Ўзбекистон Республикаси Олий Мажлисининг «Ўзбекистон Республикасининг 2002 йилги Давлат бюджети тўғрисида» 2001 йил 6 декабрдаги 305-II-сон қарорига мувофиқ Вазирлар Маҳкамаси қарор қилади:

6. Ўзбекистон Республикасининг Солиқ кодексига мувофиқ 2002 йил 1 январдан бошлаб:

юридик шахслардан даромад (фойда) солиғи ставкалари 3-иловага* мувофиқ;

юридик шахслар ялпи даромадидан солиқ ставкалари 4, 5 ва 6-иловаларга* мувофиқ;

солиқ солишнинг соддалаштирилган тизимини қўллаётган микрофирмалар ва кичик корхоналар учун ягона солиқ ставкалари 7-иловага* мувофиқ;

юридик ва жисмоний шахсларга тўланадиган дивидендлар ва фоизлар тарзида олинадиган даромадлардан солиқ ставкалари 8-иловага* мувофиқ;

юридик ва жисмоний шахсларнинг тадбиркорлик фаолияти даромадларидан олинадиган чегараланган солиқ ставкалари 9, 10-иловаларга* мувофиқ;

ишлаб чиқариладиган ва четдан келтириладиган акциз солиғига тортиладиган товарлардан олинадиган акциз солиғи ставкалари 11-1, 11-2-иловаларга* мувофиқ;

сув ресурсларидан фойдаланганлик учун солиқ ставкалари 12-иловага* мувофиқ;

ер ости бойликларидан фойдаланганлик учун солиқ ставкалари 13-иловага* мувофиқ;

юридик шахслардан олинадиган мулк солиғи ставкалари 14-иловага* мувофиқ;

жисмоний шахслардан олинадиган мулк солиғи ставкалари 15-иловага* мувофиқ;

ягона ер солиғи ставкалари 16-иловага* мувофиқ;

ягона ер солиғи тўлашга ўтмаган тўловчилар учун ер солиғи ставкалари 17-иловага* мувофиқ;

Қорақалпоғистон Республикаси, вилоятлар ва Тошкент шаҳар давлат ҳокимияти органлари томонидан жорий этиладиган маҳаллий солиқлар ва йиғимлар ставкалари 18-иловага* мувофиқ тасдиқлансин.

7. 2002 йилда:

барча солиқ солинадиган айланмалар бўйича қўшилган қиймат солиғи ставкаси 20 фоиз миқдорида;

пудрат қурилиш ташкилотлари томонидан қўшилган қиймат солиғи тўлаш тартиби;

«ЎзДЭУавто» акциядорлик жамиятининг дилерлари расмий мақомига эга бўлмаган жисмоний ва юридик шахслардан йиғим ставкаси «ЎзДЭУавто» акциядорлик жамиятида ишлаб чиқарилган олиб чиқиб кетиладиган автомобиллар двигатель ҳажмининг 1 куб. сантиметри ҳисобига 3,0 АҚШ доллари миқдорида;

сотилмаган тайёр маҳсулотнинг нормативдан ортиқча қолдиғи учун тўлов, уни маҳаллий бюджетлар даромадларига ўтказган ҳолда, уларнинг ҳақиқий ишлаб чиқариш таннархининг 2 фоизи миқдорида;

нормативдаги муддатларда ўрнатилмаган мулкдан ва фойдаланилмаган асбоб-ускуналардан олинадиган солиқнинг оширилган ставкалари;

хорижий инвестициялар иштирокидаги ишлаб чиқариш корхоналари учун даромад (фойда)дан олинадиган солиқ ставкасига пасайтирувчи коэффициентлар, фойдаланиладиган маҳаллий хом ашё, материаллар ва бутловчи буюмлар қиймати салмоғидан келиб чиққан ҳолда, 19-иловага* мувофиқ;

ифлослантирувчи моддаларни табиий муҳитга чиқариб ташлаганлик, оқизганлик ва чиқиндиларни Ўзбекистон Республикаси ҳудудига жойлаштирганлик учун тўлов ва тўловни тақсимлаш тартиби 20-1, 20-2, 20-3, 20-4-иловаларга* мувофиқ;

