Ўзбекистон Республикаси Президентининг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида» 2018 йил 26 июндаги ПҚ-3802-сон қарорини бажариш юзасидан, шунингдек, давлат солиқ хизмати органлари фаолиятини янада такомиллаштириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Солиқ қўмитаси тўғрисидаги низом 1-иловага мувофиқ;

Йирик солиқ тўловчилар бўйича ҳудудлараро солиқ инспекцияси тўғрисидаги низом 2-иловага мувофиқ;

Ўзбекистон Республикаси давлат солиқ хизмати органларида хизматни ўташ тўғрисидаги низом 3-иловага мувофиқ тасдиқлансин.

2. Ўзбекистон Республикаси давлат солиқ хизмати ходимлари меҳнатига Ягона тариф сеткаси бўйича ҳақ тўлаш бўйича разрядлар 4 — 7-иловаларга мувофиқ белгилансин.

Ўзбекистон Республикаси Давлат солиқ қўмитаси Молия вазирлиги билан биргаликда икки ҳафта муддатда Ўзбекистон Республикаси Давлат солиқ қўмитасининг харажатлар сметаси ва штатлар жадвалига тегишли қўшимча ва ўзгартиришлар киритсин.

3. Ўзбекистон Республикаси Давлат солиқ қўмитаси ўн кун муддатда:

Қорақалпоғистон Республикаси, вилоятлар ва Тошкент шаҳар давлат солиқ бошқармалари тўғрисидаги низомларни;

туман (шаҳар) давлат солиқ инспекциялари тўғрисидаги намунавий низомни тасдиқласин.

4. Ўзбекистон Республикаси Ҳукуматининг айрим қарорларига 8-иловага мувофиқ ўзгартиришлар киритилсин.

5. Ўзбекистон Республикаси Ҳукуматининг айрим қарорлари 9-иловага мувофиқ ўз кучини йўқотган деб ҳисоблансин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров ва Ўзбекистон Республикаси Давлат солиқ қўмитаси раиси Б.А. Мусаев зиммасига юклансин.

1. Ушбу Низом «Давлат солиқ хизмати тўғрисида»ги Ўзбекистон Республикаси Қонунига, Ўзбекистон Республикасининг Солиқ кодексига, Ўзбекистон Республикаси Президентининг «Солиқ маъмуриятчилигини тубдан такомиллаштириш, солиқлар ва бошқа мажбурий тўловларнинг йиғилувчанлигини ошириш чора-тадбирлари тўғрисида» 2017 йил 18 июлдаги ПФ-5116-сон Фармонига, Ўзбекистон Республикаси Президентининг «Республика солиқ органлари тизимини янада модернизация қилиш чора-тадбирлари тўғрисида» 2010 йил 8 январдаги ПҚ-1257-сон ва «Давлат солиқ хизмати органлари фаолиятини тубдан такомиллаштириш чора-тадбирлари тўғрисида» 2018 йил 26 июндаги ПҚ-3802-сон қарорларига мувофиқ Ўзбекистон Республикаси Солиқ қўмитасининг (кейинги ўринларда Қўмита деб аталади) мақоми, асосий вазифалари, функциялари, ҳуқуқлари, мажбуриятлари, фаолиятини ташкил этиш тартиби ва ҳисоботини, шунингдек, давлат солиқ хизмати органлари раҳбарларининг функционал мажбуриятлари ва жавобгарликларини белгилайди.

2. Қўмита солиқ тўғрисидаги қонун ҳужжатларига риоя этилишини ва давлатнинг иқтисодий манфаатлари ҳимоя қилинишини таъминлаш соҳасидаги назорат бўйича республика давлат бошқаруви органи ҳисобланади.

Қўмита Ўзбекистон Республикаси Вазирлар Маҳкамасига бўйсунади.

3. Қўмита ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталари қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек, ушбу Низомга ҳамда бошқа қонун ҳужжатларига амал қилади.

4. Давлат солиқ хизмати органлари томонидан ўз ваколатлари доирасида қабул қилинган қарорлар давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, солиқ тўловчилар, шу жумладан юридик ва жисмоний шахсларнинг ижро этиши учун мажбурий ҳисобланади.

5. Қўмита, Қорақалпоғистон Республикаси, вилоятлар ва Тошкент шаҳар солиқ бошқармалари, туманлар (шаҳарлар) солиқ инспекциялари (кейинги ўринларда — давлат солиқ хизматининг ҳудудий органлари деб аталади), Йирик солиқ тўловчилар бўйича ҳудудлараро солиқ инспекцияси (кейинги ўринларда — Ҳудудлараро инспекция деб аталади), шунингдек, Қўмита тизимига кирадиган ташкилотлар юридик шахс ҳисобланади, Ўзбекистон Республикаси Давлат герби тасвири туширилган ҳамда ўз номи давлат тилида ёзилган муҳрга ва бланкаларга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, банк ҳисобрақамларига, шу жумладан, чет эл валютасидаги ҳисобварақларига эга.

6. Давлат солиқ хизмати органлари ўз фаолиятини қонун ҳужжатларига мувофиқ, давлат бошқаруви органлари, маҳаллий давлат ҳокимияти органларидан мустақил равишда амалга оширадилар.

7. Қўмитанинг расмий номи:

а) давлат тилида:

тўлиқ номи — Ўзбекистон Республикаси Солиқ қўмитаси, қисқартмаси — Солиқ қўмитаси;

б) рус тилида:

тўлиқ номи — Налоговый комитет Республики Узбекистан, қисқартмаси — Налоговый комитет;

в) инглиз тилида:

тўлиқ номи — Tax Committee of the Republic of Uzbekistan, қисқартмаси — Tax Committee.

8. Солиқ қўмитасининг жойлашган жойи (почта манзили): Тошкент шаҳри, Абдулла Қодирий кўчаси, 13А-уй, 100011.

9. Қўмита тузилмасига қуйидагилар киради:

Қўмита марказий аппарати;

Қорақалпоғистон Республикаси, вилоятлар ва Тошкент шаҳар солиқ бошқармалари;

туманлар (шаҳарлар) солиқ инспекциялари;

Йирик солиқ тўловчилар бўйича ҳудудлараро солиқ инспекцияси;

юридик шахс мақомига эга бўлган тасарруфидаги ташкилотлари (кейинги ўринларда — тасарруфидаги ташкилотлар деб аталади):

«Солиқ-сервис» давлат унитар корхонаси;

«Янги технологиялар» илмий-ахборот маркази» давлат унитар корхонаси;

«Ғазалкент соғломлаштириш маркази» давлат муассасаси;

«Солиқ маълумотларини қайта ишлаш маркази» давлат унитар корхонаси.

10. Қуйидагилар Қўмитанинг асосий вазифалари ҳисобланади:

давлат солиқ сиёсатини амалга ошириш ҳамда солиқ тўғрисидаги қонун ҳужжатларига риоя этилиши, солиқлар ва йиғимларнинг тўғри ҳисоблаб чиқарилиши, тўлиқ ва ўз вақтида тўланиши юзасидан назоратни таъминлаш;

Ўзбекистон Республикаси Давлат бюджети (кейинги ўринларда Давлат бюджети деб аталади) ва давлат мақсадли жамғармаларига солиқлар ва йиғимларнинг солиқ тўғрисидаги қонун ҳужжатларига мувофиқ ўз вақтида ва бир хилдаги тушумини таъминлаш ҳисобига Давлат бюджети ва давлат мақсадли жамғармаларининг даромад қисмини барқарор шакллантириш;

солиқ тўловчилар ва солиқ солиш объектларининг ўз вақтида ҳамда ишончли ҳисобга олинишини таъминлаш, уларнинг тўлиқ қамраб олиниш механизмларини солиқ маъмуриятчилиги жараёнига маълумотларни тўлиқ йиғиш ва қайта ишлашни таъминлайдиган замонавий ахборот-коммуникация технологиялари ва илғор автоматлаштирилган таҳлил услубларини кенг жорий этиш орқали такомиллаштириш;

солиқ солинадиган базани кенгайтириш бўйича таҳлил қилиш ва таъсирчан чоралар ишлаб чиқиш, шу жумладан макроиқтисодий кўрсаткичларнинг динамикаси ва ҳудудларнинг солиқ салоҳиятини тизимли таҳлил қилиш орқали таъсирчан чоралар ишлаб чиқиш, солиқлар йиғилишини ошириш бўйича чораларни амалга ошириш, солиқ назоратини амалга оширишнинг замонавий услубларини жорий этиш;

пул маблағларининг ғайриқонуний айланиши манбаларига барҳам бериш, аҳоли билан пулли ҳисоб-китобларни амалга оширувчи юридик ва жисмоний шахслар томонидан нақд пул тушумининг тўлиқ ва ўз вақтида топширилиши юзасидан мунтазам назоратни таъминлаш;

бозорлар ва савдо комплексларининг молия-хўжалик фаолияти, улар томонидан солиқ тўғрисидаги қонун ҳужжатларига риоя этилиши юзасидан назоратни амалга ошириш ҳамда уларнинг ҳудудида аниқланган ҳуқуқбузарликлар бўйича терговга қадар текширув ўтказиб, жиноят ишларини терговга тегишлилигига кўра ҳуқуқни муҳофаза қилувчи органларга топшириш;

солиқ тўловчилар ўз солиқ мажбуриятларини ихтиёрий бажариши учун мақбул шарт-шароитлар яратиш, ҳар бир ходим томонидан «Солиқ хизмати –инсофли солиқ тўловчиларнинг ишончли ҳамкори» деган мақсадли вазифани сўзсиз бажариш;

солиқ тўловчиларнинг ҳуқуқий маданиятини ошириш бўйича ишларни амалга ошириш, солиққа оид ҳуқуқбузарликларнинг профилактикаси, уларни аниқлаш ва бартараф этиш бўйича комплекс тадбирларни бажариш;

солиқ тўловчиларга мулоқотсиз электрон хизмат кўрсатишга тўлиқ ўтиш йўли орқали солиқ тўловчилар билан ишлашни такомиллаштириш;

қонун ҳужжатларини такомиллаштириш ва солиқ тўловчиларнинг фаолиятини рағбатлантириш бўйича таклифлар киритиш;

кадрларни танлаш ва жой-жойига қўйиш, давлат солиқ хизмати органларини юксак маънавий-ахлоқий сифатларга эга бўлган малакали ходимлар билан тўлдириш, шунингдек, кадрларни касбга тайёрлаш ва қайта тайёрлаш бўйича тизимли ишларни амалга ошириш;

давлат солиқ хизмати органлари ходимларига корпоратив этикани сингдириш, коррупция фактларига кескин барҳам бериш бўйича таъсирчан чораларни, шу жумладан ходимлар манфаатларининг тўқнашувини ҳал қилиш йўли билан амалга ошириш, ишга расмиятчилик билан ёндашишга барҳам бериш, шунингдек, ходимлар ўртасида ҳуқуқбузарликлар профилактикасини таъминлаш, ўз хизмат фаолияти самарадорлигини ошириш мотивацияси тизимини жорий этиш ва улар учун хизматни ўташнинг муносиб шарт-шароитларини яратиш.

ҳудудларни комплекс ижтимоий-иқтисодий ривожлантириш бўйича давлат солиқ хизмати органларига бириктирилган секторларда солиқ солиш соҳасидаги тизимли муаммоларни ўрганиш ва аниқлаш ҳамда уларни бартараф этиш бўйича таклифлар ишлаб чиқиш.

11. Қўмита ўзига юкланган вазифаларга мувофиқ қуйидаги функцияларни амалга оширади:

а) давлат солиқ сиёсатини амалга ошириш ҳамда солиқ тўғрисидаги қонун ҳужжатларига риоя этилиши, солиқлар ва йиғимларнинг тўғри ҳисоблаб чиқарилиши, тўлиқ ва ўз вақтида тўланиши юзасидан солиқ назоратини таъминлаш соҳасида:

солиқлар ва йиғимларнинг Давлат бюджетига ва давлат мақсадли жамғармаларига тушиши прогнозини ишлаб чиқишда қатнашади;

солиқ тўловчилар фаолиятининг солиқ текширувларини, шунингдек, солиқ тўловчилар томонидан фуқароларнинг шахсий жамғариб бориладиган пенсия ҳисобварақларига жамғариб бориладиган пенсия бадалларининг тўғри ҳисоблаб чиқарилиши, тўлиқ ва ўз вақтида киритилиши текширувларини белгиланган тартибда ўтказади;

давлат солиқ хизмати органлари томонидан хўжалик юритувчи субъектлар фаолиятини солиқ текшируви ўтказилишида қонун ҳужжатларида белгиланган тартибига риоя қилиниши юзасидан назоратни амалга оширади;

юридик ва жисмоний шахслар томонидан валюта экспорт-импорт операцияларини амалга оширишда қонун ҳужжатларига риоя этилишини белгиланган тартибда назорат қилади;

солиқ тўловчилардан ёки уларнинг мансабдор шахсларидан тушунтиришлар олади, солиқ тўловчининг мол-мулки мавжудлигини текширади, шунингдек, ҳудудларни, ишлаб чиқариш, омборхона, савдо биноларини ва бошқа биноларни, шу жумладан солиқ тўловчилар томонидан даромадлар олиш учун фойдаланиладиган ёхуд солиқ солиш объектини сақлаш билан боғлиқ жойларни кўздан кечиради ёки текширади;

хўжалик юритувчи субъектлар томонидан пул маблағлари ва моддий бойликларнинг бухгалтерия ҳисобини юритишнинг белгиланган тартибига риоя қилинишини, корхоналар ҳудудига моддий бойликларни олиб кириш ва у ердан олиб чиқишда корхоналарда рухсат бериш тизими ишларининг ташкил этилиши ҳолатини текширади;

солиқ тўловчининг молия-хўжалик фаолиятини текшириш (тафтиш қилиш) жараёнида ҳисоботдаги маълумотларнинг ишончлилиги ва тўғрилигини аниқлаш, давлат солиқ хизмати органларига тақдим этилган молиявий ҳисоботлар ва солиқ ҳисоб-китобларида фактларнинг бузиб кўрсатилишини аниқлаш ва уларни бартараф этиш учун бухгалтерия ҳисобларини ва молиявий ҳисоботларни текширади;

солиқ аудитини ўтказиш давомида хом ашё, материаллар, ярим фабрикатлар ва тайёр буюмларни тортиб кўради ва ўлчайди, ишлаб чиқарилган маҳсулотнинг ҳақиқий таннархини ва тақдим этилган солиқ ҳисоб-китобларининг тўғрилигини аниқлаш учун хомашё ва материаллар сарфи нормалари, уларнинг маҳсулот ишлаб чиқариш учун тўғри ҳисобдан чиқарилишини, тайёр маҳсулотнинг тўлиқ кирим қилинишини, маҳсулот чиқиши нормалари ҳамда моддий бойликларни сақлаш ва ташишда табиий йўқотишлар нормалари тўғри белгиланишини аниқлаш учун хомашё ва материалларни ишлаб чиқаришда назорат тариқасида ишлатиб кўради, хомашё, материаллар ва тайёр маҳсулотларни назорат тариқасида текширади;

юридик шахслар ва якка тартибдаги тадбиркорлар томонидан тадбиркорлик фаолиятини амалга оширишнинг қонун ҳужжатларида белгиланган тартибига риоя этилишини назорат қилади;

жисмоний ва юридик шахслардан солиқ тўғрисидаги қонун ҳужжатларининг бузилиши тўғрисида келиб тушган мурожаатлар, хабарлар ва бошқа ахборотларни текширади;

солиқ тўғрисидаги қонун ҳужжатларининг бузилиши фактларини таҳлил қилади ҳамда солиққа оид ҳуқуқбузарликларга олиб келадиган сабаблар ва шарт-шароитларни бартараф этиш юзасидан тегишли органларга таклифлар киритади;

ҳуқуқни муҳофаза қилувчи органлар билан биргаликда солиққа оид ҳуқуқбузарликларга қарши курашишнинг узоқ муддатли ҳамда жорий дастурларини ишлаб чиқади ва амалга оширади;

б) Давлат бюджети ва давлат мақсадли жамғармаларига солиқлар ва йиғимларнинг солиқ тўғрисидаги қонун ҳужжатларига мувофиқ ўз вақтида ва бир хилдаги тушумини таъминлаш ҳисобига Давлат бюджети ва давлат мақсадли жамғармаларининг даромад қисмини барқарор шакллантириш соҳасида:

солиқ тўловчиларнинг мажбуриятлари пайдо бўлиши (тўхтатилиши) тўғрисида ахборот тақдим этадиган органлар ва ташкилотлар билан ўзаро ҳамкорлик қилади;

