Ўзбекистон Республикаси Олий Мажлисининг «Ўзбекистон Республикасининг 2004 йилги Давлат бюджети тўғрисида» 2003 йил 11 декабрдаги 553-II-сон қарорига мувофиқ Вазирлар Маҳкамаси қарор қилади:

1. Қуйидагилар:

Ўзбекистон Республикасининг 2004 йилги Давлат бюджети асосий параметрлари 1-иловага* мувофиқ;

Ўзбекистон Республикаси Молия вазирлиги ҳузуридаги Республика йўл жамғармасининг асосий параметрлари 2-иловага* мувофиқ тасдиқлансин.

2. 2004 йилги Давлат бюджети таҳчиллигининг чекланган миқдори ялпи ички маҳсулот ҳажмига нисбатан 1,0 фоиз миқдорида белгилансин.

Белгилаб қўйилсинки, Давлат бюджети таҳчиллигини молиялаштириш фақат қадрсизланмайдиган манбалар, шу жумладан давлат мулкини хусусийлаштиришдан олинадиган тушумлар, ўрта муддатли давлат пул мажбуриятлари ва хориждан маблағ жалб қилиш ҳисобига амалга оширилади.

3. Ўзбекистон Республикасининг Солиқ кодексига мувофиқ 2004 йил учун:

юридик шахслардан даромад (фойда) солиғи ставкалари 3-иловага* мувофиқ;

савдо ва умумий овқатланиш корхоналари учун ялпи даромаддан солиқ ставкалари 4-иловага* мувофиқ;

солиқ солишнинг соддалаштирилган тизимини қўллаётган микрофирмалар ва кичик корхоналар учун ягона солиқ ставкалари 5-иловага* мувофиқ;

лотереялар, тотализаторлар ва таваккалчиликка асосланган бошқа ўйинларни ташкил этиш бўйича фаолиятни амалга оширувчи юридик шахслар учун ялпи тушумдан ягона солиқ ставкалари 6-иловага* мувофиқ;

юридик ва жисмоний шахсларга тўланадиган дивидендлар ва фоизлар тарзида олинадиган даромадлардан солиқ ставкалари 7-иловага* мувофиқ;

юридик ва жисмоний шахсларнинг тадбиркорлик фаолияти айрим турлари бўйича белгиланган солиқлар ставкалари ҳамда уларга тузатувчи коэффициентлар 8 ва 9-иловаларга* мувофиқ;

рўйхат бўйича ишлаб чиқариладиган ва четдан келтириладиган товарлардан акциз солиғи ставкалари 10-1, 10-2-иловаларга* мувофиқ;

сув ресурсларидан фойдаланганлик учун солиқ ставкалари 11-иловага* мувофиқ;

ер ости бойликларидан фойдаланганлик учун солиқ ставкалари 12-иловага* мувофиқ;

юридик шахслардан олинадиган мулк солиғи ставкалари 13-иловага* мувофиқ;

жисмоний шахслардан олинадиган мулк солиғи ставкалари 14-иловага* мувофиқ;

ягона ер солиғи ставкалари 15-иловага* мувофиқ;

ягона ер солиғи тўлашга ўтмаган тўловчилар учун ер солиғи ставкалари 16-иловага* мувофиқ;

Қорақалпоғистон Республикаси, вилоятлар ва Тошкент шаҳар давлат ҳокимияти органлари томонидан жорий этиладиган маҳаллий солиқлар ва йиғимлар ставкалари 17-иловага* мувофиқ тасдиқлансин.

4. 2004 йил 1 январдан бошлаб автомобиль транспортида юк ва йўловчилар ташувчи жисмоний шахслар учун белгиланган чекланган солиқ жисмоний шахсларнинг автотранспорт воситаларини ижарага бериш, шу жумладан бирлашмалар, уюшмалар ва бошқа хўжалик юритувчи субъектларга ижарага беришдан оладиган даромадларига жорий этилсин, улар тегишли равишда ижара тўлови суммасидан даромад солиғи тўлашдан озод қилинсин.

5. Қишлоқ хўжалиги йўналишидаги илмий-тадқиқот ташкилотлари ва илмий муассасаларнинг тажриба, экспериментал ва ўқув-тажриба хўжаликлари 2004 йил 1 январдан бошлаб ягона ер солиғи тўлашга ўтказилсин.

6. 2004 йил 1 январдан бошлаб Самарқанд ва Тошкент вилоятлари қишлоқ хўжалиги товар ишлаб чиқарувчилари учун қишлоқ хўжалиги ерларининг норматив қийматидан келиб чиққан ҳолда, тажриба тариқасида, 18-иловага* мувофиқ ставкалар бўйича ягона ер солиғини ҳисоблаб чиқариш белгилансин.

