Судлар адлия органлари ва муассасаларининг (кейинги ўринларда адлия органлари деб юритилади) моддий-техника таъминотини яхшилаш, улар фаолияти учун зарур шарт-шароитлар яратиш мақсадида, шунингдек амалдаги Судлар ва адлия органларини ривожлантириш, Ижро ишини ривожлантириш жамғармалари маблағларидан фойдаланиш самарадорлигини ошириш учун Вазирлар Маҳкамаси қарор қилади:

1. Ўзбекистон Республикаси Судлари ва адлия муассасаларини ривожлантириш, Ўзбекистон Республикаси Хўжалик судларини ривожлантириш, Ижро ишини ривожлантириш жамғармалари негизида ягона Судлар ва адлия органларини ривожлантириш жамғармаси (кейинги ўринларда Жамғарма деб юритилади) ташкил этилсин.

2. Белгилансинки, қуйидагилар Жамғарма даромадларини шакллантириш манбалари ҳисобланади:

умумий юрисдикция судлари томонидан кўриб чиқиладиган ишлар бўйича жарималар ва давлат божлари тўлашдан давлат бюджетига тушаётган суммаларнинг 16 фоизи миқдоридаги ажратмалар;

хўжалик судлари томонидан кўриб чиқиладиган ишлар бўйича давлат божлари ва жарима санкцияларини тўлашдан давлат бюджетига тушаётган суммаларнинг 12 фоизи миқдоридаги ажратмалар;

адлия органлари, шу жумладан ФҲДЁ органлари томонидан ундириладиган давлат божи суммаларидан 16 фоиз, нотариуслар томонидан ундириладиган давлат божи суммаларидан эса 12 фоиз миқдоридаги ажратмалар;

адлия органлари томонидан нодавлат нотижорат ташкилотларни, адвокатлик бюроларини, фирмаларни, ҳайъатларни, рўйхатдан ўтказганлик, нотариал ва адвокатлик фаолиятини лицензиялаганлик, юридик кадрларни малака аттестациясидан ўтказганлик учун ундириладиган маблағларнинг 80 фоизи, шунингдек адлия органлари томонидан ўз ваколатлари доирасида ундириладиган жарималар;

ижро иши бўйича бюджетга ундирилган сўммадан 24 фоиз миқдоридаги ажратмалар солиқлар ҳамда бошқа мажбурий тўловлар бўйича муддатида тўланмаган қарзлар ундирилишидан ташқари;

ваколатли органлар томонидан олиб қўйилган ва давлат даромадига ўтказилган мол-мулкни сотишдан тушадиган маблағларнинг 8 фоизи шунингдек солиқлар ҳамда бошқа мажбурий тўловлар бўйича муддатида тўланмаган қарзларни ундириш бўйича;

суд ижрочилари томонидан ундириладиган ижро йиғимларининг 80 фоизи;

Ўзбекистон Республикаси Президентининг 2006 йил 31 августдаги ПҚ-458-сон қарори билан тасдиқланган Суд ҳужжатлари ва бошқа органлар ҳужжатларини ижро этиш жараёнида автомототранспорт воситалари ва кўчмас мулкни сотиш тартиби тўғрисидаги низомнинг 37-бандида назарда тутилган ҳолларда суд ижрочилари туман (шаҳар) бўлимларининг депозит ҳисобига ўтказиладиган очиқ аукционда иштирок этиш учун киритилган закалатларнинг 80 фоизи;

мол-мулкни сотиш ёки баҳолаш бўйича ўзининг шартномавий мажбуриятларини бажармаган (лозим даражада бажармаган) биржалар, баҳоловчилар, савдо ташкилотлари, бошқа шахслардан ундириладиган жарималар ва пенялар суммасининг 80 фоизи миқдоридаги ажратмалар.

қонун ҳужжатларида тақиқланмаган бошқа даромадлар.

3. Белгилаб қўйилсинки, умумий юрисдикция судлари биноларини қуриш ва таъмирлаш, уларни зарур анжомлар, компьютерлар ва бошқа замонавий ташкилий-техника воситалари билан таъминлаш Жамғарманинг биринчи навбатдаги вазифаси ҳисобланади.

Жамғарма маблағлари шунингдек:

хўжалик судларини ва адлия органларини, шу жумладан нотариатни, ФҲДЁни ва суд ижрочиларини моддий-техник таъминлашга;

судлар ва адлия органлари ходимларига малака класслари, даражалари ва муайян вақт давомида ишлаганлиги учун устама ва қўшимча ҳақ тўлашга, уларнинг малакасини оширишга, кадрларни ўқитишга;

судлар ва адлия органлари ходимларини ижтимоий муҳофаза қилишга;

судлар ва адлия органлари фаолиятини яхшилашга қаратилган бошқа тадбирларга йўналтирилади.

