Ўзбекистон Республикаси Вазирлар Маҳкамасининг 2009 йил 22 августдаги 245-сонли қарори билан тасдиқланган «Электр энергиясидан фойдаланиш қоидалари»нинг 66-банди ва Ўзбекистон Республикаси Вазирлар Маҳкамасида 2010 йил 31 май куни ўтказилган 41-сонли йиғилиш баёни ижросини таъминлаш ҳамда истеъмолчиларни электр энергиядан фойдаланишини тартибга солиш, электр тармоқларига рухсатсиз уланиш ва энергиядан ноқонуний фойдаланиш ҳолатларига йўл қўймаслик ва ҳисоб-китоб қилиш механизми самарадорлигини ошириш, такомиллаштириш, тўлов интизомини мустаҳкамлаш мақсадида қарор қиламан:

1. Вилоятнинг туман ва шаҳарларидаги барча тоифадаги истеъмолчиларнинг ҳисоб-китоб ҳисоблагичлари баланс бўйича мансублик нуқтасига, кўп қаватли уйларда яшовчи аҳоли истеъмолчиларининг ҳисоблагичлари кириш йўлакларига, маҳаллаларда яшовчи аҳоли истеъмолчиларининг ҳисоблагичлари хонадонларнинг ташқарисига чиқарилиб, электр ҳисоблагичлар махсус темир қутилар (электр шкафлар)га ўрнатилсин.

2. Шаҳар ва туман ҳокимликлари хусусий уй-жой мулкдорлар ширкатлари, маҳалла фуқаролари йиғинлари ва ички ишлар бўлими участка нозирлари билан ҳамкорликда хонадонлар ичида жойлашган электр ҳисоблагичларни йўлаклар ва хонадон ташқарисига чиқариб, махсус электр шкафларга ўрнатишда туман ва шаҳар электр таъминоти корхоналарига амалий ёрдам кўрсатсин.

3. «Навоий ҳудудий электр тармоқлари корхонаси» ОАЖ (С.Ҳожиев)га туман ва шаҳар ҳокимлари билан биргаликда:

ўн беш кун муддатда ҳисоблагичларни баланс бўйича мансублик нуқтасига, кириш йўлакларига ва хонадонларнинг ташқарисига чиқариш бўйича истеъмолчилар сони ва манзилий рўйхатларини тузиш, маҳаллалар, истеъмолчилар кесимида ойма-ой режа-жадвални тайёрлаш ва тасдиқлаш;

ўн беш кун муддатда барча тоифадаги истеъмолчиларни ушбу масала бўйича ёзма равишда огоҳлантириш;

истеъмолчиларнинг ҳисоблагичларини баланс бўйича мансублик нуқтасига чиқариш юзасидан комплекс чора-тадбирлар ишлаб чиқиш ва амалга ошириладиган ишларни молиялаштириш манбаларини аниқ кўрсатиш вазифалари юклатилсин.

4. Туман ва шаҳар ҳокимларига:

ҳар бир туман ва шаҳарларда ҳисоблагичларни баланс бўйича мансублик нуқтасига чиқариш билан боғлиқ бўлган электр жиҳозлари (электрон ҳисоблагич, махсус шкаф, электр ўтказгич, ажратгич ва ҳ.к.)ни барча тўлов турлари (жумладан пластик карточка) орқали савдо қилувчи хўжалик моллари дўконларида ихтисослаштирилган бўлимлар ташкил этиш тавсия қилинсин ва дўконнинг фаолияти, манзили тўғрисида истеъмолчиларга оммавий ахборот воситалари орқали маълум қилиб бориш топширилсин.

5. Вилоят телерадиокомпанияси, «Дўстлик байроғи» ва «Знамя дружбы» газеталари, туман ва шаҳарлар телевидения ва газеталари таҳририяти мазкур тадбирни амалга оширишдан кўзланган маънавий ва иқтисодий самарадорлик, «Электр энергиясидан фойдаланиш қоидалари»га риоя этилишини таъминлаш ҳамда тўлов интизомини мустаҳкамлаш борасида олиб борилаётган ишларни оммавий ахборот воситаларида кенг ёритиб борсинлар.

6. «Навоий ҳудудий электр тармоқлари корхонаси» ОАЖ, туман ва шаҳар ҳокимликлари:

барча тоифадаги истеъмолчиларнинг электр ҳисоблагичларини баланс бўйича мансублик нуқтасига чиқариш юзасидан амалга оширилаётган ишлар бўйича доимий таҳлил олиб борсин ва ойлик режа-жадвалнинг сўзсиз бажарилишини назоратга олсин ҳамда ушбу қарорнинг ижроси юзасидан ҳар ойда белгиланган тартибда вилоят ҳокимлигига ахборот бериб борсин.

7. Мазкур қарорнинг бажарилишини назорат қилиш вилоят ҳокимининг биринчи ўринбосари А.Эшонқулов зиммасига юклатилсин.