Қорақалпоғистон Республикаси ва Хоразм вилояти қишлоқ хўжалиги товар ишлаб чиқарувчилари учун ягона ер солиғини тақсимлашнинг амалдаги нормативлари Ўзбекистон Республикаси Молия вазирлиги, Давлат солиқ қўмитаси ҳамда Қишлоқ ва сув хўжалиги вазирлиги томонидан белгиланадиган тартибда;

Ўзбекистон Республикаси Вазирлар Маҳкамасининг «Жисмоний шахслар айрим тоифалари даромадларига имтиёзли солиқ солиш тўғрисида» 1997 йил 24 декабрдаги 562-сон қарорининг амал қилиши;

ижтимоий суғуртага ҳамда Республика йўл жамғармасига мажбурий бадаллар ва ажратмаларнинг амалдаги миқдорлари 21, 22-иловаларга* мувофиқ сақлаб қолинсин.

Давлат мулки ҳисобланадиган, яшаш учун мўлжалланмаган жойлар ижарага берилганлиги учун ижара ҳақини тақсимлаш нормативлари 23-иловага* мувофиқ белгилансин.

8. Ўзбекистон Республикаси Вазирлар Маҳкамасининг «Бюджет ташкилотларини маблағ билан таъминлаш тартибини такомиллаштириш тўғрисида» 1999 йил 3 сентябрдаги 414-сон қарори 4-бандининг амал қилиши 2005 йил 1 январгача узайтирилсин, бюджет ташкилотлари ходимларини ижтимоий муҳофаза қилиш ва моддий рағбатлантириш тадбирларига йўналтириладиган маблағлар улушини 25 фоизгача кўпайтириш назарда тутилсин.

9. Белгилансинки, 2002 йил 1 январдан бошлаб:

ижтимоий инфратузилмани ривожлантириш солиғи ва ободончилик ишлари учун йиғим ўрнига 18-иловага* мувофиқ инфратузилмани ривожлантириш солиғи;

фуқароларнинг транспорт воситалари бўйича мол-мулк солиғи ўрнига 18-иловага* мувофиқ жисмоний шахслардан транспорт воситалари учун бензин, дизель ёнилғиси ва газдан фойдаланганлик учун солиқ;

юридик шахслардан олинадиган даромад (фойда) солиғини ҳисоблаб чиқаришда Ўзбекистон Республикаси Вазирлар Маҳкамаси қарорига кўра ўз маблағлари ҳисобига коллежлар ва лицейлар қурилиши харажатлари суммасига солиқ солинадиган базани камайтиришга доир, лекин солиқ солинадиган даромад (фойда)ни камайтиришнинг белгиланган чегарасидан ортиқ бўлмаган миқдорда, қўшимча имтиёзлар жорий этилади.

10. Автотранспортни қисқа муддатга сақлаш учун тўхташ жойларидан белгиланган солиқ ундирилиши 2002 йил 1 январдан бошлаб 9-иловага* мувофиқ юридик шахс мақомига эга бўлмаган ҳамда мулкчилик шаклларидан қатъи назар, юридик шахсларга (бюджетдаги ташкилотлардан ташқари) бириктириб қўйилган ҳудудда жойлашган барча автотранспортни қисқа муддатга сақлаш учун пулли тўхташ жойларига жорий этилсин.

11. Белгилансинки, 2002 йил 1 июлдан бошлаб қонун ҳужжатларида белгиланган муддатларда устав сармояси (жамғармаси)ни шакллантирмаган хорижий инвестициялар иштирокидаги корхоналар қонун ҳужжатларида белгиланган барча солиқлар ва тўловларни тўлиқ ҳажмда, бутун фаолияти даврида имтиёзлар қўлланмаган ҳолда тўлайдилар.

Ўзбекистон Республикаси Молия вазирлиги Давлат солиқ қўмитаси билан биргаликда бир ой муддатда Қонун ҳужжатларида белгиланган муддатларда устав сармояси (жамғармаси)ни шакллантирмаган хорижий инвестициялар иштирокидаги корхоналардан солиқ ундириш тартиби тўғрисидаги Низомни ишлаб чиқсин ва белгиланган тартибда тасдиқласин.

