Respublika shahar va aholi punktlarining zamonaviy qiyofasini yanada shakllantirish, ularni obodonlashtirishni tubdan yaxshilash, obodonlashtirish boshqarmalarini zamonaviy maxsus transport va mexanizatsiya vositalari bilan jihozlash, shuningdek, band bo‘lmagan aholini obodonlashtirish ishlariga jalb etish uchun qulay shart-sharoitlar yaratish va rag‘batlantirish maqsadida:

1. Quyidagilar Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining aholi punktlarini obodonlashtirish sohasidagi eng muhim vazifalari deb hisoblansin:

obodonlashtirish ishlari arxitektura-qurilish me’yorlari va qoidalariga, shuningdek, shahar va aholi punktlarining tashqi qiyofasiga nisbatan qo‘yilgan zamonaviy talablarga qat’iy muvofiq ravishda o‘tkazilishini ta’minlash;

obodonlashtirish obyektlaridan sanitariya normalari va qoidalariga muvofiq foydalanish hamda ularni saqlash ishlarini tashkil etish;

obodonlashtirish sohasida qo‘shimcha ish o‘rinlarini hamda aholi bandligini oshirish, samarali ishlash uchun shart-sharoitlar yaratish;

obodonlashtirish boshqarmalarining moddiy-texnika bazasini mustahkamlash.

2. Obodonlashtirish bo‘yicha xarajatlarni moliyalashning asosiy manbalari etib quyidagilar belgilansin:

obodonlashtirish va ijtimoiy infratuzilmani rivojlantirish solig‘i bo‘yicha prognoz tushumlarining 50 foizi;

Avtotransport vositalarini vaqtincha saqlash bo‘yicha pulli xizmatlar ko‘rsatish huquqi uchun yig‘imning 100 foizi.

obodonlashtirish va ijtimoiy infratuzilmani rivojlantirish solig‘i bo‘yicha hamda transport vositalari uchun benzin, dizel yonilg‘isi va gazdan foydalanganlik uchun jismoniy shaxslardan olinadigan soliq bo‘yicha prognozdan ortiqcha tushumlar;

xayriya (homiylik) yordamlari va qonun hujjatlariga zid bo‘lmagan boshqa manbalardan tushgan mablag‘lar.

Xo‘jalik yurituvchi subyektlarga, mulkchilik shaklidan qat’i nazar, ularning tasarrufida qoladigan shaxsiy mablag‘lari hisobidan shahar va tuman obodonlashtirish boshqarmalariga aholi punktlarini obodonlashtirish maqsadlari yo‘lida xayriya (homiylik) yordami ko‘rsatish tavsiya etilsin.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari shahar va tuman obodonlashtirish boshqarmalari 1-ilovaga* muvofiq eng kam normativ darajagacha miqdorda ishlab chiqarish xodimlari bilan to‘ldirilishini ta’minlasin.

4. 2009 — 2011-yillarda obodonlashtirish boshqarmalarini zamonaviy maxsus transport vositalari bilan jihozlash dasturi 2 va 2a-ilovalarga* muvofiq tasdiqlansin.

O‘zbekiston Respublikasi Iqtisodiyot vazirligi, Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari obodonlashtirish boshqarmalarini zamonaviy maxsus transport vositalari bilan jihozlash dasturining tasdiqlangan parametrlari so‘zsiz bajarilishini ta’minlasin.

5. O‘zbekiston Respublikasi Moliya vazirligi:

jumladan, 2009-yil 1-yanvar holatiga ko‘ra respublika budjetining bo‘sh qoldiqlari va Qoraqalpog‘iston Respublikasi hamda mahalliy budjetlarning daromad qismlarini ortig‘i bilan bajarish hisobidan 2009-yilda obodonlashtirishga sarflanadigan xarajatlarni 3-ilovaga* muvofiq oshirsin;

2010-yilgi va keyingi yillardagi Davlat budjeti parametrlarini shakllantirishda obodonlashtirish bo‘yicha xarajatlar mazkur qarorning 2-bandida nazarda tutilgan manbalar hisobidan moliyalashtirilishini inobatga olsin.

