Vazirlar Mahkamasining “O‘zbekiston Respublikasi hududida baravar to‘lov vositasi sifatida “So‘m-Kuponlar”ni muomalaga kiritish to‘g‘risida” 1993-yil 12-noyabrdagi 550-son qaroriga muvofiq hamda tovarlar sotganlik va xizmatlar ko‘rsatganlik uchun muvofiq ravishda “So‘m-Kuponlar”da va rubllardagi tushumlarning o‘z vaqtida va to‘liq topshirilishini tezkorlik bilan nazorat qilishni ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Markaziy bankining Markaziy bankning tuman, shahar muassasalari huzurida tovar sotishdan va pulli xizmatlar ko‘rsatishdan tushgan pul tushumlari tushishining ahvolini nazorat qilish bo‘yicha komissiyalar tuzish hamda ushbu komissiyalar tarkibiga O‘zbekiston Respublikasi Milliy xavfsizlik xizmati, Ichki ishlar vazirligi va Soliq bosh boshqarmasining vakolatli va bilimdon vakillarini kiritish to‘g‘risidagi takliflari qabul qilinsin.

2. Quyidagi vazifalarni hal etish ko‘rsatib o‘tilgan komissiyalar faoliyatining asosiy yo‘nalishlari qilib belgilansin:

Markaziy bankning tuman, shahar muassasalari bilan birgalikda tovar sotuvchi va xizmatlar ko‘rsatuvchi har qaysi korxona, muassasa va tashkilotdan “So‘m-Kuponlar” va rubllarda tushgan tushumlarning har kuni inkassatsiya qilinishini ta’minlash;

tuman, shaharning inkassatsiya qilinadigan har qaysi korxonasi, muassasasi va tashkilotidan “So‘m-Kuponlar”da va rubllarda tushgan tushumlarni tezkorlik bilan hisobga olish va tahlil qilish;

inkassatsiya qilinadigan har qaysi obyektdan—do‘kondan, savdo markazidan, xizmat ko‘rsatish sohasi korxonasidan har kuni tushadigan tushum summasini ularning 10—15 kun oldin har kuni topshirgan tushum summasi bilan qiyoslab tahlil qilishni amalga oshirish;

tushgan tushumni qabul qilib olish yoki rad etish mumkinligi, shuningdek, sotilgan tovarlar va ko‘rsatilgan xizmatlarning taqdim etilgan summaga muvofiq kelishini tezkorlik bilan tekshirib ko‘rish zarurligi to‘g‘risida qaror qabul qilish;

tushumlarni inkassatsiya qilishning belgilangan tartibini buzish hollari aniqlangan taqdirda amaldagi qonunchilikka muvofiq choralar ko‘rish.

Ushbu ish tartibi 1993-yil 19-noyabrdan boshlab joriy etilsin.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, “O‘zbekiston” uyushmasi, “O‘zbekbirlashuv”, chakana va savdo tarmoqlariga ega bo‘lgan, shuningdek, aholiga pulli xizmatlar ko‘rsatuvchi vazirliklar va idoralarning rahbarlari ushbu qaror talablarining qat’iy bajarilishini hamda tuzilgan komissiyalarning samarali faoliyat ko‘rsatishiga amaliy yordam berishni ta’minlasinlar.

4. Mazkur qarorning bajarilishini nazorat qilish Respublika komissiyasi raisi o‘rtoq A. M. Mutalov zimmasiga yuklatilsin.