белгиланган тартибда солиқ тўловчилар томонидан тақдим этилган молия ва солиқ ҳисоботларини, шунингдек, солиқ тўловчиларнинг фаолияти тўғрисида солиқ органларининг ягона интеграциялаштирилган ахборот ресурс базасида йиғилган бошқа ҳужжатларни ўрганиш ва таҳлил қилиш асосида камерал солиқ текширувини амалга оширади;

ўзаро тузилган келишув асосида солиқ мониторингида иштирок этаётган солиқ тўловчи томонидан солиқ тўғрисидаги қонун ҳужжатларига риоя этилиши, солиқлар ва йиғимларнинг тўғри ҳисобланиши, тўлиқ ва ўз вақтида тўланиши солиқ мониторингини қонун ҳужжатларида белгиланган тартибда амалга оширади;

давлат даромадига ўтказилган мол-мулкни сотишдан олинган пул маблағларининг давлат даромадига тўлиқ ва ўз вақтида тушиши назоратини, шунингдек, давлат органларига берилган мол-мулкнинг ҳисобга олинишини таъминлайди;

солиқлар ва йиғимларнинг тушумини таъминлаш, шу жумладан республика ва маҳаллий бюджетлар даромадларини оширишнинг қўшимча захираларини аниқлаш бўйича молия органлари, манфаатдор вазирликлар ва идоралар, шунингдек, маҳаллий давлат ҳокимияти органлари билан ҳамкорлик қилади;

в) солиқ тўловчилар ва солиқ солиш объектларининг ўз вақтида ҳамда ишончли ҳисобга олинишини таъминлаш, уларнинг тўлиқ қамраб олиниши механизмларини солиқ маъмуриятчилиги жараёнига маълумотларни тўлиқ йиғиш ва қайта ишлашни таъминлайдиган замонавий ахборот-коммуникация технологиялари ва илғор автоматлаштирилган таҳлил усулларини кенг жорий этиш орқали такомиллаштириш соҳасида:

солиқ тўловчилар, солиқ солинадиган база, шунингдек, солиқ солиш объектлари ва солиқ солиш билан боғлиқ бўлган объектларнинг тўлиқ, ўз вақтида ва ишончли ҳисобга олинишини таъминлайди;

юридик ва жисмоний шахсларга, уларни солиқ тўловчининг идентификация рақамлари берилган ҳолда солиқ тўловчилар сифатида ҳисобга қўйиш тўғрисида ҳужжатлар берилишини қонун ҳужжатларида белгиланган тартибда ташкил қилади;

келгусида товар ва хизматларнинг мажбурий таснифланишини жорий қилган ҳолда электрон ҳисобварақ-фактуралари тўлиқ киритилишини таъминлайди;

Ўзбекистон Республикаси солиқ тўловчиларининг ягона реестрини шакллантиради ва юритади;

солиқ органларининг ягона интеграциялаштирилган ахборот ресурс базасида солиқ тўловчилар бўйича солиқлар ва йиғимларнинг ҳисоблаб чиқилиши ва амалдаги тушумлари ҳисобини юритади;

солиқлар ва йиғимлар бўйича имтиёзлар ҳисобини юритади;

банклар томонидан тегишли ахборот тақдим этилишига кўра банк ҳисобварақлари бўйича олти ой мобайнида пул операцияларини амалга оширган ҳолда молия-хўжалик фаолиятини юритмаётган, шунингдек, олти ой давомида электрон ҳисобварақ-фактураларни расмийлаштирмаган, онлайн назорат-касса техникалари, виртуал касса ёки маркетплейс тўлов тизимидан фойдаланмаган, ташқи савдо операцияларини амалга оширмаган корхоналарни аниқлайди;

тадбиркорлик фаолиятини амалга ошираётган юридик ва жисмоний шахсларнинг давлат солиқ хизмати органларида ҳисобга туришдан бўйин товлаш механизмларини ўрганади, аниқлайди ва бартараф этади;

ахборот хавфсизлиги таъминланишини ҳисобга олган ҳолда барча солиқ тўловчилар ва солиқ тушумлари бўйича солиқ органларининг ягона интеграциялаштирилган ахборот ресурс базасини яратади;

солиқ ахборотларини қабул қилиб олиш, қайта ишлаш, узатиш ва сақлаш жараёнларини автоматлаштириш чораларини кўради;

давлат солиқ хизмати органларида ахборот хавфсизлигини таъминлашни ҳисобга олган ҳолда ягона ахборот, дастурий-техник ва телекоммуникация тизими жорий этилишини ташкил қилади;

солиқ маъмуриятчилигини такомиллаштириш жараёнида давлат солиқ хизмати органлари ишига замонавий ахборот-коммуникация технологияларини жорий этади ҳамда харажатларни мақбуллаштириш ва ресурс таъминотини ривожлантириш учун уларни технологик жараёнларни юритишнинг замонавий тизимлари ва бошқаришнинг тезкор воситалари билан жиҳозлайди;

давлат солиқ хизмати органларининг бутун вертикал бўйлаб бизнес жараёнларини қайта ташкил этиш ва уларни параллель равишда рақамлаштириш ҳамда келгусида автоматлаштириш билан амалга оширади ва шу асосда инсон омили таъсирини камайтиради.

г) солиқ солинадиган базани кенгайтириш бўйича таҳлил қилиш ва таъсирчан чоралар ишлаб чиқиш, шу жумладан макроиқтисодий кўрсаткичларнинг динамикаси ва ҳудудларнинг солиқ салоҳиятини тизимли таҳлил қилиш орқали таъсирчан чоралар ишлаб чиқиш, солиқлар йиғилишини ошириш бўйича чораларни амалга ошириш, солиқ назоратини амалга оширишнинг замонавий услубларини жорий этиш соҳасида:

солиқ тўловчиларни «хавф-хатар» гуруҳи бўйича сегментлашни амалга оширади;

солиқлар ва йиғимларни тўлашдан бўйин товлаш фактларини аниқлайди ва тегишли чоралар кўради;

солиқ назоратини амалга оширишда замонавий усулларни қўллайди;

Қўмитанинг техник базасини модернизация қилиш, мустаҳкамлаш ва янгилаш билан ташқи ва ички манбалардан келиб тушадиган маълумотларни таҳлил қилишнинг илғор автоматлаштирилган усулларини жорий этади;

макроиқтисодий кўрсаткичлар динамикаси ва ҳудудларнинг солиқ салоҳиятини тизимли таҳлил қилиш орқали солиқ солинадиган базани кенгайтириш бўйича самарали чора-тадбирларни амалга оширади;

Ўзбекистон Республикасининг Солиқ кодексига ҳамда бошқа қонун ҳужжатларига мувофиқ Давлат бюджетига ва давлат мақсадли жамғармаларига солиқлар ва йиғимлар бўйича солиқ қарзини ундиришни белгилайдиган қонун ҳужжатларида назарда тутилган чора-тадбирларнинг ташкиллаштирилишини ва қўлланишини таъминлайди;

хўжалик юритувчи субъектлар ходимларининг ҳисоботдаги ва ҳақиқий сони мувофиқлиги юзасидан мониторингни амалга оширади;

хўжалик юритувчи субъектлар фаолиятида белгиланган тартибда хронометраж кўздан кечириш ўтказади;

солиқ солинадиган базага тузатишлар киритиш учун қонун ҳужжатларида белгиланган тартибда кўздан кечириш ҳамда сўров ўтказишни амалга оширади;

ишлаб чиқариш ва даромадлар миқдорларини яшириш, сотилган маҳсулотлар, ишлар ва хизматлар ҳажмларини камайтириб кўрсатиш механизмларини ўрганиш ва аниқлашни ташкиллаштиради ва амалга оширади, кўрсатиб ўтилган механизмларнинг қўлланишини бартараф этиш тадбирларини ишлаб чиқади ва амалга оширади;

аниқ мақсад параметрларини белгилаш билан яширин иқтисодиёт даражасини пасайтириш стратегияси, концепцияси ва дастурларини ишлаб чиқади;

солиқ маъмуриятчилиги ислоҳоти ва ривожланиш стратегиясини ишлаб чиқади ва унинг ижроси мониторингини амалга оширади.

д) маблағларнинг ғайриқонуний айланиш манбаларига барҳам бериш юзасидан мунтазам назоратни таъминлаш соҳасида:

савдо ва хизматлар кўрсатишни ташкил этишнинг қонун ҳужжатларига мувофиқлиги, шу жумладан, назорат-касса техникаларини, қонун ҳужжатларида назарда тутилган ҳолларда эса онлайн назорат-касса техникалари ёки виртуал кассаларни, пластик карточкалардан тўловларни қабул қилиб олиш бўйича ҳисоб-китоб терминалларини қўллаш, алкоголли ва тамаки маҳсулотларини сотиш ҳамда маркировка қилиш қоидаларига риоя этилиши юзасидан назоратни амалга оширади;

тадбиркорлик субъектларида, шунингдек, бозорлар ва савдо комплексларида бир марталик йиғимлар, бозорлар, савдо комплекслари ва уларнинг филиалларида кўрсатилган хизматлар учун ижара тўловларининг ўз вақтида ва тўлиқ ундирилиши, савдо ва хизмат кўрсатиш қоидалари бажарилиши, нақд пул ёки пластик карточкалар бўйича тўлов шаклига қараб нархларнинг сунъий равишда оширилиши ёки пасайтирилиши, назорат-касса техникаларининг ёки виртуал кассаларнинг, тўлов терминалларининг қўлланилиши белгиланган тартибда талон ва чекларнинг берилиши бўйича белгиланган тартибда сайёр солиқ текширувларини ўтказади;

е) бозорлар ва савдо комплексларининг молия-хўжалик фаолияти, улар томонидан солиқ тўғрисидаги қонун ҳужжатларига риоя этилиши юзасидан назоратни амалга ошириш ҳамда уларнинг ҳудудида аниқланган ҳуқуқбузарликлар бўйича терговга қадар текширув ўтказиб, жиноят ишларини терговга тегишлилигига кўра ҳуқуқни муҳофаза қилувчи органларга топшириш соҳасида:

бозорлар, савдо комплекслари ҳудудларида ва уларга туташ бўлган автомобилларни вақтинчалик сақлаш жойларида молиявий-иқтисодий ҳамда солиқ соҳасидаги жиноятлар ва бошқа ҳуқуқбузарликларни аниқлайди, олдини олади ва бартараф этади;

бозорлар ва савдо комплекслари ҳудудларида сифатсиз, қалбакилаштирилган (ясама) ёки ноқонуний олиб кирилган товарларни тайёрлаш ва сотишга қарши курашади;

бозорлар, савдо комплекслари, уларга туташ бўлган автомобиль воситаларининг тўхташ жойлари, шунингдек, улар ҳудудида фаолият кўрсатаётган тадбиркорлик субъектлари фаолиятидан олинган пул оқимлари ҳаракати мониторингини ва маблағлар тушуми ҳисобининг тўлиқлигини таъминлайди;

бозорлар, савдо комплекслари, уларга туташ бўлган автотранспорт воситаларини вақтинча сақлаш жойлари, шунингдек, уларнинг ҳудудида фаолиятни амалга оширувчи тадбиркорлик субъектлари пул маблағлари тушумлари ва товар айланмаси тўғрисида давлат солиқ хизмати органларига тушадиган маълумотларнинг ишончлилигини текшириш учун банклар ҳамда статистика органлари билан ўзаро ҳамкорлик қилади;

бозорлар, савдо комплекслари ҳудудларида, уларга туташ бўлган автомобиль воситаларининг тўхташ жойларида молиявий-иқтисодий ва солиқ соҳаларида ҳуқуқни бузиш содир этилиши ҳолатлари бўйича терговга қадар текширувларни ташкил этади ва олиб боради, жиноий ишлар қўзғайди, жиноят ишларини терговга тегишлилигига кўра ҳуқуқни муҳофаза қилувчи органларга беради;

солиққа оид ҳуқуқбузарликлар натижасида давлатга, юридик ва жисмоний шахсларга етказилган зарарнинг белгиланган тартибда ундирилишини таъминлаш чораларини кўради;

ж) солиқ тўловчилар ўз солиқ мажбуриятларини ихтиёрий бажариши учун мақбул шарт-шароитлар яратиш, ҳар бир ходим томонидан «Солиқ хизмати — инсофли солиқ тўловчиларнинг ишончли ҳамкори» деган мақсадли вазифани сўзсиз бажариш соҳасида:

солиқ тўловчиларга солиқ мажбуриятларини бажаришда ҳар томонлама кўмаклашади;

солиқлар ва йиғимларнинг ўз вақтида ва тўлиқ тўланишини таъминлаш учун солиқ тўловчиларга хизмат кўрсатиш сифатини ошириш бўйича чораларни амалга оширади, шунингдек, зарур ҳолларда солиқ тўловчилар ўртасида сўровномалар ўтказади;

қонун ҳужжатларида белгиланган тартибда айрим турдаги солиқларни ҳисоблаш тарзида солиқ тўловчиларга сервис хизматлари кўрсатади;

юридик ва жисмоний шахсларнинг солиқ соҳасидаги ҳуқуқлари ва қонун билан муҳофаза қилинадиган манфаатлари ҳимояланишини таъминлайди;

давлат солиқ хизмати органлари фаолиятининг очиқлиги ва шаффофлигини таъминлайди;

солиқ тўловчи тўғрисидаги маълумотларнинг қонун ҳужжатларига мувофиқ сир тутилишига риоя этиш ишларини ташкил қилади;

з) солиқ тўловчиларнинг ҳуқуқий маданиятини ошириш бўйича ишларни амалга ошириш, солиққа оид ҳуқуқбузарликларнинг профилактикаси, уларни аниқлаш ва бартараф этиш бўйича комплекс тадбирларни бажариш соҳасида:

солиқ солиш масалаларига дахлдор норматив-ҳуқуқий ҳужжатларни солиқ тўловчиларга ва аҳолига ўз вақтида таништириш ва етказиш ишларини ташкил этади;

солиқ соҳасида амалга оширилаётган ислоҳотларнинг мазмун-моҳияти тўғрисида жойларда ва оммавий ахборот воситалари орқали кенг тушунтириш ишларини олиб боради;

солиққа доир қонун ҳужжатларини нашр этиш, кўпайтириш ва давлат солиқ хизматининг ҳудудий органларига етказиш, маслаҳат хизматлари кўрсатиш, солиқ тўловчиларни солиқларни тўғри ва ўз вақтида ҳисоблаб чиқаришга, солиқ ҳисоботларини ва солиқлар ҳамда йиғимларни ҳисоблаб чиқиш, тўлаш билан боғлиқ бўлган бошқа ҳужжатларни тақдим этишга ўқитиш учун сервис-марказлар ташкил қилади;

солиқ тўғрисидаги қонун ҳужжатлари бўйича норматив-ҳуқуқий ҳужжатлар тўпламларини нашр этади, давлат солиқ хизмати органларини қонун ҳужжатлари билан таъминлаш чораларини кўради;

жисмоний ва юридик шахсларнинг солиқ солиш ва солиқ тўғрисидаги қонун ҳужжатлари бузилиши масалалари бўйича мурожаатларини белгиланган тартибда кўриб чиқади;

солиққа оид ҳуқуқбузарликлар профилактикаси бўйича давлат дастурларини ишлаб чиқиш ва амалга оширишда иштирок этади;

солиққа оид ҳуқуқбузарликлар профилактикасини амалга оширади, шу жумладан уларнинг содир этилиши сабабларини аниқлайди ва бартараф этади;

ҳуқуқбузарликлар профилактикасини бевосита амалга оширувчи ва унда иштирок этувчи бошқа органлар ҳамда муассасалар билан ўзаро ҳамкорлик қилади;

акцизости товарларини ишлаб чиқаришда ва айланмасида ҳуқуқбузарликларни аниқлаш, олдини олиш ва бартараф этилишини белгиланган тартибда ташкиллаштиради ва амалга оширади;

солиққа оид ҳуқуқбузарликларни содир қилган шахсларни қидириб топиш учун материалларни ҳуқуқни муҳофаза қилувчи органларга беради, давлатга етказилган зарарни белгиланган тартибда ундиришни таъминлаш чораларини кўради;

маъмурий ҳуқуқбузарликлар бўйича ишларни юритади;

солиққа оид ҳуқуқбузарликлар содир этган жисмоний ва юридик шахсларнинг ҳисобини юритади, мазкур маълумотларнинг таҳлилини амалга оширади;

солиққа оид жиноятларнинг содир этилиши ҳолатларини аниқлаш учун, суриштирув, тергов ва суддан яшириниб юрган шахсларни қидириб топиш учун оммавий-ахборот воситалари имкониятларидан фойдаланади;

