“Elektron raqamli imzo toʻgʻrisida”gi Oʻzbekiston Respublikasi Qonunini, Oʻzbekiston Respublikasi Prezidentining “Axborot-kommunikatsiya texnologiyalarini yanada rivojlantirishga oid qoʻshimcha chora-tadbirlar toʻgʻrisida” 2005-yil 8-iyuldagi PQ-117-son qarorini ijro etish yuzasidan hamda elektron raqamli imzolar kalitlarini roʻyxatga olish markazlari faoliyatini tashkil etish maqsadida Vazirlar Mahkamasi qaror qiladi:

1. Quyidagilar:

Elektron raqamli imzolar kalitlarini roʻyxatga olish markazlarini davlat roʻyxatidan oʻtkazish tartibi toʻgʻrisidagi nizom 1-ilovaga muvofiq;

Elektron raqamli imzolar kalitlarini roʻyxatga olish markazlarining faoliyat yuritishi tartibi toʻgʻrisidagi nizom 2-ilovaga muvofiq tasdiqlansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. Mazkur Nizom “Elektron raqamli imzo toʻgʻrisida”gi Oʻzbekiston Respublikasi Qonuniga muvofiq ishlab chiqilgan va elektron raqamli imzolar kalitlarini roʻyxatga olish markazlarini davlat roʻyxatidan oʻtkazish tartibini belgilaydi.

2. Elektron raqamli imzolar kalitlarini roʻyxatga olish markazi (keyingi oʻrinlarda matnda “Roʻyxatga olish markazi” deb yuritiladi) Oʻzbekiston Respublikasi Axborot texnologiyalari va kommunikatsiyalarini rivojlantirish vazirligida (keyingi oʻrinlarda matnda “Roʻyxatga olish organi” deb yuritiladi) davlat roʻyxatidan oʻtgan yuridik shaxs hisoblanadi.

3. Roʻyxatga olish markazini davlat roʻyxatidan oʻtkazish:

arizani koʻrib chiqishni va Roʻyxatga olish markazini davlat roʻyxatidan oʻtkazish yoki davlat roʻyxatidan oʻtkazishni rad etish toʻgʻrisida qaror qabul qilishni;

davlat roʻyxatidan oʻtganlik toʻgʻrisida guvohnoma berishni;

Roʻyxatga olish markazining vakolatli shaxslariga elektron raqamli imzolar kalitlari sertifikatlarini berishni oʻz ichiga oladi.

4. Roʻyxatga olish markazini davlat roʻyxatidan oʻtkazish uchun ariza beruvchi Roʻyxatga olish organiga 1-ilovaga muvofiq shakl boʻyicha ariza beruvchi tashkilotning rahbari imzosi va muhri bilan tasdiqlangan roʻyxatga olish toʻgʻrisidagi arizani yuboradi.

Roʻyxatga olish markazini davlat roʻyxatidan oʻtkazish toʻgʻrisidagi arizaga quyidagilar ilova qilinadi:

ariza beruvchi tashkilotning davlat roʻyxatidan oʻtkazilganligi toʻgʻrisidagi guvohnomaning nusxasi;

ariza beruvchi tashkilotning rahbari toʻgʻrisidagi maʼlumotlar;

Roʻyxatga olish organi bilan oʻzaro aloqa qilish tanlangan shaxsga ishonch xati;

Roʻyxatga olish markazining axborot xavfsizligi talablarini oʻz ichiga oladigan uning axborot tizimi boʻyicha loyiha hujjatlari;

ochiq kalit (agar u mavjud boʻlsa) va uning qoʻllanish sohasi toʻgʻrisidagi maʼlumot.

Roʻyxatdan oʻtkazuvchi organ Roʻyxatga olish markazini davlat roʻyxatidan oʻtkazish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

5. Ariza beruvchi:

sertifikatlar, litsenziyalar va boshqa texnik hujjatlarni ilova qilgan holda belgilangan sertifikatsiyalangan apparat va litsenziya dasturiy vositalari roʻyxatini taqdim etishga;

axborot xavfsizligi, texnika xavfsizligi talablariga va yongʻinga qarshi talablarga javob beradigan zarur xonalarga ega boʻlishga;

maxfiy axborotning saqlanishini va ruxsat berilmagan foydalanishdan himoya qilishni taʼminlashga majburdir.