Ўзбекистон Республикаси Ер ресурслари, геодезия, картография ва давлат кадастри давлат қўмитаси:

Ўзбекистон Республикаси Қишлоқ ва сув хўжалиги вазирлиги, Иқтисодиёт вазирлиги, Молия вазирлиги ва Давлат солиқ қўмитаси билан биргаликда 2004 йил 1 апрелгача Самарқанд ва Тошкент вилоятлари барча қишлоқ хўжалиги товар ишлаб чиқарувчиларининг қишлоқ хўжалиги ерлари норматив қийматини 2004 йил 1 январдаги ҳолатига кўра қайта баҳолаш ишларини амалга оширсин;

Ўзбекистон Республикаси Давлат солиқ қўмитаси билан биргаликда қишлоқ хўжалиги ерларининг қайта баҳоланган норматив қийматини ягона ер солиғини ҳисоблаб чиқиш учун кўрсатиб ўтилган вилоятларнинг барча қишлоқ хўжалиги товар ишлаб чиқарувчиларига етказсин.

Ўзбекистон Республикаси Молия вазирлиги қишлоқ хўжалиги ерлари норматив қийматини қайта баҳолаш натижаларига кўра, зарурият бўлганда, ягона ер солиғининг белгиланган ставкаларига тузатишлар киритиш бўйича Ўзбекистон Республикаси Вазирлар Маҳкамасига таклифлар киритсин.

7. 2004 йил 1 январдан бошлаб:

қўшилган қиймат солиғи бўйича аванс тўловлари бекор қилинсин, ушбу солиқни амалдаги айланма бўйича ҳар ойда бир марта тўлаш назарда тутилсин;

«ЎзДЭУавто» акциядорлик жамиятида ишлаб чиқарилган автомобилларни республикадан олиб кетувчи жисмоний ва юридик шахслардан йиғим бекор қилинсин.

8. 2004 йил 1 январдан бошлаб:

фойдали қазилмаларни қазиб олувчи микрофирмалар ва кичик корхоналар учун ягона солиқ тўлаш билан бирга ер ости бойликларидан фойдаланганлик учун солиқ;

меҳнатга ҳақ тўлаш фондидан ижтимоий суғуртага мажбурий бадаллар тўлаш ўрнига, мулкчилик шаклларидан қатъи назар, юридик шахслар меҳнатга ҳақ тўлаш фондидан 19-иловага* мувофиқ миқдорда ягона ижтимоий тўлов жорий этилсин.

Белгилаб қўйилсинки, ягона ижтимоий тўлов давлат солиқлари ва йиғимларига тенглаштирилади.

Ўзбекистон Республикаси Молия вазирлиги Меҳнат ва аҳолини ижтимоий муҳофаза қилиш вазирлиги, Давлат солиқ қўмитаси, Ўзбекистон Республикаси Марказий банки билан биргаликда Ягона ижтимоий тўловни ҳисоблаш, тўлаш ва тақсимлаш тўғрисидаги низомни икки ҳафта муддатда ишлаб чиқсин ва белгиланган тартибда тасдиқласин.

9. Ижтимоий суғуртага мажбурий бадалларни амалдаги ставкалар бўйича тўлашнинг амалдаги тартиби:

ихтисослаштирилган цехлар, участкалар ва корхоналарда ишлаётган ногиронларнинг меҳнатидан фойдаланаётган корхоналар;

«SOS – Ўзбекистон болалар маҳаллалари» уюшмаси учун сақлаб қолинсин.

Белгилаб қўйилсинки, адвокатлик бюролари, ҳайъатлари ва фирмалари ижтимоий суғуртага меҳнатга ҳақ тўлаш фондидан 25 фоиз миқдорида бадал тўлайдилар.

10. 2004 йилда:

барча солиқ солинадиган айланмалар бўйича қўшилган қиймат солиғи ставкаси 20 фоиз миқдорида;

корхоналар, ташкилотлар ва муассасалар томонидан товарлар (ишлар, хизматлар)ни сотиш (товар айланмаси) ҳажмидан Бюджетдан ташқари пенсия жамғармасига мажбурий ажратмалар ставкаси, қўшилган қиймат солиғи ва акциз солиғи чиқариб ташланган ҳолда, 0,7 фоиз миқдорида;

фуқароларнинг иш ҳақидан Бюджетдан ташқари пенсия жамғармасига мажбурий суғурта бадаллари ставкаси 2,5 фоиз миқдорида сақлаб қолинсин.

11. 2004 йил 1 январдан бошлаб Ўзбекистон Республикаси Молия вазирлиги ҳузуридаги Республика йўл жамғармасига ажратмалар ва йиғимлар ставкалари 20, 21-иловаларга* мувофиқ белгилансин.

