Muhim iqtisodiy ahamiyatga ega boʻlgan sanoatning bazaviy tarmoqlari korxonalarini qurish, rekonstruksiya qilish va modernizatsiyalash bilan bogʻliq yirik investitsiya loyihalarini ekspertizadan oʻtkazish sifatini oshirish maqsadida:

1. Oʻzbekiston Respublikasi Vazirlar Mahkamasi huzurida neft-gaz sanoati, geologiya, energetika, kimyo, metallurgiya, mashinasozlik kabi iqtisodiyotning bazaviy tarmoqlari korxonalarini, shuningdek, yirik obyektlar va gidrotexnika inshootlarini qurish, rekonstruksiya qilish va modernizatsiyalash bilan bogʻliq Yirik investitsiya loyihalarini ekspertizadan oʻtkazish byurosi (keyingi oʻrinlarda Byuro deb yuritiladi) tashkil etilsin.

Belgilansinki, Byuro rahbari ayni vaqtda Oʻzbekiston Respublikasi Bosh vazirining Maslahatchisi hisoblanadi.

Yangi tashkil etilayotgan Byuro zimmasiga Oʻzbekiston Respublikasi Prezidentining Farmon yoki Qarori, shuningdek, hukumat qarori bilan tasdiqlanishi lozim boʻlgan maqsadli dasturlar, konsepsiyalar va investitsiya loyihalarini amalga oshirish mumkinligi toʻgʻrisida qarorlar qabul qilinishi uchun ekspertizadan oʻtkazish va tavsiyanomalar tayyorlash vazifasi yuklansin. Tavsiyanomalar quyidagi baholar asosida tayyorlanadi:

loyiha boʻyicha investitsiya sarf-xarajatlarining toʻgʻriligi, ishlab chiqarish uchun tanlangan texnologiyaning asoslanganligi, eng yaxshi mahalliy va xorijiy analoglarni qiyoslash asosida ishlab chiqarish siklining yaxlitligi va tugalligi;

har tomonlama asoslangan zamonaviy texnologiyalardan, butlovchi buyumlar, yoqilgʻi-energetika, xomashyo va tabiiy resurslardan oqilona foydalanish talablariga amal qilgan holda ularni mahalliylashtirish va taʼminlanish darajasini tanlash;

talab etilayotgan sanoat jihozlari, asbob-uskunalar, mashina va mexanizmlar, shu bilan birga import boʻyicha sotib olinayotganlarni hisobga olgan holda ularning texnik darajasi va taklif etilayotgan texnologiyaga muvofiqligi asosida tasniflash;

mahsulotning narx va sifat tavsifi boʻyicha raqobatbardoshligi darajasi, mahsulotlarni sotishning uzoq muddatli bozorini chuqur ishlab chiqish;

mahsulotni taqsimlash boʻyicha bitim loyihalari, shuningdek, konlar yoki yer osti qatlamlaridan foydalanish huquqini beruvchi litsenziyani olish uchun qoʻyilgan talablar.

2. Yirik investitsiya loyihalarini ekspertizadan oʻtkazish byurosi haqidagi nizom va uning tuzilmasi 1 va 2- ilovalarga muvofiq tasdiqlansin.

3. Belgilansinki:

qonun hujjatlariga muvofiq Oʻzbekiston Respublikasi Prezidentining Farmoni va Qarori, shuningdek, hukumat qarori qabul qilinishi zarur boʻlgan maqsadli davlat dasturlariga kiritilgan investitsiya loyihalari, konsepsiyalar;

Oʻzbekiston Respublikasi Prezidentining alohida qarorlari asosida soliqlar va boshqa majburiy toʻlovlar boʻyicha imtiyozlar berilishini nazarda tutadigan;

markazlashtirilgan manbalar resurslari hisobiga yoki Oʻzbekiston Respublikasi Hukumati kafolati bilan xorijiy kreditlarni jalb etgan holda amalga oshiriladigan;

mahsulotni taqsimlash toʻgʻrisidagi bitimlarga muvofiq amalga oshiriladigan investitsiya loyihalari majburiy ravishda Byuroda ekspertizadan oʻtkaziladi.

