Ўзбекистон Республикасининг «Давлат статистикаси тўғрисида» ва «Давлат божхона хизмати тўғрисида»ги қонунларига ва Ўзбекистон Республикаси Вазирлар Маҳкамасининг 1998 йил 31 мартдаги 137-сонли «Ўзбекистон Республикасида ташқи савдо фаолиятини эркинлаштириш бўйича қўшимча чора-тадбирлар тўғрисида»ги қарорига асосан Давлат статистика қўмитаси, Давлат божхона қўмитаси, Иқтисодиёт вазирлиги ва Ташқи иқтисодий алоқалар, инвестициялар ва савдо вазирлиги қарор қилади:

1. Давлат ва божхона ташқи савдо статистикаси маълумотларини йиғиш ва қайта ишлаш услубияти тўғрисидаги низом иловага мувофиқ тасдиқлансин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

1. Ушбу Низом тўлов балансининг услубиятига мувофиқ, ташқи савдода маҳсулотлар ва хизматлар ҳисобининг тўлиқ акс эттирилишини таъминлаш мақсадида, давлат ва божхона ташқи савдо статистикаси маълумотларини йиғиш ва қайта ишлашнинг услубиятини ҳамда Ўзбекистон Республикаси Давлат статистика қўмитаси ва Давлат божхона қўмитаси ўртасидаги маълумотлар алмашинуви тартибини аниқлаб беради.

2. Маҳсулотлар ташқи савдоси бўйича статистик маълумотларни йиғиш ва қайта ишлаш ҳамда улар бўйича маълумотлар базасини шакллантириш Давлат божхона қўмитаси томонидан божхона декларациялари маълумотлари асосида амалга оширилади.

3. Божхона декларациясида ва божхона статистикаси томонидан ҳисобга олинмайдиган, эгалик ҳуқуқи резидентдан норезидентга ўтган ёки аксинча бўлган маҳсулотлар экспорт-импорти ҳажми тўғрисидаги маълумотларни йиғиш ва қайта ишлаш Давлат статистика қўмитаси томонидан махсус статистик кузатувлар тармоғи орқали амалга оширилади.

4. Хизматлар экспорт-импортини ҳисобга олиш Давлат статистика қўмитаси томонидан давлат статистика ҳисоботи ва махсус кузатувлар асосида амалга оширилади.

Ўзбекистон Республикаси ҳудудида хорижий фуқаролар томонидан ёдгорликлар, совғалар ва шахсий эҳтиёжлар учун сотиб олинган бошқа ашёларга қилинган харажатлар «Ўзбектуризм» МК томонидан ўтказиладиган махсус кузатувлар маълумотлари асосида хизматлар экспортида акс этади.

Ўзбекистон Республикаси ҳудудида норезидентларнинг ўзларининг доимий муассасалари орқали амалга оширадиган, тугалланиши учун бир йилдан ошиқ вақт талаб қиладиган қурилиш, фойдали қазилмаларни излаш ва қидирув соҳаларидаги хизматлар ҳажми хизматлар импортида акс этмайди ва улар ички ишлаб чиқариш сифатида қаралади.

5. Давлат божхона қўмитаси ҳисобот давридан кейинги ҳар ойнинг 7-санасигача тезкор, 15-санасида эса Ўзбекистон Республикаси ташқи савдо божхона статистикасининг меъёрий ҳужжатларини ҳисобга олган ҳолда, товарлар ташқи савдоси маълумотлари базаси бўйича аниқлаштирилган маълумотларни (Ташқи иқтисодий фаолият маҳсулотлар номенклатурасининг 9 та белгиси бўйича) жисмоний шахслар тўғрисидаги маълумотларни ажратган ҳолда Давлат статистика қўмитасига тақдим этади. Тақдим этилаётган маълумотлар ўсиб бориш тартибида шакллантирилади.

6. Давлат божхона қўмитаси зарур ҳолларда Давлат статистика қўмитасига республика тўлов балансининг шаклланиши учун керак бўлган божхона декларацияларининг алоҳида ҳолатлари бўйича маълумотларни тақдим этади.

7. Давлат статистика қўмитаси ҳар ойда Давлат божхона қўмитасига ҳар ойнинг 1-санаси ҳолатига юридик манзилларини кўрсатган ҳолда Корхона ва ташкилотларнинг ягона давлат регистридан маълумотларни тақдим этади.

8. Давлат божхона қўмитаси ҳар чоракда товарлар ташқи савдоси бўйича божхона ахборотномасини нашр этади.

9. Ташқи савдо бўйича якуний жамланма маълумотларни шакллантириш, уларни нашр қилиш ва фойдаланувчиларга зарур кесимларда тақдим этиш Давлат статистика қўмитаси томонидан ўрнатилган тартибда амалга оширилади.

10. Мазкур Низом «Ўзбектуризм» Миллий компанияси билан келишилган.