и) солиқ тўловчиларга мулоқотсиз электрон хизмат кўрсатишга тўлиқ ўтиш йўли орқали солиқ тўловчилар билан ишлашни такомиллаштириш соҳасида:

солиқ тўловчилар билан ишлашда ахборот-коммуникация технологияларидан кенг фойдаланилишини таъминлайди;

солиқ тўловчиларга реал вақт режимида кенг кўламли интерактив хизматлар кўрсатилишини ташкил этади;

солиқ тўловчиларга солиқ тўловчининг шахсий кабинети орқали, шу жумладан Ягона интерактив давлат хизматлари портали орқали электрон хизмат кўрсатилишини таъминлайди;

солиқ тўловчиларни қонун ҳужжатларида белгиланган тартибда айрим солиқлар бўйича ҳисоблаб чиқарилган солиқлар суммаси ҳақида солиқ тўловчининг шахсий кабинети орқали хабардор қилади;

к) қонун ҳужжатларини такомиллаштириш ва солиқ тўловчиларнинг фаолиятини рағбатлантириш бўйича таклифлар киритиш соҳасида:

солиқ тўғрисидаги қонун ҳужжатларини, шу жумладан табиий ресурслардан эҳтиётлаб ва самарали фойдаланишни рағбатлантиришга йўналтирилган солиққа оид қонун ҳужжатларини янада такомиллаштириш, солиқлар ва йиғимларни бирхиллаштириш, солиқ юкини қисқартириш, юридик ва жисмоний шахслар фаолиятини рағбатлантириш, уларга зарур имтиёзлар ва преференциялар бериш бўйича таклифлар тайёрлашда қатнашади;

қонунлар ва бошқа норматив-ҳуқуқий ҳужжатлар лойиҳаларини ишлаб чиқади ва уларни белгиланган тартибда кўриб чиқиш учун киритади;

Ўзбекистон Республикаси Иқтисодиёт ва молия вазирлиги ҳамда бошқа вазирликлар ва идоралар билан биргаликда қонун ҳужжатларида белгиланган тартибда солиқ солиш масалалари бўйича норматив-ҳуқуқий ҳужжатларни ишлаб чиқади ва тасдиқлайди;

солиқ ҳисоботлари ҳамда солиқлар ва йиғимларни ҳисоблаб чиқариш, тўлаш билан боғлиқ бошқа ҳужжатлар шаклларини Ўзбекистон Республикаси Иқтисодиёт ва молия вазирлиги билан биргаликда ишлаб чиқади ва белгиланган тартибда тасдиқлайди;

Ўзбекистон Республикасининг хорижий давлатлар билан маълумотларни алмашиш ва солиқ соҳасида ҳамкорлик қилиш масалалари бўйича халқаро шартномалари лойиҳаларини ишлаб чиқишда қатнашади ҳамда уларнинг белгиланган тартибда Ўзбекистон Республикаси Вазирлар Маҳкамасига киритилишини таъминлайди;

л) кадрларни танлаш ва жой-жойига қўйиш, давлат солиқ хизмати органларини юксак маънавий-ахлоқий сифатларга эга бўлган малакали ходимлар билан тўлдириш, шунингдек, кадрларни касбга тайёрлаш ва қайта тайёрлаш бўйича тизимли ишларни амалга ошириш соҳасида:

қўйилган талабларга мувофиқ давлат солиқ хизмати органларига маънавий-ахлоқий жиҳатдан юқори малакали ходимларни танлаш ва тўлдириш бўйича ишларни ташкил этади;

белгиланган тартибда таълим муассасалари ташкил этиш йўли билан, давлат олий таълим муассасалари имкониятларидан фойдаланган ҳолда давлат солиқ хизмати органлари кадрларини тайёрлаш, қайта тайёрлаш ва уларнинг малакасини ошириш ишларининг тизимли равишда ташкил этилишини таъминлайди, шунингдек, ривожланган хорижий мамлакатларнинг солиқ органлари ва ўқув муассасалари билан тажриба алмашишнинг кенгайтирилишини амалга оширади;

давлат солиқ хизмати органлари ходимлари лавозимларининг малака тавсифномаларини ишлаб чиқади, раҳбарлар ва мутахассисларни аттестациядан ўтказади, уларга ўз ваколатлари доирасида махсус унвонлар беради;

тегишли танловдан ўтмаган ёки лавозим вазифаларини жиддий бузганлиги учун илгари давлат солиқ хизмати органларидан бўшатилган шахсларнинг ишга қабул қилинишига йўл қўймаслик юзасидан назоратни таъминлайди;

давлат солиқ хизмати органлари кадрларини тайёрлаш бўйича хизмат кўрсатишга йўналтирилган тизимни жорий этади, солиқ тўловчилар билан низоли вазиятлар юзага келганда уларга стрессга бардошлиликни сингдириш, шунингдек, ходимларнинг ахлоқий — психологик ҳолатини ошириш бўйича психологик тренингларни жорий қилади;

м) давлат солиқ хизмати органлари ходимларига корпоратив этикани сингдириш, коррупция фактларига кескин барҳам бериш бўйича таъсирчан чораларни, шу жумладан ходимлар манфаатларининг тўқнашувини ҳал қилиш йўли билан амалга ошириш, ишга расмиятчилик билан ёндашишга барҳам бериш, шунингдек, ходимлар ўртасида ҳуқуқбузарликлар профилактикасини таъминлаш, ўз хизмат фаолияти самарадорлигини ошириш мотивацияси тизимини жорий этиш ва улар учун хизматни ўташнинг муносиб шарт-шароитларини яратиш соҳасида:

кадрларни Ўзбекистон Республикасига содиқлик, ватанпарварлик, ҳалоллик ҳамда ҳуқуқий давлат ғоялари ва асосларини ҳурмат қилиш руҳида тарбиялаш юзасидан узлуксиз ишларни амалга оширади;

давлат солиқ хизмати органлари ходимлари томонидан солиқ тўловчиларга нисбатан ғаразли мақсадларда ноқонуний таъсир кўрсатиш ҳолатларини аниқлайди ва уларга барҳам беради;

давлат солиқ хизмати органларида коррупция ҳолатларини аниқлашга, уларнинг олдини олишга, қарши курашишга ва бартараф этишга йўналтирилган чора-тадбирларни ишлаб чиқади, ташкил этади ва уларни амалга оширишда қатнашади;

давлат солиқ хизмати органларининг ходимлари ўртасида ҳуқуқбузарликлар профилактикаси бўйича чора-тадбирларни амалга оширади;

хизмат вазифаларини бажараётганда давлат солиқ хизмати органлари ходимларини ноқонуний тажовузлардан ҳимоя қилишни таъминлаш юзасидан чора-тадбирлар комплексини ишлаб чиқади ва амалга оширади;

ҳар икки йилда кўпи билан бир марта давлат солиқ хизматининг ҳудудий органлари ҳамда Ҳудудлараро инспекциянинг бюджет ва хўжалик фаолияти бўйича харажатлар сметалари ижроси юзасидан тафтишни амалга оширади. Жуда зарур бўлганда ва молия-хўжалик фаолиятида қонун бузилишларига йўл қўйилган ҳолатлар тўғрисида ишончли ахборот мавжуд бўлган тақдирда навбатдан ташқари тафтишлар ўтказилиши мумкин;

давлат солиқ хизматининг ҳудудий органлари ҳамда Ҳудудлараро инспекция томонидан моддий ва пул ресурсларидан оқилона фойдаланиш чора-тадбирлари бажарилишини таъминлайди, хўжасизлик, исрофгарчилик, давлат маблағларини ва бюджетдан ташқари маблағларни асоссиз равишда сарфлаш, смета-штат интизомини бузиш ҳолларига барҳам беради;

мамлакат иқтисодий манфаатларини ҳимоя қилиш борасида виждонан хизмат қилаётган ходимларни уларнинг шахсий ҳиссасидан келиб чиққан ҳолда рағбатлантириш механизмларини яратади.

н) ҳудудларни комплекс ижтимоий-иқтисодий ривожлантириш бўйича давлат солиқ хизмати органларига бириктирилган секторларда солиқ солиш соҳасидаги тизимли муаммоларни ўрганиш ва аниқлаш хамда уларни бартараф этиш бўйича таклифлар ишлаб чиқиш соҳасида:

ҳудудларни ижтимоий-иқтисодий ривожлантириш ва камбағалликни қисқартириш бўйича лойиҳаларни амалга оширишда давлат солиқ хизмати органларининг иштирокини фаоллаштиради;

солиқ солиш соҳасида ишларни ҳаққоний ҳолатини чуқур ва хар томонлама ўрганишни амалга оширади;

биринчи навбатда, уйма-уй юриш, жисмоний ва юридик шахсларнинг мурожаатларини кўриб чиқиш, аҳолининг турли қатламлари билан тўғридан-тўғри мулоқотни ташкил этиш орқали тўпланган муаммолар ва тизимли камчиликларни аниқлаш бўйича ишларини амалга оширади;

солиқ солиш соҳасидаги муаммоларни бартараф этиш бўйича мақсадли чора-тадбирларни амалга оширади;

солиқ тўловчилар ўртасида амалга оширилаётган ислоҳотларнинг мазмун ва моҳиятини тушунтириш бўйича ишларни ташкил этади.

12. Қўмита марказий аппарати, давлат солиқ хизматининг ҳудудий органларининг функциялари Қўмита раиси томонидан тасдиқланадиган низомлар билан белгиланади.

13. Қўмита ходимларининг ҳуқуқлари, мажбуриятлари ва жавобгарлиги Ўзбекистон Республикасининг «Давлат солиқ хизмати тўғрисида»ги Қонуни, ушбу Низом, шунингдек, Ўзбекистон Республикаси давлат солиқ хизмати органларида хизматни ўташ тўғрисидаги низом билан аниқланади.

14. Қўмита ўзига юкланган вазифа ва функцияларни амалга ошириш учун ўз ваколатлари доирасида қуйидаги ҳуқуқларга эга:

1) Ўзбекистон Республикаси Вазирлар Маҳкамаси ёки Ўзбекистон Республикаси Президенти Администрациясига белгиланган тартибда меъёрий-ҳуқуқий ҳужжатлар лойиҳалари, шунингдек, Қўмитага юкланган вазифа ва функцияларни бажариш билан боғлиқ бўлган бошқа ҳужжатларни киритиш;

2) Қўмитанинг ваколатига кирадиган масалаларда давлат ва хўжалик бошқаруви органлари, маҳаллий давлат ҳокимияти органлари фаолиятини белгиланган тартибда мувофиқлаштириш;

3) Қўмитанинг ваколатига кирадиган масалаларни ҳал этиш учун зарур бўлган ахборотларни, маълумотларни, маълумотномаларни давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлардан бепул сўраш ва олиш;

4) Қўмита ва унинг тасарруфидаги тузилмалари ўзининг ташкилий тузилмаси доирасида давлат мулкини белгиланган тартибда бир тузилмадан бошқа тузилмага тезкор бошқарув ҳуқуқи асосида ўтказиш;

5) Қўмита, давлат солиқ хизматининг ҳудудий органлари, Ҳудудлараро инспекцияси ва тасарруфидаги ташкилотлар ходимларини моддий рағбатлантириш, мукофотлаш тартиби, миқдорлари ва шартларини белгилаш;

6) Қўмитанинг ваколатига кирадиган масалалар бўйича таклифларни Ўзбекистон Республикаси Вазирлар Маҳкамаси, давлат ва хўжалик бошқаруви органларига, жойлардаги маҳаллий давлат ҳокимияти органларига кўриб чиқиш учун киритиш;

7) Қўмитанинг ваколатига кирадиган масалалар бўйича идоралараро тусдаги халқаро шартномаларни белгиланган тартибда тузиш;

8) Қўмитанинг ваколатига кирадиган масалалар бўйича халқаро даражада Ўзбекистон Республикасининг манфаатини белгиланган тартибда ифода этиш;

9) солиқ тўловчиларнинг молиявий ҳужжатларини, шартномаларини (контрактларини), режаларини, сметаларини, даромадлари тўғрисидаги декларацияларини ҳамда солиқлар ва йиғимларни ҳисоблаб чиқиш ва тўлаш, фуқароларнинг якка тартибдаги жамғариб бориладиган пенсия ҳисоб рақамларига жамғариб бориладиган мажбурий пенсия бадалларини тўлаш билан боғлиқ бошқа ҳужжатларини, шу жумладан электрон ҳужжатларини, шунингдек, экспорт-импорт операциялари билан боғлиқ ҳужжатларини белгиланган тартибда текшириш;

10) ўтказилаётган камерал солиқ текширувини холисона амалга ошириш мақсадида қўшимча маълумотлар олиш зарурати юзага келганда қонун ҳужжатларида белгиланган тартибда сайёр солиқ текширувларини амалга ошириш;

11) солиқ текширувларини ўтказаётганда:

ҳудудни, ишлаб чиқариш, омборхона, савдо биноларини ва бошқа биноларни (шунингдек, алоҳида режимда ишлайдиган корхоналарни), шу жумладан солиқ тўловчи томонидан даромадлар олиш учун фойдаланиладиган ёхуд солиқ солиш объектларини сақлаш билан боғлиқ жойларни, уларнинг жойлашган жойидан қатъи назар, текшириш;

мол-мулкларни хатловдан ўтказиш ва бажарилган ишларни, кўрсатилган хизматларни назорат тартибида ўлчаш;

кассаларни ҳамда товар-моддий бойликлар ва ҳужжатларни (шу жумладан электрон тарзидаги ҳужжатларни) сақлаш жойларини муҳрлаб қўйиш;

солиқлар ва йиғимларни ҳисоблаб чиқиш ва тўлаш билан боғлиқ ҳужжатларни талаб қилиш;

ҳужжатларни (нусхаларини, шунингдек, асл нусхаларини), шу жумладан электрон ҳужжатларни, предметларни (товарлар, буюмлар, хомашёлар, материаллар ва ярим тайёр маҳсулотлар намуналарини), шунингдек, ҳуқуқбузарлик предметларини олиб қўйиш, олиб қўйилиши солиқ тўловчи фаолиятининг тўхтаб қолишига олиб келадиган ҳужжатлар бундан мустасно. Солиқ тўловчи фаолиятининг тўхтаб қолишига олиб келадиган ҳужжатлар ва предметларни олиб қўйиш фақат суд қарори асосида амалга оширилади;

солиқ тўловчидан, шунингдек, солиқ тўловчининг раҳбарлик функцияларини ёки бухгалтерия ҳисоби ва молиявий бошқарув функцияларини амалга ошираётган шахслардан, бошқа моддий жавобгар ходимлардан тушунтиришлар олиш;

текширилаётган солиқ тўловчиларнинг раҳбарларидан асосий воситалар, товар-моддий бойликлар, пул маблағлари ва ҳисоб-китобларни хатловдан ўтказишни талаб қилиш;

таржимонни, экспертни жалб этиш ва экспертизани тайинлаш;

аниқланган солиқ қонунчилигининг бузилишларини бартараф этилишини талаб қилиш;

Ўзбекистон Республикасининг Солиқ кодексида ва бошқа қонун ҳужжатларида назарда тутилган бошқа хатти-ҳаракатларни амалга ошириш;

12) савдо, товарлар сотиш ва пулли хизматлар кўрсатиш қоидаларига риоя этилиши, шунингдек, нақд пул ёки пластик карточкалар бўйича тўлов шаклига қараб нархларни сунъий равишда ошириш ёки пасайтириш, назорат-касса техникаларидан, қонун ҳужжатларида назарда тутилган ҳолларда эса онлайн назорат-касса техникалари ёки виртуал кассалардан, ҳисоб-китоб терминалларидан фойдаланиш, белгиланган тартибда талонлар ва чекларни бериш масалалари юзасидан текширувларни белгиланган тартибга мувофиқ ўтказиш;

13) солиқ назоратини амалга оширишда қонун ҳужжатларида белгиланган тартибда фискал хотирали назорат-касса машинасида, онлайн назорат-касса машиналари ёки виртуал кассаларда сақланаётган маълумотлардан фойдаланиш;

14) солиқ солинадиган базани аниқлаштириш мақсадида хўжалик юритувчи субъектлар ходимларининг ҳисоботдаги ва ҳақиқий сонининг мувофиқлиги юзасидан мониторингни амалга ошириш;

15) солиқ мониторингини амалга оширишда солиқ тўловчидан солиқлар ва йиғимларнинг тўғри ҳисобланиши, тўлиқ ва ўз вақтида тўланиши билан боғлиқ зарур ҳужжатлар, маълумотлар, тушунтиришларни талаб қилиб олиш;