12. Маҳаллий ҳокимият ва бошқарув органларининг барча даражалардаги маҳаллий бюджетлар даромадлари ва харажатларини шакллантиришдаги роли, мустақиллиги ва масъулиятини кучайтириш, маҳаллий бюджетларнинг Давлат бюджетидаги улушини ошириш мақсадида:

сув ресурсларидан фойдаланганлик учун солиқ;

экология солиғи;

юридик шахс бўлмасдан тадбиркорлик фаолияти билан шуғулланувчи жисмоний шахслар даромадларидан олинадиган белгиланган солиқ;

юридик ва жисмоний шахсларнинг тадбиркорлик фаолияти айрим турларини амалга оширишдан оладиган даромадларидан олинадиган белгиланган солиқ;

республикада ишлаб чиқариладиган алкоголли маҳсулотлар (этил спиртидан ташқари), пиво, ўсимлик ёғи, кир совун ва атир совунга акциз солиғи бўйича тушумлар тўлиқ миқдорда маҳаллий бюджетлар даромадларига ўтказилсин.

13. 2004 йил учун:

Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари даромадлари ва харажатлари ҳажмлари, республика бюджетидан дотациялар ва мақсадли субвенцияларнинг чекланган миқдорлари 22-иловага* мувофиқ;

умумдавлат солиқлари тушумларидан Қорақалпоғистон Республикаси бюджетига, вилоятлар ва Тошкент шаҳар маҳаллий бюджетларига ажратмалар нормативлари 23-иловага* мувофиқ;

Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари айланма касса нақд пул маблағининг энг кам зарур миқдорлари 24-иловага* мувофиқ тасдиқлансин.

Ўзбекистон Республикаси Молия вазирлигига тегишли бюджетларга дотациялар, мақсадли субвенциялар ва бюджет ссудалари (даромадлар ва харажатлар ўртасидаги вақтинчалик касса тафовутига) ажратишда уларнинг миқдорларини ҳудудлар бўйича ундириладиган барча солиқлар ва тўловларнинг тўлиқ тушишидан, шунингдек бюджетларнинг биринчи навбатдаги харажатларининг (устамалари билан иш ҳақи, нафақалар, стипендиялар ва уларга тенглаштирилган тўловларнинг) маблағ билан сўзсиз таъминланиши зарурлигидан келиб чиққан ҳолда аниқлаштириш ҳуқуқи берилсин.

14. Аҳолини иссиқлик энергияси билан кафолатли таъминлаш, коммунал хўжалиги қозонхона иншоотлари ва иссиқлик тармоқларининг куз-қиш даврида узлуксиз ишлашини таъминлаш мақсадида Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари параметрларида 2004 йилдан бошлаб уларни мукаммал таъмирлаш учун мақсадли маблағлар назарда тутилиши маълумот учун қабул қилинсин.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикаси Молия вазирлиги:

тегишли даражадаги бюджетларни шакллантиришда ҳар йили қозонхона иншоотлари ва иссиқлик тармоқларини таъмирлаш учун маблағларни назарда тутсинлар;

кўрсатиб ўтилган мақсадлар учун ажратиладиган бюджет маблағларидан қатъий мақсадли фойдаланилишини таъминласинлар.

15. 2004 йил учун Ўзбекистон Республикаси Вазирлар Маҳкамасининг захира жамғармаси ҳамда Қорақалпоғистон Республикаси, вилоятлар ва Тошкент шаҳар бюджетларининг захира фондлари миқдорлари 25-иловага* мувофиқ тасдиқлансин.

16. Ҳукуматнинг маблағ жалб қилишининг чекланган миқдори, шу жумладан Ҳукумат томонидан кафолатланган кредитлар ҳажми 2004 йилда давлат ташқи қарзига хизмат кўрсатиш (асосий қарзни қайтариш, фоизларни тўлаш, воситачилик ҳақи ва бошқа харажатлар) бўйича харажатлар ҳажмида чеклаб қўйилсин.

17. Ўзбекистон Республикаси Молия вазирлиги ва Иқтисодиёт вазирлиги:

макроиқтисодий кўрсаткичлар прогнозининг бажарилиши ҳамда Ўзбекистон Республикаси Давлат бюджетининг ижроси таҳлили натижалари бўйича, зарурият бўлганда, Давлат бюджетининг белгиланган таҳчиллиги доирасида Давлат бюджетининг асосий параметрларини аниқлаштириш юзасидан Ўзбекистон Республикаси Вазирлар Маҳкамасига таклифлар киритсинлар;

2005 молия йилидан бошлаб ялпи ички маҳсулот ўртача муддатли прогнози, бюджет таҳчиллигининг, давлатнинг маблағ жалб қилишининг чекланган миқдори, бошқа макроиқтисодий кўрсаткичлар билан ўзаро боғлиқликда 3 йилга бюджет даромадлари ва харажатлари параметрларининг мақсадли йўналишларини белгилашни назарда тутувчи солиқ-бюджет сиёсатининг ўртача муддатли стратегияси юзасидан 2004 йил 1 апрелгача таклифлар киритсинлар.