4. Судлар ва адлия органларини ривожлантириш жамғармаси тўғрисидаги Низом ва уни бошқариш тузилмаси 1 ва 2-иловаларга мувофиқ тасдиқлансин.

5. Белгилансинки, Жамғарма фаолиятини бошқариш ва унинг маблағларини тақсимлаш Ўзбекистон Республикаси Адлия вазири бошқарадиган Кузатувчи кенгаш томонидан амалга оширилади.

Кузатувчи кенгаш таркибига лавозимига кўра Олий суд ва Олий хўжалик суди раислари, Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти директори ва Жамғарманинг ижро этувчи директори киради.

6. Белгилаб қўйилсинки, Жамғарма маблағларини тўплаш ва сарфлашни тезкор бошқариш 4 кишидан иборат таркибдаги, Жамғарма маблағлари ҳисобидан маблағ билан таъминланадиган Жамғарма ижро этувчи дирекцияси томонидан амалга оширилади.

Жамғарма ижро этувчи дирекциясини Ижро этувчи директор бошқаради, у Жамғарма Кузатувчи кенгаши томонидан лавозимга тайинланади ва лавозимдан озод қилинади.

Жамғарма ижро этувчи директори Жамғарма маблағларидан белгиланган мақсадда фойдаланилиши учун шахсан жавоб беради.

Жамғарманинг Кузатувчи кенгаши бир ой муддатда Жамғарма ижро этувчи дирекциясини жойлаштирилишини ва бутланишини, шунингдек Жамғарма фаолиятининг бошқа ташкилий-техник масалалари ҳал этилишини таъминласин.

7. Ўзбекистон Республикаси Молия вазирлиги (М. Нурмуродов) Жамғарма маблағларидан мақсадли фойдаланилиши устидан қатъий назоратни амалга оширсин.

8. Ўзбекистон Республикаси Адлия вазири А. Полвон-зода йилнинг ҳар чорагида Ўзбекистон Республикаси Президенти девонига Жамғарма маблағларидан фойдаланилиши тўғрисида ҳисобот тақдим этсин.

9. Қуйидагилар:

Ўзбекистон Республикаси Вазирлар Маҳкамасининг «Адлия вазирлиги фаолиятини такомиллаштириш масалалари тўғрисида» 1992 йил 12 ноябрдаги 523-сон қарорига 3-илова (Ўзбекистон Республикаси ҚТ, 1992 й., 11-сон, 32-модда);

Ўзбекистон Республикаси Вазирлар Маҳкамасининг «Ўзбекистон Республикасининг Хўжалик судларини ривожлантириш жамғармаси тўғрисида» 1993 йил 4 мартдаги 124-сон қарори;

Ўзбекистон Республикаси Вазирлар Маҳкамасининг «Ўзбекистон Республикаси Президентининг «Хўжалик юритувчи субъектларнинг иқтисодий ночорлиги ва шартнома мажбуриятларининг бажарилиши учун мансабдор шахсларнинг жавобгарлигини кучайтириш тўғрисида» 1998 йил 4 мартдаги ПФ-1938-сон Фармонининг бажарилишини таъминлаш чора-тадбирлари ҳақида» 1998 йил 24 апрелдаги 177-сон қарорининг 8-банди (Ўзбекистон Республикаси ҚТ, 1998 й., 4-сон, 17-модда);

Ўзбекистон Республикаси Вазирлар Маҳкамасининг «Ўзбекистон Республикаси умумий юрисдикция судларининг моддий-техника таъминотини яхшилаш чора-тадбирлари тўғрисида» 2000 йил 15 августдаги 321-сон қарорининг 5-банди;

Ўзбекистон Республикаси Вазирлар Маҳкамасининг «Ижро ишини ривожлантириш жамғармасини ташкил этиш тўғрисида» 2002 йил 17 октябрдаги 358-сон қарори, 1-банд бундан мустасно;

Ўзбекистон Республикаси Вазирлар Маҳкамасининг «Ўзбекистон Республикаси адлия муассасалари ва судларини ривожлантириш жамғармаси тўғрисидаги Низомга ўзгартириш ва қўшимчалар киритиш ҳақида» 2003 йил 28 февралдаги 114-сон қарори (Ўзбекистон Республикаси ҚТ, 2003 й., 2-сон, 20-модда) ўз кучини йўқотган деб ҳисоблансин.