16) хўжалик юритувчи субъектлар фаолиятида ўтказилган хронометраж кўздан кечириш натижаларига кўра товар (иш, хизмат)лар реализациясидан камайтириб кўрсатилган тушумни қайта ҳисоб-китоб қилган ҳолда солиқларни ҳисоблашни амалга ошириш тўғрисида талабнома юбориш;

17) давлат солиқ хизматлари органларида солиқ солиш объектлари ва солиқ солиш билан боғлиқ объектлар тўғрисидаги мавжуд маълумотларни аниқлаштириш мақсадида, қонун ҳужжатларида белгиланган тартибда, кўздан кечириш ҳамда сўров олиб бориш;

18) белгиланган тартибда қуйидагиларни:

банклардан ва бошқа кредит-молия ташкилотларидан солиқ тўловчиларнинг ҳисоб-китоб ҳисобварақларида ёки бошқа ҳисобварақларида амалга оширилган операциялар ҳақидаги, шунингдек, ушбу ҳисобварақлардаги мавжуд пул маблағлари тўғрисидаги маълумотларни;

божхона органларидан ва бошқа ваколатли органлардан импорт-экспорт операциялари амалга оширилганлиги ва солиқ тўловчилар тўғрисидаги бошқа зарур маълумотларни;

вазирликлар, идоралар ва бошқа ташкилотлардан давлат солиқ хизмати органлари мансабдор шахсларининг хизмат вазифалари масалалари бўйича маълумотларни олиш;

19) белгиланган тартибда:

қурилиш, монтаж, таъмирлаш ва бошқа ишларни назорат ўлчовидан ўтказиш учун малакали мутахассисларни жалб этиш;

иқтисодий жиноятлар билан курашишда илмий-техник воситалардан ва усуллардан фойдаланиш;

ўтказиладиган текширишларда бошқа назорат қилувчи органлар, вазирликлар ва идоралар билан ҳамкорлик қилиш;

мансабдор шахсларни, фуқароларни аниқланган ҳуқуқбузарлик фактлари бўйича тушунтиришлар бериш учун давлат солиқ хизмати органларига таклиф этиш;

20) солиқ тўловчи томонидан ҳисобга олиш ҳужжатлари йўқотиб қўйилган ёки йўқ қилинган ҳолатларда Давлат бюджетига ва давлат мақсадли жамғармаларига тўланиши керак бўлган солиқлар ҳамда йиғимлар суммасини солиқ тўловчи тўғрисида ўзида мавжуд бўлган ахборотлар, шунингдек, бошқа ана шундай солиқ тўловчилар тўғрисидаги маълумотлар асосида ҳисоб-китоб қилиш йўли билан мустақил равишда белгилаш;

21) солиқ мажбурияти бўйича даъво қилиш муддати мобайнида солиқлар ва йиғимларнинг ҳисоблаб чиқилган суммасини ҳисоблаб чиқариш ёки қайта кўриб чиқиш;

22) солиқлар ва йиғимларни ундириш функцияларини амалга оширувчи давлат органлари ва ташкилотларни солиқлар ва йиғимларнинг тўғри ҳисоблаб чиқилганлиги, тўлиқ ундирилганлиги ва Давлат бюджетига ҳамда давлат мақсадли жамғармаларига ўз вақтида ўтказилганлиги юзасидан назорат қилиш;

23) Солиқ тўловчининг (солиқ агентининг) банкдаги ҳисобварақлари бўйича операцияларни ўн кундан кўп бўлмаган муддатга тўхтатиб туриш. Солиқ тўловчининг (солиқ агентининг) банкдаги ҳисобварақлари бўйича операцияларни ўн кундан кўп муддатга тўхтатиб туриш бўйича суд тартибида чоралар кўриш (жиноий фаолиятдан олинган даромадларни легаллаштириш ҳамда терроризмни молиялаштириш, шунингдек, мазкур кичик банднинг иккинчи хатбошида назарда тутилган ҳолатлар бундан мустасно).

Юридик шахслар ва якка тартибдаги тадбиркорларнинг банкдаги ҳисобварақлари бўйича операцияларни ўн кундан кўп бўлмаган муддатга тўхтатиб туриш солиқ органи томонидан мазкур солиқ тўловчиларнинг (солиқ агентларининг) солиқ мажбуриятлари бажарилишини таъминлаш учун қуйидаги ҳолларда қўлланилиши мумкин:

ушбу солиқ тўловчи (солиқ агенти) томонидан солиқ органига молиявий ва (ёки) солиқ ҳисоботи бундай ҳисоботни тақдим этишнинг белгиланган муддати тугаганидан кейин ўн кун ичида тақдим этилмаганда;

солиқ тўловчи (солиқ агенти) томонидан солиқ органининг камерал солиқ текшируви натижалари бўйича талабномасига тушунтиришлар ва (ёки) тузатишлар белгиланган муддатда тақдим этилмаганда, шунингдек солиқ тўловчи томонидан солиқ органи талаб қилган ҳужжатлар тақдим этилмаганда;

солиқ текширувини ўтказаётган солиқ органларининг мансабдор шахсларини кўрсатилган ҳудудга ёки бинога (бундан турар жойлар мустасно) киришига тўсқинлик қилишда. Солиқ органи мансабдор шахсининг киришига тўсқинлик қилиниши унинг ўзи ва текширилаётган шахс томонидан имзоланадиган далолатнома билан расмийлаштирилади. Бундай далолатнома асосида солиқ органи банкдаги ҳисобварақлар бўйича операцияларни тўхтатиб туради;

солиқ тўловчининг (солиқ агентининг) ўзи кўрсатган манзилда йўқлигида;

25) қонун ҳужжатларида белгиланган тартибда:

солиққа оид ҳуқуқбузарликлар тўғрисидаги ишни кўриб чиқиш ва юридик ҳамда жисмоний шахсларга нисбатан молиявий санкцияларни қўллаш;

маъмурий ҳуқуқбузарликлар тўғрисидаги ишларни кўриб чиқиш ва маъмурий жазолар қўллаш;

26) аниқланган солиққа оид ҳуқуқбузарликлар бўйича товар-моддий бойликларни қонун ҳужжатларида белгиланган ҳолатларда ва тартибда давлат даромадига ўтказиш. Солиқ тўловчилар — юридик шахслар, якка тартибдаги тадбиркорларнинг товар-моддий бойликларини давлат даромадига ўтказиш суд тартибида амалга оширилади;

27) солиқ тўловчилар томонидан ноқонуний олинган маблағларни давлат даромадига ундириш тўғрисида уларга нисбатан судга даъволар тақдим этиш;

28) ўтказилган камерал назорат натижалари бўйича солиқ тўловчи аниқлаштирилган солиқ ҳисоботини тақдим этмаса ёки аниқланган тафовутлар бўйича асосномаларни тақдим этмаса ёхуд тақдим этган асосномалар етарли эмас деб топилса солиқ органи солиқ тўловчига солиқ аудитини тайинлаш;

29) давлат улушлари бўйича дивидендларни ва давлат унитар корхоналарининг соф фойдасидан Давлат бюджетига ажратмаларни ундириш;

30) солиқ тўловчи мажбуриятларининг бажарилиши зарурлиги тўғрисида ва солиқ қарзини мажбурий тартибда ундириш бўйича кўриладиган чоралар тўғрисида солиқ тўловчига талабнома юбориш;

31) солиқ тўловчи солиқ ҳисоботи тақдим этилган санадан эътиборан ўн кун мобайнида ёзма ариза бермаган тақдирда, солиқлар ва йиғимларнинг ортиқча тўланган суммаларини солиқ қарзини, шу жумладан, улар бўйича пеня ва жарималарни узиш ҳисобидан ҳисобга олиш тўғрисида Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасига мустақил равишда хулоса тақдим этиш;

32) Ўзбекистон Республикасининг Солиқ кодексида белгиланган ҳолатларда ҳужжатларни, агар улар чет тилда тузилган бўлса, нотариал тасдиқлаган ҳолда давлат тилига таржима қилишни талаб қилиш;

33) юридик шахсларнинг мол-мулкига солинадиган солиқ, сув ресурсларидан фойдаланганлик учун солиқ бўйича солиқ даврида бўнак тўловлари суммаси солиқ ҳисоботида кўрсатилган, бюджетга тўланиши лозим бўлган солиқ суммасига нисбатан 10 фоиздан ортиқ камайтирилган тақдирда, бўнак тўловларини солиқларнинг ҳақиқий суммасидан келиб чиқиб, пеня ҳисоблаган ҳолда қайтадан ҳисоблаш;

34) бозорларда, савдо комплексларида ва уларга туташ бўлган автотранспорт воситаларини вақтинча сақлаш жойларида бир марталик йиғимнинг тўлиқ тушганлигини ва уни топшириш ҳисобини, ижара тўловини, назорат-касса техникаларидан, қонун ҳужжатларида назарда тутилган ҳолларда эса онлайн назорат-касса техникалари ёки виртуал кассалардан фойдаланилишини, ҳисоб-китоб терминалларини, савдо ва хизматлар кўрсатиш қоидаларига риоя этилишини белгиланган тартибда қисқа муддатли текширишларни амалга ошириш, шу жумладан, нақд пул ёки пластик карточкалар бўйича тўлов шаклига қараб нархларни сунъий равишда ошириш ёки пасайтириш, шунингдек, белгиланган тартибда талонлар ва чекларни бериш масалалари юзасидан текширувлар ўтказиш;

35) бозорлар, савдо комплекслари ҳудудларида ва уларга туташ бўлган автотранспорт воситаларини вақтинчалик сақлаш жойларида аниқланган молия-иқтисодий ва солиқ соҳаларидаги бузилишлар содир этилганлиги фактлари бўйича терговга қадар текширувлар ўтказиш, улар бўйича жиноий ишлар қўзғаш, кейинчалик ишларни терговга тегишлилигига қараб қонун ҳужжатларига мувофиқ ҳуқуқни муҳофаза қилувчи органларга бериш.

Давлат солиқ хизмати органлари ушбу Низомда ва бошқа қонун ҳужжатларида назарда тутилган бошқа ҳуқуқларга ҳам эгадир.

36) Солиқ ва йиғимларни йиғиш мақсадида давлат солиқ хизмати органларининг бюджетдан ташқари маблағлари ҳисобидан тўғридан-тўғри шартнома орқали қайтариш шарти билан тижорат банкларига «0» фоиз ставкада депозитга маблағ жойлаштириш.

37) тижорат банкларида корпоратив банк карталарини очиш ва улардан назорат харидларини амалга ошириш мақсадида фойдаланиш.

15. Ушбу Низомнинг 14-бандида назарда тутилган ҳуқуқлар белгиланган ваколатлар доирасида:

ушбу Низомнинг 14-бандидаги 9 — 22, 33 — 35-кичик бандлари — давлат солиқ хизмати органларининг мансабдор шахсларига берилади;

ушбу Низомнинг 14-бандидаги 1 — 8, 23 — 32 ва 36-кичик бандлари — давлат солиқ хизмати органлари бошлиқлари ва уларнинг ўринбосарларига берилади.

16. Қўмита марказий аппарати таркибий бўлинмалари ва давлат солиқ хизматининг ҳудудий органларининг ҳуқуқлари Қўмита раиси томонидан тасдиқланадиган низомларда белгиланади.

17. Қўмита:

юкланган вазифа ва функцияларни самарали амалга ошириш, шунингдек, солиқ тўғрисидаги қонун ҳужжатларига риоя этилишини таъминлаш соҳасида давлат бошқаруви назоратини самарали бажариш;

Давлат бюджетига ва давлат мақсадли жамғармаларига солиқлар ва йиғимлар тушуми прогноз кўрсаткичларига эришилишини сўзсиз таъминлаш;

Ўзбекистон Республикаси Вазирлар Маҳкамаси ва Ўзбекистон Республикаси Президенти Администрациясига киритиладиган, шунингдек, Қўмита томонидан қабул қилинадиган норматив-ҳуқуқий ҳужжатлар лойиҳалари ва бошқа ҳужжатларни амалга ошириш сифати, натижалари ва якуний натижаси;

давлат солиқ хизмати органларини ривожлантириш, шунингдек, ҳудудларни ижтимоий-иқтисодий ривожлантириш ва муаммоли масалаларни ҳал этиш бўйича дастурлар, чора-тадбирлар режалари, «йўл харитаси» ва бошқа дастурий ҳужжатларни самарали амалга ошириш;

фуқаролар ва тадбиркорлик субъектларининг ҳуқуқлари ва қонуний манфаатларини ҳимоя қилиш ва риоя этилишини таъминлаш учун жавоб беради.

18. Қўмита марказий аппарати таркибий бўлинмалари ва давлат солиқ хизматининг ҳудудий органларининг жавобгарлиги Қўмита раиси томонидан тасдиқланадиган низомларда белгиланади.

19. Қуйидагилар Қўмита раисининг асосий функционал мажбуриятлари ҳисобланади:

1) Ўзбекистон Республикаси Конституцияси ва қонунлари, шунингдек, бошқа норматив-ҳуқуқий ҳужжатлар талабларига риоя этиш;

2) Қўмита фаолиятига умумий раҳбарлик қилиш, тегишли қонун ҳужжатлари билан Қўмита зиммасига юкланган вазифа ва функцияларнинг бажарилишини ташкил этиш;

3) Ўзбекистон Республикаси Президенти ҳужжатлари ва Ўзбекистон Республикаси Вазирлар Маҳкамасининг қарорлари билан тасдиқланган Қўмита фаолиятини янада такомиллаштириш бўйича концепциялар, комплекс дастурлар ҳамда комплекс тадбирлар ижросини танқидий ва чуқур таҳлил қилиш;

4) Давлат бюджетига, давлат мақсадли жамғармаларига солиқлар ва йиғимлар тушуми прогноз кўрсаткичларига эришишни сўзсиз таъминлаш бўйича таъсирчан чораларни ишлаб чиқиш ва қабул қилиш;

5) Қўмита фаолияти соҳасига кирувчи масалалар бўйича Ўзбекистон Республикаси Президенти Администрациясининг бўлинмалари ва Ўзбекистон Республикаси Вазирлар Маҳкамаси котибиятлари, шунингдек, тегишли вазирликлар ва идоралар билан ўзаро ҳамкорлик қилиш, Ўзбекистон Республикаси Вазирлар Маҳкамаси ва унинг Раёсати мажлисларида масалаларни кўриб чиқишда иштирок этиш;

6) Ўзбекистон Республикаси Президенти, Ўзбекистон Республикасининг Бош вазири ва унинг ўринбосарларининг топшириқларини ижро этиш;

7) ўз ўринбосарлари ваколатларини белгилаш, улар ўртасида вазифаларни тақсимлаш, Қўмитанинг бошқа мансабдор шахслари ваколатларини белгилаш, Қўмита фаолиятининг алоҳида участкаларига раҳбарлик қилиш учун ўз ўринбосарлари ва бошқа мансабдор шахсларнинг шахсий масъулияти даражасини белгилаш;

8) Қўмита фаолиятини режалаштиришни ташкил этиш, Қўмита ва ўз ўринбосарларининг ҳар чораклик иш режаларини тасдиқлаш, уларнинг бажарилиши юзасидан назоратни таъминлаш;

9) Ўзбекистон Республикаси Президенти ва Ўзбекистон Республикаси Вазирлар Маҳкамаси ҳужжатлари ҳамда топшириқлари ижросини ташкил этиш ва мониторингини олиб боришнинг таъсирчан тизимини яратиш, Қўмита фаолиятида ижро интизомини мустаҳкамлаш бўйича комплекс амалий чора-тадбирларни бажариш, қонун ҳужжатларида белгиланган тартибда топшириқларнинг ўз вақтида ва сифатли ижро этилиши учун таркибий ва ҳудудий бўлинмалар, шунингдек, тасарруфидаги ташкилотлар раҳбарларининг шахсий жавобгарлигини ошириш чораларини кўриш;

10) Қўмита ходимларини қайта тайёрлаш ва уларнинг малакасини оширишни тизимли ташкил этиш;

11) Қўмита тизимида кадрларни танлаш ва жой-жойига қўйиш, уларнинг самарали фаолияти учун зарур шарт-шароитлар яратиш, Қўмитанинг кадрлар захирасини шакллантириш;

12) Ўзбекистон Республикаси Президенти, Ўзбекистон Республикаси Президенти Администрацияси ва Ўзбекистон Республикаси Вазирлар Маҳкамаси номенклатурасига кирадиган вакант раҳбар лавозимларга таклиф этилган кадрлар, шунингдек, Қўмитага ишга қабул қилинаётган бошқа кадрларнинг профессионаллиги, ўз ишини билиши, амалий тажрибаси, юқори даражадаги ишчанлик ва маънавий-ахлоқий фазилатлари кафолатини таъминлаш;