18. Ўзбекистон Республикаси Молия вазирлигининг:

Давлат бюджетининг харажатлар бўйича параметрларини тасдиқланган 2492,5 млрд сўмга ўрнига 2385,6 млрд сўмгача миқдорда аниқлаштирган ҳамда бюджет таҳчиллигини (ялпи ички маҳсулот ҳажмига нисбатан тасдиқланган 2,0 фоиз ўрнига) ялпи ички маҳсулот ҳажмига нисбатан 0,7 фоизгача камайтирган ҳолда 2003 йилги давлат харажатларини мақбуллаштириш юзасидан;

Ўзбекистон Республикаси Марказий банки билан биргаликда 2004 йил январь ойида 2003 йил учун барча даражалардаги бюджетлар билан якуний айланмалар ўртасидаги ўзаро ҳисоб-китобларни тартибга солишга доир операцияларни, 2003 йилги Давлат бюджетининг ижроси тўғрисидаги ҳисоботда ўтказилган операцияларни акс эттирган ҳолда, ўтказиш тўғрисидаги таклифлари қабул қилинсин.

Ўзбекистон Республикаси Молия вазирлиги:

2003 йилги Давлат бюджети таҳчиллиги фақат қадрсизланмайдиган манбалар, шу жумладан давлат мулкини хусусийлаштиришдан олинадиган тушумлар ҳамда давлат бюджетининг 2003 йил бошидаги қолдиғи ҳисобига молиялаштирилишини таъминласин;

Ўзбекистон Республикаси Давлат бюджети даромадлари кўрсаткичларини айрим манбалар ва мамлакат минтақалари бўйича 2003 йилга тасдиқланган даромадлар ҳажми доирасида аниқлаштирсин.

19. Ўзбекистон Республикаси Вазирлар Маҳкамасининг 26-иловага мувофиқ қарорлари ўз кучини йўқотган деб ҳисоблансин.

Ўзбекистон Республикаси Ҳукуматининг 27-иловага мувофиқ айрим қарорларига ўзгартиришлар ва қўшимчалар киритилсин.

20. Ўзбекистон Республикаси Адлия вазирлиги манфаатдор вазирликлар ва идоралар билан биргаликда мазкур қарорнинг қабул қилиниши муносабати билан амалдаги қонун ҳужжатларига ўзгартиришлар ва қўшимчалар юзасидан Вазирлар Маҳкамасига икки ҳафта муддатда таклифлар киритсин.

Вазирликлар ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари илгари чиқарилган норматив ҳужжатларини бир ҳафта муддатда мазкур қарорга мувофиқлаштирсинлар.

21. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С.Азимов зиммасига юклансин.

1. Ўзбекистон Республикаси Олий Кенгаши Раёсати ва Ўзбекистон Республикаси Вазирлар Маҳкамасининг «Чернобиль ҳалокатидан зиён кўрган Ўзбекистон Республикасида истиқомат қилувчи фуқароларни ижтимоий ҳимоялаш ҳақида» 1992 йил 6 апрелдаги 170-сон қарорининг (Ўзбекистон Республикаси ҚТ, 1992 й., 4-сон, 10-модда; 1994 й., 1-сон, 1-модда) 10-банди.

2. Вазирлар Маҳкамасининг «Давлатга қарашли бўлмаган мактабгача болалар муассасалари тармоғини ташкил этиш ва ривожлантириш чора-тадбирлари тўғрисида» 1999 йил 24 июндаги 313-сон қарорининг (Ўзбекистон Республикаси ҚТ, 1999 й., 6-сон, 33-модда) 6-банди.

3. Вазирлар Маҳкамасининг «Ўзбекистон Республикасининг 2003 йилги асосий макроиқтисодий кўрсаткичлари прогнози ва Давлат бюджети параметрлари тўғрисида» 2002 йил 30 декабрдаги 455-сон қарорининг 3-банди, 8-бандининг иккинчи ва тўртинчи хатбоши ҳамда қарорга 3-20-иловалар.

4. Вазирлар Маҳкамасининг «Қимматли қоғозлар иккиламчи бозорини янада ривожлантириш чора-тадбирлари тўғрисида» 2003 йил 29 апрелдаги 196-сон қарорининг (Ўзбекистон Республикаси ҚТ, 2003 й., 4-сон, 33-модда) 2-банди.

5. Вазирлар Маҳкамасининг «Вазирликлар ва идораларнинг бюджетдан ташқари жамғармаларига маблағлар ажратиш ва улардан фойдаланилишини тартибга солиш чора-тадбирлари тўғрисида» 2003 йил 19 ноябрдаги 520-сон қарорига (Ўзбекистон Республикаси ҚТ, 2003 й., 11-сон, 123-модда) 2-илова 4-бандининг иккинчи хатбоши.