6. Ariza beruvchi arizada koʻrsatilgan faoliyat turi boʻyicha ishlarni olib borish uchun zarur shart-sharoitlar mavjudligini hamda faoliyatni amalga oshirish vakolati berilgan shaxslarning kasbiy yaroqliligini tasdiqlovchi boshqa hujjatlar va maʼlumotlarni taqdim etish huquqiga egadir.

7. Roʻyxatga olish organi roʻyxatga olish toʻgʻrisida ariza olingan kundan boshlab bir oy muddatda arizani koʻrib chiqadi va taqdim etilgan maʼlumotlar asosida Roʻyxatga olish markazini davlat roʻyxatidan oʻtkazish yoki davlat roʻyxatidan oʻtkazishni rad etish toʻgʻrisida qaror qabul qiladi.

8. Arizani koʻrib chiqish jarayonida Roʻyxatga olish organi davlat roʻyxatidan oʻtkazish toʻgʻrisida qaror qabul qilish uchun zarur boʻlgan boshqa axborotni talab qilishi mumkin.

9. Roʻyxatga olish markazi davlat roʻyxatidan oʻtkazilganligi uchun toʻlov undirilmaydi.

10. Davlat roʻyxatidan oʻtkazish toʻgʻrisida qaror qabul qilingan taqdirda Roʻyxatga olish organi davlat roʻyxatidan oʻtganlik toʻgʻrisida guvohnoma beradi. Roʻyxatga olish markazlari davlat roʻyxatidan oʻtkazilganligi toʻgʻrisidagi guvohnoma maxsus blankalarda rasmiylashtiriladi. Guvohnoma blankalari qatʼiy hisobot beriladigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi.

Roʻyxatga olish organi rahbari guvohnomalar blankalari hisobga olinishi, saqlanishi va ulardan maqsadli foydalanilishi uchun belgilangan tartibda javob beradi.

Davlat roʻyxatidan oʻtganlik toʻgʻrisidagi guvohnoma 5 yilgacha amal qilish muddati bilan beriladi.

11. Quyidagi hollarda Roʻyxatga olish markazini davlat roʻyxatidan oʻtkazish rad etilishi mumkin:

ariza beruvchi tomonidan mazkur Nizomning 4 va 5-bandlarida bayon qilingan talablarning bajarilmasligi;

Oʻzbekiston Respublikasida ana shunday nomdagi Roʻyxatga olish markazi roʻyxatdan oʻtkazilganligi;

ariza beruvchi tashkilot muassislaridan hech boʻlmaganda bittasi Oʻzbekiston Respublikasi rezidenti hisoblanmasligi.

Roʻyxatga olish markazini davlat roʻyxatidan oʻtkazish rad etilishi toʻgʻrisidagi qaror asoslanishi va qaror qabul qilingandan soʻng 3 kun mobaynida yozma shaklda ariza beruvchiga yuborilishi kerak.

12. Roʻyxatga olish organining Roʻyxatga olish markazini davlat roʻyxatidan oʻtkazishni rad etish toʻgʻrisidagi qarori ustidan belgilangan tartibda sudga shikoyat qilish mumkin.

13. Roʻyxatga olish markazini davlat roʻyxatidan oʻtkazish uchun hujjatlar taqdim etishda bayon qilingan maʼlumotlar oʻzgargan taqdirda ariza beruvchi bu haqda uch kun muddatda yozma shaklda Roʻyxatga olish organini xabardor qilishi shart.

Davlat roʻyxatidan oʻtganlik toʻgʻrisidagi guvohnoma yoʻqolganda (yoʻqotilganda, yoʻq qilinganda va boshqa hollarda) roʻyxatga olish markazining murojaati asosida Roʻyxatga olish organi tomonidan “Dublikat” belgisi bilan yangi guvohnoma beriladi.