13) фаолият соҳасига кирадиган масалалар бўйича норматив-ҳуқуқий ҳужжатлар лойиҳалари сифатли ишлаб чиқилишини, уларнинг қонун ҳужжатларида белгиланган талабларга қатъий мувофиқ равишда ўз вақтида Ўзбекистон Республикаси Вазирлар Маҳкамасига киритилишини ташкил этиш;

14) қонун ҳужжатларида белгиланган тартибда Қўмитанинг қонун лойиҳаларини тайёрлаш фаолиятини ташкил этиш;

15) Қўмита ваколатига кирувчи масалалар бўйича норматив-ҳуқуқий ҳужжатларни, зарурат бўлганда, бошқа вазирликлар ва идоралар билан биргаликда тегишли қарорлар қабул қилиш;

16) Қўмитага тақдим этилган таклифлар ва норматив-ҳуқуқий ҳужжатлар лойиҳаларининг тўлиқ ҳамда ҳар томонлама кўриб чиқилишини таъминлаш, уларни қонун ҳужжатларида белгиланган муддатларда келишиш (виза қўйиш);

17) Қўмита раҳбарлари ва ходимлари хизмат сафарларини қонун ҳужжатлари талабларига тўла мувофиқ равишда бажариш ва ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланилишини таъминлаш;

18) ўз ўринбосарлари ҳамда таркибий ва давлат солиқ хизматининг ҳудудий органлари раҳбарлари фаолияти самарадорлиги ва натижадорлигини тизимли танқидий таҳлил қилиш, Қўмитанинг ҳайъати мажлисларида уларнинг шахсий ҳисоботларини эшитиш, якунлари бўйича зарур чоралар кўриш;

19) Қўмита ходимларини рағбатлантириш ва интизомий жавобгарликка тортиш масалаларини ҳал қилиш, ўз ўринбосарларини рағбатлантириш ҳамда интизомий жавобгарликка тортиш, шу жумладан, уларнинг эгаллаб турган лавозимида қолиши мақсадга мувофиқлигига доир масалаларни кўриб чиқиш бўйича таклифлар киритиш, уларнинг шахсий жавобгарлигини оширишга доир тизимли чораларни амалга ошириш;

20) Қўмита ходимлари томонидан Қўмита томонидан белгиланган тартибда тасдиқланадиган ходимларнинг одоб-ахлоқ қоидалари талабларига ҳамда ички меҳнат тартиби қоидаларига риоя этилишини таъминлашни назорат қилиш;

21) қонун ҳужжатларида белгиланган талабларга мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиёти ва қонун ҳужжатларини такомиллаштириш бўйича чора-тадбирларни ишлаб чиқиш ҳамда амалга ошириш йўли билан уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

22) Қўмита, Ҳудудлараро инспекция, давлат солиқ хизматининг ҳудудий органлари ва тасарруфидаги ташкилотлар ишини ташкил этишнинг замонавий шакллари жорий этилишини таъминлаш;

23) аҳоли ва тадбиркорлик субъектлари билан ўзаро ҳамкорлик қилишда, шу жумладан «ягона дарча» принципини жорий этиш орқали давлат хизматлари кўрсатиш сифати ва самарадорлигини ошириш ҳамда улардан эркин фойдаланишни таъминлаш ва Ўзбекистон Республикасининг «Электрон ҳукумат тўғрисида»ги Қонунини амалга ошириш доирасида замонавий ахборот-коммуникация технологияларидан фойдаланиш;

24) жисмоний ва юридик шахсларнинг мурожаатларини кўриб чиқиш, аҳоли билан бевосита ва очиқ мулоқотни йўлга қўйиш, қонун ҳужжатларида белгиланган муддатларда ва тартибда жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан сайёр қабуллар ўтказиш;

25) Ўзбекистон Республикаси Президентининг Халқ қабулхоналари билан самарали ҳамкорликни, улар фаолиятида Қўмита ходимлари ҳамда раҳбарларининг фаол иштирок этишини ташкиллаштириш, жисмоний ва юридик шахсларнинг Ўзбекистон Республикаси Президенти Виртуал қабулхонасидан тушадиган мурожаатлари ўз вақтида ҳамда тўлиқ кўриб чиқилишини таъминлаш;

26) давлат сирларига киритилган ахборот ва махфий ахборот билан ишлашда қонун ҳужжатлари талабларига риоя қилиш;

27) зарур ҳолларда марказий аппарат ва ҳудудий бўлинмалар, Йирик солиқ тўловчилар бўйича ҳудудлараро солиқ инспекциясининг тасдиқланган тузилмаларига бошқарув ходимларининг умумий чекланган сони ва иш ҳақи фонди доирасида ўзгартиришлар киритиш;

30) Ўзбекистон Республикаси Президенти Администрацияси билан келишилган ҳолда Ўзбекистон Республикаси Солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси маблағлари ҳисобидан давлат солиқ хизмати органлари бошқарув ходимлари мутахассисларининг қўшимча штат бирликларини жорий этиш;

31) Қўмита марказий аппаратининг таркибий тузилмалари, давлат солиқ хизматининг ҳудудий органлари тўғрисидаги низомларни ҳамда тасарруфидаги ташкилотлар уставларини белгиланган тартибда тасдиқлаш;

32) Қўмита марказий аппарати, Ҳудудлараро инспекциянинг штатлар жадвалини тасдиқлаш;

33) Қўмита ходимларини, Қорақалпоғистон Республикаси, вилоятлар ва Тошкент шаҳар солиқ бошқармалари бошлиқлари ўринбосарлари, Қорақалпоғистон Республикаси, вилоятлар ва Тошкент шаҳар солиқ бошқармалари ҳамда Ҳудудлараро инспекциянинг бўлим (шуъба) бошлиқлари, Қорақалпоғистон Республикаси, вилоятлар ва Тошкент шаҳар солиқ бошқармалари солиқ органлари фаолиятини назорат қилиш ва шахсий хавфсизлик бўлимлари (шуъбалари) ходимларини, туман (шаҳар) солиқ инспекциялари бошлиқлари, Ҳудудлараро инспекция бошлиғи ва бошлиқ ўринбосарлари, Ҳудудлараро инспекция шахсий хавфсизлик бўлимлари ходимларини лавозимга тайинлаш ва лавозимдан озод қилиш;

34) Қўмита ҳайъати ва марказий аппарати мажлисларини бошқариш;

35) Қўмита ва давлат солиқ хизматининг ҳудудий органлари, Ҳудудлараро инспекциянинг ходимлари томонидан бажарилиши мажбурий бўлган буйруқлар чиқариш, йўриқномалар, қоидалар, низомларни тасдиқлаш ҳамда кўрсатмалар бериш, шунингдек, уларнинг белгиланган тартибда ижро этилишини назорат қилиш;

36) давлат солиқ хизмати органлари ходимларини моддий рағбатлантириш, шу жумладан мукофотлаш тўғрисида қарорлар қабул қилиш;

37) давлат солиқ хизмати органлари тизимидаги ходимлар ва мутахассисларни уларнинг кўп йиллик ва самарали фаолияти, алоҳида ютуқлари ва хизматлари учун белгиланган тартибда Ўзбекистон Республикаси давлат мукофотларига билан тақдирлашга тақдим қилиш ва тавсиялар берилишини таъминлаш;

38) давлат органлари ва бошқа ташкилотларда, шунингдек, бошқа давлатларнинг давлат солиқ хизмати органлари билан муносабатларда давлат солиқ хизмати органларининг манфаатларини ифодалаш.

39) бўйсунувчи ташкилотларнинг ходимлари сонини аниқлаш, уларнинг тузилмаси, штат бирлиги, шу жумладан, бошқарув ходимлари, иш ҳақи фонди, харажатлар сметаси, транспорт воситаларининг меъёрларини тасдиқлаш, шунингдек, уларнинг мол-мулкини тасарруф этиш.

20. Қуйидагилар Қўмита раиси ўринбосарларининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари, шунингдек, бошқа норматив-ҳуқуқий ҳужжатлар талабларига риоя этиш;

2) Қўмита раиси вақтинча бўлмаганда тегишли буйруқ асосида унинг вазифаларини бажариш;

3) Қўмитанинг мутасаддилик қилинадиган таркибий тузилмалари фаолиятини мувофиқлаштириш, назорат қилиш ва уларга бевосита раҳбарлик қилиш, уларнинг ходимлари ўртасида вазифаларни тақсимлаш;

4) Қўмитанинг мутасаддилик қилинадиган фаолият йўналишлари бўйича Ўзбекистон Республикаси Президенти ҳужжатлари ва Ўзбекистон Республикаси Вазирлар Маҳкамасининг қарорлари билан тасдиқланган Қўмита фаолиятини янада такомиллаштириш бўйича концепциялар, комплекс дастурлар ҳамда комплекс чора-тадбирлар ижросини танқидий ва чуқур таҳлил қилиш;

5) мутасаддилик қилинадиган таркибий тузилмалар томонидан прогноз кўрсаткичларига эришишни сўзсиз таъминлаш бўйича таъсирчан чоралар кўриш, тузилмалар раҳбарлари ҳисоботларини мунтазам эшитиш ва қайд этилган кўрсаткичларга эришиш учун уларнинг шахсий жавобгарлигини ошириш;

6) мутасаддилик қилинадиган таркибий тузилмалар раҳбарларининг ҳар чораклик режаларини тасдиқлаш, уларнинг бажарилиши устидан назоратни таъминлаш;

7) Ўзбекистон Республикаси Президенти ва Ўзбекистон Республикаси Вазирлар Маҳкамаси қарорлари ҳамда топшириқлари ижросини таъминлаш, Қўмитанинг мутасаддилик қилинадиган таркибий тузилмаларда ижро интизомини мустаҳкамлаш бўйича комплекс амалий чораларни амалга ошириш, шунингдек, қонун ҳужжатларида белгиланган тартибда топшириқларнинг ўз вақтида ва сифатли ижро этилиши учун таркибий тузилмалар раҳбарларининг шахсий жавобгарлигини ошириш чораларини кўриш;

8) Қўмита ҳайъати қарорлари, Қўмита раисининг буйруқ ва топшириқлари ўз вақтида ҳамда сифатли бажарилишини таъминлаш;

9) мутасаддилик қилинадиган таркибий тузилмаларда кадрларни танлаш ва жой-жойига қўйиш бўйича Қўмита раисига таклифлар тақдим этиш, уларнинг профессионаллиги, ўз ишини билиши, амалий тажрибаси, юқори даражадаги ишчанлик ва маънавий-ахлоқий фазилатлари кафолатини таъминлаш, уларнинг касбий малакасини ошириш чораларини кўриш, мутасаддилик қилинадиган таркибий тузилмаларда кадрлар захирасини шакллантириш;

10) норматив-ҳуқуқий ҳужжатлар лойиҳалари мутасаддилик қилинадиган таркибий тузилмалар томонидан сифатли ишлаб чиқилишини ташкил этиш, Қўмитанинг таркибий тузилмаларида тайёрланган ҳужжатлар лойиҳаларини кўриб чиқиш ва улар кейинчалик Қўмита раиси томонидан кўриб чиқилиши, имзоланиши (виза қўйилиши) учун виза қўйиш, уларнинг қонун ҳужжатлари талабларига қатъий мувофиқ равишда Ўзбекистон Республикаси Вазирлар Маҳкамасига ўз вақтида киритилишини таъминлаш;

11) Қўмитага тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

12) хизмат сафарларини қонун ҳужжатлари талабларига тўлиқ мувофиқ амалга ошириш ва ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланилишини таъминлаш;

13) мутасаддилик қилинадиган таркибий тузилмалар раҳбарлари ва ходимлари фаолияти самарадорлиги ҳамда натижадорлигини тизимли танқидий таҳлил қилиш, Қўмита ҳайъати мажлисларида уларнинг шахсий ҳисоботларини эшитиш, якунлари бўйича зарур чоралар кўриш;

14) мутасаддилик қилинадиган таркибий тузилмаларнинг фаолият соҳасига тегишли бўлган масалалар бўйича Қўмита фаолиятини такомиллаштиришга доир амалий чоралар кўриш, қонун ҳужжатларини такомиллаштириш юзасидан таклифлар ишлаб чиқиш ҳамда уларни Қўмита раисига киритиш;

15) мутасаддилик қилинадиган таркибий тузилмалар раҳбарлари ва ходимларини рағбатлантириш, моддий рағбатлантириш, мукофотлаш ҳамда интизомий жавобгарликка тортиш, шу жумладан уларнинг эгаллаб турган лавозимида қолиши мақсадга мувофиқлиги тўғрисидаги масалани кўриб чиқиш бўйича таклифларни Қўмита раисига киритиш, функционал вазифалар ва юкланган вазифалар бажарилиши учун уларнинг шахсий жавобгарлигини ошириш бўйича тизимли чораларни амалга ошириш;

16) Қўмита томонидан белгиланган тартибда тасдиқланган ходимларнинг одоб-ахлоқ қоидалари ҳамда ички меҳнат тартиби қоидалари талабларига риоя этиш, кўрсатилган қоидалар мутасаддилик қилинадиган таркибий тузилмалар раҳбарлари ва ходимлари томонидан риоя этилишини таъминлаш;

17) қонун ҳужжатларида белгиланган талабларга мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиёти ва қонун ҳужжатларини такомиллаштириш бўйича чора-тадбирлар ишлаб чиқиш ҳамда амалга ошириш йўли билан уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

18) Қўмита раисига давлат хизматлари самарадорлиги, сифати ва улардан эркин фойдаланишни оширишга доир таклифлар киритиш;

19) жисмоний ва юридик шахсларнинг мурожаатларини кўриб чиқиш бўйича самарали ишларни ташкил этиш, аҳоли билан бевосита ва очиқ мулоқотни йўлга қўйиш, мунтазам шахсий қабуллар ўтказиш, шу жумладан қонун ҳужжатларида белгиланган муддатларда ва тартибда жисмоний шахсларни ва юридик шахсларнинг вакилларини сайёр қабул қилиш;

20) Ўзбекистон Республикаси Президентининг Халқ қабулхоналари билан самарали ҳамкорлик қилиш, улар фаолиятида қонун ҳужжатлари талабларига мувофиқ фаол иштирок этиш, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушадиган барча мурожаатларини ўз вақтида ҳамда тўлиқ кўриб чиқилишини таъминлаш;

21) давлат сирларига киритилган ахборот ва махфий ахборот билан ишлашда қонун ҳужжатлари талабларига риоя қилиш;

22) вазирликлар, идоралар, маҳаллий ижро этувчи органлар ва бошқа ташкилотларнинг солиқ тўғрисидаги қонун ҳужжатларига риоя этилишини таъминлаш соҳасидаги ишларни мувофиқлаштиришда иштирок этиш.

21. Қўмита маркази аппаратининг таркибий тузилмалари ва давлат солиқ хизматининг ҳудудий органлари раҳбарларининг асосий функционал мажбуриятлари Қўмита раиси томонидан тасдиқланади.

22. Қўмита раиси:

1) Қўмитага юкланган вазифа ва функцияларнинг бажарилиши;

2) Давлат бюджети ва давлат мақсадли жамғармаларига тушумлар прогнозининг бажарилиши;

3) солиқлар ва йиғимларнинг тўлиқ ва ўз вақтида тушишини таъминлаш юзасидан лозим даражада назорат ўрнатилиши;

4) Ўзбекистон Республикаси Президенти, Ўзбекистон Республикаси Вазирлар Маҳкамасининг қарорлари, бошқа норматив-ҳуқуқий ҳужжатлари талабларининг ўз вақтида ва сифатли бажарилиши;

5) давлат солиқ хизмати органларига юқори маънавий-ахлоқий сифатларга эга малакали ходимларни жалб этишга қаратилган, кадрларни танлаш, жой-жойига қўйиш ва рағбатлантиришнинг мутлақо янги тизими яратилиши;

6) ходимларнинг хизматга бўлган муносабатини тубдан ўзгартириш, қонун бузилишининг барча кўринишларига нисбатан муросасиз муносабатда бўлиш муҳити яратилиши, жамоада соғлом муҳит шакллантирилиши;

7) давлат солиқ хизмати органлари фаолиятининг очиқлиги таъминланиши, солиқ тўловчилар билан тўғридан-тўғри алоқасиз мулоқот ўрнатилиши;

8) солиқ маъмуриятчилигининг замонавий услубларини жорий этиш соҳасида халқаро экспертлар, грантларни жалб этиш ишлари;

9) давлат солиқ хизмати органларининг моддий-техника жиҳатдан таъминланиши;

10) ушбу Низомнинг 17-бандида назарда тутилган Қўмитанинг тегишли жавобгарлик соҳалари;

11) ушбу Низомнинг 19-бандида назарда тутилган ўз функционал мажбуриятларининг сифатли бажарилиши учун шахсан жавоб беради.

