Сабзавот, ҳўл мева, полиз маҳсулотлари, узум етиштиришни кўпайтириш, тайёрлаш, етиштирилган ҳосилни ўз вақтида ва нобуд қилмай қайта ишлаш ва сотиш, шунингдек, республика ташқарисида сотиш бозорларини кенгайтириш мақсадида Вазирлар Маҳкамаси қарор қилади:

1. Ўзбекистон Республикаси Макроиқтисодиёт ва статистика вазирлиги томонидан «Ўзмевасабзавотузумсаноатхолдинг» холдинг компанияси Ўзбекистон Республикаси Қишлоқ ва сув хўжалиги вазирлиги «Мевасабзавот»нинг ҳудудий бирлашмалари Деҳқон ва фермер хўжаликлари уюшмаси билан биргаликда ишлаб чиқилган 1998 йилда мева-сабзавот маҳсулотларининг асосий турларини етиштириш саноат турини қайта ишлаш, истеъмол ва экспорт қилишнинг 1, 1а, 1б, 1в, ва 1г-иловаларга* мувофиқ прогноз кўрсаткичлари маълумот учун қабул қилинсин.

Ўзбекистон Республикаси Макроиқтисодиёт ва статистика вазирлиги зарурат бўлганда хўжалик юритувчи субъектларнинг барча тоифаларини қамраб олувчи статистика ҳисоботи ва текшириш-қўшимча шаклларини жорий этган ҳолда 1999 йилдан бошлаб мева-сабзавот маҳсулотлари ва узум етиштириш ҳамда улардан фойдаланишнинг прогноз баланси ишлаб чиқилишини таъминласин.

2. Қорақалпоғистон Республикаси Вазирлар Кенгаши ва вилоятлар ҳокимликлари:

мева-сабзавот маҳсулотлари ва узум «Ўзмевасабзавотузумсаноатхолдинг» холдинг компаниясининг ихтисослаштирилган хўжаликларида ва «Мевасабзавот»нинг ҳудудий бирлашмаларида устувор етиштирилишини таъминласинлар, бунда прогноз балансига мувофиқ мева-сабзавот экинлари ва узум етиштириш учун зарур ер майдонлари ажратилишига алоҳида эътибор берсинлар.

«Ўзмевасабзавотузумсаноатхолдинг» холдинг компанияси Ўзбекистон Республикаси Қишлоқ ва сув хўжалиги вазирлиги Деҳқон ва фермер хўжаликлари уюшмаси Ташқи иқтисодий алоқалар вазирлиги Давлат божхона қўмитаси «Ўздавстандарт» маркази «Ўздавкарантин» Марказий банк ва тижорат банклари билан биргаликда ҳудудий комиссиялар ташкил этсинлар, уларга ҳўл мева-сабзавот маҳсулотлари етиштириш, уларни саноат йўли билан қайта ишлаш, ички бозорни тўлдиришни ва экспортни таъминлаш бўйича ишларни мувофиқлаштириш юклансин.

3. «Ўзмевасабзавотузумсаноатхолдинг» компанияси:

қўшимча ресурсларни қидириб топсин ва 1998 йилда қайта ишлаш бўйича ишлаб турган ишлаб чиқариш қувватларини иш билан таъминлашни ўтган йилги даражага нисбатан: сабзавотлар бўйича 2 баравар ҳўл мева бўйича 16 баравар узум бўйича 13 баравар кўпайтиришни таъминласин;

бир ой муддатда мева-сабзавот маҳсулотларини қайта ишлаш бўйича ишлаб турган қувватларни қайта рўйхатдан ўтказсин, уларни қайта ихтисослаштириш ва замонавийлаштириш, шунингдек инвестиция лойиҳалари тугалланиши ва Вазирлар Маҳкамасининг 1997 йил 18 июлдаги 363-сон қарори билан тасдиқланган маҳсулотлар экспортини ривожлантириш дастури бажарилиши бўйича қўшимча чора-тадбирлар комплексини ишлаб чиқсин;