1. Вазирлар Маҳкамасининг «Хорижий валютадаги давлат божлари, йиғимлар ҳамда солиқ бўлмаган бошқа тўловлар ставкалари тўғрисида» 1993 йил 19 августдаги 423-сон қарорида:

2-илованинг II, III бўлимлари ва IV бўлимнинг 2-банди ўз кучини йўқотган деб ҳисоблансин;

«Божлар, йиғимлар ва бошқа солиқ бўлмаган тўловларни тўлашдан тушган валюта тушумларини тақсимлаш» жадвалида:

10 ва 15-бандлар ўз кучини йўқотган деб ҳисоблансин;

12-банддаги «хорижий банкларнинг ваколатхоналарини аккредитация қилишга» сўзлари чиқариб ташлансин.

2. Вазирлар Маҳкамасининг 1997 йил 30 июлдаги 374-сон қарори (Ўзбекистон Республикаси ҚТ, 1997 й., 7-сон, 26-модда) билан тасдиқланган Ўзбекистон Республикаси Давлат божхона қўмитаси тўғрисида Низом 9-бандининг ўн олтинчи хатбошидаги «хўжалик субъектларидан» сўзларидан кейин «0,07 фоиз миқдорида» сўзлари қўшилсин.

3. Вазирлар Маҳкамасининг «Қишлоқ хўжалиги ишлаб чиқаришининг техник жиҳатдан таъминланганлиги даражасини оширишга оид чора-тадбирлар тўғрисида» 1997 йил 20 августдаги 410-сон қарорида:

5-банднинг бешинчи хатбошидаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин;

6-банд ўз кучини йўқотган деб ҳисоблансин.

4. Вазирлар Маҳкамасининг «Жисмоний шахсларнинг айрим тоифалари даромадларига имтиёзли солиқ солиш тўғрисида» 1997 йил 24 декабрдаги 562-сон қарорининг (Ўзбекистон Республикаси ҚТ, 1997 й., 11-12-сон, 40-модда) 1-бандидаги «1998 йилда сақлаб қолинсин» сўзлари «белгилансин» сўзи билан алмаштирилсин.

5. Вазирлар Маҳкамасининг 1998 йил 15 апрелдаги 159-сон қарори (Ўзбекистон Республикаси ҚТ, 1998 й., 4-сон, 15-модда; 1999 й., 11-сон, 64-модда; 2000 й., 8-сон, 45-модда; 2001 й., 6-сон, 34-модда; 2002 й., 7-сон, 41-модда, 9-сон, 53-модда; 2003 й., 6-сон, 45-модда) билан тасдиқланган Микрофирмалар ва кичик корхоналар учун солиқ солишнинг соддалаштирилган тизимини қўллаш тартибида:

а) I бўлимда:

5-бандга қуйидаги мазмундаги гап қўшилсин:

«Бунда ушбу корхоналарга экспорт қилувчи корхоналар учун мулк солиғи бўйича берилган имтиёзлар татбиқ этилмайди»;

6-банддаги «бюджетдан ташқари фондларга» сўзлари «давлат мақсадли фондларига» сўзлари билан алмаштирилсин;

б) II бўлимда:

2-банддаги «Макроиқтисодий ва статистика вазирлиги» сўзлари «Ўзбекистон Республикаси Давлат статистика қўмитаси» сўзлари билан алмаштирилсин;

3-банддаги «юридик шахслар бўлмаган ваколатхоналар ва филиалларда» сўзлари «шўъба корхоналарда, филиалларда ва ваколатхоналарда» сўзлари билан алмаштирилсин;

6-банд қуйидаги таҳрирда баён қилинсин:

«6. Акциз солиғи солинадиган маҳсулотлар ишлаб чиқарувчи, шунингдек фойдали қазилмаларни қазиб олувчи микрофирмалар ва кичик корхоналар Ўзбекистон Республикаси Солиқ кодексида белгиланган тартибда акциз солиғини ва ер ости бойликларидан фойдаланганлик учун солиқни тўлашган тақдирда ягона солиқ тўлашга ўтишлари мумкин».

в) III бўлимнинг 4-бандига қуйидаги мазмундаги хатбоши қўшилсин:

«дивидендлар тарзида олинган ва улар олинган юридик шахснинг устав капитали (фонди)га йўналтирилган даромадлар».

6. Вазирлар Маҳкамасининг «Магнум» ҳайдов тракторларини жиҳозлаш учун плуглар харид қилиш тўғрисида» 1998 йил 31 июлдаги 326-сон қарорида:

1-бандда:

бешинчи хатбошидаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин;

олтинчи хатбоши ўз кучини йўқотган деб ҳисоблансин;

иловадаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин.

