«Тошкент шаҳар йўловчилар ташиш транспортини бошқаришни такомиллаштириш тўғрисида» 1992 йил 4 июндаги Фармонга мувофиқ ва йўловчилар ташиш транспорти ишини тубдан яхшилаш, йўловчиларга хизмат кўрсатиш сифати ва маданиятини ошириш, хизматларнинг турларини кенгайтириш ҳамда меҳнат жамоаларининг молиявий, ишлаб чиқариш, ижтимоий вазифаларини ҳал этиш мақсадида Вазирлар Маҳкамаси қарор қилади:

1. Белгилаб қўйилсинки, бирлашмалар, корхоналар ва ташкилотларнинг фаолияти ҳамда уюшма Бошқаруви билан ва ўзаро муносабатлар уюшма Устави ва таъсис шартномалари билан тартибга солинади, бунда уларнинг юридик ва хўжалик мустақиллиги сақлаб қолинади.

2. Белгилаб қўйилсинки, Тошкент шаҳар йўловчилар ташиш транспорти корхоналари давлат уюшмаси:

мустақил ишлаб чиқариш-хўжалик комплекси ҳисобланади, ўз фаолиятида Ўзбекистон Республикаси қонунларига, Ўзбекистон Республикаси Президенти фармонларига, Вазирлар Маҳкамасининг қарорлари ва фармойишларига, уюшма Уставига амал қилади ҳамда Тошкент шаҳар ҳокимлиги билан ҳамкорлик қилади;

ўзига юклатилган вазифа ва функцияларнинг зарур тартибда бажарилиши учун Вазирлар Маҳкамаси, Тошкент шаҳар ҳокимлиги ва уюшма таркибига қирувчи бўлинмалар олдида жавоб беради;

ўзига қарашли бирлашмалар, корхоналар ва ташкилотларнинг мол-мулкини бошқаради, Ўзбекистон Республикасининг амалдаги қонунларига мувофиқ уларни тузади, қайта ташкил этади ва тугатади;

Тошкент шаҳар ҳокимлиги билан тузилган шартнома асосида йўловчилар ташиш транспортининг турларини янада ривожлантириш ва йўловчиларга хизмат кўрсатиш тизимини такомиллаштириш, хизматларнинг ҳажмлари ва турларини кенгайтириш бўйича комплекс чора-тадбирларни ишлаб чиқади ва уларнинг бажарилишини таъминлайди;

ўзига қарашли бирлашмалар, корхоналар ва ташкилотларнинг моддий-техника таъминоти хизматлари ишини таъминлайди, шунингдек, материаллар, асбоб-ускуналар, эҳтиёт қисмлар, ҳаракатдаги состав ва бошқа техникавий воситаларни кооперация йўли билан етказиб беришни ривожлантириш чора-тадбирларини ишлаб чиқади ва уларнинг амалга оширилишига кўмаклашади.

3. Уюшма бошқарувининг юқори органи Кенгаш ҳисобланади. Уюшма Кенгаши бошқарувни сайлайди, тузилмани, унинг ходимлари меҳнатига ҳақ тўлаш ва уларни рағбатлантириш тизимини белгилайди.

Уюшма бошқарувининг Раиси ва унинг ўринбосарлари уюшма Кенгаши ва Тошкент шаҳар ҳокимлигининг тавсияси бўйича Ўзбекистон Республикаси Президенти ҳузуридаги Вазирлар Маҳкамаси томонидан тайинланади.

4. Уюшма бошқарувининг Раиси, биринчи ўринбосари ва ўринбосарлари мақоми, маиший таъминоти, тиббий ва транспорт хизмати кўрсатиш бўйича тегишли равишда Ўзбекистон Республикаси вазири, вазирнинг биринчи ўринбосари ва ўринбосарларига тенглаштирилсин.

5. Молия вазирлиги, республика Автомобиль транспорти вазирлиги ва Тошкент шаҳар ҳокимлиги Тошкент шаҳар йўловчилар ташиш транспорти корхоналари давлат уюшмаси билан биргаликда бир ой муддат ичида шаҳар пассажир транспорти турлари бўйича пулли хизмат кўрсатиладиган бир йўловчи ҳисобига бюджетдан маблағ ажратиш нормативларини ишлаб чиқсинлар ва уюшмани маблағ билан таъминлаш тартибини тасдиқласинлар, бунда йил давомида фойдаланилмаган бюджет маблағлари мусодара қилинмаслиги назарда тутилсин.

6. Ўзбекистон Республикаси Меҳнат вазирлиги Молия вазирлиги, Автомобиль транспорти вазирлиги ва Давлат уюшмаси билан биргаликда бир ҳафта муддат ичида меҳнат сарфи ва иш шароитларидан келиб чиқиб, транспортнинг турлари ўртасида меҳнатга ҳақ тўлаш нисбатини тенглаштиришни ҳисобга олган ҳолда йўловчилар ташиш автомобиль ва электр транспорти ходимлари меҳнатига ҳақ тўлашнинг янги шартларини ишлаб чиқсин ва уни 1992 йил 16 июндан бошлаб жорий этсин.