Byuroga belgilangan tartibda shartnoma asosida loyihalarni toʻliq va chuqur ekspertizadan oʻtkazish uchun yuridik subyektlar va jismoniy shaxslarni jalb etish huquqi berilsin.

4. Oʻzbekiston Respublikasi Vazirlar Mahkamasi:

bir oy muddatda Byuroda iqtisodiyotning bazaviy tarmoqlaridagi korxonalarda amalga oshirilishi tavsiya etilayotgan loyihaviy takliflar va investitsiya loyihalari boʻyicha ekspertiza oʻtkazish va tavsiyanomalar tayyorlash tartibini ishlab chiqsin va tasdiqlasin;

Byuroni qisqa muddatlarda sanoatning bazaviy tarmoqlaridagi loyihalashtirish va qurilish, texnologiya jarayonlari, yer osti qatlamlaridan oqilona foydalanish sohasi boʻyicha chuqur bilimlarga ega boʻlgan yuqori malakali kadrlar bilan taʼminlasin.

5. Oʻzbekiston Respublikasi Moliya vazirligi Yirik investitsiya loyihalarini ekspertizadan oʻtkazish byurosini joriy taʼminlash va texnik jihozlashga zarur budjet mablagʻlarini ajratishni nazarda tutsin.

6. Oʻzbekiston Respublikasi Adliya vazirligi bir oy muddatda manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisidagi takliflarni Vazirlar Mahkamasiga kiritsin.

7. Mazkur qaror ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

1. Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosi (keyingi oʻrinlarda Byuro deb yuritiladi) Oʻzbekiston Respublikasi Vazirlar Mahkamasi huzurida tashkil etilgan yuridik shaxs boʻlmagan ekspert organi hisoblanadi va bevosita Oʻzbekiston Respublikasi Bosh vaziriga boʻysunadi.

2. Byuro oʻz faoliyatida Oʻzbekiston Respublikasi Konstitutsiyasi, Oʻzbekiston Respublikasi qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlari, Oʻzbekiston Respublikasi Bosh vaziri farmoyishlariga, shuningdek, ekspertizaning kompleksliligi, xolisligi, mustaqilligi tamoyillari hamda mazkur Nizomga amal qiladi.

3. Byuro belgilangan shakldagi (gerbsiz) blankka ega. Byuroning masʼul xodimlariga Oʻzbekiston Respublikasi Bosh vaziri imzolagan guvohnomalar beriladi.

4. Byuroning asosiy vazifalari Oʻzbekiston Respublikasi Prezidentining Farmon yoki Qarori, shuningdek hukumat qarori bilan tasdiqlanishi lozim boʻlgan maqsadli dasturlar, konsepsiyalar va investitsiya loyihalarini amalga oshirish mumkinligi toʻgʻrisida qarorlar qabul qilinishi uchun ekspertizadan oʻtkazish va quyidagi baholar asosida tavsiyanomalar berishdan iborat:

loyiha boʻyicha investitsiya sarf-xarajatlarining toʻgʻriligi, ishlab chiqarish uchun tanlangan texnologiyaning asoslanganligi, eng yaxshi mahalliy va xorijiy analoglarni qiyoslash asosida ishlab chiqarish siklining yaxlitligi va tugalligi;

har tomonlama asoslangan zamonaviy texnologiyalardan, butlovchi buyumlar, yoqilgʻi-energetika, xomashyo va tabiiy resurslardan oqilona foydalanish talablariga amal qilgan holda ularni mahalliylashtirish va taʼminlanish darajasini tanlash;