7. Вазирлар Маҳкамасининг 1999 йил 5 февралдаги 54-сон қарори (Ўзбекистон Республикаси ҚТ, 1999 й., 2-сон, 9-модда; 2003 й., 6-сон, 44-модда, 45-модда; 10-сон, 96-модда) билан тасдиқланган Маҳсулот (ишлар, хизматлар)ни ишлаб чиқариш ва сотиш харажатлари таркиби ҳамда молиявий натижаларни шакллантириш тартиби тўғрисидаги Низомга 1-иловада:

а) 1.15-банд қуйидаги таҳрирда баён қилинсин:

«1.15. Ижарага берганлик, хизматлар кўрсатилганлиги, маълумотлар узатилганлиги учун алоқа узелларига тўлов (кўчма, йўлдош, пейжинг алоқаси, радиочастоталар ижараси, ажратилган каналлар, маълумотларни узатишнинг симли ва симсиз тармоқлари), АТС ва Интернетдан ташқари»;

б) қуйидаги мазмундаги 1.21-1-банд қўшилсин:

«1.21-1. Ишлаб чиқариш жараёнига бевосита тааллуқли бўлмаган атроф табиий муҳитни ифлослантирганлик ва унга чиқиндиларни жойлаштирганлик учун қонун ҳужжатларида белгиланган нормалардан ортиқча компенсация тўловлари».

8. Вазирлар Маҳкамасининг «Дон ўриш-йиғиш комбайнлари ва ҳайдов агрегатларини харид қилиш тўғрисида» 1999 йил 2 апрелдаги 152-сон қарорининг 3-бандида:

биринчи хатбошидаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин;

иккинчи хатбоши чиқариб ташлансин.

9. Вазирлар Маҳкамасининг «Кейс» дон ўриш-йиғиш комбайнларини харид қилиш тўғрисида» 1999 йил 12 майдаги 235-сон қарорининг 4-бандида:

биринчи хат бошидаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин;

иккинчи хат боши чиқариб ташлансин.

10. Вазирлар Маҳкамасининг «Ишлаб чиқариш синовлари учун шудгорлаш агрегатлари харид қилиш тўғрисида» 1999 йил 19 июлдаги 351-сон қарорида:

3-банддаги «Қашқадарё вилояти ҳокимлигининг» сўзлари «республика бюджетининг» сўзлари билан алмаштирилсин;

иловадаги «Қашқадарё вилоятининг» сўзлари «республика бюджетининг» сўзлари билан алмаштирилсин.

11. Вазирлар Маҳкамасининг 1999 йил 20 сентябрдаги 431-ф-сон фармойишининг 4-банди учинчи хатбоши қуйидаги таҳрирда баён қилинсин:

«Қозоғистон Республикасидан Ўзбекистон Республикасига кирган ёки Ўзбекистон Республикасидан Қозоғистон Республикасига чиққан ҳолда олинган маблағлар Ўзбекистон Республикаси Молия вазирлиги ҳузуридаги Республика йўл жамғармасининг валюта ҳисоб рақамига ўтказилган ҳолда бевосита божхона постларида Ўзбекистон Республикаси тижорат банкларининг бўлимлари томонидан эркин муомаладаги валютада амалга оширилади».

12. Вазирлар Маҳкамасининг «Туркманистоннинг автотранспорт воситалари Ўзбекистон Республикаси ҳудудига кирганлиги ва транзит ҳаракатланганлиги учун йўл йиғимлари жорий этиш тўғрисида» 1999 йил 28 сентябрдаги 447-сон қарорининг (Ўзбекистон Республикаси ҚТ, 1999 й., 9-сон, 59-модда) 2-банди қуйидаги таҳрирда баён қилинсин:

«2. Белгилаб қўйилсинки, Туркманистоннинг автотранспорт воситаларидан йиғим ундириш олинган маблағлар Ўзбекистон Республикаси Молия вазирлиги ҳузуридаги Республика йўл жамғармасининг валюта ҳисоб рақамига ўтказилган ҳолда бевосита божхона постларида Ўзбекистон Республикаси тижорат банкларининг бўлимлари томонидан эркин муомаладаги валютада амалга оширилади».

13. Ўзбекистон Республикаси Вазирлар Маҳкамасининг «Чегарадош давлатларнинг юк автотранспорт воситалари Ўзбекистон Республикасининг божхона ҳудуди орқали ўтиши учун ягона йиғимлар белгилаш тўғрисида» 1999 йил 31 декабрдаги 552-сон қарори (Ўзбекистон Республикаси ҚТ, 1999 й., 12-сон, 72-модда; 2000 й., 2-сон, 8-модда, 10-сон, 65-модда) 3-бандининг иккинчи хатбоши қуйидаги таҳрирда баён қилинсин:

«Қирғизистон Республикаси юк автотранспорти воситалари ва автобусларидан тўловлар бевосита божхона постларида ундирилади, олинган маблағлар тижорат банклари бўлимлари орқали Ўзбекистон Республикаси Молия вазирлиги ҳузуридаги Республика йўл жамғармасининг валюта ҳисоб рақамига ўтказилади».

