Xalqaro, xorijiy hukumat tashkilotlari va hukumatga qarashli boʻlmagan tashkilotlardan olinadigan texnik koʻmak, grantlar va muruvvat yordami moliyaviy mablagʻlarini hisobga olish samaradorligini oshirish, shuningdek noqonuniy “iflos” moliyaviy mablagʻlarni halollab olish imkoniyatlari va kanallarini bartaraf etish maqsadida Vazirlar Mahkamasi qaror qiladi:

1. 2004-yilning birinchi choragidan boshlab Oʻzbekiston Respublikasining yuridik va jismoniy shaxslari tomonidan xalqaro, xorijiy hukumat tashkilotlari va hukumatga qarashli boʻlmagan tashkilotlardan olinadigan texnik koʻmak, grantlar va muruvvat yordami moliyaviy mablagʻlari (begʻaraz koʻmak) boʻyicha birxillashtirilgan davlat statistika hisoboti joriy qilinsin.

Oʻzbekiston Respublikasi Davlat statistika qoʻmitasi begʻaraz koʻmak moliyaviy mablagʻlarini jalb etish, oʻzlashtirish va ulardan maqsadli foydalanish monitoringi boʻyicha davlat hisoboti shaklini bir hafta muddatda ishlab chiqsin va belgilangan tartibda tasdiqlasin.

2. Begʻaraz koʻmak doirasida tushadigan moliyaviy mablagʻlarga bank xizmati koʻrsatish boʻyicha qulay shart-sharoitlar yaratish maqsadida Oʻzbekiston Respublikasi Tashqi ishlar vazirligi, Tashqi iqtisodiy aloqalar agentligi, Tashqi iqtisodiy faoliyat milliy banki, “Asaka” davlat-aksiyadorlik tijorat bankining taklifiga rozilik berilsin hamda yuridik va jismoniy shaxslarga — texnik koʻmak, grantlar va muruvvat yordami oluvchilarga (shunday koʻmak boʻyicha) xizmat koʻrsatish, begʻaraz koʻmak oluvchilarni bank vositachilik haqi toʻlashdan ozod qilgan holda, koʻrsatib oʻtilgan banklarning boʻlinmalariga yuklansin.

Oʻzbekiston Respublikasi Tashqi iqtisodiy faoliyat milliy banki va “Asaka” davlat-aksiyadorlik tijorat banki texnik koʻmak, grantlar va muruvvat yordami oluvchilarning hisob raqamlariga xizmat koʻrsatish uchun maxsus filiallarni belgilasinlar.

3. Oʻzbekiston Respublikasi Vazirlar Mahkamasi huzuridagi Xorijiy investitsiyalar va kreditlar masalalari boʻyicha Idoralararo kengash (R.S. Azimov) Davlat statistika qoʻmitasi tomonidan taqdim etiladigan umumlashtirilgan axborotlar asosida begʻaraz koʻmak doirasida tushayotgan moliyaviy mablagʻlarning jalb etilishi va oʻzlashtirilishi toʻgʻrisida yilning har choragida Vazirlar Mahkamasiga axborot kiritsin.

4. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda amaldagi qonun hujjatlariga ushbu qarordan kelib chiqadigan oʻzgartirishlar va qoʻshimchalar toʻgʻrisida takliflar kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.