talab etilayotgan sanoat jihozlari, asbob-uskunalar, mashina va mexanizmlar, shu bilan birga import boʻyicha sotib olinayotganlarni hisobga olgan holda ularning texnik darajasi va taklif etilayotgan texnologiyaga muvofiqligi asosida tasniflash;

mahsulotning narx va sifat tavsifi boʻyicha raqobatbardoshligi darajasi, mahsulotlarni sotishning uzoq muddatli bozorini chuqur ishlab chiqish;

mahsulotni taqsimlash boʻyicha bitim loyihalari, shuningdek, konlar yoki yer osti qatlamlaridan foydalanish huquqini beruvchi litsenziyani olish uchun qoʻyilgan talablar.

5. Yuklangan vazifalarni amalga oshirish uchun Byuro quyidagi huquqlarga ega:

Vazirlar Mahkamasining tarkibiy tuzilmalari, davlat va xoʻjalik boshqaruvi organlari, mahalliy davlat hokimiyati organlaridan Byuro vakolatiga kiruvchi masalalar boʻyicha materiallarni talab qilib olish;

belgilangan tartibda shartnoma asosida loyihalarni toʻliq va chuqur ekspertizadan oʻtkazish uchun yuridik subyektlar va jismoniy shaxslarni jalb etish;

oʻz vakolati doirasida Oʻzbekiston Respublikasi vazirliklari va idoralarining axborot va maʼlumotlari elektron bazasidan foydalanish.

6. Byuro direktori va xodimlari:

sifatsiz va oʻz vaqtidan kechiktirilgan holda oʻtkazilgan ekspertiza natijasida davlatga jiddiy iqtisodiy zarar yetganlik;

ekspertiza oʻtkazishda yoʻl qoʻyilgan kamchiliklar oqibatida qurilish, texnologik sikllar va alohida operatsiyalar muddatini choʻzib yuborganlik;

Oʻzbekiston Respublikasining normativ-huquqiy hujjatlari qoida va talablariga hamda mazkur Nizomga rioya etilmaganligi sababli jiddiy texnogen va boshqa avariyalar sodir boʻlganligi;

zarur hollarda loyiha boʻyicha uning maqsad va vazifalarini taʼminlovchi asoslangan muqobil tavsiyalar tayyorlanishi;

ish jarayonida Byuro xodimlari olishi mumkin boʻlgan maʼlumotlarning maxfiyligi;

va boshqa huquqbuzarliklar uchun javobgardirlar.

7. Byuroning davlat va xoʻjalik boshqaruvi organlari, mahalliy davlat hokimiyati organlari oʻrtasidagi hamkorligi Byuro vakolati doirasida mazkur Nizom bilan belgilangan mustaqillik asosida koʻriladi.

8. Byuro xodimlari faoliyatini moddiy ragʻbatlantirish maqsadida Byuro direktori:

xodimlarning yuqori malakasi, mahorati va ish sifatiga qarab oylik lavozim maoshining 100 foizigacha miqdorda doimiy ustama haq;

katta iqtisodiy samara beradigan kompleks ekspertizaning yuqori sifatli oʻtkazilgani uchun xodimlarga oylik lavozim maoshining (doimiy ustama haqni hisobga olmagan holda) 100 foizigacha miqdorda bir yoʻla mukofot belgilash huquqiga ega.

Byuro direktoriga koʻrsatilgan miqdordagi doimiy ustama haq va bir yoʻla mukofot Oʻzbekiston Respublikasi Bosh vaziri tomonidan belgilanadi.

9. Byuro xodimlariga doimiy ustama haq har chorakda belgilanadi va xodimlarning talab etilgan ish sifatini taʼminlashlariga qarab navbatdagi chorakda qayta koʻrib chiqilishi mumkin.

10. Ekspertiza oʻtkazilishida bir yoʻla mukofotlanish huquqini beruvchi iqtisodiy samara bahosi Byuro direktori tomonidan Oʻzbekiston Respublikasi Moliya vazirligi bilan kelishilgan holda belgilanadi.