2000 йилда тизимнинг қайта ишлаш корхоналарининг ишлаб чиқариш қувватларидан фойдаланиш даражасини камида сабзавотлар бўйича 70 фоизга, ҳўл мева бўйича 60 фоизга, узум бўйича 85 фоизга етказишни таъминласин;

бир ой муддатда Вазирлар Маҳкамасига хорижий инвестициялар ва технологияларни жалб этиш хорижий инвесторлар билан биргаликда қўшма корхоналар ташкил этиш 1998—2000 йилларда ишлаб чиқаришни замонавийлаштириш ва янгилаш бўйича аниқ дастурни киритсин.

4. Белгилансинки, ҳўл мева-сабзавот маҳсулотларини марказлаштирилмаган ҳолда экспорт қилиш туманлар ва шаҳарлар ҳокимликлари томонидан 2-иловага мувофиқ тартибда бериладиган рухсатномалар асосида амалга оширилади. Ҳокимликлар тегишли рухсатномаларни беришда ички бозор эҳтиёжларини устувор таъминлаш заруриятидан келиб чиқсинлар.

Зарур ҳужжатларни тезликда расмийлаштиришга кўмаклашиш мақсадида Қорақалпоғистон Республикаси Вазирлар Кенгаши ва вилоятлар ҳокимликлари ҳар бир туман ва шаҳар ҳокимлиги ҳузурида банклар божхона хизматлари «Ўздавстандарт» марказининг минтақавий органлари карантин ва эпидемиология хизматларининг масъул ходимларидан иборат ишчи гуруҳлар ташкил этсинлар.

5. Белгилаб қўйилсинки, ҳўл мева-сабзавот маҳсулотлари юридик шахслар томонидан четга олиб чиқилишида:

харидорнинг импорт қилувчилар банк органлари ёки минтақалари маъмуриятлари томонидан тасдиқланган кафолат мажбуриятлари мавжудлиги етказиб берилган маҳсулот учун пул ёки моддий-техника ресурсларининг ўз вақтида тушиши хизмат кўрсатувчи банкда контрактларни рўйхатдан ўтказишнинг шарти ҳисобланади;

Истисно ҳолларда Қорақалпоғистон Республикаси Вазирлар Кенгашининг вилоятлар ва Тошкент шаҳар ҳокимликларининг қарорларига кўра муқобил банк кафолатлари тақдим этилган ёки ишлаб чиқариш-техника мақсадларидаги товарлар олдиндан етказиб берилган тақдирда, шунингдек валюта маблағларининг бир қисми белгиланган тартибда Ўзбекистон Республикасининг ваколатли банкига мажбурий сотилганда бартер контрактлар тузилиши мумкин.

6. Деҳқон ва фермер хўжаликлари уюшмаси аъзолари томонидан мева-сабзавот маҳсулотларини четга чиқаришга ҳужжатларни расмийлаштириш Ўзбекистон Республикаси Вазирлар Маҳкамасининг 1998 йил 22 апрелдаги 168-сон қарорига мувофиқ ишлаб чиқилган ва Ўзбекистон Республикаси Адлия вазирлигида 1998 йил 2 июлда 450-рақами билан рўйхатдан ўтказилган тартиб асосида амалга оширилиши маълумот учун қабул қилинсин.

Белгилансинки, Деҳқон ва фермер хўжаликлари уюшмаси аъзолари мева-сабзавот маҳсулотларини четга чиқаришга рухсатномани тегишли туман ва шаҳар ҳокимликларидан оладилар.

7. Қорақалпоғистон Республикаси Вазирлар Кенгаши ва вилоятлар ҳокимликлари Ўзбекистон Республикаси Макроиқтисодиёт ва статистика вазирлигига мева-сабзавот маҳсулотлари республика ташқарисига жўнатилганлиги тўғрисидаги тезкор маълумотларни ҳар ойнинг 1 ва 16-кунларида 3-иловага* мувофиқ шакл бўйича тақдим этсинлар.