14. Вазирлар Маҳкамасининг 2000 йил 18 январдаги 16-сон қарори (Ўзбекистон Республикаси ҚТ, 2000 й., 1-сон, 4-модда) билан тасдиқланган Кўп квартирали уйларни капитал таъмирлаш учун маблағлар тўплаш (йиғиш) ва улардан фойдаланиш тўғрисидаги Вақтинчалик низомнинг 2-бандига қуйидаги мазмундаги хатбоши қўшилсин:

«Мазкур банднинг амал қилиши 1991 йилгача қурилган, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан тасдиқланадиган турар жойларнинг аниқ рўйхатлари асосида бюджет маблағлари ва бошқа манбалар ҳисобига амалга ошириладиган уйларнинг ичидаги муҳандислик коммуникацияларини ва турар жойларнинг умумий фойдаланиладиган жойларини мукаммал таъмирлашга жорий этилмайди».

15. Вазирлар Маҳкамасининг «Дон ўриш-йиғиш комбайнлари ва эҳтиёт қисмлар харид қилиш тўғрисида» 2000 йил 12 майдаги 186-сон қарорининг 3-бандида:

биринчи хатбошидаги «Қорақалпоғистон Республикаси ва вилоятлар ҳокимликлари» сўзлари «республика бюджети» сўзлари билан алмаштирилсин;

иккинчи хатбоши чиқариб ташлансин.

16. Вазирлар Маҳкамасининг «Тожикистон Республикаси юк автотранспорт воситалари ва автобусларининг Ўзбекистон Республикаси божхона ҳудуди орқали ўтганлиги учун йиғимларни бирхиллаштириш тўғрисида» 2002 йил 8 январдаги 11-сон қарорининг (Ўзбекистон Республикаси ҚТ, 2002 й., 1-сон, 3-модда) 2-банди қуйидаги таҳрирда баён қилинсин:

«2. Белгилаб қўйилсинки, Тожикистоннинг автотранспорт воситаларидан йиғим ундириш олинган маблағлар Ўзбекистон Республикаси Молия вазирлиги ҳузуридаги Республика йўл жамғармасининг валюта ҳисоб рақамига ўтказилган ҳолда бевосита божхона постларида Ўзбекистон Республикаси тижорат банкларининг бўлимлари томонидан эркин муомаладаги валютада амалга оширилади».

17. Вазирлар Маҳкамасининг 2002 йил 6 июндаги 200-сон қарори билан тасдиқланган 2002—2010 йилларда компьютерлаштириш ва ахборот-коммуникация технологияларини ривожлантириш дастурида:

а) 4-бўлимнинг биринчи хатбоши қуйидаги таҳрирда баён қилинсин:

«Дастурнинг асосий бўлимларини молиялаштириш учун маблағларни хорижий банклар, операторлар, провайдерларнинг кредитлари, шунингдек ички ва ташқи инвесторларнинг ўз маблағлари ҳисобига жалб этиш мўлжалланмоқда. Бунда коллежлар, лицейлар ва умумтаълим мактабларини компьютерлар билан жиҳозлаш харажатларини (камида бир мингта компьютер синфлари ташкил этиш бўйича ҳар йилги эҳтиёжни қондиришни ҳисобга олган ҳолда): харажатларнинг 30 фоизини – беғараз грантларни босқичма-босқич жалб этиш ҳисобига ва 70 фоизгачасини ушбу мақсадлар учун назарда тутилган давлат бюджетидан ҳар йили ажратиладиган маблағлар ҳисобига амалга ошириш мўлжалланмоқда, олий ўқув юртлари бўйича эса асосан беғараз грантлар ва олий ўқув юртларининг бюджетдан ташқари маблағлари ушбу харажатларни молиялаштириш манбалари ҳисобланади».

б) 8-иловадаги изоҳ**га «асосан беғараз грантлар ва бюджетдан ташқари маблағлар ушбу харажатларни молиялаштириш манбалари ҳисобланадиган олий ўқув юртларидан ташқари» сўзлари қўшилсин.

18. Вазирлар Маҳкамасининг 2003 йил 15 апрелдаги 217-ф-сон фармойиши 3-бандининг иккинчи хат бошидан «божхонада расмийлаштирилган кундан бошлаб икки ой ўтгандан кейин акциз солиғи тўлаган ҳолда» сўзлари чиқариб ташлансин.