12. Белгилансинки, 2002 йил 1 январдан бошлаб:

ялпи даромад солиғини ҳамда микрофирмалар ва кичик корхоналар учун ягона солиқни ҳисоблаб чиқаришда солиқ солинадиган даромадга давлат облигациялари ва давлатнинг бошқа қимматли қоғозлари бўйича олинган дивидендлар ва фоизлар сифатида олинган даромадлар қўшилмайди;

юридик шахслар томонидан дивидендлар сифатида олинган ҳамда юридик шахснинг даромад олинган устав сармояси (жамғармаси)га йўналтирилган даромадларига солиқ солинмайди.

юридик шахсларнинг мол-мулкидан амортизация ва солиқ ҳисоблаб чиқариш асосий фондларнинг ҳар йили қайта баҳоланадиган қийматидан келиб чиққан ҳолда амалга оширилади;

мулкчилик шаклларидан қатъи назар, хўжалик юритувчи субъектлар ҳар йили 1 январдаги ҳолатига кўра асосий воситалар қийматини, уларни жорий нархларга мувофиқлаштириш учун Ўзбекистон Республикаси Макроиқтисодиёт ва статистика вазирлиги томонидан тасдиқланган тартибда қайта баҳолайдилар.

13. Белгилаб қўйилсинки, қишлоқ хўжалиги товар ишлаб чиқарувчилари томонидан тўланадиган ягона ер солиғидан Ўзбекистон Республикаси Молия вазирлиги ҳузуридаги Қишлоқни қишлоқ хўжалиги техникаси билан таъминлашни давлат томонидан рағбатлантириш жамғармасига 28 фоиз миқдоридаги ажратмалар тўловчилар томонидан Деҳқон ва фермер хўжаликларини қўллаб-қувватлаш жамғармасига белгиланган тартибда ажратилгандан кейин, Қорақалпоғистон Республикаси ва Хоразм вилояти ҳудудида пахтачилик ва ғаллачиликдаги ортиқча харажатлар қоплангандан кейин тўланади.

19. Ўзбекистон Республикаси Молия вазирлиги ҳамда Меҳнат ва аҳолини ижтимоий муҳофаза қилиш вазирлиги манфаатдор вазирликлар ва идоралар билан биргаликда бир ой муддатда:

иш ҳақи, стипендиялар, нафақалар ва пенсиялар тўлаш харажатларини молиялаштириш тартиби ва муддатлари тўғрисидаги низомни;

бошқарув органлари таъминоти харажатларини, улар ходимлари сонини 5 фоизга қисқартиришни ва бўшаб қолган маблағларни юқори малакали ходимларни моддий рағбатлантиришга йўналтиришни назарда тутган ҳолда, молиялаштириш тартибини ишлаб чиқсинлар ва белгиланган тартибда тасдиқласинлар.

20. 2002 йил 1 январдан бошлаб болаларнинг мактабгача болалар муассасаларидаги таъминоти ва мусиқа мактабларида ўқиганлиги учун ота-оналар томонидан тўланадиган тўловларнинг табақаланган миқдорлари 28 ва 29-иловаларга* мувофиқ белгилансин.

24. Ўзбекистон Республикаси Ҳукуматининг 30-иловага* мувофиқ қарорлари ўз кучини йўқотган деб ҳисоблансин.

Ўзбекистон Республикаси Ҳукуматининг 31-иловага* мувофиқ айрим қарорларига ўзгартиришлар ва қўшимчалар киритилсин.

25. Ўзбекистон Республикаси Адлия вазирлиги манфаатдор вазирликлар ва идоралар билан биргаликда мазкур қарор қабул қилиниши муносабати билан амалдаги қонун ҳужжатларига ўзгартиришлар ва қўшимчалар киритиш бўйича Вазирлар Маҳкамасига икки ҳафта муддатда таклифлар киритсин.

Вазирликлар ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари бир ҳафта муддатда илгари чиқарилган норматив ҳужжатларни мазкур қарорга мувофиқлаштирсинлар.