8. Ўзбекистон Республикаси Ички ишлар вазирлиги (З. Алматов) ҳўл мева-сабзавот маҳсулотлари ва уларни қайта ишлашдан олинган маҳсулотлар ортилган автотранспорт республика ҳудудида тўсиқсиз ҳаракат қилишини таъминласин.

9. «Ўзбекистон темир йўллари» давлат акциядорлик компанияси (Н. Э. Эрметов) ва «Ўзбекистон ҳаво йўллари» миллий авиакомпанияси (А. Р. Рўзметов) юқорида баён қилиб ўтилган Тартибга мувофиқ жўнатиш ҳужжатларининг ўз вақтида берилишини ва юк топширилган кундан бошлаб икки кеча-кундуздан ортиқ бўлмаган муддатда мева-сабзавот маҳсулотларини жўнатувчига транспорт воситалари ажратилишини таъминласинлар.

10. «Ўзмевасабзавотузумсаноатхолдинг» холдинг компаниясининг қайта ишловчи корхоналарининг ва «Мевасабзавот» ҳудудий бирлашмаларининг саноат йўли билан қайта ишлашга йўналтирилаётган мева-сабзавот маҳсулотларини харид қилиш учун айланма маблағларини тўлдириш мақсадида Ўзбекистон Республикаси Молия вазирлиги ва Давлат солиқ қўмитаси:

муддатида тўланмаган тўловлар ва бюджетга тўловлар бўйича ҳисобланган пеняларни 1998 йил 1 июлда шаклланган ҳолатига кўра ҳисобдан чиқарсинлар;

бўшаб қолган маблағларни мева-сабзавот маҳсулотлари ва узум тайёрлашга мақсадли йўналтирган ҳолда 1998 йил август-сентябрь ойлари учун «Ўзмевасабзавотузумсаноатхолдинг» холдинг компанияси ва «Мевасабзавот» бирлашмаси корхоналарига ҳисобланган бюджетга тўловларни (акциз солиғидан ташқари) истисно тариқасида 1998 йил 1 октябргача кечиктирсинлар. Муддати кечиктирилган тўловлар 1999 йил январь ойидан бошлаб 3 ой давомида тенг улушларда тўлансин.

«Пахта-банк» ва бошқа тижорат банкларининг:

берилган кредитлар бўйича 1998 йил 1 январдаги ҳолатига кўра ҳисобланган муддати ўтказиб юборилган фоизларни тижорат банкларининг ўз ресурслари ҳисобига ҳисобдан чиқариш ҳақидаги;

корхонанинг ссуда қарзларини қайтариш муддатларини 1998 йил 1 августдан бошлаб 6 ойга узайтириш ҳақида.

1998 йил 1 августдан бошлаб 6 ойга узайтириш ҳақида қайта тайёрлаш учун ишлатиладиган 1998 йил ҳосили мева-сабзавот маҳсулотларини тайёрлашга Марказий банкнинг қайта маблағ билан таъминлаш ставкасидан кўп бўлмаган фоизли ставка билан биринчи навбатда кредит бериш тўғрисидаги таклифлари қабул қилинсин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И. Х. Жўрабеков зиммасига юклансин.

1. Мазкур Тартиб Деҳқон ва фермер хўжаликлари уюшмаси аъзоси бўлмаган Ўзбекистон Республикаси резидентлари бўлган юридик ва жисмоний шахслар томонидан ҳўл мева-сабзавот маҳсулотлари четга олиб чиқилишига жорий этилади.

2. Деҳқон ва фермер хўжаликлари уюшмаси аъзолари томонидан мева-сабзавот маҳсулотлари четга олиб чиқилиши Ўзбекистон Республикаси Адлия вазирлиги томонидан 1998 йил 2 июлда 450-рақами билан рўйхатдан ўтказилган тартибда расмийлаштирилади.