23. Қўмита раисининг биринчи ўринбосари:

1) Давлат бюджетига ва давлат мақсадли жамғармаларига солиқлар ва йиғимлар тўлиқ ва ўз вақтида тушишининг таъминланиши;

2) солиқ тўғрисидаги қонун ҳужжатлари ва ҳуқуқни қўллаш амалиётини такомиллаштириш бўйича таклифлар тайёрланиши, солиқ назоратини амалга оширишнинг замонавий услублари жорий этилиши, солиқ соҳасидаги ҳуқуқбузарликларнинг келиб чиқиш сабаб ва шарт-шароитлари таҳлил қилиниши, уларга барҳам бериш чоралари кўрилиши;

3) солиқ солиш базасини кенгайтириш бўйича, жумладан ҳудудларнинг макроиқтисодий кўрсаткичлар динамикаси ва солиқ салоҳиятини тизимли таҳлил қилиш орқали комплекс чоралар кўрилиши;

4) назорат амалга оширилиши ва солиқ қарздорлиги ошишига йўл қўйилмаслиги, халқаро тажрибани чуқур ўрганиш орқали солиқ тизимининг модернизацияланиши;

5) Қўмитага юкланган вазифа ва функцияларнинг Қўмита марказий аппаратининг мутасаддилик қилинадиган таркибий тузилмаларида бажарилиши;

6) мутасаддилик қилинадиган масалалар бўйича ушбу Низомнинг 17-бандида назарда тутилган Қўмитанинг тегишли жавобгарлик соҳалари;

7) ушбу Низомнинг 20-бандида назарда тутилган ўз функционал мажбуриятларининг сифатли ижро этилиши учун шахсан жавоб беради.

24. Қўмита раиси ўринбосарлари:

1) солиқ маъмуриятчилиги самарадорлигини оширишга кўмаклашувчи солиқ тўғрисидаги қонун ҳужжатларини ишлаб чиқиш ва қўллаш методологиясининг такомиллаштирилиши;

2) Давлат бюджети даромадлари даражасини ошириш учун захираларни излаш ва аниқлаш бўйича тизимли ишлар олиб борилиши;

3) солиқ мажбуриятларини ўз вақтида бажарганлиги учун тадбиркорлик субъектларини рағбатлантириш чоралари кўрилиши;

4) солиқ солиш қисмида иқтисодиётнинг хуфиёна секторини легаллаштиришга қаратилган тизимли назорат таъминланиши;

5) сифатсиз, қалбаки (ясама) ва ноқонуний олиб кирилган товарлар ишлаб чиқарилиши, шунингдек, реализация қилинишига қарши курашишнинг ҳолати ва самарадорлиги;

6) солиқ маъмуриятчилиги жараёнига замонавий ахборот-коммуникация технологиялари ва таҳлилнинг илғор автоматлаштирилган услублари, электрон ҳисобварақ-фактураларни ҳисобга олиш ва онлайн назорат-касса машиналарининг автоматлаштирилган мониторинги бўйича дастурий маҳсулотлар жорий этилиши ҳамда самарали фаолият кўрсатиши;

7) жисмоний ва юридик шахсларнинг мурожаатлари пухта, ҳар томонлама, тўлиқ ва объектив кўриб чиқилиши, фуқароларнинг шахсан қабул қилиниши;

9) Қўмита вазифа ва функцияларининг Қўмитанинг мутасаддилик қилинадиган таркибий тузилмаларида бажарилиши;

10) мутасаддилик қилинадиган масалалар бўйича ушбу Низомнинг 17-бандида назарда тутилган Қўмитанинг тегишли жавобгарлик соҳалари;

11) ушбу Низомнинг 20-бандида назарда тутилган ўз функционал мажбуриятларининг сифатли ижро этилиши учун шахсан жавоб беради.

25. Қўмитанинг мансабдор шахслари:

ўзларининг функционал вазифаларини бажармаганлиги ёки зарур даражада бажармаганликлари, ижро интизомини бузганликлари;

ушбу Низом ва Ўзбекистон Республикасининг бошқа қонун ҳужжатлари талабларига риоя қилмаганликлари;

ноқонуний хатти-ҳаракатлар (ҳаракатсизлик) туфайли солиқ тўловчиларга моддий ва маънавий зарар етказганликлари;

ўзларининг ноқонуний хатти-ҳаракатлари (ҳаракатсизлиги) туфайли хўжалик юритувчи субъектларнинг ишлаб чиқариш ҳажмларини пасайтирганликлари ва солиқ солиш базасини камайтирганликлари;

қонун ҳужжатларига мувофиқ бўлмаган қарорлар қабул қилганликлари;

қонун ҳужжатларида назарда тутилган бошқа ҳуқуқбузарликлар учун қонун ҳужжатларида белгиланган тартибда жавоб берадилар.

26. Давлат солиқ хизмати органлари ходимларининг ўз хизмат ваколатлари доирасидан четга чиққанлиги, шунингдек, зиммасига юкланган хизмат вазифаларини бажармаганлиги қонун ҳужжатларида белгиланган тартибда интизомий, маъмурий ёки жиноий жавобгарликка сабаб бўлади.

27. Солиқ назоратини амалга оширишда давлат солиқ хизмати органлари мансабдор шахсларининг ноқонуний хатти-ҳаракатлари (ҳаракатсизлиги) туфайли етказилган зарарлар қонунда белгиланган тартибда қопланади.

28. Солиқ органлари солиқ тўловчининг айнан битта давр учун айнан бир хил солиқлар бўйича бир мартадан ортиқ солиқ аудитини ўтказишга ҳақли эмас, Солиқ кодексида белгиланган ҳолатлар бундан мустасно.

29. Жисмоний ва юридик шахслар ўз ҳуқуқ ва эркинликларини бузаётган давлат солиқ хизмати органлари мансабдор шахсларининг хатти-ҳаракатлари (ҳаракатсизлиги) ёки қарорлари юзасидан қонун ҳужжатларида белгиланган тартибда Қўмита раҳбариятига ёхуд бевосита судга шикоятлар билан мурожаат қилишга ҳақлидирлар.

30. Қўмитага Ўзбекистон Республикаси Олий Мажлиси Қонунчилик палатаси маъқуллаганидан кейин киритилган Ўзбекистон Республикаси Бош вазирининг тақдимномасига биноан Ўзбекистон Республикаси Президенти томонидан тасдиқланадиган ва лавозимидан озод қилинадиган раис бошчилик қилади.

31. Қўмита раиси ўз мақомига кўра Ўзбекистон Республикаси Вазирлар Маҳкамасининг аъзоси ҳисобланади.

32. Қўмита раисининг Ўзбекистон Республикаси Президенти томонидан лавозимга тайинланадиган ва лавозимдан озод қилинадиган биринчи ўринбосари ва ўринбосарлари бўлади.

33. Қўмита раиси бўлмаган вақтда унинг ваколатлари вазифалар тақсимотига биноан унинг ўринбосарлари томонидан бажарилади.

34. Қорақалпоғистон Республикаси, вилоятлар ва Тошкент шаҳар солиқ бошқармаларига Ўзбекистон Республикаси Президенти томонидан лавозимга тайинланадиган ва лавозимдан озод этиладиган бошлиқлар бошчилик қилади.

Ҳудудлараро инспекция, туман (шаҳар) солиқ инспекцияларига белгиланган тартибда Қўмита раиси томонидан тайинланадиган ва лавозимдан озод этиладиган бошлиқлар бошчилик қилади.

35. Қўмита марказий аппаратининг таркибий тузилмалари, ҳудудий солиқ бошқармалари тўғрисидаги низомлар Қўмита раиси томонидан, туманлар (шаҳарлар) солиқ инспекциялари тўғрисидаги низомлар эса Қўмита раиси томонидан тасдиқланадиган туман (шаҳар) солиқ инспекцияси тўғрисидаги Намунавий низом асосида ҳудудий солиқ бошқармалари бошлиқлари томонидан тасдиқланади.

36. Қўмита марказий аппарати таркибий тузилмаларининг давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлар билан ўзаро ҳамкорлигининг таъминланиши Қўмита марказий аппарати таркибий тузилмалари раҳбарлари томонидан амалга оширилади.

37. Қўмита марказий аппарати таркибий тузилмалари ўз фаолият йўналишлари бўйича давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлар билан ўзаро ҳамкорлик қилиб:

1) топшириқларни давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотларга етказади ва уларнинг ижросини назорат қилади;

2) давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотларга бевосита таркибий тузилманинг фаолиятига оид масалалар бўйича сўровномалар юборади ва улар ижросини назорат қилади;

3) текширувлар ва ўрганишлар ўтказади, давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотларнинг амалий фаолиятини умумлаштиради, уни такомиллаштиришга қаратилган чора-тадбирларни ишлаб чиқади ва қабул қилади;

4) давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлари фаолиятини ташкил этиш ва натижалари ҳақидаги ҳисобот ва ахборот материаллари, статистик ва бошқа маълумотларни ўрганишни ташкил этади;

5) давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлари иш режаларини таҳлил қилади, уларнинг фаолиятларини режалаштиришни такомиллаштириш бўйича чораларни кўради;

6) давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлардан келиб тушган таклифларни кўриб чиқади;

7) норматив-ҳуқуқий ҳужжатлар лойиҳаларини тайёрлашда давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотларнинг иштирокини ташкил этади, қонун ҳужжатларини такомиллаштириш бўйича улардан келиб тушган таклифларни кўриб чиқади.

38. Давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлар Қўмита марказий аппарати таркибий тузилмалари билан ўзаро ҳамкорлик қилади, шу жумладан:

1) Қўмита раҳбарияти топшириқларининг ижроси тўғрисида ахборот беради;

2) фаолиятнинг белгиланган соҳасидаги қонун ҳужжатлари ижроси юзасидан фаолият натижалари тўғрисида ахборот тақдим қилади;

3) уларнинг фаолиятини ўрганиш ва текшириш натижасида аниқланган ишдаги камчиликлар ва қонунбузилишларини бартараф этиш натижалари тўғрисида ахборот беради;

4) ўзининг иш натижалари тўғрисидаги ҳисоботларни белгиланган тартибда ва муддатларда тақдим этади;

5) солиққа тортиш ва солиқ тўғрисидаги қонун ҳужжатларига риоя этилиши соҳасидаги муаммоларни бартараф этишга қаратилган таклифларни тақдим этади;

6) комплекс ижтимоий-иқтисодий ривожлантириш бўйича секторлар билан ўзаро ҳамкорлик натижалари тўғрисида ҳисобот беради;

7) ваколатли органлар томонидан ўзининг фаолиятида ўтказилган текшириш натижалари тўғрисида хабардор қилади.

39. Қўмита марказий аппарати таркибий тузилмалари ҳамда унинг ҳудудий давлат солиқ хизмати органлари, Ҳудудлараро инспекция ва тасарруфидаги ташкилотларнинг ўзаро ҳамкорлиги жараёнида келиб чиқадиган келишмовчиликлар Қўмита раиси топшириғига биноан унинг тегишли ўринбосарлари томонидан кўриб чиқилади. Агар кўриб чиқишдан кейин келишмовчиликлар тартибга солинмаса, улар бўйича қарор бевосита Қўмита раиси томонидан қабул қилинади.

40. Қўмита ўз вазифалари ва функцияларини амалга оширишда бошқа давлат ва хўжалик бошқаруви органлари, маҳаллий давлат ҳокимияти органлари, фуқароларнинг ўзини ўзи бошқариш органлари, ҳуқуқни муҳофаза қилувчи органлар, банклар ва бошқа ташкилотлар билан ўзаро ҳамкорлик қилади.

41. Ҳудудлараро инспекция ўз вазифалари ва функцияларини амалга оширишда бошқа давлат ва хўжалик бошқаруви органлари, маҳаллий давлат ҳокимияти органлари, фуқароларнинг ўзини ўзи бошқариш органлари, ҳуқуқни муҳофаза қилувчи органлар, банклар ва бошқа ташкилотлар билан ўзаро ҳамкорлик қилади.

42. Давлат солиқ хизматининг ҳудудий органлари ўз ваколатлари доирасида бошқа ҳудудий давлат ва хўжалик бошқаруви органлари, маҳаллий давлат ҳокимияти органлари, фуқароларнинг ўзини ўзи бошқариш органлари, ҳуқуқни муҳофаза қилувчи органлар, банклар ва бошқа ташкилотлар билан ўзаро ҳамкорлик қилади.

Давлат солиқ хизматининг ҳудудий органлари тегишли ҳудудларни ижтимоий-иқтисодий ривожлантириш бўйича «йўл хариталари» ишлаб чиқилишида ва амалга оширилишида комплекс ижтимоий-иқтисодий ривожлантириш бўйича секторлар билан яқиндан ҳамкорлик қилади.

43. Қўмитанинг фаолиятига Ўзбекистон Республикаси Вазирлар Маҳкамасининг Макроиқтисодий таҳлил ва прогнозлаштириш, молия ва банк тизимларини ислоҳ қилиш, хусусий тадбиркорлик ва кичик бизнесни ривожлантириш масалалари бўйича Комплекс раҳбари ва Ўзбекистон Республикаси Вазирлар Маҳкамасининг Макроиқтисодий таҳлил ва прогнозлаштириш, молия ва банк тизимларини ислоҳ қилиш, хусусий тадбиркорлик ва кичик бизнесни ривожлантириш масалалари йиғма ахборот-таҳлил департаменти ва Ўзбекистон Республикаси Президенти бўлинмалари мутасаддилик қилади.

44. Қўмитада Қўмита раиси (ҳайъат раиси), раиснинг биринчи ўринбосари, раис ўринбосарлари (лавозими бўйича) ва Қўмита фаолиятининг асосий йўналишларини мувофиқлаштирувчи Қўмита таркибий тузилмалари раҳбарлари ва Ҳудудлараро инспекция бошлиғидан иборат таркибда ҳайъат ташкил этилади.

Ҳайъатнинг сони ва шахсий таркиби Қўмита раисининг тақдимига биноан Ўзбекистон Республикаси Вазирлар Маҳкамаси томонидан тасдиқланади.

45. Ҳайъатга қуйидаги вазифалар юкланади:

Қўмита фаолиятининг ушбу Низомда белгиланган асосий йўналишларини тайёрлаш ва амалга ошириш;

Қўмита тизими раҳбарлари ва ходимларининг қонун ҳужжатларида, Ўзбекистон Республикаси Президенти ҳужжатлари ва Ўзбекистон Республикаси Вазирлар Маҳкамаси қарорларида белгиланган вазифаларнинг ўз вақтида ва сифатли бажарилишини таъминлаш учун шахсий жавобгарлигини ошириш чораларини кўрган ҳолда таркибий ва давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлар раҳбарларининг ҳисоботлари мунтазам равишда эшитилишини ташкил қилиш;

Қўмита фаолияти соҳасида ҳудудий ва тармоқ дастурларини амалга оширишнинг бориши натижадорлигини ҳар чоракда ва тизимли кўриб чиқиш;

жойларда Қўмита фаолият соҳасининг долзарб масалаларини муҳокама қилишни таъминлаган ҳолда ҳайъатнинг кенгайтирилган кўчма мажлисларини ўтказишни ташкил этиш, шунингдек, юзага келган муаммоларни бартараф этиш бўйича тегишли қарорларни ишлаб чиқиш ва қабул қилиш;

Қўмита марказий аппарати ва унинг тизимига кирувчи лавозимлар номенклатурасини кўриб чиқиш ва тасдиқлаш;

Қўмита номенклатурасига кирадиган лавозимларга кадрларни танлаш, жой-жойига қўйиш масалаларини кўриб чиқиш;

Қўмита тизимидаги ташкилотларнинг устав капитали миқдорини аниқлаш ва тасдиқлаш;

Ўзбекистон Республикаси Президенти ва Ўзбекистон Республикаси Вазирлар Маҳкамаси қарорлари ва топшириқларида белгиланган вазифаларни ўз вақтида ва сифатли амалга оширишни таъминлаш учун ижро интизомини мустаҳкамлаш ва Қўмита раҳбарлари ва ходимларининг шахсий жавобгарлигини ошириш.

Ҳайъат, шунингдек, Қўмита ваколатига тааллуқли бошқа масалаларни ҳам кўриб чиқиш ҳуқуқига эга.

46. Ҳайъат мажлисига Қўмита ваколатига кирадиган масалалар бўйича бошқа вазирликлар, давлат қўмиталари, идоралар, маҳаллий давлат ҳокимияти органлари ва ташкилотлар раҳбарлари таклиф этилиши мумкин.