10. Ўзбекистон Республикаси Адлия вазирлиги қонун ҳужжатларига мазкур қарордан келиб чиқувчи ўзгартириш ва қўшимчалар тўғрисида Вазирлар Маҳкамасига бир ой муддатда таклифлар киритсин.

11. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов ва Ўзбекистон Республикаси Президентининг Давлат маслаҳатчиси А.А. Азизов зиммасига юклансин.

1. Судлар ва адлия органларини ривожлантириш жамғармаси (кейинги ўринларда Жамғарма деб юритилади) судлар, адлия органлари ва муассасалари (кейинги ўринларда адлия органлари деб юритилади) моддий-техника таъминотини яхшилаш, шунингдек улар фаолияти учун зарур шарт-шароитлар яратиш мақсадида ташкил этилган.

2. Жамғарма маблағлари:

умумий юрисдикция судлари томонидан кўриб чиқиладиган ишлар бўйича жарималар ва давлат божлари тўлашдан давлат бюджетига тушаётган суммаларнинг 16 фоизи миқдоридаги ажратмалар;

хўжалик судлари томонидан кўриб чиқиладиган ишлар бўйича давлат божлари ва жарима санкцияларини тўлашдан давлат бюджетига тушаётган суммаларнинг 12 фоизи миқдоридаги ажратмалар;

адлия органлари, шу жумладан ФҲДЁ органлари томонидан ундириладиган давлат божи суммаларидан 16 фоиз, нотариуслар томонидан ундириладиган давлат божи суммаларидан эса 12 фоиз миқдоридаги ажратмалар;

адлия органлари томонидан нодавлат нотижорат ташкилотларни, адвокатлик бюроларини, фирмаларни, ҳайъатларни, рўйхатдан ўтказганлик, нотариал ва адвокатлик фаолиятини лицензиялаганлик, юридик кадрларни малака аттестациясидан ўтказганлик учун ундириладиган маблағларнинг 80 фоизи, шунингдек адлия органлари томонидан ўз ваколатлари доирасида ундириладиган жарималар;

ижро иши бўйича бюджетга ундирилган суммадан 24 фоиз миқдоридаги ажратмалар солиқлар ҳамда бошқа мажбурий тўловлар бўйича муддатида тўланмаган қарзлар ундирилишидан ташқари;

ваколатли органлар томонидан олиб қўйилган ва давлат даромадига ўтказилган мол-мулкни сотишдан тушадиган маблағларнинг 8 фоизи шунингдек солиқлар ҳамда бошқа мажбурий тўловлар бўйича муддатида тўланмаган қарзларни ундириш бўйича;

суд ижрочилари томонидан ундириладиган ижро йиғимларининг 80 фоизи:

Ўзбекистон Республикаси Президентининг 2006 йил 31 августдаги ПҚ-458-сон қарори билан тасдиқланган Суд ҳужжатлари ва бошқа органлар ҳужжатларини ижро этиш жараёнида автомототранспорт воситалари ва кўчмас мулкни сотиш тартиби тўғрисидаги низомнинг 37-бандида назарда тутилган ҳолларда суд ижрочилари туман (шаҳар) бўлимларининг депозит ҳисобига ўтказиладиган очиқ аукционда иштирок этиш учун киритилган закалатларнинг 80 фоизи;

мол-мулкни сотиш ёки баҳолаш бўйича ўзининг шартномавий мажбуриятларини бажармаган (лозим даражада бажармаган) биржалар, баҳоловчилар, савдо ташкилотлари, бошқа шахслардан ундириладиган жарималар суммасининг 80 фоизи миқдоридаги ажратмалар ва пенялар.

қонун ҳужжатларида тақиқланмаган бошқа даромадлар ҳисобига шакллантирилади.

3. Умумий юрисдикция судлари биноларини қуриш ва таъмирлаш, уларни зарур анжомлар, компьютерлар ва бошқа замонавий ташкилий-техника воситалари билан таъминлаш Жамғарманинг биринчи навбатдаги вазифаси ҳисобланади.

