Ўзбекистонда аккредитация қилинган хорижий фирмалар ва компанияларнинг фаолият кўрсатишлари учун халқаро талабларга мос келувчи қулай шарт-шароитлар яратиш, Халқаро савдо-кўргазма комплексининг Бизнес-марказидан самарали фойдаланилишини таъминлаш мақсадида Вазирлар Маҳкамаси қарор қилади:

1. Тошкент шаҳридаги Халқаро савдо-кўргазма комплексининг Бизнес-маркази биноси қурилиши ниҳоясига етказилганлиги маълумот учун қабул қилинсин.

Ўзбекистон Республикаси Ташқи иқтисодий алоқалар вазирлиги ва Давлат мулки қўмитасининг устав жамғармаси 70,8 млн. АҚШ доллари миқдорида — кўрсатиб ўтилган Бизнес-марказнинг мол—мулки қийматига тенг бўлган очиқ акциядорлик жамияти шаклидаги «Халқаро Ҳамкорлик Маркази» компаниясини ташкил этиш тўғрисидаги таклифига розилик берилсин.

Халқаро савдо-кўргазма комплексининг Бизнес-маркази биноси, энг аввало, унга хорижий компаниялар, фирмалар, банкларнинг ва бошқа хорижий ҳамда халқаро ташкилотлар ва тузилмаларнинг ваколатхоналарини жойлаштириш учун мўлжалланганлиги белгилаб қўйилсин

«Халқаро Ҳамкорлик Маркази» компаниясига Бизнес-марказ мол-мулкининг сақланишини таъминлаш, шунингдек, унинг самарали ишлашини ва халқаро даражада сервис хизмати кўрсатишини ташкил этиш масъулияти юклансин.

2. «Халқаро Ҳамкорлик Маркази» компанияси акцияларининг камида 50 фоизи хорижий инвесторларга сотилиши белгилаб қўйилсин.

«Халқаро Ҳамкорлик Маркази» компаниясининг устав жамғармасидаги улушларни унинг муассислари ўртасида дастлабки тақсимлаш схемаси 1-иловага* мувофиқ, хорижий инвесторлар улушини кейинчалик кўпайтириш ва эркин савдода сотиш ҳуқуқини берган ҳолда, маъқуллансин.

Ўзбекистон Республикаси Давлат мулки қўмитаси Ташқи иқтисодий алоқалар вазирлиги билан биргаликда танлов асосида хорижий инвесторларни аниқласин ва уларга «Халқаро Ҳамкорлик Маркази» компанияси акцияларининг камида 50 фоизи сотилишини таъминласин.

3. Белгилансинки, «Халқаро Ҳамкорлик Маркази» компанияси акцияларини сотишдан тушган барча маблағлар Халқаро савдо-кўргазма комплексининг Бизнес-маркази қурилиши учун жалб қилинган Туркэксимбанк кредитини қайтаришга йўналтирилади.

«Халқаро Ҳамкорлик Маркази» компанияси муассисларига устав жамғармасини Туркэксимбанк кредитини 2-иловага* мувофиқ қайтариш даври мобайнида шакллантириш ҳуқуқи берилсин.

4. «Амбассадор Групп» (АҚШ), «Интерконтинентал» (АҚШ), «Мертенс Хоффман» (АҚШ-Исроил) ва «Меркури ФМ» (Буюк Британия) хорижий компаниялари Ташқи иқтисодий алоқалар вазирлигида Бизнес-марказнинг техник менежментини ташкил этишга доир таклифлар тақдим этганлиги маълумот учун қабул қилинсин.

Ўзбекистон Республикаси Ташқи иқтисодий алоқалар вазирлиги Бизнес-марказ менежменти учун хорижий компания-операторни жалб қилиш юзасидан икки ой муддатда тендер ўтказсин.

5. «Халқаро Ҳамкорлик Маркази» компаниясига Ўзбекистон Республикаси норезидентларидан биноларни ижарага олганлик учун, валюта тушумининг бир қисмини мажбурий сотгандан сўнг қоладиган маблағларни Туркэксимбанк кредитини қайтариш ва менежментни амалга оширганлик учун хорижий компания-операторга тўлашга йўналтирган ҳолда, эркин алмаштириладиган валютада ҳақ ундиришга рухсат этилсин.

6. Туркэксимбанк кредити бўйича мажбуриятларнинг вақтида қайтарилишини таъминлаш мақсадида, истисно тариқасида, «Халқаро Ҳамкорлик Маркази» компанияси бинодан фойдаланиш бошлангандан бошлаб фойдадан олинадиган солиқдан, мол-мулк, ер солиғидан ва қўшилган қиймат солиғидан, шунингдек, Бизнес-марказдан фойдаланиш учун зарур бўлган ускуналар ва материаллар импорти учун божхона тўловларидан (божхона расмийлаштириши учун йиғимлар бундан мустасно), бўшаб қоладиган маблағларни кредитни қайтаришга мақсадли йўналтирилган ҳолда, 4 йил муддатга озод қилинсин.

7. Мазкур қарорнинг бажарилишини назорат қилиш Ўзбекистон Республикаси Бош вазири Ў.Т. Султонов зиммасига юклансин.