47. Ҳайъат, агар унинг мажлисида таркибининг ярмидан кўпи қатнашган тақдирда ваколатли бўлади. Кўриб чиқилаётган масалалар бўйича қарорлар оддий кўпчилик овоз билан қабул қилинади.

48. Ҳайъат қарорлари Қўмита қарорлари ва раиснинг буйруқлари билан амалга оширилади.

49. Ҳайъат раиси ва аъзолари ўртасида келишмовчиликлар мавжуд бўлган тақдирда раис пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикр-мулоҳазаларини Ўзбекистон Республикаси Вазирлар Маҳкамасига хабар қилишлари мумкин.

50. Ҳайъат фаолияти тартиби унинг ҳайъат тасдиқлайдиган регламентида белгиланади.

51. Давлат солиқ хизматининг ҳудудий органлари фаолиятининг, шу жумладан, ҳайъат қарорларини ва Қўмита топшириқларини бажариш билан боғлиқ энг муҳим масалаларни ҳал этиш учун Қорақалпоғистон Республикаси, вилоятлар ва Тошкент шаҳар солиқ бошқармаларида кенгашлар ташкил қилинади. Қорақалпоғистон Республикаси, вилоятлар ва Тошкент шаҳар солиқ бошқармалари кенгашларининг шахсий таркиби тегишли ҳудудий солиқ бошқармаси бошлиғининг тақдимига биноан Қўмита раиси томонидан тасдиқланади.

52. Солиққа оид қонун ҳужжатларини қўллашнинг энг мураккаб ва мунозарали масалалари бўйича қарорлар тайёрлаш, юқори малакали маслаҳатлашувлар ўтказиш учун солиқ бошқармаларида маслаҳат-эксперт кенгашлари ташкил этилади.

53. Қўмитага аҳоли ўртасида тушунтириш ва профилактика ишларини амалга ошириш учун қонун ҳужжатларига мувофиқ босма ва электрон оммавий ахборот воситаларини таъсис этиши мумкин.

54. Қўмитанинг самарадорлиги мунтазам равишда баҳоланади.

55. Қўмита фаолиятининг самарадорлиги ва натижадорлигини баҳолаш қуйидаги асосий мезонларга асосланади:

давлат солиқ хизмати органлари ишининг сифатини қониқарли баҳолайдиган солиқ тўловчилар, шунингдек, уларнинг ҳаракатлари ва қарорлари юзасидан шикоятларнинг сони;

камерал солиқ текшируви натижаси бўйича ундирилган солиқлар ва йиғимларнинг умумий суммаси;

хронометраж кўздан кечириш ва солиқ текширувлари натижалари бўйича аниқланган давлат бюджети даромадларини ошириш захиралари суммаси ва уларни ундириш даражаси;

ҳисобланган солиқ ва йиғимлар ундирилишининг тўлиқлиги ва солиқ қарздорлигининг пасайиш даражаси;

давлат солиқ хизмати органлари билан ўзаро муносабатларда «шахсий кабинет»дан фойдаланиш даражаси;

электрон ҳисобварақ-фактураларни ҳисобга олиш ва онлайн назорат-касса машиналарини автоматлаштирилган мониторинг қилиш бўйича дастурий маҳсулотларни қўллаётган солиқ тўловчиларнинг қамраб олиниши.

Қўмита марказий аппаратининг таркибий тузилмалари, давлат солиқ хизматининг ҳудудий органлари, Ҳудудлараро инспекция ва тасарруфидаги ташкилотлар фаолиятининг самарадорлигини баҳолашнинг қўшимча мезонларини белгилаши мумкин.

56. Қўмита фаолиятининг самарадорлиги ва натижадорлигини баҳолаш якунлари бўйича:

давлат солиқ хизмати органларининг раҳбарлари ва ходимларига нисбатан рағбатлантириш (мукофотлаш) ёки интизомий жавобгарлик чоралари;

Қўмитанинг фаолиятида аниқланган камчиликларни бартараф этиш ва унинг фаолиятини янада такомиллаштириш чоралари қабул қилинади.

57. Қўмита фаолиятининг самарадорлиги ва натижадорлигини баҳолаш тартиби ва методикаси қонун ҳужжатларида белгиланади.

58. Қўмита, давлат солиқ хизматининг ҳудудий органлари, Ҳудудлараро инспекциянинг молиялаштирилиши ва моддий-техника таъминоти, шу жумладан уларнинг ходимлари меҳнатига ҳақ тўлаш бюджетдан ажратиладиган маблағлар доирасида Давлат бюджети маблағлари, Ўзбекистон Республикаси Солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси маблағлари, шунингдек, қонун ҳужжатларида тақиқланмаган бошқа манбалар маблағлари ҳисобига амалга оширилади.

59. Давлат солиқ хизмати органлари ходимларининг меҳнатга ҳақ тўлаш фонди қуйидагилардан иборат:

а) лавозим маоши (давлат солиқ хизмати органлари ходимларининг лавозим маошини белгилашда Ягона тариф сеткаси бўйича меҳнатга ҳақ тўлашнинг тасдиқланган разрядларига мувофиқ тариф коэффициенти 1,7 бараварга оширилган миқдорда);

б) қуйидаги миқдордаги ойлик устамалар ва бошқа тўловлар:

марказий аппарат ва Ҳудудлараро инспекция ходимларига (техник ва хизмат кўрсатувчи ходимлардан ташқари), алоҳида меҳнат шароитлари учун лавозим иш ҳақига (тариф ставкасига) 20 фоиз. Мазкур устамалар қонун ҳужжатларида белгиланган рағбатлантирувчи қўшимча ҳақ ва устамаларни ҳисоблашда давлат солиқ хизмати органлари ходимларининг лавозим маоши таркибига киритилади;

иш ҳақи фондининг 15 фоизи (бюджет муассасалари ва ташкилотлари ходимларини моддий рағбатлантириш махсус жамғармасидан шаклланадиган);

лавозим маошига нисбатан 40 фоиз (меҳнатни рағбатлантириш коеффициенти);

махсус унвон учун 0,15 дан 0,65 гача (рағбатлантириш коэффициентини ҳисобга олган ҳолда лавозим маошига нисбатан коэффициентда);

узоқ муддат узлуксиз хизмати учун 0,05 дан 0,6 гача (рағбатлантириш коэффициентини ҳисобга олган ҳолда лавозим маошига нисбатан коэффициентда);

икки ойлик меҳнат ҳақи фонди миқдоридаги мукофот ва бир ойлик меҳнат ҳақи миқдоридаги моддий ёрдам тўлови;

қонунчилик ҳужжатларида белгиланган бошқа тўловлар;

в) рағбатлантирувчи тўловлар;

бошқа тўловлар, шу жумладан:

овқатланиш харажатларини қоплаш учун базавий ҳисоблаш миқдорининг икки баравари миқдоридаги ойлик тўловлар;

давлат солиқ хизмати органлари ходимларининг транспорт ҳаражатларини қоплаш учун базавий ҳисоблаш миқдорининг икки баравар миқдорида ойлик тўловлар (хизмат транспорти воситалари ажратилган ходимлардан ташқари);

йилига бир марта ойлик меҳнатга ҳақ тўлаш фонди миқдорида моддий ёрдам кўрсатиш;

д) ходимнинг асослантирилган аризасига асосан юқори турувчи тузилма раҳбарининг розилиги билан меҳнатга ҳақ тўлаш фондига ажратилган маблағлар доирасида қуйидаги ҳолларда қўшимча тарзда моддий ёрдам кўрсатилиши мумкин:

яқин қариндошлари вафот этганда — ўлим тўғрисидаги гувоҳнома нусхасига асосан;

алоҳида муҳтожлик ҳолатида (бахтсиз ҳодиса, тўй ва бошқа маросимлар муносабати билан, узоқ муддатли касаллик сабабли махсус даволаниш ва соғлиқни қайта тиклаш учун, шунингдек, оиладаги оғир моддий аҳвол сабабли ва бошқа ҳолатлар);

қонун ҳужжатларида назарда тутилган бошқа тўловлар.

Махсус унвон ва кўп йиллик хизмати учун бериладиган устама миқдорини ҳисоблашда Ўзбекистон Республикаси Давлат бюджети ҳисобидан тўланадиган лавозим маоши ва ойлик устамаларнинг биргаликдаги суммалари ҳисобга олинади.

Қўмита ходимлари лавозим маошларига ҳар ойлик устамалар ва қўшимча тўловлар Қўмита раиси томонидан тасдиқланадиган низомга мувофиқ амалга оширилади.

59¹. Давлат солиқ хизмати органлари ходимларига мазкур низомнинг 59-банди а) ва б) кичик бандларида кўрсатилган лавозим маоши, устама ва бошқа тўловларни молиялаштириш бюджет маблағлари ҳисобидан, в) кичик бандидаги бошқа тўловларни молиялаштириш Ўзбекистон Республикаси Солиқ қўмитасининг Моддий ёрдам, ижтимоий муҳофаза, солиқ органларини ривожлантириш ҳамда кўзда тутилмаган харажатлар махсус жамғармаси маблағлари ҳисобидан амалга оширилади.

60^1. Қўмита раисининг маслаҳатчилари (шу жумладан, Жамоатчилик билан алоқалар бошқармаси бошлиғи) меҳнатга ҳақ тўлаш, тиббий ва транспорт хизмати кўрсатиш шартларига кўра Қўмита раисининг ўринбосарига тенглаштирилади.

62. Қуйидагилар давлат солиқ хизмати органлари ходимларини моддий рағбатлантиришнинг асосий турлари ҳисобланади:

давлат солиқ хизмати органлари фаолияти самарадорлигини баҳолаш мезонларига асосан ва эришилган якуний натижалардан келиб чиқиб мукофотлаш;

Давлат бюджетига тўловлар тушумлари прогнози бажарилганлиги ва ортиғи билан бажарилганлиги учун ой, чорак, ярим йиллик иш якунлари бўйича мукофотлаш;

алоҳида муҳим топшириқлар бажарилганлиги учун якка тартибда мукофотлаш;

ходимларнинг лавозим маошига иш участкасининг мураккаблиги ва муҳимлиги ҳамда меҳнатда юқори натижаларга эришганлиги учун устамалар тўлаш;

хизмат вазифаларини бажариш чоғидаги алоҳида хизматлари учун ва пенсияга чиқиши муносабати билан қимматбаҳо совғалар билан мукофотлаш;

давлат солиқ хизмати органлари ходимларининг лавозим маошларига уларнинг функционал вазифаларини бажаришларини, билимлари даражасини, солиқ тўловчилар билан иш олиб бориш касбий қобилиятларини ҳар йили тест синовларидан ўтказиш асосида белгиланадиган махсус рағбатлантирувчи устамалар.

Давлат солиқ хизмати органлари ходимлари Ўзбекистон Республикаси Солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси ҳисобидан ҳам қуйидаги суммаларнинг 10 фоизига қадар миқдорда мукофотланади:

камерал солиқ текшируви натижаси бўйича ундирилган солиқлар ва йиғимлар;

хронометраж кўздан кечириш натижалари бўйича аниқланган, солиқ тўловчи тўлаб берган солиқлар;

солиқ текширувлари натижаси бўйича ундирилган солиқлар.

63. Давлат солиқ хизматининг ҳудудий органлари ходимларининг функционал вазифаларини бажариши, билим даражаси, солиқ тўловчилар билан иш олиб бориш бўйича касбий қобилиятларини тест синовидан ўтказиш натижалари бўйича бериладиган тоифаларга қараб лавозим маошларига 10 фоиздан 30 фоизгача миқдорда махсус рағбатлантирувчи устамаларни хар йили тест синовидан ўтказиш асосида қўллаш тартиби Ўзбекистон Республикаси Иқтисодиёт ва молия вазирлиги ва Қўмита томонидан тасдиқланади.

64. Давлат солиқ хизмати органлари тузилмаларининг раҳбар ва инспекторлар таркиби ходимларини ҳамда мутахассисларни (ишлаб чиқариш ходимлари) ой, чорак, ярим йилдаги иш якунлари бўйича мукофотлаш республика ва маҳаллий бюджетларга, давлат мақсадли жамғармаларга солиқлар ва йиғимлар тушумлари прогнози бажарилганлиги ва ортиғи билан бажарилганлиги учун ҳамда улар фаолиятини тавсифловчи бошқа асосий кўрсаткичлар бажарилганлиги учун Қўмита раиси томонидан тасдиқланадиган низомга мувофиқ, давлат солиқ хизмати органларининг раҳбарлари қарорлари асосида амалга оширилади.

65. Қўмитада, давлат солиқ хизматининг ҳудудий органларида ва Ҳудудлараро инспекцияда Ўзбекистон Республикаси Солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси ташкил этилади. Ўзбекистон Республикаси Солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси тўғрисидаги низом Ўзбекистон Республикаси Вазирлар Маҳкамаси томонидан тасдиқланади.

66. Бюджетдан ажратиладиган маблағлар ҳисобига шакллантириладиган меҳнатга ҳақ тўлаш фонди маблағлари, шунингдек, Ўзбекистон Республикаси Солиқ қўмитасининг Моддий ёрдам, ижтимоий муҳофаза, солиқ органларини ривожлантириш ҳамда кўзда тутилмаган харажатлар махсус жамғармаси маблағлари давлат солиқ хизмати органлари ходимларига тўловлар, шу жумладан мукофотлар манбалари ҳисобланади.

67. Қўмита раиси Ўзбекистон Республикаси Вазирлар Маҳкамаси ва Ўзбекистон Республикаси Президенти олдида Қўмита фаолияти тўғрисида мунтазам равишда ҳисобот беради.

68. Ўзбекистон Республикаси Вазирлар Маҳкамасининг тегишли Котибият раҳбари Қўмита раҳбарларига юкланган вазифаларни самарали бажариш бўйича улар фаолиятининг доимий мониторингини олиб боради, Қўмита фаолияти самарадорлигига холис баҳо беради.

69. Мониторинг ва баҳолаш якунлари бўйича давлат солиқ хизмати органларининг алоҳида ўрнак кўрсатган раҳбарлари ва ходимлари рағбатлантирилади ёки йўл қўйган жиддий камчиликлари учун эгаллаб турган лавозимидан озод этишгача бўлган жавобгарликка тортилади.

70. Қўмитани қайта ташкил этиш ва тугатиш қонун ҳужжатларида белгиланган тартибда амалга оширилади.

1. Ушбу Низом Йирик солиқ тўловчилар бўйича ҳудудлараро солиқ инспекцияси (кейинги ўринларда Ҳудудлараро инспекция деб аталади) фаолиятини ташкил этиш тартибини белгилайди.

2. Ҳудудлараро инспекция Ўзбекистон Республикаси Солиқ қўмитасининг (кейинги ўринларда Қўмита деб аталади) мустақил таркибий тузилмаси ҳисобланади ва бевосита Қўмита раисига бўйсунади.

3. Ҳудудлараро инспекцияга жойлашган жойи ва амалга ошираётган фаолиятидан қатъи назар, йирик солиқ тўловчиларнинг солиқ маъмуриятчилигини амалга ошириш вазифаси юкланади.

4. Солиқ тўловчиларни йирик солиқ тўловчилар тоифасига киритиш мезонлари Қўмита томонидан белгиланади.

5. Ҳудудлараро инспекция ўз фаолиятида Ўзбекистон Республикаси Конституциясига, Ўзбекистон Республикасининг Солиқ кодексига, Ўзбекистон Республикасининг «Давлат солиқ хизмати тўғрисида»ги Қонунига ва бошқа қонун ҳужжатларига, Ўзбекистон Республикасининг Олий Мажлиси палаталари қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Қўмита қарорларига ҳамда ушбу Низомга амал қилади.

6. Ҳудудлараро инспекция юридик шахс ҳисобланади, Ўзбекистон Республикаси Давлат герби тасвири туширилган ва ўз номи давлат тилида ёзилган муҳр ва бланкага, шунингдек, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида ғазначилик ҳисобрақамларига, банк ҳисобрақамларига, шу жумладан хорижий валютадаги ҳисобрақамларига эга.

7. Ҳудудлараро инспекциянинг расмий номи:

а) давлат тилида:

тўлиқ — Йирик солиқ тўловчилар бўйича ҳудудлараро солиқ инспекцияси, қисқартирилгани — Йирик солиқ тўловчилар бўйича инспекция;

б) рус тилида:

тўлиқ — Межрегиональная налоговая инспекция по крупным налогоплательщикам, қисқартирилгани — Инспекция по крупным налогоплательщикам;

в) инглиз тилида:

тўлиқ — Interregional tax inspection for large taxpayers, қисқартирилгани — Inspection for large taxpayers.

8. Ҳудудлараро инспекциянинг жойлашган жойи (почта манзили): Тошкент шаҳри, Абай кўчаси, 8-уй.