19. Вазирлар Маҳкамасининг 2003 йил 21 августдаги 361-сон қарори (Ўзбекистон Республикаси ҚТ, 2003 й., 8-сон, 74-модда) билан тасдиқланган Ўзбекистон Республикаси Молия вазирлиги ҳузуридаги Республика йўл жамғармаси даромадларини шакллантириш ва маблағларини сарфлаш тартиби тўғрисидаги Низомда:

а) 7-бандда:

«а» кичик бандига қуйидаги мазмундаги хатбоши қўшилсин:

«Агар хўжалик юритувчи субъект фаолиятнинг бир неча турлари билан шуғулланcа, у ҳолда у алоҳида ҳисоб юритиши ва тўловларни фаолиятнинг ушбу турлари учун белгиланган ставкалар бўйича тўлаши керак»;

«е» кичик банди қуйидаги таҳрирда баён қилинсин:

«е) Ўзбекистон Республикаси Ички ишлар вазирлиги органларида рўйхатдан ўтказилган тақдирда харид қилинган ва вақтинча олиб чиқиб кетиладиган енгил автомобиль ёки бошқа автотранспорт воситалари (юк автомобиллари, автобуслар, махсус автомобиллар) нархидан келиб чиқиб, мулкчилик шаклидан қатъи назар, ушбу маблағларнинг харидорлари (фойдаланувчилари) томонидан тўланадиган сотиб олинган ва вақтинча олиб чиқиб кетиладиган автотранспорт воситалари қийматидан тўланадиган йиғимлар ҳисобига шакллантирилади.

Йиғимлар бевосита харидорлар (фойдаланувчилар) – юридик ва жисмоний шахслар томонидан Жамғарманинг автотранспорт воситаларини рўйхатдан ўтказиш жойи бўйича хизмат кўрсатувчи туман (шаҳар) солиқ инспекцияларининг тегишли банкларда очилган тегишли транзит ҳисоб рақамларига тўланади.

Автотранспорт воситаларини сотиб олишга ёки қайта сотишга ва вақтинча олиб чиқиб кетишга йиғим тўланганлиги тўғрисидаги ҳужжат кўрсатилмасдан автотранспорт воситалари рўйхатдан ўтказилмайди, қайта рўйхатдан ўтказилмайди ёки техник кўрикдан ўтказилмайди.

Ўзбекистон Республикаси Ички ишлар вазирлиги органларида рўйхатдан ўтказиладиган сотиб олинган ва вақтинча олиб чиқиб кетиладиган автотранспорт воситалари қийматидан йиғимлар суммаси тўловчи (фойдаланувчи) корхоналар томонидан маҳсулот (ишлар, хизматлар) ишлаб чиқариш ва сотиш харажатлари таркибига, бюджет ташкилотлари томонидан эса – таъминот сарф-харажатлари сметасига киритилади»;

«ж» кичик банди ўз кучини йўқотган деб ҳисоблансин;

б) 26-банд қуйидаги таҳрирда баён қилинсин:

«26. Тўловчилар ҳисобот ойидан кейинги ойнинг 15-кунидан кечикмай рўйхатдан ўтказиш жойи бўйича солиқ органларига Жамғармага маблағ ажратилиши бўйича ҳисоб-китобларни тақдим этадилар ва худди шу ойнинг 20-кунигача тўланиши керак бўлган тўловларни Жамғармага ўтказадилар. Мажбурий ажратмаларнинг ортиқча тўланган суммаси солиқ органларининг ортиқча тўлаганлик тўғрисидаги хулосаси бўйича, тўловчининг ёзма аризаси олинган кундан бошлаб ўттиз кун муддатда бўлажак тўловлар ҳисобига ўтказилади ёки Республика йўл жамғармаси томонидан тўловчига қайтарилади»;

в) 27-банд қуйидаги таҳрирда баён қилинсин:

«27. Хўжалик юритувчи субъектлар таркибига кирадиган, юридик шахслар бўлмаган таркибий бўлинмалар Жамғармага ажратмаларни туман (шаҳар)лар солиқ инспекцияларининг транзит ҳисоб рақамларига ўтказадилар, уларга бюджетга ва бюджетдан ташқари Пенсия жамғармасига тўловлар бўйича ҳисоб-китобларни тақдим этадилар»;

г) 29-банднинг еттинчи хатбоши қуйидаги таҳрирда баён қилинсин:

«Ўзбекистон Республикаси Марказий банки, Ўзбекистон Республикаси Молия вазирлиги ҳузуридаги Қишлоқни қишлоқ хўжалиги техникаси билан таъминлашни давлат томонидан рағбатлантириш жамғармаси»;

д) 30-банднинг учинчи ва бешинчи хатбоши чиқариб ташлансин;

е) 31-бандда:

учинчи хатбошига «шунингдек ҳадя шартномаси асосида яқин қариндошлардан (ота-оналар, болалар, ака-укалар, опа-сингиллар, эр, хотин) автомобиллар ва мотоаравачалар олувчи фуқаролар» сўзлари қўшилсин;

қуйидаги мазмундаги хатбоши қўшилсин:

«ҳомийлик (беғараз) ёрдами сифатида автомобиль олган юридик шахслар - болалар уйлари, ихтисослаштирилган мактаб-интернатлар, кексалар ва кичик ёшдаги ногиронлар учун интернат-уйлар, шунингдек давлат бюджетидан таъминланадиган тиббиёт муассасалари»;

«автотранспорт воситалари балансдан балансга беғараз берилган ҳолларда юридик шахслар».