LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Тошкент ҳайвонот боғи коллекцияларини ҳайвонлар ва қушларнинг ноёб ва экзотик, шу жумладан «Қизил китоб»га киритилган турлари билан тўлдириш мақсадида Вазирлар Маҳкамаси қарор қилади:
1. Тошкент ҳайвонот боғига, ўзининг иқтисодий манфаатларини ҳисобга олган ҳолда, ҳайвонлар ва қушларни хорижий мамлакатларнинг ҳайвонот боғлари ва муассасалари билан алмаштиришга, шунингдек уларни юридик ва жисмоний шахслардан бепул қабул қилиб олишга рухсат этилсин.
2. Тошкент ҳайвонот боғи томонидан Ўзбекистон Республикасига келтириладиган ҳайвонлар ва қушлар, витаминлар, озуқалар, ветеринария препаратлари ва биологик препаратлар Ўзбекистон Республикаси Вазирлар Маҳкамаси тасдиқлайдиган рўйхат бўйича 2012 йил 31 декабргача божхона тўловларидан (божхонада расмийлаштириш йиғимларидан ташқари) озод қилинсин.
Белгилаб қўйилсинки, имтиёзлар берилиши муносабати билан бўшаб қоладиган маблағлар Тошкент ҳайвонот боғининг ҳайвонлар ва қушлар коллекцияларини тўлдириш ва кенгайтириш учун мақсадли равишда йўналтирилади.
3. Ўзбекистон Республикаси Давлат табиатни муҳофаза қилиш қўмитаси, Тошкент шаҳар ҳокимлиги Тошкент ҳайвонот боғи билан биргаликда ҳайвонот боғи коллекциясини Ўзбекистон Республикаси ҳудудида яшайдиган ҳайвонлар ва қушлар билан кенгайтириш ва бойитиш тадбирларининг аниқ режасини ишлаб чиқсинлар.
4. Вазирлар Маҳкамасининг «Тошкент ҳайвонот боғи коллекцияларини тўлдириш ва бойитиш чора-тадбирлари тўғрисида» 2000 йил 10 январдаги 7-сон қарори ўз кучини йўқотган деб ҳисоблансин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.