Aholi sonining yildan-yilga ortib borayotgani, suv resurslariga bo‘lgan talabning oshishi hamda iqlim o‘zgarishi natijasida suv tanqisligining kuchayib borayotgani mamlakatimiz ijtimoiy-iqtisodiy rivojlanishiga salbiy ta’sir ko‘rsatuvchi omillardan biri hisoblanadi.

Shu munosabat bilan respublikamizda suv resurslaridan foydalanish mexanizmlarini tubdan takomillashtirish, ulardan oqilona va samarali foydalanishni ta’minlash, iqtisodiyot tarmoqlarida suv tejovchi texnologiyalarni keng joriy etish hamda sug‘oriladigan yerlarning meliorativ holatini yaxshilash borasida tizimli chora-tadbirlar amalga oshirilmoqda.

Xususan, O‘zbekiston Respublikasining Suv kodeksi, O‘zbekiston Respublikasi Prezidentining 2024-yil 5-yanvardagi PQ-5-sonli “Quyi bo‘g‘inda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari to‘g‘risida”gi qarori bilan ushbu yo‘nalishda muhim vazifalar belgilab berilgan.

Shu bilan birga, tumanda 2026-yil sug‘orish mavsumida mavjud suv resurslaridan oqilona foydalanish, sug‘orish tarmoqlarida suv yo‘qotilishini kamaytirish hamda qishloq xo‘jaligi ekinlarini yetishtiruvchilarga ajratiladigan suv hajmlarini cheklangan suv resurslaridan kelib chiqib belgilash zarurati yuzaga kelmoqda.

Yuqoridagilardan kelib chiqib, O‘zbekiston Respublikasining “Mahalliy davlat hokimiyati to‘g‘risida”gi Qonunining 6- va 24-moddalariga muvofiq, xalq deputatlari Sho‘rchi tumani Kengashi qaror qiladi:

1. O‘zbekiston Respublikasi Prezidentining 2024-yil 5-yanvardagi PQ-5-sonli qarori ijrosini ta’minlash maqsadida Sho‘rchi tumani “Suv yetkazib berish xizmati” davlat muassasasining 2026-yil 19-martdagi 01-569-sonli xati inobatga olinsin.

2. Sho‘rchi tumanida 2026-yil sug‘orish davrida yakuniy iste’molchilar kesimida ekinlarini sug‘orish uchun suv olish limitlarini ko‘rib chiqish va tasdiqlash yuzasidan tuman “Suv yetkazib berish xizmati” davlat muassasasi direktori O. Ismoilovning hisoboti ma’lumot uchun qabul qilinsin.

3. Tumanda 2026-yil sug‘orish davrida yakuniy iste’molchilar kesimida ekinlarini sug‘orish uchun suv olish limitlari quyidagicha tasdiqlansin: Sho‘rchi tumanidagi “Suv yetkazib berish xizmati” davlat muassasasi tomonidan suv iste’molchilariga 2026-yil sug‘orish davri uchun ajratilgan suv limitlari 1, 2, 3-ilovalarga muvofiq tasdiqlansin.

4. Tuman hokimining qishloq va suv xo‘jaligi masalalari bo‘yicha o‘rinbosari (S. Saidahmedov) hamda tuman “Suv yetkazib berish xizmati” davlat muassasasi (O. Ismoilov)ga:

cheklangan suv limitlarini inobatga olgan holda, suv resurslaridan oqilona foydalanish maqsadida ekin maydonlariga, ayniqsa takroriy ekin maydonlariga suvni kam talab qiladigan qishloq xo‘jaligi ekinlarini joylashtirish choralarini ko‘rish;

tuman hududiga olinadigan suv resurslarini aniq hisobga olish hamda yer maydonlaridan kelib chiqib adolatli taqsimlash;

suv iste’molchilari tomonidan limit asosida olingan suv resurslari hisobini yuritish va belgilangan tartibda soliq organlariga o‘z vaqtida taqdim etib borish vazifalari yuklatilsin

5. Xalq deputatlari tuman Kengashining Agrar, suv xo‘jaligi va ekologiya masalalari bo‘yicha doimiy komissiyasi (A. Qudratov)ga:

joylarga chiqqan holda suv iste’molchilari tomonidan suv resurslaridan samarali foydalanilishi yuzasidan deputatlik nazoratini o‘rnatish;

har oy yakunlari bo‘yicha suv limitidan ortiqcha foydalangan iste’molchilarni komissiya yig‘ilishlariga jalb etish hamda ularning hisobotlarini eshitish;

2026-yil davomida mazkur masala yuzasidan mutasaddi tashkilotlar rahbarlarining hisobotlarini Kengash sessiyasi kun tartibiga kiritishni nazoratga olish topshirilsin.

6. Tuman hokimligi matbuot xizmati (N. Shoyeva) hamda tuman “Suv yetkazib berish xizmati” davlat muassasasi (O. Ismoilov)ga mazkur qarorning mazmun-mohiyatini, suv resurslaridan oqilona foydalanish, suvni tejash madaniyatini oshirish va “suv — tekin” tushunchasidan voz kechish bo‘yicha amalga oshirilayotgan chora-tadbirlarni ommaviy axborot vositalari va ijtimoiy tarmoqlarda keng yoritish tavsiya etilsin.

7. Mazkur qarorning ijrosini ta’minlash tuman hokimining qishloq va suv xo‘jaligi masalalari bo‘yicha o‘rinbosari (S. Saidahmedov) ,tuman “Suv yetkazib berish xizmati” davlat muassasasi (O. Ismoilov) zimmasiga yuklatilsin.

8. Mazkur qarorning ijrosini nazorat qilish esa Xalq deputatlari tuman Kengashining Agrar, suv xo‘jaligi va ekologiya masalalari bo‘yicha doimiy komissiyasi (A. Qudratov) zimmasiga yuklatilsin.

9. Ushbu qaror qabul qilingan kundan kuchga kiradi.