Ерларни ҳайдаш ишларининг ўз вақтида ва сифатли бажарилишини таъминлаш ҳамда қишлоқ хўжалиги ерларини экиш ишларига тайёрлаш, фермер хўжаликларининг машина-трактор парклари, шу жумладан муқобил машина-трактор паркларининг ер ҳайдаш тракторларига бўлган эҳтиёжини янада тўлиқ қондириш, шунингдек Халқаро тараққиёт уюшмасининг «Қишлоқ хўжалиги корхоналарини қўллаб-қувватлаш. II фаза» лойиҳаси доирасидаги кредитидан самарали фойдаланиш мақсадида Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлигининг «Қишлоқ хўжалиги корхоналарини қўллаб-қувватлаш. II фаза» лойиҳасини амалга ошириш учун Халқаро тараққиёт уюшмаси кредити (кейинги ўринларда ХТУ кредити деб аталади) ҳисобига «ЎзКейсТрактор» қўшма корхонасида ишлаб чиқарилган 150 та «New Нolland TS-6070» русумли ер ҳайдаш тракторлари сотиб олиш тўғрисидаги таклифига розилик берилсин.

2. Белгилаб қўйилсинки, ер ҳайдаш тракторларини сотиб олиш «Қишлоқ хўжалиги корхоналарини қўллаб-қувватлаш. II фаза» лойиҳасини бажаришда қатнашувчи тижорат банклари орқали миллий валютада, «Агробанк» ва «Микрокредитбанк» очиқ акциядорлик тижорат банкларига кредит линиялари доирасида ХТУ кредити ҳисобидан ажратилган тегишли равишда 3,0 млн АҚШ доллари ва 2,5 млн АҚШ доллари миқдорида хорижий валютадаги лимитларни қайта тақсимлаш ҳисобига улар учун миллий валютадаги кредит маблағлари лимитларини кўпайтирган ҳолда амалга оширилади.

3. Ўзбекистон Республикаси Молия вазирлиги белгиланган тартибда:

тегишли равишда 3,0 млн АҚШ доллари ва 2,5 млн АҚШ долларига тенг эквивалентдаги миллий валютадаги маблағларнинг давлат ташқи қарзига хизмат кўрсатиш учун республика бюджетида назарда тутилган маблағлар ҳисобидан Ўзбекистон Республикаси Марказий банкининг маблағ кўчирилаётган санада амалдаги курси бўйича «Агробанк» ва «Микрокредитбанк» очиқ акциядорлик тижорат банкларининг ҳисоб рақамларига ўтказилишини;

«Агробанк» ва «Микрокредитбанк» очиқ акциядорлик тижорат банкларидан сотиб олинган хорижий валютадаги жами 5,5 млн АҚШ доллари миқдоридаги маблағларнинг, зарурат бўлганда, улардан Ўзбекистон Республикасининг ХТУ кредити бўйича ташқи мажбуриятларига хизмат кўрсатишда етишмаётган қисми учун фойдаланиш ҳуқуқи билан депозитга жойлаштирилишини таъминласин.

4. Ўзбекистон Республикаси Молия вазирига «Агробанк» ва «Микрокредитбанк» очиқ акциядорлик тижорат банклари билан тузилган қайта кредитлаш тўғрисидаги битимга ўзгартиришларни Ўзбекистон Республикаси номидан имзолаш ваколати берилсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.