Пиллачиликнинг мавжуд озуқа базасини сақлаб қолиш ва уни янада ривожлантириш, шу асосда пилла етиштиришни кўпайтириш мақсадида Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлиги Ўзбекистон Республикаси Макроиқтисодиёт ва статистика вазирлиги, Давлат ер ресурслари қўмитаси, Жиззах, Сирдарё ва Тошкент вилоятлари ҳокимликлари билан биргаликда бир ой муддатда кўрсатиб ўтилган вилоятлар қишлоқ хўжалиги корхоналарининг 1-иловага* мувофиқ тутзорларини «Пилла-холдинг» холдинг компаниясининг туман пилла тайёрлаш ва уни қайта ишлаш корхоналарига тажриба тариқасида узоқ муддатли ижарага берсин.

Бунда ижара ҳақи ундириш ер солиғи ставкаси миқдорида белгилансин.

2. Қорақалпоғистон Республикаси ва республика вилоятлари бўйича 2000—2005 йилларда пилла етиштирувчи хўжаликларда ўз маблағлари ҳисобига тут қаторлари ва тутзорлар барпо этиш бўйича топшириқ уларнинг кўкариб кетишини ҳисобга олган ҳолда 2-иловага* мувофиқ ҳамда 2000 йилда пилла тайёрлаш топшириғи 3-иловага* мувофиқ белгилансин.

3. Белгилансинки, «Ўзбек ипаги» уюшмаси пиллачилик хўжаликларининг қишлоқ хўжалик ерларидан асосан тут уруғлиги ва экиш материали етиштириш, пиллачиликнинг озуқа базасини барпо этиш мақсадида тут дарахтлари ўтказиш учун фойдаланилиши керак.

«Ўзбек ипаги» уюшмасига пиллачилик ва пиллакашлик корхоналари эҳтиёжларидан келиб чиқиб, кўрсатиб ўтилган ер майдонларида тут дарахтлари экиш ҳуқуқи берилсин.

4. Қорақалпоғистон Республикаси Вазирлар Кенгаши, вилоятлар ҳокимликлари ва Ўзбекистон Республикаси Қишлоқ ва сув хўжалиги вазирлиги тут дарахтлари сақланиши ва уларнинг маҳсулдорлиги оширилиши учун қишлоқ хўжалиги корхоналари, раҳбарларига талабчанликни оширсинлар, Ўзбекистон Республикаси Давлат табиатни муҳофаза қилиш қўмитаси ва «Ўзбек ипаги» уюшмаси билан келишмасдан тут дарахтлари асоссиз равишда қўпориб ташланишига йўл қуювчи раҳбарлар ва шахсларни жавобгарликка тортсинлар.

5. Ўзбекистон Республикаси Қишлоқ ва сув хўжалиги вазирлиги, Ўсимликларни ҳимоя қилиш ва агрокимё тадқиқотлари республика маркази ҳамда «Ўзбек ипаги» уюшмаси Андижон, Наманган, Фарғона ва Сурхондарё вилоятлари ҳокимликлари билан биргаликда 2000-2001 йилларда тут парвонасини қириб ташлаш ва уни тўлиқ йўқотиш ҳамда тарқалишига йўл қўймаслик юзасидан профилактика чора-тадбирларини амалга оширсинлар.

8. Ўзбекистон Республикаси Қишлоқ ва сув хўжалиги вазирлиги, «Ўзбек ипаги» уюшмаси Ўзбекистон Республикаси Монополиядан чиқариш ва рақобатни ривожлантириш давлат қўмитаси билан келишган ҳолда:

ҳар йили бўлажак пилла тайёрлаш мавсумида пилланинг навлари бўйича чекланган шартномавий нархлар юзасидан тавсияларни ишлаб чиқсинлар;

пилла етиштирувчи хўжаликлар билан ҳисоб-китобларни пилланинг амалдаги стандарт бўйича аниқланадиган нав таркибини ҳисобга олган ҳолда шартномавий нархларга қатъий мувофиқ ҳолда амалга оширсинлар.

9. Белгилансинки:

пилла етиштирувчи хўжаликлар пиллани ички бозорда улар томонидан «Ўзбек ипаги» уюшмасининг пилла тайёрлаш ва пиллакашлик корхоналарига маҳсулот етказиб бериш бўйича шартномавий мажбуриятлар бажарилгандан кейингина сотишлари мумкин;

республикага импорт бўйича касалликка чалинган ва сифатсиз ипак қурт уруғи келтирилишига йўл қўймаслик мақсадида улар «Ўзбек ипаги» уюшмасининг Ўзбекистон ипакчилик илмий-тадқиқот институти хулосаси берилгандан кейин олиб келинади.

10. Мазкур қарорнинг бажарилишини назорат қилиш Бош вазир ўринбосарлари М.З. Усмонов ва Б.М. Олимжонов зиммасига юклансин.