4. Жамғарма маблағлари:

а) судлар ва адлия органлари бинолари ва хоналарини қуриш, таъмирлаш ва жиҳозлашга, уларни зарур анжомлар, компьютерлар ва бошқа замонавий ташкилий-техника воситалари билан таъминлашга;

б) судлар ва адлия органлари техника воситаларига хизмат кўрсатиш ва уларни таъмирлашга;

в) судьяларга (Ўзбекистон Республикаси Олий суди судьяларидан ташқари) малака класслари ҳамда муайян йил ишлаганлиги учун устамалар ва қўшимча ҳақ тўлашга;

г) адлия органлари ходимларига даража класслари ҳамда муайян йил ишлаганлиги учун устамалар ва қўшимча ҳақ тўлашга;

д) судлар ва адлия органлари ходимларини моддий рағбатлантиришга ва ижтимоий муҳофаза қилишга (уй-жой қуриш, санатория-курорт ва тиббий хизмат кўрсатиш, маошларга устамалар ва қўшимча ҳақ белгилаш, моддий ёрдам кўрсатиш);

е) кадрлар малакасини оширишга, уларни ўқитишга, тегишли адабиётлар ва матбаа нашрлари билан таъминлашга;

е-1) Ўзбекистон Республикаси Қонун ҳужжатлари маълумотлари миллий базасини юритиш, техник жиҳатдан сақлаб туриш ва модернизация қилиш тадбирларини молиялаштириш;

ж) судларнинг (судьялардан ташқари) ва адлия органларининг қўшимча ходимлари таъминотига;

з) судьяларни ва адлия органлари ходимларини формали кийим-бошлар билан таъминлаш харажатларини молиялаштиришга;

и) Жамғарма захирасини яратишга;

к) судлар ва адлия органлари фаолиятини яхшилашга қаратилган бошқа тадбирларга йўналтирилади.

Жамғарма маблағлари уларни Ўзбекистон Республикаси Олий суди орқали ажратган ҳолда Суд қонунчилигини демократлаштириш ва либераллаштириш ҳамда суд тизими мустақиллигини таъминлаш бўйича тадқиқот марказига ҳам йўналтирилади.

Истисно ҳолларда Жамғарма маблағлари Ўзбекистон Республикаси Вазирлар Маҳкамасининг қарорига кўра Ўзбекистон Республикаси Адвокатлар палатаси ва унинг ҳудудий бошқармалари фаолияти учун зарур шарт-шароитлар яратиш чора-тадбирларини молиялаштиришга йўналтирилиши мумкин.

Жамғармага келиб тушган ижро йиғимлари, суд ижрочилари томонидан ундирилган жарима суммалари, шунингдек биржалар, баҳоловчилар, савдо ташкилотлари ва ўзга шахслар томонидан мол-мулкни баҳолаш ёки сотишда зиммасига олинган шартнома мажбуриятларни бажармаганлик (лозим даражада бажармаганлик) учун жарима ва пенялар Суд департаментининг моддий-техника базасини мустаҳкамлаш, суд ижрочиларини моддий рағбатлантириш, шунингдек суд ижрочилари фаолиятини ва мажбурий ижро этиш тизимини такомиллаштириш бўйича бошқа чора-тадбирларни амалга ошириш учун ишлатилади.

5. Жамғарманинг жорий йилда фойдаланилмаган маблағлари бюджетга олиб қўйилмайди ва улардан кейинги йилда фойдаланилади.

6. Судлар ва адлия органлари ходимларини қўшимча кўпайтириш Ўзбекистон Республикаси Молия вазирлиги билан келишилган ҳолда амалга оширилади.

7. Жамғарма маблағларидан фойдаланиш судларни ва адлия органларини ривожлантириш дастурларини маблағ билан таъминлаш орқали амалга оширилади, ушбу дастурлар ҳар йили маблағлар ва буюртманомалар тушиши прогнози асосида шакллантирилади.

Дастурда судлар ва адлия органлари бинолари ва хоналарини қуриш, реконструкция қилиш, таъмирлаш, жиҳозлаш муддатлари ва ҳажмлари; уларни жиҳозлар, транспорт воситалари, компьютерлар ва бошқа замонавий ташкилий-техника воситалари билан таъминлаш, шунингдек судлар ва адлия органларини ривожлантириш бўйича бошқа тадбирлар назарда тутилади.

Судлар ва адлия органларини ривожлантириш дастури, уларни маблағ билан таъминлаш ҳажмлари ҳамда Жамғарманинг захирага қўйиладиган ҳар йилги қисми миқдори Жамғарманинг Кузатувчи кенгаши томонидан тасдиқланади.

8. Жамғарма фаолиятини бошқариш Жамғарманинг Кузатувчи кенгаши томонидан амалга оширилади, унга Ўзбекистон Республикаси Адлия вазири раҳбарлик қилади, у Жамғарма Кузатувчи кенгашининг раиси ҳисобланади. Кузатувчи кенгаш таркибига лавозимига кўра Олий суд ва Олий хўжалик суди раислари, Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти директори ҳамда Жамғарманинг ижро этувчи директори киради.

Жамғарманинг Кузатувчи кенгаши ҳар чоракда камида бир марта мажлис ўтказади. Зарур ҳолларда Жамғарма Кузатувчи кенгашининг навбатдан ташқари мажлислари чақирилиши мумкин.