6. Qoraqalpog‘iston Respublikasi Vazirlar Kengashi va viloyatlar hokimliklari 2009-yilning 1-apreligacha bo‘lgan muddatda shahar posyolkalari maqomini olgan aholi punktlarining ko‘kalamzorlashtirish maydonlarini, ko‘chalari va yo‘lkalari uzunligini, irrigatsiya tarmoqlari hamda boshqa tashqi obodonlashtirish obyektlarini inventarizatsiyadan o‘tkazsin va O‘zbekiston Respublikasi Moliya vazirligiga ularga xizmat ko‘rsatish uchun zarur bo‘ladigan mablag‘larning asoslangan hisob-kitobini taqdim etsin.

O‘zbekiston Respublikasi Moliya vazirligi 2010-yilgi budjet parametrlarini shakllantirishda yangi shahar posyolkalari tashkil etilishini hisobga olgan holda obodonlashtirish obyektlaridan foydalanish va ularni saqlash uchun mablag‘larni nazarda tutsin.

7. O‘zbekiston Respublikasi Mehnat va aholini ijtimoiy muhofaza qilish vazirligi, “O‘zkommunxizmat” agentligi Moliya vazirligi bilan birgalikda ikki oy muddatda obodonlashtirish xodimlarini, ularni moddiy rag‘batlantirishni kuchaytirish chora-tadbirlarini va xizmat ko‘rsatish hududi hamda bajariladigan ishlarning sifatiga qarab ish haqi miqdori belgilanishini hisobga olgan holda mehnatga haq to‘lashning tarmoq tarif setkasiga o‘tkazish bo‘yicha takliflar ishlab chiqsin hamda Vazirlar Mahkamasiga kiritsin.

8. O‘zbekiston Respublikasi Davlat arxitektura va qurilish qo‘mitasi “O‘zkommunxizmat” agentligi bilan birgalikda bir oy muddatda Zamonaviy arxitektura-shaharsozlik talablarini hisobga olgan holda aholi punktlarini obodonlashtirish ishlarini tashkil etish qoidalarini ishlab chiqsin va tasdiqlash uchun O‘zbekiston Respublikasi Vazirlar Mahkamasiga kiritsin.

9. “O‘zkommunxizmat” agentligi O‘zbekiston Respublikasi Moliya vazirligi bilan birgalikda ikki oy muddatda shaharlar va tumanlarni obodonlashtirish sohasida, vaqt me’yorlari, xizmat ko‘rsatish hududlari va xodimlar soni normativlarini hisobga olgan holda normativ-huquqiy hujjatlar ishlab chiqilishi va belgilangan tartibda tasdiqlanishini ta’minlasin.

10. Vazirlar Mahkamasining “Toshkent shahar hokimligi huzurida Mustaqillik maydonini ko‘kalamzorlashtirish, obodonlashtirish va saqlash departamentini tashkil etish to‘g‘risida” 2004-yil 24-dekabrdagi 606-son qarorining 1-ilovasidagi “Jami xodimlar soni — 134 kishi” so‘zlari “Jami xodimlar soni — 274 kishi” so‘zlari bilan almashtirilsin.

11. O‘zbekiston Respublikasi Moliya vazirligi Adliya vazirligi va boshqa manfaatdor vazirliklar hamda idoralar bilan birgalikda mazkur qaror qabul qilinishi munosabati bilan bir oy muddatda qonun hujjatlariga o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

Vazirliklar va idoralar, Qoraqalpog‘iston Respublikasi Vazirlar Kengashi, viloyatlar hamda Toshkent shahar hokimliklari bir hafta muddatda avval qabul qilingan me’yoriy hujjatlarni ushbu qarorga muvofiqlashtirsin.

12. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari N.M. Xanov zimmasiga yuklansin.