Oʻzbekiston Respublikasi Prezidenti huzuridagi Ijtimoiy himoya milliy agentligi va Serbiya Respublikasi Mehnat, bandlik, faxriylar va ijtimoiy masalalar vazirligi (keyingi oʻrinlarda “Ishtirokchilar” deb ataluvchilar),

ikki davlat oʻrtasidagi oʻzaro hamkorlikni mustahkamlash va umumiy sheriklikni chuqurlashtirishga hissa qoʻshish istagida,

quyidagi oʻzaro anglashuvga erishdilar:

Ishtirokchilar oʻz hamkorligi nogironligi boʻlgan shaxslarning maqomini himoya qilish va ragʻbatlantirishga hamda ikki muassasa oʻrtasidagi oʻzaro anglashuvni chuqurlashtirishga hissa qoʻshishiga intiladilar.

Oʻz vakolatlari doirasida va milliy qonunchiligiga muvofiq, Ishtirokchilar siyosat, huquqiy va institutsional asoslarni takomillashtirish; qulay, shaxsga yoʻnaltirilgan va jamoaga asoslangan ijtimoiy xizmatlar; mustaqil yashashni qoʻllab-quvvatlash, mehnat qobiliyatini baholash, kasbiy reabilitatsiya, bandlik va ijtimoiy hayotda ishtirok etish; axborot, aloqa, davlat xizmatlari va jismoniy muhitning qulayligi; hamda nogironlik inklyuziyasi sohasida kasbiy salohiyatni oshirish yoʻnalishlarida hamkorlikni rivojlantiradilar.

Zarur hollarda, Ishtirokchilar oʻz vakolatlariga kiradigan nogironligi boʻlgan shaxslarning maqomini ragʻbatlantirish va himoya qilishga oid boshqa masalalarni ham koʻrib chiqishlari mumkin.

Ishtirokchilar qonunchilik, siyosat hujjatlari, metodologiyalar va tahliliy materiallar almashish; konferensiya, seminar, oʻquv dasturlari va oʻrganish tashriflarini oʻtkazish; ekspertlar almashish; hamda qoʻshma dastur va loyihalarni ishlab chiqish orqali hamkorlik qiladilar.

Ishtirokchilar mazkur Memorandum maqsadlariga erishish uchun tegishli boʻlgan hollarda, bandlik masalalari boʻyicha vakolatli tashkilotlar, nogironligi boʻlgan shaxslar tashkilotlari, ijtimoiy xizmat koʻrsatuvchilar, ilmiy-tadqiqot muassasalari, fuqarolik jamiyati va xalqaro tashkilotlar vakillarini tegishli tadbirlarda ishtirok etishga taklif qilishlari mumkin.

Ishtirokchilar mazkur Memorandum qamrab olgan mavzular boʻyicha axborot va baholarni almashish maqsadida yiliga kamida ikki marta, oʻzaro kelishilgan shakl va tartibda uchrashuvlar oʻtkazadilar.

Mazkur Memorandum doirasidagi hamkorlik uchun ish tillari serb va oʻzbek tillari, oʻzaro kelishilgan hollarda esa ingliz tili ham boʻladi.

Mazkur Memorandum qoidalari Ishtirokchilarga nogironligi boʻlgan shaxslarning maqomini yaxshilash va himoya qilishga oid umumiy manfaatlarga ega boshqa masalalar boʻyicha kelishib olishlariga toʻsqinlik qilmaydi.

Ishtirokchilar, agar yozma ravishda boshqacha kelishilmagan boʻlsa, mazkur Memorandumni amalga oshirish bilan bogʻliq xarajatlarni mustaqil ravishda qoplaydilar.

Mazkur Memorandum xalqaro shartnoma hisoblanmaydi hamda xalqaro huquq bilan tartibga solinadigan huquq yoki majburiyatlar yuzaga keltirmaydi.

Mazkur Memorandumga Ishtirokchilarning oʻzaro roziligi bilan oʻzgartirishlar kiritilishi mumkin.

Ishtirokchilar oʻrtasida mazkur Memorandum qoidalarini talqin qilish yoki qoʻllashda yuzaga keladigan har qanday kelishmovchiliklar ikkala Ishtirokchining vakillari oʻrtasidagi maslahatlashuvlar yoki muzokaralar yoʻli bilan hal etiladi.

Mazkur Memorandum imzolangan sanadan boshlab 30 kun oʻtgach amal qila boshlaydi.

Mazkur Memorandum Ishtirokchilardan biri boshqa Ishtirokchiga yozma xabarnoma yuborish orqali uni toʻxtatmagunga qadar amalda boʻladi. Mazkur Memorandum boshqa Ishtirokchi bunday xabarnomani olganidan keyin uch oy oʻtgach amal qilishdan toʻxtaydi.

Belgrad shahrida, 2026-yil 8 sentabr kuni, ikki nusxada, har biri oʻzbek, serb va ingliz tillarida imzolandi, bunda barcha matnlar teng autentikdir. Talqin qilishda kelishmovchiliklar yuzaga kelgan taqdirda, ingliz tilidagi matndan foydalaniladi.