Тошкент шаҳри маҳаллаларининг инфратузилмасини ривожлантириш, ҳаво ҳарорати кескин совиб кетиши даврида талафот кўрган маҳаллалардаги ички йўллар, пиёдалар йўлаклари, муҳандислик-коммуникация объектларини таъмирлаш мақсадида:

1. Иқтисодиёт ва молия вазирлиги ҳамда Тошкент шаҳар ҳокимлигининг Тикланиш ва тараққиёт жамғармаси (кейинги ўринларда — Жамғарма) ҳисобидан Тошкент шаҳри маҳаллаларининг инфратузилмасини ривожлантириш, ҳаво ҳарорати кескин совиб кетиши даврида талафот кўрган маҳаллалардаги ички йўллар, пиёдалар йўлаклари, муҳандислик-коммуникация объектларини таъмирлаш, ҳамда болалар ва спорт майдончаларини қуриш, маҳалла ҳудудида микро хиёбонлар ташкил этиш, ирригация ишлари, кўп қаватли уйларнинг том ва фасад қисмларини таъмирлаш ҳамда аҳоли кайфияти ва яшаш сифатига ижобий таъсир қилувчи ободонлаштириш, таъмирлаш ва бошқа қурилиш ишлари учун Тошкент шаҳар ҳокимлигига 584 миллиард сўм миқдорида фоизсиз кредит ажратиш тўғрисидаги таклифи маъқуллансин.

Белгилансинки, мазкур кредит маблағларининг 200 миллиард сўми 2023 йилнинг IV чорагида, 384 миллиард сўми 2024 йилнинг ҳар чорагида тенг улушларда Тошкент шаҳар маҳаллий бюджетининг қўшимча манбалари ҳисобидан Жамғармага қайтарилади.

1¹. Иқтисодиёт ва молия вазирлиги икки ҳафта муддатда Тошкент шаҳри маҳаллалардаги ички йўллар, пиёдалар йўлаклари, муҳандислик-коммуникация объектларини таъмирлаш, болалар ҳамда спорт майдончаларини қуриш, маҳалла ҳудудида микро хиёбонлар ташкил этиш, ирригация ишлари, кўп қаватли уйларнинг том ва фасад қисмларини таъмирлаш ҳамда аҳоли кайфияти ва яшаш сифатига ижобий таъсир қилувчи ободонлаштириш, таъмирлаш ва бошқа қурилиш ишлари учун Тошкент шаҳар маҳаллий бюджетига Ўзбекистон Республикаси республика бюджети ҳисобидан 211 миллиард сўм миқдорида ажратсин.

2. Тошкент шаҳар ҳокимлиги мазкур қарорнинг 1 ва 1¹-бандларга мувофиқ ажратилган маблағлар ҳисобидан Тошкент шаҳридаги маҳаллаларга амалга ошириладиган қурилиш, таъмирлаш ва ободонлаштириш ишларидан келиб чиқиб маблағ ажратсин.

Тошкент шаҳрининг туман ҳокимликлари маҳаллалар раислари билан биргаликда маҳаллаларнинг инфратузилмасини ривожлантириш бўйича амалга ошириладиган лойиҳаларнинг рўйхатларини халқ депутатлари туман Кенгашлари йиғилишида муҳокама қилиб, тасдиқласин.

3. Мазкур қарорнинг ижросини назорат қилиш Ўзбекистон Республикаси Бош вазири А.Н. Арипов зиммасига юклансин.