LexUZ шарҳи
Мазкур қарор Ўзбекистан Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Бирлашган Миллатлар Ташкилоти 2000 йилни Халқаро тинчлик маданияти йили деб эълон қилганлигини ҳамда ЮНЕСКО Ижроия кенгаши ўзининг 1998 йил 6 ноябрда Тошкент шаҳрида бўлиб ўтган 155-сессияси якунловчи мажлисида «Тинчлик маданияти ва ЮНЕСКОнинг аъзо давлатлардаги фаолияти» Декларациясини қабул қилганлигини эътиборга олиб, шунингдек Халқаро тинчлик маданияти йилини Тошкент Декларацияси руҳида нишонлаш юзасидан ўтказиладиган тадбирларни ишлаб чиқиш ва амалга оширишни таъминлаш мақсадида Вазирлар Маҳкамаси қарор қилади:
1. ЮНЕСКО ишлари бўйича Ўзбекистон Республикаси миллий комиссияси тегишли вазирликлар ва идоралар билан биргаликда:
а) бир ой муддатда Халқаро тинчлик маданияти йилига бағишланган 1999 йилги тадбирлар режасини ишлаб чиқсин ва тасдиқласин, унда жаҳондаги динларнинг энг нуфузли вакиллари иштирокида «Динлар мулоқоти» конференциясини ўтказишни назарда тутсин;
б) қуйидагиларга йўналтирилган тадбирларни ўз ичига олувчи 2000 йилги «Тинчлик маданияти» миллий дастурини ишлаб чиқсин ва тасдиқлаш учун Вазирлар Маҳкамасига киритсин:
таълимни, кадрлар тайёрлашни ҳамда тинчлик ва зўравонлик қилмаслик руҳидаги илмий тадқиқотларни ривожлантириш;
коммуникацияларни ҳамда билимлар ва ахборотларнинг эркин оммалаштирилишини ва улардан биргаликда фойдаланишни қўллаб-қувватлаш;
барча халқлар ва маданиятлар ўртасидаги ўзаро бир-бирини тушунишга, сабр-бардошлиликка ва бирдамликка кўмаклашиш.