3. Экспорт қилувчи ҳўл мева-сабзавот маҳсулотларини четга чиқариш мақсадида тегишли рухсатнома олиш учун туман ёки шаҳар ҳокимлигига буюртманома беради. Буюртманомага қуйидагилар илова қилинади:

а) Ташқи иқтисодий алоқалар вазирлиги томонидан берилган ташқи иқтисодий фаолият билан шуғулланиш ҳуқуқини берувчи рухсатнома;

б) импорт қилувчининг мамлакати банкининг ёки импорт қилувчилар минтақалари маъмуриятининг кафолат мажбуриятлари билан тасдиқланган импорт қилувчи харидор билан тузилган контракт.

Истисно ҳолларда экспорт қилувчи бартер битими тузиш учун Қорақалпоғистон Республикаси Вазирлар Кенгаши вилоятлар ва Тошкент шаҳар ҳокимликларининг рухсатномасини олиши шарт. Бундай рухсатнома улар томонидан етказиб берилаётган маҳсулот учун пул ёки моддий-техника ресурслари ўз вақтида тушганлиги тўғрисидаги импорт қилувчилар минтақалари банк ташкилотлари ёки маъмурияти томонидан тасдиқланган харидорнинг кафолат мажбуриятлари мавжуд бўлган тақдирда берилади.

4. Туман ёки шаҳар ҳокимлиги бир кеча-кундузда буюртманомани кўриб чиқади ва мазкур Тартибга иловага мувофиқ шакл бўйича у ҳақда тегишли қарор қабул қилади.

5. Экспорт қилувчи ҳокимлик ҳузурида ташкил этилган тезкор гуруҳ ёрдамида:

а) ўз контрактини хизмат кўрсатувчи банкда рўйхатдан ўтказади. Банк контракт тақдим этилган кундан бошлаб икки кеча-кундуздан кечикмай контрактни рўйхатдан ўтказиши керак;

б) қуйидагиларни:

«Ўздавстандарт» марказининг маҳаллий органларидан мувофиқлик сертификатини;

Ўзбекистон Республикаси Ташқи иқтисодий алоқалар вазирлигининг маҳаллий экспертиза органларидан ТС-1 шакл бўйича маҳсулотнинг келиб чиқиши сертификатини (тез бузиладиган маҳсулотлардан ташқари);

«Ўздавкарантин» бўлинмаларидан фитосанитария сертификатини олади.

Барча сертификатлар зарур ҳужжатлар тақдим этилгандан кейин бир кеча-кундуз давомида берилади.

6. Экспорт қилувчи фойдаланиладиган транспортга қараб уни олиш учун «Ўзбекистон темир йўллари» давлат акциядорлик компанияси ёки «Ўзбекистон ҳаво йўллари» миллий авиакомпаниясининг ҳудудий бўлинмаларига мурожаат қилади, бунинг учун:

буюртманомани;

ҳокимликнинг рухсатномасини;

контрактни тақдим этади.

Транспорт компаниялари ташиш ҳужжатлари (юкхатлари)ни ҳужжатлар тақдим этилган кундан бошлаб икки кеча-кундузда расмийлаштиришлари ва беришлари шарт.

7. Экспорт қилувчи фойдаланиладиган транспортга қараб юкни жўнатишни расмийлаштириш мақсадида темир йўл станциясига ёки аэропортга мурожаат қилади, бунинг учун уларга ташиш ҳужжатлари (юкхатлари) тақдим этилади.

8. Экспорт қилувчи ҳокимликнинг тезкор гуруҳи ёрдамида Давлат божхона қўмитасининг маҳаллий бўлимида юк экспортини расмийлаштиради, бунинг учун юк божхона декларациясини тўлдиради ва:

а) контрактни;

б) ҳокимликнинг рухсатномасини;

в) фитосанитария сертификатини тақдим этади.