14. Roʻyxatga olish organi 2-ilovaga muvofiq shakl boʻyicha tuzilgan ariza asosida Roʻyxatga olish markazi vakolatli shaxslarining elektron raqamli imzolar kalitlarini tayyorlaydi va elektron raqamli imzolar kalitlari sertifikatlarini (keyingi oʻrinlarda matnda “Elektron raqamli imzolar kalitlari sertifikati” deb yuritiladi) beradi.

Elektron raqamli imzoning ochiq kaliti elektron raqamli imzoning yopiq kalitiga mos kelishini tasdiqlovchi va Roʻyxatga olish markazi tomonidan elektron raqamli imzoning yopiq kaliti egasiga berilgan hujjat Elektron raqamli imzo kalitining sertifikati hisoblanadi.

Ustav, shartnoma, tegishli xatti-harakatlari sodir etish huquqiga ishonchnoma asosida Roʻyxatga olish markazi nomidan ish koʻruvchi uning xodimi Roʻyxatga olish markazining vakolatli shaxsi hisoblanadi.

Elektron raqamli imzoni yaratgan (elektron hujjatga imzo qoʻygan) va uning nomiga Roʻyxatga olish markazi tomonidan Elektron raqamli imzolar kalitlari sertifikati berilgan jismoniy shaxs elektron raqamli imzoning yopiq kaliti egasi (keyingi oʻrinlarda matnda “elektron raqamli imzo egasi” deb yuritiladi) hisoblanadi.

15. Vakolatli shaxslarning elektron raqamli imzo kalitlari sertifikatlarini olish uchun Roʻyxatga olish markazi Roʻyxatga olish organiga elektron raqamli imzo kalitlari sertifikatlariga kiritish uchun zarur boʻlgan ushbu shaxslar toʻgʻrisidagi maʼlumotlarni, ularning oʻz qoʻli bilan qoʻyilgan imzolari, ariza beruvchi tashkilotning rahbari imzosi va dumaloq (rasmiy) muhri bilan tasdiqlangan maʼlumotlarni qogʻoz hujjat shaklida taqdim etishi shart.

16. Vakolatli shaxsning elektron raqamli imzo kaliti sertifikati elektron hujjat shaklda hamda ikki nusxada qogʻoz hujjat shaklida yaratiladi. Qogʻoz hujjat shaklidagi elektron raqamli imzo kaliti sertifikatlari Roʻyxatga olish organi masʼul shaxsining imzosi va muhri bilan tasdiqlanadi hamda sertifikat egasi (vakolatli shaxs)ning oʻz qoʻli bilan imzolanadi. Qogʻoz hujjat shaklidagi sertifikatning bir nusxasi vakolatli shaxsga beriladi. Sertifikatning qogʻoz hujjat shaklidagi ikkinchi nusxasi Roʻyxatga olish organida saqlanadi.

17. Sertifikat pasport yoki shaxsni tasdiqlaydigan boshqa hujjat koʻrsatilgan holda shaxsan vakolatli shaxs tomonidan olinadi. Sertifikat egasi sertifikat qogʻoz hujjat shaklida va elektron hujjat shaklda olinganligi toʻgʻrisida tegishli jurnalga imzo chekadi.

18. Roʻyxatga olish markazi Roʻyxatga olish markazining muassisi (muassislari) nomi, manzili oʻzgarishi, shuningdek davlat roʻyxatidan oʻtkazish toʻgʻrisidagi guvohnomaning amal qilish muddati tamom boʻlishi munosabati bilan qayta roʻyxatdan oʻtkaziladi.

19. Davlat roʻyxatidan oʻtkazish toʻgʻrisidagi guvohnomaning amal qilish muddati tamom boʻlgandan keyin Roʻyxatga olish markazi guvohnomaning amal qilish muddati tamom boʻlishidan kamida bir oy oldin qayta roʻyxatga olish toʻgʻrisida ariza yuboradi.