7. Уюшма 1992 — 1994 йиллар мобайнида ҳаракатдаги транспорт билан боғлиқ ходимларни формали кийим билан таъминлаш тартибини ишлаб чиқсин ва Ўзбекистон Республикаси Молия вазирлиги билан келишган ҳолда уни маблағ билан таъминлаш манбаини тасдиқласин.

8. Ўзбекистоннинг тараққиёт истиқболини белгилаш қўмитаси, Ўзбекистон Республикаси Молия вазирлиги, Ташқи иқтисодий алоқалар вазирлиги уюшма билан биргаликда 15 кун ичида Вазирлар Маҳкамасига:

импорт бўйича ҳаракатдаги состав, асбоб-ускуналар ва эҳтиёт қисмлар олиш учун валюта маблағлари ажратиш;

ҳаракатдаги состав паркини янгилаш ва тўлдиришга, шунингдек, уюшманинг ишлаб чиқариш ва ижтимоий аҳамиятга эга бўлган объектларини кўриш, қайта кўриш, техника билан қайта жиҳозлашга капитал маблағлар ажратиш;

Тошкент метрополитени қурилишини давом эттириш учун ҳар йили мақсадли зарур маблағлар ажратиш тўғрисида таклифлар киритсинлар.

9. «Ўзшартномасавдо»:

уюшма корхоналари моддий-техника таъминотнинг мавжуд тартибини 1992 йилда сақлаб қолсин;

1992 йилнинг иккинчи ярмидан бошлаб автомобиль ва троллейбус шиналарининг уларни тайёрлаган заводлардан бевосита «Тошшаҳарйўловчиавтотранс» ишлаб чиқариш бирлашмасига ва трамвай-троллейбус ишлаб чиқариш бошқармасига етказиб берилишини таъминласин;

ҳар йили уюшма корхоналарига ҳуқуматлараро битимларга кирган моддий-техника ресурсларини етказиб бериш учун квоталар ажратилишини назарда тутсин, шартнома асосида маҳсулот етказиб берувчилар билан тўғридан-тўғри хўжалик алоқалари ўрнатилишига ҳар томонлама кўмаклашсин.

10. Ўзбекистон Республикаси Нефть маҳсулотлари билан таъминлаш давлат қўмитаси уюшма корхоналари билан тузилган шартномалар бўйича бензин, дизель ёнилғиси ва ёнилғи-мойлаш ҳамда ишлатиш материаллари бошқа турларининг етказиб берилишини таъминласин.

11. Тошкент шаҳар метрополитени учун темир йўл транспорти корхонаси мақоми, унинг ходимлари учун эса ушбу тоифа учун назарда тутилган ҳуқуқ ва имтиёзлар ҳамда темир йўл транспорти ходимларининг тартиб-интизоми ҳақидаги Уставнинг амал қилиши сақлаб қолинсин.

12. Ўзбекистон Республикаси Қишлоқ хўжалиги вазирлиги бир ой муддат ичида шаҳар атрофидаги сабзавотчилик-чорвачилик йўналишидаги давлат хўжаликларидан бирини уюшма таркибига бериш масаласини кўриб чиқсин ва ҳал этсин.

13. Ўзбекистон Республикаси Автомобиль транспорти вазирлиги:

иловада қайд этилган корхоналар ва ташкилотларни 1992 йил 1 июндаги ҳолатига кўра балансдан балансга уюшма таркибига ўтказсин;

ҳаракатдаги составнинг моддий-техника таъминоти ва уни тузатишнинг амалдаги тартиби 1992 йил охиригача сақлаб қолинсин.

14. Тошкент шаҳар ҳокимлиги:

шаҳар йўловчилар ташиш транспорти ишини мувофиқлаштириш ва унинг барча турларини ривожлантириш Бошқармасини меҳнатга ҳақ тўлаш фонди ва ходимлари сони билан бирга уюшмага ўтказсин;

автомобиль йўллари, кўчалар ва тор кўчаларнинг ҳолатини, уларнинг ёритилишини яхшилаш, улаш тармоқлари зонасида дарахтларни кесиш ва йиғиштириб олиш, шунингдек, ҳайдовчилари учун хавф-хатарсиз иш шароитлари, айниқса тунги вақтда, яратиш бўйича қўшимча чора-тадбирларни ишлаб чиқсин ва амалга оширсин;

1992 йилнинг сентябригача уюшма корхоналарига бевосита яқин жойдан уй-жойлар ва уларни қуриш учун ер участкалари ажратиш имкониятини кўриб чиқсин ва белгиласин;

ишчилар таъминоти бошқармаси ва ҳайдовчилар таркиби учун махсус овқатланиш блоклари ташкил этишда уюшмага амалий ёрдам кўрсатсин;

уюшма билан биргаликда бир ой муддат ичида Тошкент шаҳар саноат корхоналарида зарур эҳтиёт қисмлар, узеллар ва агрегатлар тайёрлаш дастурини ишлаб чиқсин ва уларни тайёрлашни ташкил этсин.

15. Давлат уюшмаси бир ой муддат ичида Устав лойиҳасини ишлаб чиқсин ва тасдиқлаш учун уни Ўзбекистон Республикаси Президенти ҳузуридаги Вазирлар Маҳкамасига киритсин.

16. Ташкил этилаётган уюшманинг аппарати Широкая кўчаси, 6-уйдаги бинога жойлаштирилсин.