Oʻzbekiston Respublikasi “Davlat bojxona xizmati toʻgʻrisida”gi Qonunining 6 va 7-moddalari, Oʻzbekiston Respublikasi Prezidentining 2012-yil 18-iyuldagi PF-4455-son “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi Farmoni, Oʻzbekiston Respublikasi Prezidentining 2011-yil 28-iyuldagi PQ-1588-son “Orol dengizining Oʻzbekiston qismiga tegishli mahsulot taqsimotiga oid Bitimni amalga oshirishni davom ettirishga oid qoʻshimcha chora-tadbirlar toʻgʻrisida”gi hamda 2013-yil 30-oktabrdagi PQ-2059-son “Orol dengizining Oʻzbekiston qismiga tegishli mahsulot taqsimotiga oid Bitimni amalga oshirishni davom ettirishga oid qoʻshimcha chora-tadbirlar toʻgʻrisida”gi qarorlari, Oʻzbekiston Respublikasi Vazirlar Mahkamasining 2013-yil 13-apreldagi 106-son “Oʻzbekiston Respublikasida tovarlar va transport vositalarini vaqtinchalik chetdan olib kelish (chetga olib chiqish) shartlari toʻgʻrisida”gi va 2014-yil 21-iyuldagi 199-son “Oʻzbekiston Respublikasida tashqi savdo operatsiyalari monitoringini takomillashtirishga doir qoʻshimcha chora-tadbirlar toʻgʻrisida”gi qarorlariga muvofiq Oʻzbekiston Respublikasi Davlat bojxona qoʻmitasi, Tashqi iqtisodiy aloqalar, investitsiyalar va savdo vazirligi hamda Iqtisodiyot vazirligi qaror qiladi:

1. Oʻzbekiston Respublikasi Davlat bojxona qoʻmitasi, Tashqi iqtisodiy aloqalar, investitsiyalar va savdo vazirligi hamda Iqtisodiyot vazirligining 2007-yil 5-sentabrdagi 01-02/12-27, EG-01/10-3960, 33-son qarori (roʻyxat raqami 1732, 2007-yil 22-oktabr) (Oʻzbekiston Respublikasi qonun hujjatlari toʻplami, 2007-y., 43-son, 438-modda) bilan tasdiqlangan 2006-yil 30-avgustdagi Orol dengizining Oʻzbekiston qismiga tegishli mahsulot taqsimotiga oid Bitimni bajarish doirasida Oʻzbekiston Respublikasi bojxona chegarasi orqali olib oʻtiladigan tovarlarning bojxona rasmiylashtiruvi qoidalariga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 1-bandning uchinchi va toʻrtinchi xatboshilaridan “Koreya Milliy Neft Korporatsiyasi,” va “, “Petronas Charigali Oversiz Sdn. Bxd.” degan soʻzlar chiqarib tashlansin.

2. 2-band oʻz kuchini yoʻqotgan deb topilsin.

3. 13-band quyidagi tahrirda bayon etilsin:

“13. Qaytariladigan tovarlarni vaqtincha olib kirish muddatini bojxona yuk deklaratsiyasida dastlab koʻrsatilgan muddatdan ortiq muddatga uzaytirish Oʻzbekiston Respublikasi Vazirlar Mahkamasining 2013-yil 13-apreldagi 106-son “Oʻzbekiston Respublikasida tovarlar va transport vositalarini vaqtinchalik chetdan olib kelish (chetga olib chiqish) shartlari toʻgʻrisida”gi qaroriga muvofiq amalga oshiriladi.”.

4. 17-band quyidagi tahrirda bayon etilsin:

“17. Bojxona rasmiylashtiruvi maqsadida sertifikatlanishi majburiy boʻlgan sarflanadigan tovarlarni sertifikatlashdan oʻtkazish Oʻzbekiston Respublikasi Vazirlar Mahkamasining 2004-yil 6-iyuldagi 318-son “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida” qarori va Oʻzbekiston Respublikasi hududiga sertifikatsiyalanishi majburiy boʻlgan tovarlarni (mahsulotlar)ni olib kirish tartibi toʻgʻrisidagi yoʻriqnomada (roʻyxat raqami 901, 2000-yil 26-fevral) belgilangan tartibda amalga oshiriladi.”.

5. Ushbu oʻzgartirishlar Oʻzbekiston Respublikasi Moliya vazirligi, Markaziy bank Boshqaruvi va Operator bilan kelishilgan.