Qayta roʻyxatga olish roʻyxatga olish singari tartibda amalga oshiriladi.

20. Roʻyxatga olish markazi davlat roʻyxatidan oʻtkazilganligi toʻgʻrisidagi guvohnomaning amal qilishi Roʻyxatga olish markazi faoliyatida qonun hujjatlari va mazkur Nizom talablari buzilganligi aniqlangan taqdirda Roʻyxatga olish organining qarori bilan toʻxtatib turilishi mumkin.

21. Roʻyxatga olish markazi davlat roʻyxatidan oʻtkazilganligi toʻgʻrisidagi guvohnoma quyidagi hollarda Roʻyxatga olish organi qarori bilan bekor qilinishi mumkin:

ariza beruvchi tashkilotning arizasiga koʻra;

davlat roʻyxatidan oʻtganlik toʻgʻrisidagi guvohnomaning amal qilish muddati tamom boʻlishiga koʻra;

Roʻyxatga olish markazini taʼsis etgan yuridik shaxsning davlat roʻyxatidan oʻtkazilganligi toʻgʻrisidagi guvohnoma bekor qilinganda.

Davlat roʻyxatidan oʻtganlik toʻgʻrisidagi guvohnomaning bekor qilinishi shuningdek:

qonun hujjatlariga, shu jumladan axborot xavfsizligi sohasidagi qonun hujjatlariga muntazam ravishda rioya qilinmagan taqdirda;

davlat roʻyxatidan oʻtganlik toʻgʻrisidagi guvohnomaning amal qilishi toʻxtatib turilishiga olib kelgan qonunni buzishlar Roʻyxatga olish organi tomonidan belgilangan muddatlarda bartaraf etilmagan taqdirda;

qonun hujjatlarida nazarda tutilgan boshqa hollarda sudning qarori boʻyicha amalga oshirilishi mumkin.

22. Roʻyxatga olish organining Roʻyxatga olish markazini davlat roʻyxatidan oʻtkazish toʻgʻrisidagi guvohnomaning amal qilishini toʻxtatib turish yoki bekor qilish toʻgʻrisidagi qarori ustidan Roʻyxatga olish markazi belgilangan tartibda sudga shikoyat qilishi mumkin.

23. Roʻyxatga olish markazini davlat roʻyxatidan oʻtkazish toʻgʻrisidagi guvohnomaning amal qilishi toʻxtatib turilgandan yoki bekor qilingandan keyin Roʻyxatga olish organi tomonidan Elektron raqamli imzolar kalitlari sertifikatlari reyestriga yozuv qayd etiladi va Roʻyxatga olish markaziga rasmiy bildirishnoma yuboriladi.

24. Roʻyxatga olish markazini tugatish qonun hujjatlarida belgilangan tartibda amalga oshiriladi.

25. Roʻyxatga olish markazi tugatilgan taqdirda ushbu Roʻyxatga olish markaziga berilgan elektron raqamli imzo kalitlari reyestri va elektron raqamli imzo kalitlari sertifikatlari elektron raqamli imzo egalarining roziligi bilan boshqa Roʻyxatga olish markazlariga berilishi mumkin.

Boshqa Roʻyxatga olish markazlariga berilmagan elektron raqamli imzo kalitlari reyestri va elektron raqamli imzo kalitlari sertifikatlari bekor qilinadi va saqlash uchun Roʻyxatga olish organiga beriladi. Elektron raqamli imzoning ochiq kalitlaridan foydalanuvchilar bundan xabardor qilinadi. Elektron raqamli imzoning haqiqiyligini tasdiqlash uchun elektron raqamli imzoning ochiq kalitidan foydalanuvchi yuridik yoki jismoniy shaxs elektron raqamli imzoning ochiq kalitlaridan foydalanuvchi (keyingi oʻrinlarda “Elektron imzodan foydalanuvchi” deb yuritiladi) hisoblanadi.

