Миллий валютани мустаҳкамлаш ва унинг ички эркин алмаштирилишини таъминлаш, республикага чет эл инвестицияларини жалб қилиш ва истеъмол бозорини тўлдириш учун зарур шарт-шароитлар яратиш мақсадида:

1. Ўзбекистон республика валюта биржасида операцияларни янада эркинлаштиришни амалга ошириш, юридик ва жисмоний шахсларнинг миллий валюта — сўмни эркин муомаладаги валютага эркин алмаштиришга бўлган талабини қондириш юзасидан қўшимча чора-тадбирлар кўриш зарур деб ҳисоблансин.

Марказий банк ва ваколатли банклар нақд сўмларни эркин муомаладаги валютага алмаштириш ҳажмларини кўпайтириш учун қўшимча ресурсларни қидириб топсинлар, ушбу мақсадларга 1995 йилнинг иккинчи ярим йилида камида 120 миллион АҚШ долларини йўналтирсинлар.

2. Белгилаб қўйилсинки, ички валюта бозорида

— халқ истеъмол товарлари ишлаб чиқариш ва улар билан республика ички бозорини тўлдириш билан банд бўлган;

— экспортга, биринчи навбатда экспорт прогнозига киритилган маҳсулот ва товарларни ишлаб чиқариш билан банд бўлган;

— Ўзбекистонда ишлаб чиқариш фаолиятидан белгиланган тартибда олинган фойда ва дивидендларнинг бир қисмини репатриация қилишни амалга оширувчи;

— республика иқтисодиётининг базавий ва етакчи тармоқларидаги устувор лойиҳаларни амалга оширишда қатнашувчи хорижий сармоя иштирокидаги қўшма корхоналар, жисмоний ва юридик шахслар эркин муомаладаги валютага айлантириш ҳуқуқига кўпроқ эга бўладилар.

3. Белгилаб қўйилсинки, 1995 йилнинг 1 июлидан бошлаб кўрсатиб ўтилган корхоналар ва ташкилотларга, уларнинг мулкчилик шаклларидан қатъи назар, нақд пулсиз сўмларни эркин муомаладаги валютага айлантириш Ўзбекистон республика валюта биржасида ваколатли банкларнинг талабномалари асосида қуйидаги мажбурий шартларга риоя қилган ҳолда амалга оширилади:

— хорижий шериклар билан тузилган контрактлар, шунингдек ваколатли банкнинг эксперт хулосаси мавжуд бўлиши;

— хорижий валютани маблағларни сўмларда олдиндан эҳтиёт қилиб қўйган ҳолда корхоналарнинг фақат ўз маблағлари ҳисобига сотиб олиш;

— корхоналарнинг бюджетга ва бюджетдан ташқари фондларга тўловлар бўйича қарзларининг, маҳсулот етказиб берувчилардан ва банк ссудалари бўйича муддати ўтиб кетган қарзларининг йўқлиги.

— рўйхатга олинган пайтдан бошлаб камида 6 ой мобайнида фаолиятни амалга ошириш.

4. Эркин муомаладаги валютага алмаштириш бўйича валюта операцияларини ўтказишни ва ушбу мақсадлар учун ажратилган маблағлардан белгиланган мақсадда ички валюта бозорида фойдаланишни, шунингдек биржа савдоларида жисмоний ва юридик шахсларнинг қатнашиши учун бир марта рухсат бериш юзасидан қарорлар қабул қилишни назорат этиш пул-кредит сиёсати бўйича республика комиссиясига юклансин. Комиссия таркиби иловага* мувофиқ қайта тасдиқлансин.

5. Комиссия Ўзбекистон республика валюта биржасида операциялар ўтказишнинг юқорида кўрсатиб ўтилган талабларга жавоб берадиган тартибини ўн кун муддатда тасдиқласин.

