O‘zbekiston Respublikasi Prezidentining “O‘zbekiston Qishloq xo‘jaligi fanlari akademiyasini tashkil etish to‘g‘risida” 1991-yil 11-iyundagi Farmonini bajarish yuzasidan Vazirlar Mahkamasi qaror qiladi:

1. Belgilansinki, O‘zbekiston Qishloq xo‘jaligi fanlari akademiyasi VASXNIL O‘rta Osiyo bo‘limining huquqiy vorisi hisoblanadi.

Respublikada joylashgan dehqonchilik ixtisosidagi ilmiy-tadqiqot muassasalari, ularning moddiy va tajriba-ishlab chiqarish bazalari bilan birga, ilovaga muvofiq O‘zbekiston Qishloq xo‘jaligi fanlari akademiyasi ixtiyoriga berilsin.

2. O‘zbekiston Qishloq xo‘jaligi fanlari akademiyasining bosh vazifalari etib quyidagilar belgilansin:

respublika dehqonchilik-sanoat kompleksida fan-texnika taraqqiyotini jadallashtirishga qaratilgan fundamental va amaliy tadqiqotlarni rivojlantirish, yer-suv, moddiy-texnika va mehnat resurslaridan oqilona va samarali foydalanish, paxta, meva-sabzavot, chorvachilik va boshqa qishloq xo‘jaligi mahsulotlarini intensiv asosda yetishtirishni ko‘paytirish maqsadida fan va ishlab chiqarishning mustahkam aloqasini ta’minlash;

tabiiy-iqlim sharoitlari, nufus vaziyatining o‘zgarishi, yer va suv resurslari taqchilligining o‘sib borishini hisobga olgan holda O‘zbekiston dehqonchilik-sanoat kompleksi tarmoqlari rivojlanishi qonuniyatlari va istiqbollarini tadqiq etish;

qishloqda ishlab chiqarish munosabatlarini, qishloq xo‘jaligini yuritish tizimini, dehqonchilik-sanoat kompleksi xo‘jalik mexanizmining iqtisodiy asoslarini, shuningdek, dehqonchilik-sanoat ishlab chiqarishi kooperativlashuvi va integratsiyasining zamonaviy shakllarini, mehnatni tashkil etish va unga haq to‘lashning ilg‘or metodlarini takomillashtirish muammolari bo‘yicha tadqiqotlarni kengaytirish va chuqurlashtirish;

qishloq aholisi turmush darajasini oshirish, ularning mehnat va maishiy sharoitlarini, ish bilan samarali band bo‘lishini yaxshilash, qishloqni ijtimoiy qayta qurish, atrof-muhit muhofazasi muammolarini tadqiq etish;

jahon fani va amaliyoti yutuqlaridan respublika dehqonchilik-sanoat kompleksini jadal rivojlantirish maqsadida foydalanish uchun ularni o‘rganish va umumlashtirish;

qishloq xo‘jaligi ishlab chiqarishining resurslarni tejovchi, tabiatni muhofaza qiluvchi, xomashyo resurslariga sanoat yo‘li bilan qayta ishlov beruvchi prinsipial yangi texnika va texnologiyalarni yaratish va mavjudlarini takomillashtirish;

g‘o‘za va boshqa qishloq xo‘jaligi ekinlarining dastlabki urug‘chiligini tashkil etish;

jamoa va davlat xo‘jaliklari dehqon (fermer) xo‘jaliklari, dehqonchilik-sanoat kompleksining boshqa korxonalari va tashkilotlari amaliyotida fan, texnika va ilg‘or tajriba yutuqlaridan eng to‘la foydalanishga har tomonlama ko‘maklashish;

O‘zbekistonning ilmiy muassasalari va oliy o‘quv yurtlarining idoraviy bo‘ysunishidan qat’i nazar, ularda olib borilayotgan dehqonchilik-sanoat sohasidagi tadqiqotlarni muvofiqlashtirish va ularga ilmiy-metodik rahbarlikni amalga oshirish;

ilmiy tadqiqotlarni tashkil etishning, tajriba-izlanish ishlarini o‘tkazishning progressiv metodlari va shakllarini egallagan yuqori malakali ilmiy kadrlar (fan doktorlari va nomzodlari) tayyorlash.

3. O‘zbekiston Qishloq xo‘jaligi fanlari akademiyasining I. H. Jo‘rabekov (rais), A. I. Imomaliyev, S. N. Usmonov, T. N. Guskova, V. I. Pleunev, M. Y. Islomov, M. M. Mirzayev, M. R. Nariyans, I. P. Makarov o‘rtoqlardan iborat tarkibdagi tashkiliy qo‘mitasi bir oy muddat ichida O‘zbekiston Qishloq xo‘jaligi fanlari akademiyasining haqiqiy a’zolari (akademiklar) va muxbir a’zolari saylovini o‘tkazish tartibini ishlab chiqsin va tasdiqlash uchun Vazirlar Mahkamasiga taqdim etsin.

