Ишлаб чиқарилаётган пировард маҳсулотнинг, энг аввало пахта мойининг сифатини доимий равишда яхшилашдан ёғ-мой саноати корхоналарининг манфаатдорлигини рағбатлантиришни кучайтириш, шунингдек республика пахта тозалаш ва ёғ-мой корхоналари ўртасидаги ўзаро муносабатлар механизмини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2008 йил 21 майдаги Ф-2996-сон фармойишига мувофиқ ташкил этилган ишлаб чиқарилаётган пахта мойи сифатини оширишни рағбатлантириш юзасидан таклифлар тайёрлаш бўйича махсус Идоралараро комиссия томонидан ишлаб чиқилган:

ишлаб чиқарилаётган пахта мойи сифатини оширишни рағбатлантиришга доир ташкилий чора-тадбирлар 1-иловага* мувофиқ;

озиқ-овқат учун ишлатиладиган пахта мойи сифатини назорат қилиш тизими 2-иловага* мувофиқ маъқуллансин.

2. Ўзбекистон Республикаси Иқтисодиёт вазирлиги, Молия вазирлиги ҳамда Ёғ-мой ва озиқ-овқат саноати уюшмасининг 2008—2011 йиллар даврида ёғ-мой саноати корхоналари томонидан ўсимлик мойини қадоқлаш ва ҳидсизлантириш бўйича қувватларни 3-4 иловаларга* мувофиқ кучайтириш тўғрисидаги таклифига розилик берилсин.

3. Белгилансинки, 2008 йил пахта хом ашёси ҳосилидан бошлаб техник чигитга улгуржи-сотиш нархлари уларнинг навлари ва класси ҳисобга олинган ҳолда табақалаштирилиб «Ўзпахтасаноат» уюшмаси билан келишган ҳолда Ўзбекистон Республикаси Молия вазирлиги томонидан белгиланади.

4. Қуйидаги тартиб белгилансин, унга мувофиқ 2009 йил пахта хом ашёси ҳосилидан бошлаб пахта мойи чиқиши нормативлари ҳар йили селекция навлари бўйича пахта хом ашёси тайёрлашнинг ҳақиқий ҳажмлари ва чигитнинг Ўзбекистон «Сифат» маркази томонидан аниқланадиган мойдорлиги ҳисобга олинган ҳолда республика минтақалари бўйича Ўзбекистон Республикаси Иқтисодиёт вазирлиги, Молия вазирлиги томонидан Ёғ-мой ва озиқ-овқат саноати уюшмаси билан биргаликда белгиланади.

5. Ёғ-мой ва озиқ-овқат саноати уюшмаси Ўзбекистон Республикаси Соғлиқни сақлаш вазирлиги, «Ўзстандарт» агентлиги, «Ўзпахтасаноат» уюшмаси ва Ўзбекистон «Сифат» маркази билан биргаликда:

ишлаб чиқарилаётган пахта мойи сифатини оширишни рағбатлантириш бўйича ташкилий чора-тадбирлар 1-иловада белгиланган муддатларда сўзсиз бажарилишини;

2-иловага мувофиқ тасдиқланган тизим асосида республика ёғ-мой корхоналарида ишлаб чиқарилаётган пахта мойи сифати комплекс назорат қилинишини;

мой ишлаб чиқариш жараёнида ёғ-мой корхоналари томонидан технологик режимлар нормаларига риоя қилинишининг тизимли мониторинги олиб борилишини;

2009 йил 1 сентябргача бўлган муддатда техник чигитнинг мойдорлигини аниқлашнинг экспрес-анализаторларини мамлакатимизда ишлаб чиқаришни ўзлаштириш бўйича ташкилий-техник чора-тадбирлар амалга оширилишини ҳамда «Сифат» маркази лабораториялари ва ёғ-мой корхоналари улар билан жиҳозланишини таъминласин.

6. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.