26. Roʻyxatga olish organi roʻyxatga olish markazlari vakolatli shaxslarining elektron raqamli imzosi kalitlari sertifikatlarining yagona davlat reyestrini yuritadi hamda yuridik va jismoniy shaxslarning undan erkin foydalanishini taʼminlaydi.

27. Yagona davlat reyestrida quyidagilar koʻrsatiladi:

quyidagilarni oʻz ichiga oladigan Roʻyxatga olish markazi toʻgʻrisidagi maʼlumotlar:

Markazning nomi;

pochta manzili;

telefon/faks raqami;

elektron pochta manzili;

davlat roʻyxatidan oʻtganlik toʻgʻrisidagi guvohnoma berilgan sana, tartib raqami va uning amal qilish muddati;

davlat roʻyxatidan oʻtganlik toʻgʻrisidagi guvohnomaning qayta roʻyxatdan oʻtkazilishi, amal qilishining toʻxtatib turilishi va qayta tiklanishi, bekor qilinishining asosi va sanasi;

Markazning vakolatli shaxslari — elektron raqamli imzo egalari toʻgʻrisidagi maʼlumotlar;

elektron raqamli imzo kaliti sertifikati uzaytirilishi, toʻxtatib turilishi, qayta tiklanishi va bekor qilinishining asosi va sanasi.

28. Roʻyxatga olish markazlari vakolatli shaxslarining elektron raqamli imzosi kalitlari sertifikatlaridan faqat davlat yagona reyestriga kiritilgandan keyin foydalanish mumkin. Ushbu sertifikatlardan imzolar kalitlari sertifikatlarini tasdiqlash bilan bogʻliq boʻlmagan maqsadlar uchun foydalanishga yoʻl qoʻyilmaydi.

29. Sertifikat yagona davlat reyestridan chiqarilgandan keyin Roʻyxatga olish organi bir ish kuni mobaynida Roʻyxatga olish markaziga tegishli bildirishnoma yuboradi.

Roʻyxatga olish markazi vakolatli shaxsining sertifikati yagona davlat reyestridan chiqarilgan paytdan boshlab haqiqiy hisoblanmaydi.

30. Foydalanilayotgan elektron raqamli imzoning yopiq kalitiga ishonch yoʻqolgan taqdirda Roʻyxatga olish markazi Roʻyxatga olish organini bundan xabardor qiladi. Roʻyxatga olish organi bildirishnoma olingandan keyin sertifikatning amal qilinishini toʻxtatib qoʻyadi va mazkur Roʻyxatga olish markazi vakolatli shaxsining sertifikatini bekor qilingan sertifikatlar roʻyxatiga kiritadi.

31. Mazkur Nizomni buzganlikda aybdor shaxslar belgilangan tartibda javobgar boʻladilar.

Ariza beruvchi tashkilot blankasiga

1. ___________________________________________________________

(ariza beruvchining—yuridik shaxsning nomi va tashkiliy-huquqiy shakli)

_____________________________________________________________________________________

___________________________________ ni roʻyxatdan oʻtkazishni iltimos qiladi

(Roʻyxatga olish markazining nomi va manzili)

2. Xizmat koʻrsatuvchi bankning nomi:

Bank hisob varagʻi;

MFO

3. Pochta manzili:

4. Telefon, faks, elektron pochta:

5. Arizaga ilova qilinadigan hujjatlar:

1) _____________________________

2) _____________________________

3) _____________________________

4) _____________________________

5) _____________________________

muhr

Elektron raqamli imzo kalitlarini

Roʻyxatdan oʻtkazish markazining blankasida

Nomlariga elektron raqamli imzo kaliti sertifikati berilishi zarur boʻlgan vakolatli shaxslar roʻyxati:

1. Vakolatli shaxsning familiyasi, ismi, otasining ismi.

2. Vakolatli shaxsning lavozimi.

3. Pasportiga doir maʼlumotlar.

4. Pochta manzili.

5. Telefon/faks.

6. Elektron pochta.

muhr

1. Ushbu Nizom “Elektron raqamli imzo toʻgʻrisida”gi Oʻzbekiston Respublikasi Qonuniga muvofiq ishlab chiqilgan hamda elektron raqamli imzolar kalitlarini roʻyxatga olish markazlarining (keyingi oʻrinlarda matnda “Roʻyxatga olish markazi” deb yuritiladi) funksiyalari, huquqlari va majburiyatlarini belgilaydi, shuningdek ularga qoʻyiladigan asosiy talablarni belgilab beradi.