Жамғарманинг Кузатувчи кенгаши мажлиси унда Жамғарманинг Кузатувчи кенгаши аъзоларининг камида учдан икки қисми иштирок этган тақдирда ваколатли ҳисобланади.

Жамғарма маблағларидан фойдаланиш бўйича қарор Жамғарманинг Кузатувчи кенгаши аъзоларининг оддий кўпчилик овози билан қабул қилинади ва Жамғарма Кузатувчи кенгаши раиси томонидан имзоланади.

9. Жамғарма маблағлари тўпланиши ва сарфланишини тезкор бошқариш Жамғарманинг Ижро этувчи дирекцияси томонидан амалга оширилади.

Жамғарманинг Ижро этувчи дирекциясига Ижро этувчи директор раҳбарлик қилади, у Жамғарманинг Кузатувчи кенгаши томонидан лавозимга тайинланади ва лавозимдан озод қилинади.

Жамғарманинг Ижро этувчи директори Жамғарма маблағларидан мақсадли фойдаланилиши учун шахсан жавоб беради.

10. Жамғарманинг Ижро этувчи дирекцияси қуйидагиларга мажбур:

буюртманомаларни йиғиш ва Кузатувчи кенгаш томонидан кўриб чиқиш учун материалларни тайёрлаш;

Кузатувчи кенгаш қарорларини судлар ва адлия органларига етказиш;

Кузатувчи кенгаш қарорларини ўз вақтида ижро этиш;

Жамғарманинг ажратилган маблағларидан фойдаланилишини назорат қилиш ва унинг мониторингини амалга ошириш;

Кузатувчи кенгашга ва Ўзбекистон Республикаси Молия вазирлигига Жамғарма маблағларидан фойдаланилиши бўйича ҳисобот тақдим этиш.

Жамғарманинг ижро этувчи дирекцияси қуйидаги ҳуқуқларга эга:

зарур ҳолларда маблағлар ажратишга тушган буюртманомалар бўйича қўшимча маълумотлар олиш;

ундирилган ва Жамғармага ўтказиладиган пул маблағларининг амалда тушган суммаси бўйича тегишли ташкилотлардан ахборотлар ва статистика маълумотларини сўраб олиш;

Жамғарманинг ажратилган маблағларидан мақсадли фойдаланилишини текшириш;

Маблағлардан белгиланган мақсадда фойдаланилмаган тақдирда молиялаштиришни тўхтатиб туриш, кейинчалик ушбу масалани Кузатувчи кенгашга кўриб чиқиш учун киритиш.

11. Ижро этувчи дирекция ўз Низомига мувофиқ бошқа ҳуқуқ ва мажбуриятларга эга бўлиши мумкин.

Жамғарманинг Ижро этувчи дирекцияси тўғрисидаги Низом Жамғарманинг Кузатувчи кенгаши томонидан тасдиқланади.

12. Жамғармадан маблағлар ажратиш юзасидан буюртманомалар Адлия вазирлиги, Олий суд, Олий хўжалик суди ҳамда Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти (кейинги ўринларда Департамент деб юритилади) томонидан Жамғарманинг Ижро этувчи дирекциясига тушади.

Жамғарманинг Ижро этувчи дирекцияси тушган буюртманомаларни умумлаштиради ва уларни кўриб чиқиш учун Жамғарманинг Кузатувчи кенгашига киритади.

Ижро этувчи дирекция Жамғарманинг Кузатувчи кенгаши қарорлари бўйича маблағларни юқорида кўрсатиб ўтилган идораларга қабул қилинган қарорга мувофиқ фойдаланиш учун ўтказади.

Ўзбекистон Республикаси Адлия вазирлиги, Олий суди, Олий хўжалик суди ва Департамент Жамғарманинг Кузатувчи кенгашига Жамғарманинг ажратилган маблағларидан фойдаланилиши тўғрисида белгиланган тартибда ҳисобот тақдим этади.

13. Жамғарма маблағларидан фойдаланиш тўғрисидаги ҳисобот ҳар чоракда Жамғарманинг Кузатувчи кенгаши томонидан кўриб чиқилади ва Ўзбекистон Республикаси Адлия вазири томонидан Ўзбекистон Республикаси Президенти девонига тақдим этилади.

14. Ўзбекистон Республикаси Молия вазирлиги Жамғарма маблағларидан мақсадли фойдаланилишини назорат қилади.

15. Жамғарма маблағларини тўплаш ва улардан фойдаланиш тартиби Жамғарманинг Кузатувчи кенгаши томонидан тасдиқланади.