4. O‘zbekiston Qishloq xo‘jaligi fanlari akademiyasi uchun haqiqiy a’zolar (akademiklar)ning 20 ta va muxbir a’zolarning 30 ta bo‘sh o‘rni belgilansin, haqiqiy a’zolikka (akademiklikka) nomzodlar uchun cheklangan yosh — 65 yoshgacha, muxbir a’zolikka nomzodlar uchun — 60 yoshgacha qilib belgilansin.

VASXNILning respublikada ishlovchi haqiqiy a’zolari (akademiklar) va muxbir a’zolari belgilangan o‘rin doirasida tegishli ravishda O‘zbekiston Qishloq xo‘jaligi fanlari akademiyasining akademiklari va muxbir a’zolari deb hisoblansin.

5. VASXNIL rayosatining O‘zbekiston Qishloq xo‘jaligi fanlari akademiyasining Prezidenti bir vaqtning o‘zida VASXNIL vitse-prezidenti hisoblanishi to‘g‘risidagi taklifi qabul qilinsin.

6. O‘zbekiston Respublikasi Fanlar akademiyasi va uning muassasalari xodimlari uchun belgilangan mehnatga haq to‘lash shartlari va amaldagi moddiy imtiyozlar O‘zbekiston Qishloq xo‘jaligi fanlari akademiyasi rayosati a’zolariga, rayosat apparati va akademiyaga qarashli ilmiy-tadqiqot muassasalari jamoalari xodimlariga tatbiq etilsin.

7. O‘zbekiston Respublikasi Iqtisodiyot qo‘mitasi, Moliya vazirligi O‘zbekiston Qishloq xo‘jaligi fanlari akademiyasi bilan birgalikda bir oy muddat ichida akademiya boshqaruv apparati sonini, ularni saqlashga hamda fundamental ilmiy-tadqiqot va tajriba-konstruktorlik ishlarini mablag‘ bilan ta’minlashga respublika budjetidan mablag‘larning zarur hajmlarini aniqlasinlar.

8. O‘zbekiston Qishloq xo‘jaligi fanlari akademiyasiga:

izlanish va amaliy tadqiqotlar o‘tkazish, eksperimental ishlarni keng joriy etish, Qishloq xo‘jaligi vazirligi, boshqa manfaatdor idoralar respublika dehqonchilik sanoat kompleksining korxonalari va tashkilotlari bilan shartnoma tuzish asosida yuqori malakali ilmiy kadrlar tayyorlash;

akademiyaning ilmiy-tadqiqot muassasalari, eksperimental bazalari va davlat xo‘jaliklarini moddiy-texnika resurslari bilan markazlashgan tartibda ta’minlash uchun xo‘jalik hisobidagi “O‘zagroakademta’minot” bazasini tashkil etish tavsiya qilinsin,

9. Mazkur qarorning bajarilishini nazorat qilish O‘zbekiston Respublikasi Prezidenti huzuridagi Vazirlar Mahkamasi Raisining birinchi o‘rinbosari o‘rtoq I. H. Jo‘rabekov zimmasiga yuklatilsin.

Shreder nomidagi ishlab chiqarish-ilmiy birlashmasi

“Soyuzxlopok” ilmiy-ishlab chiqarish birlashmasi

“G‘o‘za seleksiyasi va urug‘chiligi” ilmiy-ishlab chiqarish birlashmasi

“Don” ilmiy-ishlab chiqarish birlashmasi

“Plemelita” ilmiy-ishlab chiqarish birlashmasi

“Ipak” ilmiy-ishlab chiqarish birlashmasi

“O‘rtaosiyoqishloqxo‘jalikmexanizatsiyasi ilmiy-ishlab chiqarish birlashmasi

Qoraqalpog‘iston Respublikasidagi “Paxta” ilmiy-ishlab chiqarish birlashmasi

O‘zbekiston veterinariya ilmiy-tadqiqot instituti

O‘zbekiston sholikorlik ilmiy-tadqiqot instituti

O‘rta Osiyo qishloq xo‘jaligini tashkil etish va uning iqtisodiyoti ilmiy-tadqiqot instituti

O‘zbekiston sabzavot-poliz ekinlari va kartoshkachilik ilmiy-tadqiqot instituti

O‘rta Osiyo o‘simliklarni himoya qilish ilmiy-tadqiqot instituti

Samarqand shahridagi qorako‘lchilik ilmiy-tadqiqot instituti