6. Белгилаб қўйилсинки, 1995 йилнинг 1 июлидан бошлаб, мулкчилик шаклларидан қатъи назар, корхона ва ташкилотларга кредит бериш фақат Ўзбекистон Республикасининг миллий валютасида амалга оширилади.

Эркин алмаштириладиган валютада кредитлар ажратиш назарда тутилган корхона ва ташкилотларга кўрсатиб ўтилган кредитлар ваколатли банклар томонидан Ўзбекистон Республикасининг миллий валютасида, кейинчалик уни Ўзбекистон республика валюта биржасида эркин муомаладаги валютага алмаштирган ҳолда, ажратилади.

Ўзбекистон Республикаси Молия вазирлиги кўрсатиб ўтилган корхоналарга кредит бериш учун ваколатли банкларга миллий валютада кредит линиялари очсин.

7. Чет эл банклари, экспорт-импорт агентликлари ва халқаро молия ташкилотлари томонидан ажратиладиган эркин муомаладаги валюта ҳолидаги қарз маблағларни кредитга бериш ва қайта маблағ билан таъминлашнинг амалдаги тартиби сақлаб қолинсин.

Шунингдек, корхона ва ташкилотларга эркин муомаладаги валютада илгари берилган кредитларни тўлашнинг амалдаги тартиби ҳам сақлаб қолинсин.

8. Белгилаб қўйилсинки:

— мижозларнинг талабномалари бўйича ваколатли банклар томонидан сотиб олинган ва 7 иш куни мобайнида фойдаланилмаган хорижий валюта сўзсиз қайта сотилиши керак;

— импорт контрактлари бўйича аванс тўловлари контрактда назарда тутилган қийматнинг 15 фоизидан ошмайдиган, аммо 100000 АҚШ долларидан кўп бўлмаган сумма доирасида, фақат импорт қилувчи корхонага хизмат кўрсатадиган Ўзбекистон Республикаси ваколатли банкининг алоқадор банкнинг муқобил банк кафолати мавжуд бўлган тақдирдагина йўл қўйилади. Мазкур суммадан ошадиган аванс тўловларини ўтказиш фақат Ўзбекистон Республикаси Ташқи иқтисодий алоқалар агентлигининг хулосаси бўйича Ўзбекистон Республикаси Вазирлар Маҳкамасининг рухсати билан амалга оширилади.

9. Ўзбекистон Республикаси Прокуратураси, Давлат солиқ қўмитаси корхоналарнинг экспорт-импорт операцияларни амалга оширишнинг белгиланган тартибига сўзсиз риоя қилишлари устидан мунтазам назоратни таъминласинлар.

10. Ўзбекистон Республикаси Молия вазирлиги, Марказий банк бир ҳафта муддатда:

— норматив ҳужжатларга тегишли ўзгартиришлар киритсинлар;

— шу йилнинг III чорагида давлат қисқа муддатли облигацияларини чиқариш ва сотиш бўйича Вазирлар Маҳкамасига таклифлар киритсинлар;

— Ташқи иқтисодий алоқалар вазирлиги ва Давлат солиқ қўмитаси билан биргаликда республикада ўз тайёр маҳсулотини ишлаб чиқаришни рағбатлантириш мақсадида экспорт ва импорт божларини қайта кўриб чиқиш бўйича Вазирлар Маҳкамасига таклифлар киритсинлар.

11. Ўзбекистон Республикаси Молия вазирлиги ва Марказий банки миллий валюта — сўмни мустаҳкамлашга йўналтириладиган маблағлар ҳажмини янада кўпайтириш мақсадида 1996 йил 1 январгача республиканинг олтин-валюта ресурсларини Марказий банкка бериш тўғрисида таклифлар киритсинлар.

12. Вазирлар Маҳкамасининг 1994 йил 3 майдаги 234-сон қарорига илова ўз кучини йўқотган деб ҳисоблансин.

13. Мазкур Фармоннинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов ва Ўзбекистон Республикаси Марказий банки Бошқаруви раиси Ф.М. Муллажонов зиммасига юклансин.