2. Roʻyxatga olish markazlari oʻz faoliyatida “Elektron raqamli imzo toʻgʻrisida”gi Oʻzbekiston Respublikasi Qonuniga, Oʻzbekiston Respublikasining boshqa qonun hujjatlariga, shuningdek mazkur Nizomga amal qiladi.

3. Quyidagilar roʻyxatga olish markazlarining asosiy funksiyalari hisoblanadi:

elektron raqamli imzoning yopiq va ochiq kalitlarini yaratish;

elektron raqamli imzo yopiq kaliti muhofaza qilinishini va uning maxfiyligini taʼminlash;

elektron raqamli imzo kalitlari sertifikatlarining reyestrini yuritish, uning oʻz vaqtida yangilanishini hamda undan yuridik va jismoniy shaxslarning erkin foydalana olish imkoniyatini taʼminlash;

yuridik va jismoniy shaxslarga elektron raqamli imzo kalitlarining sertifikatlarini elektron hujjatlar shaklida va qogʻoz hujjatlar shaklida berish;

elektron raqamli imzo kalitlari sertifikatlarining amal qilishini toʻxtatib turish va qayta tiklash, shuningdek ularni bekor qilish;

yuridik va jismoniy shaxslarning murojaatiga binoan elektron raqamli imzo kalitlari sertifikatlarining koʻchirma nusxalari berilishini, shuningdek elektron raqamli imzo kalitlarining toʻxtatib turilgan va bekor qilingan sertifikatlari toʻgʻrisidagi maʼlumotlardan erkin foydalanilishini taʼminlash;

yuridik va jismoniy shaxslarning murojaatiga binoan elektron hujjatlardagi elektron raqamli imzoning haqiqiyligini tasdiqlash;

elektron raqamli imzoli qogʻozdagi elektron hujjatlarning koʻchirma nusxalarini tasdiqlash;

elektron raqamli imzo kalitining sertifikatidan bundan buyon foydalanish imkoniyatiga taʼsir etishi mumkin boʻlgan hollar haqida elektron raqamli imzo yopiq kalitining egasini xabardor qilish;

elektron raqamli imzo yopiq kalitining egalarini elektron raqamli imzodan foydalanish qoidalariga oʻqitish imkoniyatini taʼminlash.

4. Roʻyxatga olish markazi elektron raqamli imzo kalitlarini roʻyxatga olish boʻyicha oʻz faoliyatini Oʻzbekiston Respublikasi Axborot texnologiyalari va kommunikatsiyalarini rivojlantirish vazirligida (keyingi oʻrinlarda matnda “Roʻyxatga olish organi” deb yuritiladi) davlat roʻyxatidan oʻtgandan keyin va Roʻyxatga olish markazining vakolatli shaxsi tomonidan elektron raqamli imzo kaliti sertifikati olingandan keyin amalga oshirishi kerak.

5. Roʻyxatga olish markazi:

elektron raqamli imzoni shakllantirish va tekshirish, kalitlar sertifikatlarini saqlash, shakllantirishning sertifikatlashtirilgan apparat vositalariga;

litsenziyali tizimli va amaliy dasturiy taʼminlashga;

elektron raqamli imzo kalitlarini hisobga olish, saqlash va ulardan foydalanish boʻyicha zarur hujjatlarga;

axborotlarni muhofaza qilish sohasida ish tajribasiga ega boʻlgan mutaxassislarga;

maxfiy axborot saqlanishini taʼminlaydigan sharoitlarga ega boʻlishi kerak.

