Ўзбекистон Республикаси Президентининг «Хорижий инвестициялар ва кредитларни жалб этиш ҳамда ўзлаштириш жараёнини такомиллаштириш чора-тадбирлари тўғрисида» 2008 йил 24 июлдаги ПҚ-927-сон қарорига мувофиқ Ўзбекистон Республикаси Вазирлар Маҳкамаси қарор қилади:

Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.

2. Вазирлар Маҳкамасининг 2003 йил 22 январдаги 37-сон қарори (Ўзбекистон Республикаси ҚТ, 2003 й., 1-сон, 10-модда) билан тасдиқланган Ўзбекистон Республикаси Иқтисодиёт вазирлиги тўғрисидаги Низомда:

а) 9-бандга қуйидаги мазмундаги хатбоши қўшилсин:

«хорижий инвестициялар ва кредитларни жалб этиш ва ўзлаштириш жараёнида идоравий бўйсунишидан қатъи назар, барча хўжалик юритувчи субъектлар фаолиятини мувофиқлаштириш»;

б) 10-бандда:

учинчи хатбоши қуйидаги таҳрирда баён қилинсин:

«мамлакат иқтисодиётини ривожлантиришнинг мувозанатлилигини, мамлакатда мавжуд бўлган табиий, минерал-хом ашё, ишлаб чиқариш, илмий-техник ва меҳнат салоҳиятидан, шунингдек тегишли инфратузилмадан самарали фойдаланишни таъминлашни ҳисобга олган ҳолда мамлакатни ижтимоий-иқтисодий ривожлантиришнинг минтақалар, иқтисодиёт тармоқлари ва секторлари бўйича қисқа муддатли ва ўрта муддатли прогнозлари ва дастурларини ишлаб чиқишни ташкил этади ва мувофиқлаштиради»;

йигирма иккинчи хатбоши қуйидаги таҳрирда баён қилинсин:

«узоқ муддатли прогнозлар, ривожлантириш устуворликлари, таркибий ўзгартиришлар, шунингдек ишлаб чиқариш ва ижтимоий инфратузилмани ривожлантириш йўналишлари асосида халқаро молия тузилмалари, хорижий молия ва суғурта ташкилотлари ҳамда донор мамлакатлар билан биргаликда амалга ошириш таклиф қилинаётган устувор инвестиция лойиҳаларини пухта ишлаб чиқади ва уларнинг портфелини шакллантиради»;

қуйидаги мазмундаги хатбоши қўшилсин:

«вазирликка юкланган бошқа функцияларни белгиланган тартибда амалга оширади».