishlab chiqarishni modernizatsiya qilish, texnik va texnologik jihatdan qayta jihozlash boʻyicha eng muhim loyihalarni amalga oshirishga;

ishlab chiqarilayotgan mahsulotning tannarxini va pirovard narxini yanada pasaytirishga hamda xodimlarni belgilangan tartibda mukofotlashga yoʻnaltiriladi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.