11. Byuro xodimlariga doimiy ustama haq va bir yoʻla mukofotlar Oʻzbekiston Respublikasi Vazirlar Mahkamasi apparatining Mehnatga haq toʻlash fondi doirasida toʻlanadi.

12. Byuro oʻz faoliyatida bevosita Oʻzbekiston Respublikasi Bosh vaziriga hisobot beradi.

13. Byuro oʻz faoliyatini unga yuklatilgan asosiy vazifalarga, shuningdek Oʻzbekiston Respublikasi Prezidenti hamda Oʻzbekiston Respublikasi Bosh vazirining investitsiya loyihalari (loyihaviy takliflar)ni ekspertizadan oʻtkazish bilan bogʻliq boʻlgan topshiriqlariga muvofiq amalga oshiradi.

14. Byuro faoliyatini direktor boshqaradi, u lavozimi boʻyicha Oʻzbekiston Respublikasi Bosh vazirining maslahatchisi hisoblanadi.

15. Byuro direktori va ekspertlari Oʻzbekiston Respublikasi Bosh vaziri tomonidan Oʻzbekiston Respublikasi Prezidenti bilan kelishilgan holda lavozimga tayinlanadi va ozod etiladi.

16. Byuro direktori:

Byuro faoliyatiga umumiy rahbarlikni amalga oshiradi va Byuro zimmasiga yuklatilgan vazifalar bajarilishi uchun shaxsan javobgar boʻladi;

Byuro ekspertlari orasida vazifalarni taqsimlaydi;

Oʻzbekiston Respublikasi Prezidentining hujjatlari, Oʻzbekiston Respublikasi Hukumati qarorlari va Byuroning vakolatiga kiruvchi masalalar boʻyicha boshqa hujjatlarning belgilangan tartibda Byuroga kiritilgan loyihalarini koʻrib chiqishni tashkil etadi, tegishli ekspertiza oʻtkazilishini, tahliliy va maʼlumot beruvchi materiallar tayyorlanishini taʼminlaydi;

ekspertiza yakunini umumlashtiradi va Oʻzbekiston Respublikasi Bosh vaziri uchun masʼuliyatli loyihalarni amalga oshirish maqsadga muvofiqligi va texnik imkoniyatlari toʻgʻrisida qaror qabul qilishga imkon beradigan asoslangan tavsiyanomalarni tayyorlaydi.

Byuro direktori vaqtincha boʻlmagan taqdirda uning vazifalarini Oʻzbekiston Respublikasi Bosh vaziri tayinlaydigan Byuro ekspertlaridan biri bajaradi.

17. Byuro ekspertlari:

oʻzlariga biriktirilgan masalalar boʻyicha loyihalarni puxta kompleks ekspertizadan oʻtkazadilar, Byuro direktori topshiriqlarini bajaradilar, ekspert baholarining oʻz vaqtida tayyorlanishi va sifati uchun shaxsan javobgar boʻladilar;

Byuro direktorining topshirigʻi bilan tegishli tahliliy va maʼlumot beradigan materiallarni tayyorlaydilar.

18. Byuroning taʼminlanishi va texnik jihozlanishi davlat budjeti hisobidan amalga oshiriladi.

19. Byuroning xodimlariga Oʻzbekiston Respublikasi Vazirlar Mahkamasi Apparati xodimlari uchun belgilangan tibbiy, maishiy va transport taʼminoti shart-sharoitlari joriy etiladi.

20. Zarur hollarda, Byuro oʻziga yuklangan vazifalarni bajarish doirasida chaqirilgan alohida ekspertlarni kontrakt asosida jalb etish va mehnatiga haq toʻlash Oʻzbekiston Respublikasi Vazirlar Mahkamasi rahbariyati bilan kelishilgan holda amalga oshiriladi va hukumat apparati boʻyicha tegishli buyruq bilan rasmiylashtiriladi.