1-модда. «Ўзбекистон Республикасида коммунал, маиший ва савдо соҳасида хизмат кўрсатган ходим» фахрий унвони негизида «Ўзбекистон Республикасида хизмат кўрсатган коммунал хўжалиги ходими» фахрий унвони таъсис этилсин.

2-модда. Ўзбекистон Республикасининг 1995 йил 22 декабрда қабул қилинган «Давлат мукофотлари тўғрисида»ги 176-I-сонли Қонуни (Ўзбекистон Республикасининг 2018 йил 11 апрелда қабул қилинган ЎРҚ-473-сонли Қонуни таҳририда) (Ўзбекистон Республикаси Олий Мажлиси палаталарининг Ахборотномаси, 2018 йил, № 4, 221-модда; 2019 йил, № 9, 589-модда; 2020 йил, № 3, 200-модда, № 5, 299, 300-моддалар, № 6, 334-модда, № 12, 688-модда; 2021 йил, 4-сонга илова; 2022 йил, № 8, 790-модда; 2024 йил, № 8, 832-модда; 2025 йил, № 3, 374-модда) 7-моддаси биринчи қисмининг ўн учинчи хатбошиси қуйидаги таҳрирда баён этилсин:

«Ўзбекистон Республикасида хизмат кўрсатган коммунал хўжалиги ходими».

3-модда. Ўзбекистон Республикасининг 1996 йил 26 апрелда қабул қилинган «Ўзбекистон Республикасининг фахрий унвонларини таъсис этиш тўғрисида»ги 226-I-сонли Қонунига (Ўзбекистон Республикаси Олий Мажлисининг Ахборотномаси, 1996 йил, № 5-6, 64-модда; 1997 йил, № 2, 64-модда; 1998 йил, № 5-6, 114-модда, № 9, 164-модда; 2000 йил, № 5-6, 153-модда; Ўзбекистон Республикаси Олий Мажлиси палаталарининг Ахборотномаси, 2020 йил, № 12, 688-модда; 2022 йил, № 5, 464-модда; 2024 йил, № 8, 832-модда; 2025 йил, № 3, 374-модда, № 10, 1155-модда) қуйидаги ўзгартиришлар киритилсин:

1) 1-модданинг ўн учинчи хатбошиси қуйидаги таҳрирда баён этилсин:

«Ўзбекистон Республикасида хизмат кўрсатган коммунал хўжалиги ходими»;

2) Ўзбекистон Республикасининг фахрий унвонлари тўғрисидаги Низомнинг ўн учинчи хатбошиси қуйидаги таҳрирда баён этилсин:

«Ўзбекистон Республикасида хизмат кўрсатган коммунал хўжалиги ходими» фахрий унвони бирлашмалар, ташкилотлар ва муассасаларнинг уй-жой коммунал хўжалиги соҳасини ривожлантиришга муносиб ҳисса қўшган, ўз меҳнати билан юксак касбий маҳоратини намоён этган ҳамда аҳолига хизмат кўрсатиш ишини яхшилашда алоҳида хизмат кўрсатган ходимларига берилади»;

3) Ўзбекистон Республикаси фахрий унвонларининг кўкрак нишонлари тавсифидаги «Ўзбекистон Республикасида коммунал, маиший ва савдо соҳасида хизмат кўрсатган ходим» фахрий унвонининг кўкрак нишонига оид тавсиф қуйидаги таҳрирда баён этилсин:

Кўкрак нишони диаметри 30 миллиметрли доира шаклида бўлади ва 925 пробали кумушдан тайёрланади. Нишоннинг қалинлиги 2,2 миллиметр.

Нишоннинг ҳошияланган текис юз томонида ўртароқда аҳолига коммунал хизмат кўрсатишнинг рамзи сифатида марказда кўп квартирали уй, пастки ўнг чеккасида дафна новдаси тасвирланган. Нишоннинг айланаси бўйлаб «XIZMAT KOʻRSATGAN KOMMUNAL XOʻJALIGI XODIMI» деган ёзув жойлашган.

Нишоннинг орқа томонида Ўзбекистон Республикасининг Давлат герби тасвирланган.

Тасвирлар ва ёзув қабариқ.

Кўкрак нишони ички қисмига Ўзбекистон Республикасининг Давлат байроғи рангларидаги шойи лента сирилган қадағичга халқа ва илмоқча ёрдамида уланади.

Қадағичнинг бўйи 16 миллиметр, эни 25 миллиметр.

Қадағичнинг орқа томонига нишонни кийимга тақиб қўйиш учун тўғноғич кўринишидаги мослама ўрнатилган».

4-модда. Ўзбекистон Республикаси Қурилиш ва уй-жой коммунал хўжалиги вазирлиги ҳамда бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

5-модда. Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

6-модда. Ушбу Қонун расмий эълон қилинган кундан эътиборан кучга киради.