9. Ҳудудлараро инспекция томонидан қонун ҳужжатларида белгиланган ваколатлари доирасида қабул қилинган қарорлар давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, қонун ҳужжатларига мувофиқ маъмуриятчилиги Ҳудудлараро инспекция томонидан амалга ошириладиган солиқ тўловчилар учун бажариш мажбурий ҳисобланади.

10. Қуйидагилар Ҳудудлараро инспекциянинг асосий вазифалари ҳисобланади:

йирик солиқ тўловчилар ҳисобини ташкил этиш ва улардан солиқ тўғрисидаги қонун ҳужжатларида кўзда тутилган солиқлар ва йиғимларнинг тўлиқ тушишини таъминлаш;

йирик солиқ тўловчилар фаолиятида солиқ тўғрисидаги қонун ҳужжатларига риоя қилиниши бўйича солиқ назоратини ташкил этиш;

йирик солиқ тўловчиларга солиқ мажбуриятларини бажариш бўйича ўзаро ҳамкорлик асосида сервис-техник хизмат кўрсатилишини амалга ошириш;

йирик солиқ тўловчилар маъмуриятчилиги доирасида солиққа оид ҳуқуқбузарликларни профилактика қилиш, аниқлаш ва олдини олиш бўйича комплекс тадбирларни амалга ошириш.

11. Ҳудудлараро инспекция ўзига юкланган вазифаларга мувофиқ қуйидаги функцияларни бажаради:

а) йирик солиқ тўловчилар ҳисобини ташкил этиш ва улардан солиқ тўғрисидаги қонун ҳужжатларида кўзда тутилган солиқлар ва йиғимларнинг тўлиқ тушишини таъминлаш соҳасида:

қонун ҳужжатларида белгиланган йирик солиқ тўловчилар мезонларига мос келадиган юридик шахсларни аниқлаш ва ҳисобга қўйиш ишларини юритади;

юридик шахсларга улар йирик солиқ тўловчилар жумласига киритилганлиги ва қонун ҳужжатларида белгиланган тартибда ҳисобга қўйилганлиги тўғрисида хабарномалар юборади;

йирик солиқ тўловчилар реестрини шакллантиради ва юритади;

йирик солиқ тўловчилар ҳисоботларининг қабул қилиниши ва қайта ишланишини амалга оширади;

йирик солиқ тўловчиларнинг шахсий карточкалари юритилишини амалга оширади;

Ўзбекистон Республикаси Давлат бюджети (кейинги ўринларда Давлат бюджети деб аталади) ва давлат мақсадли жамғармаларига тўланиши лозим бўлган ва ҳақиқатда тўланган солиқлар ва йиғимлар суммалари, шу жумладан улар бўйича имтиёзлар, шунингдек, йирик солиқ тўловчилар бўйича молиявий жарималар суммалари ҳисобини юритади;

Йирик солиқ тўловчилар бўйича Давлат бюджети ва давлат мақсадли жамғармаларига солиқлар ва йиғимлар тушуми прогнозининг ишлаб чиқилишида иштирок этади;

солиқ тўғрисидаги қонун ҳужжатларини ва солиқ маъмуриятчилигини янада такомиллаштириш бўйича таклифлар тайёрлашда қатнашади;

макроиқтисодий кўрсаткичлар динамикасининг тизимли таҳлили асосида солиқ солинадиган базани кенгайтириш бўйича самарали тадбирларни амалга оширади;

б) йирик солиқ тўловчилар фаолиятида солиқ тўғрисидаги қонун ҳужжатларига риоя қилиниши бўйича солиқ назоратини ташкил этиш соҳасида:

камерал солиқ текшируви, шунингдек, йирик солиқ тўловчи томонидан тақдим этилган маълумотлар ишончлилигини ҳамда солиқ тўловчининг ҳисоботларида акс эттирилган солиқ ва божхона имтиёзлари қўлланилишининг қонунийлигини тасдиқлаш учун қонунчилик ҳужжатларида белгиланган тартибда жойига чиққан ҳолда сайёр солиқ текширувларини амалга оширади;

ҳисоботларда кўрсатилган ишчилар сони билан ҳақиқатда ишловчилар сони, шунингдек, ишлаб чиқариш ҳажмларининг мос келиши масалалари бўйича йирик солиқ тўловчилар фаолияти мониторингини олиб боради. Солиқ тўғрисидаги қонун ҳужжатлари бузилганлиги аниқланган ҳолатларда қонун ҳужжатларида белгиланган тартибда уларни олдини олиш ва бартараф этиш чораларини кўради;

экспорт-импорт операциялари тўғрисидаги қонун ҳужжатларига риоя қилиниши юзасидан ўз ваколатлари доирасида назоратни амалга оширади;

қўшилган қиймат солиғи бўйича ноль даражали ставка қўлланилишининг асослилиги юзасидан назоратни амалга оширади;

солиқ назоратини амалга оширишда замонавий усулларни қўллайди ҳамда ташқи ва ички манбалардан келиб тушадиган маълумотларни таҳлил қилишнинг илғор автоматлаштирилган усулларини жорий этади;

йирик солиқ тўловчилар фаолиятининг солиқ текширувларини белгиланган тартибда ўтказади

солиқ тўловчилардан ёки уларнинг мансабдор шахсларидан тушунтиришлар олади, йирик солиқ тўловчиларнинг мол-мулки мавжудлигини текширади, шунингдек, ҳудудларни, ишлаб чиқариш, омборхона, савдо биноларини ва бошқа биноларни, шу жумладан, йирик солиқ тўловчи томонидан даромадлар олиш учун фойдаланиладиган ёхуд солиқ солиш объектини сақлаш билан боғлиқ жойларни кўздан кечиради ёки текширади;

хўжалик юритувчи субъектлар томонидан пул маблағлари ва моддий бойликларнинг бухгалтерия ҳисобини юритишнинг белгиланган тартибига риоя қилинишини, корхоналар ҳудудига моддий бойликларни олиб кириш ва у ердан олиб чиқишда корхоналарда рухсат бериш тизими ишларининг ташкил этилиши ҳолатини текширади;

йирик солиқ тўловчиларда солиқ аудити ўтказиш жараёнида солиқлар ва йиғимларнинг тўғри ҳисобланганлиги ва тўланганлигини, назорати солиқ органлари зиммасига юклатилган қонунчилик ҳужжатларига риоя қилинганлигини солиқ тўловчининг бухгалтерия, молия, статистика, банк ҳужжатлари ҳамда бошқа ҳужжатларни, маълумотларни ўрганиш ва таҳлил қилиш йўли билан текширади;

солиқ аудитини ўтказиш давомида хом ашё, материаллар, ярим фабрикатлар ва тайёр буюмларни тортиб кўради ва ўлчайди, ишлаб чиқарилган маҳсулотнинг ҳақиқий таннархини ва тақдим этилган солиқ ҳисоб-китобларининг тўғрилигини аниқлаш учун хом ашё ва материаллар сарфи нормалари, уларнинг маҳсулот ишлаб чиқариш учун тўғри ҳисобдан чиқарилишини, тайёр маҳсулотнинг тўлиқ кирим қилинишини, маҳсулот чиқиши нормалари ҳамда моддий бойликларни сақлаш ва ташишда табиий йўқотишлар нормалари тўғри белгиланишини аниқлаш учун хом ашё ва материалларни ишлаб чиқаришда назорат тариқасида ишлатиб кўради, хом ашё, материаллар ва тайёр маҳсулотларни назорат тариқасида текширади;

в) йирик солиқ тўловчиларга солиқ мажбуриятларини бажариш бўйича ўзаро ҳамкорлик асосида сервис-техник хизмат кўрсатилишини амалга ошириш соҳасида:

солиқ тўловчининг шахсий кабинети, шу жумладан, Ягона интерактив давлат хизматлари портали орқали йирик солиқ тўловчиларга электрон хизматлар кўрсатилишини амалга оширади;

қонун ҳужжатларида белгиланган тартибда ўзаро тузилган келишув асосида, солиқ мониторингида иштирок этаётган йирик солиқ тўловчи томонидан солиқ тўғрисидаги қонун ҳужжатларига риоя этилиши, солиқлар ва йиғимларнинг тўғри ҳисобланиши, тўлиқ ва ўз вақтида тўланиши юзасидан солиқ мониторингини амалга оширади;

солиқ тўғрисидаги қонун ҳужжатлари нормалари, шунингдек, электрон ҳисобварақ-фактураларни шакллантиришнинг ахборот тизимларини қўллаш бўйича йирик солиқ тўловчиларга маслаҳат хизматлари кўрсатади;

қонун ҳужжатларида белгиланган тартибда солиқлар ва йиғимларнинг айрим турларини ҳисоблаб чиқаришда йирик солиқ тўловчиларга сервис хизматлари кўрсатади;

солиқ тўловчилар билан ишлашда ахборот-коммуникация технологиялари кенг қўлланилишини таъминлайди;

солиқлар ва йиғимлар, шунингдек, молиявий жарималар бўйича йирик солиқ тўловчиларнинг ортиқча тўланган ёки ортиқча ундирилган суммаларини (ноль даражали ставкани қўллаш натижасида ҳосил бўлган қўшилган қиймат солиғининг ортиқча суммаси бундан мустасно) қонун ҳужжатларида белгиланган тартибда қайтарилиши ёки ҳисобга олинишини амалга оширади;

йирик солиқ тўловчиларнинг солиқ соҳасидаги ҳуқуқлари ва қонун билан қўриқланадиган манфаатлари ҳимоясини таъминлайди;

йирик солиқ тўловчилар тўғрисидаги маълумотларнинг қонун ҳужжатларига мувофиқ сир сақланиши бўйича ишларни ташкил қилади;

г) йирик солиқ тўловчиларнинг маъмуриятчилиги доирасида солиққа оид ҳуқуқбузарликларни профилактика қилиш, аниқлаш ва олдини олиш бўйича комплекс тадбирларни амалга ошириш соҳасида:

ҳудудий давлат солиқ хизмати органлари билан ўзаро ҳамкорлик қилиш орқали йирик солиқ тўловчиларнинг солиқ солиш базасини, шунингдек, солиқ солинадиган объектлар ва солиқ солиш билан боғлиқ объектларнинг ўз вақтида, тўлиқ ва ишончли ҳисобга олинишини таъминлайди;

солиққа оид ҳуқуқбузарликлар профилактикасини амалга оширади, шу жумладан, ушбу ҳуқуқбузарликлар содир этилиши сабабларини аниқлайди ва бартараф этади, шунингдек, ҳуқуқбузарликлар профилактикасини бевосита амалга оширадиган ва иштирок этадиган бошқа органлар ва ташкилотлар билан ҳамкорлик қилади;

қонун ҳужжатларида белгиланган тартибда маъмурий ҳуқуқбузарликлар бўйича ишларни юритади;

солиққа оид ҳуқуқбузарликлар содир этган йирик солиқ тўловчилар ҳисобини юритади, ушбу маълумотларни таҳлил қилади;

йирик солиқ тўловчиларнинг солиқ қарзини ундириш бўйича мажбурий чоралар қўлланилишини амалга оширади;

йирик солиқ тўловчиларнинг мажбуриятлари юзага келганлиги (бекор бўлганлиги) тўғрисида маълумотлар тақдим этадиган органлар ва ташкилотлар билан ўзаро ҳамкорлик қилади;

бошқа вазирлик ва идоралар билан биргаликда йирик солиқ тўловчиларнинг молия-хўжалик фаолияти юзасидан таҳлилий ўрганиш ўтказади ва ушбу ўрганиш доирасида солиққа оид ҳуқуқбузарликлар билан курашиш бўйича узоқ муддатли ва жорий дастурларни ишлаб чиқади ва амалга оширади;

йирик солиқ тўловчиларнинг солиқ солиш масалалари ва солиқ тўғрисидаги қонун ҳужжатлари бузилиши тўғрисидаги мурожаатларини белгиланган тартибда кўриб чиқади;

солиқ солишга оид меъёрий-ҳуқуқий ҳужжатларни оммавий ахборот воситалари ва семинарлар, брифинглар, матбуот — конференциялар, «давра суҳбатлари» ва бошқа тадбирларни ташкил этиш орқали йирик солиқ тўловчиларга етказиш ва таништириш бўйича ишларни амалга оширади.

12. Ҳудудлараро инспекция ўзига юкланган вазифалар ва функцияларни бажариш учун қуйидаги ҳуқуқларга эга:

1) йирик солиқ тўловчилардан Ҳудудлараро инспекция ваколатига кирувчи масалалар бўйича қарорлар қабул қилиш учун зарур бўлган маълумотлар ва материалларни сўраш ва олиш;

2) қонун ҳужжатларида белгиланган тартибда йирик солиқ тўловчиларнинг бухгалтерия ва солиқ ҳисоби ахборот тизимларидан, шунингдек, ҳисоб ҳужжатларидан фойдаланиш;

3) давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлардан Ҳудудлараро инспекция ваколатига кирувчи масалаларни ҳал қилиш учун зарур бўлган ахборотлар, маълумотлар ва маълумотномаларни сўраш ва бепул олиш;

4) йирик солиқ тўловчи томонидан тақдим этилган маълумотлар ишончлилигини ҳамда йирик солиқ тўловчининг ҳисоботларида акс эттирилган солиқ ва божхона имтиёзлари қўлланилишининг қонунийлигини тасдиқлаш учун камерал солиқ текшируви натижаси бўйича қонунчилик ҳужжатларида белгиланган тартибда жойига чиққан ҳолда сайёр солиқ текширувларини амалга ошириш;

5) ҳисоботларда кўрсатилган ишчилар сони билан ҳақиқатда ишловчилар сони, шунингдек, ишлаб чиқариш ҳажмлари ва ишлаб чиқариш фаолиятида активлардан фойдаланишнинг мос келиши масалалари бўйича йирик солиқ тўловчилар фаолияти мониторингини амалга ошириш;

6) солиқ мониторингини амалга оширишда солиқ тўловчидан қонун ҳужжатларида белгиланган тартибда солиқлар ва йиғимларнинг тўғри ҳисобланиши, тўлиқ ва ўз муддатида тўланиши билан боғлиқ бўлган зарур ҳужжатлар, маълумотлар, тушунтиришларни талаб қилиб олиш;

7) йирик солиқ тўловчиларга фаолиятида ўтказилган хронометраж кўздан кечириш натижаларига кўра товар (иш, хизмат)лар реализациясидан камайтириб кўрсатилган тушумни қайта ҳисоб-китоб қилган ҳолда солиқларни ҳисоблашни амалга ошириш ҳақида белгиланган тартибда талабнома юбориш;

8) ҳудудий давлат солиқ хизмати органлари билан ўзаро ҳамкорлик қилиш орқали солиқлар ва йиғимларни ҳисоблаш учун асос бўлувчи кузатув далолатномаларини тузган ҳолда йирик солиқ тўловчилар ҳисобини юритиш;

9) белгиланган тартибда қуйидагиларни олиш:

ваколатли органлардан — йирик солиқ тўловчиларга лицензия ва (ёки) бошқа рухсат берувчи ҳужжатлар берилганлиги, шунингдек, уларнинг бекор қилинганлиги, амал қилиши тўхтатилганлиги ёки тугатилганлиги тўғрисидаги маълумотлар;

қурилиш соҳасида назорат қилувчи давлат органларидан — ер майдонлари ва объектларни қуришга рухсат берувчи ҳужжатларнинг мавжудлиги, жумладан, лойиҳа-смета ҳужжатлари ва қурилишни якунлаш муддатлари тўғрисидаги маълумотлар;

кўчмас мулкка бўлган ҳуқуқни давлат рўйхатидан ўтказувчи органлардан — тегишли ҳудудда жойлашган ер майдони ёки бошқа кўчмас мулкдан фойдаланиш ҳуқуқи тўғрисидаги маълумотлар;

сув ресурслари ҳисобини юритувчи органлардан — йирик солиқ тўловчилар томонидан фойдаланилган сув ҳажмлари тўғрисидаги маълумотлар;

нотариал идоралардан — «Нотариат тўғрисида»ги Ўзбекистон Республикаси Қонунининг 23-моддасига биноан йирик солиқ тўловчилар бўйича амалга оширилган нотариал ҳаракатлар тўғрисидаги маълумотлар;

фойдаланишга берилган ер қаъри майдонларининг давлат ҳисоби ва (ёки) ер қаъри майдонларидан фойдаланиш ҳуқуқини давлат рўйхатидан ўтказишни амалга оширувчи органлардан — ер қаъри майдони жойлашган жой ва мазкур ер қаъри майдонидан фойдаланиш ҳуқуқи берилган шахс тўғрисидаги маълумотлар;