6. Elektron raqamli imzo vositalarini sertifikatsiyalash qonun hujjatlarida belgilangan tartibda amalga oshiriladi.

7. Roʻyxatga olish markazining axborot tizimi belgilangan talablarga muvofiq ruxsatsiz foydalanishdan muhofaza qilingan boʻlishi kerak.

8. Elektron raqamli imzo kalitlarining sertifikatlari yuridik va jismoniy shaxslarning murojaatiga koʻra Roʻyxatga olish markazi tomonidan beriladi. Murojaat qilgan shaxs elektron raqamli imzo kaliti sertifikatini roʻyxatga olish va uni olish uchun Roʻyxatga olish markazining ommaviy ofertasi bilan oldindan tanishishi lozim.

9. Elektron raqamli imzo kaliti sertifikatini olish uchun murojaat qilgan shaxs elektron raqamli imzo kaliti sertifikatini roʻyxatga olish va uni olish uchun imzolangan ariza taqdim etishi kerak. Imzolangan ariza ommaviy ofertada belgilangan shartlarga rozilikdan dalolat beradi. Arizani koʻrib chiqish muddati besh ish kunidan oshmasligi kerak.

10. Elektron raqamli imzo kaliti sertifikatini roʻyxatga olish va uni olish uchun beriladigan ariza shakli hamda Roʻyxatga olish markazi tomonidan yuridik va jismoniy shaxsga elektron raqamli imzo kaliti sertifikatini berish, shuningdek elektron raqamli imzo kalitlari sertifikatlari reyestrini yuritish uchun zarur boʻlgan hujjatlar roʻyxati Roʻyxatga olish markazi tomonidan belgilanadi.

Roʻyxatga olish markaziga elektron raqamli imzo kalitlari sertifikatlarini berish maqsadlariga muvofiq boʻlmagan maʼlumotlarni soʻrab olish taqiqlanadi.

11. Ariza berilgunga qadar ariza beruvchi elektron raqamli imzo kalitini mustaqil yaratishi va uni roʻyxatga olish uchun Roʻyxatga olish markaziga taqdim etishi mumkin.

Elektron raqamli imzoning ochiq va yopiq kalitlarini yaratish yuridik va jismoniy shaxslarning arizasiga koʻra Roʻyxatga olish markazi tomonidan amalga oshirilishi mumkin.

12. Elektron raqamli imzoning ochiq va yopiq kalitlarini yaratishda Roʻyxatga olish markazi bir vaqtning oʻzida elektron raqamli imzo kaliti sertifikatini berishi kerak.

13. Elektron raqamli imzo kalitining sertifikati elektron raqamli imzo egasiga elektron hujjat shaklida va qogʻoz hujjat shaklida beriladi.

14. Yuridik va jismoniy shaxslar elektron raqamli imzoning bir nechta kalitlariga ega boʻlishi mumkin. Elektron raqamli imzo har bir kalitining sertifikati belgilangan tartibda alohida roʻyxatga olinadi.

15. Elektron raqamli imzo ochiq va yopiq kalitlarini yaratish, elektron raqamli imzo kalitini roʻyxatga olish va elektron raqamli imzo kaliti sertifikatini berish boʻyicha xizmatlar pulli hisoblanadi.

Koʻrsatiladigan pulli xizmatlar tarkibi va qiymati belgilangan tartibda shartnomaviy asosda belgilanadi.

16. Roʻyxatga olish markazi oʻzi tomonidan yaratilgan elektron raqamli imzo ochiq va yopiq kalitlari muhofaza qilinishini taʼminlashi lozim.

17. Elektron raqamli imzo kalitining sertifikatida quyidagilar koʻrsatilishi kerak:

elektron raqamli imzoning egasi boʻlgan jismoniy shaxsning familiyasi, ismi, otasining ismi;

agar elektron raqamli imzoning egasi yuridik shaxsning vakili boʻlsa, shu yuridik shaxsning nomi;

elektron raqamli imzoning tartib raqami va amal qilish muddati;

elektron raqamli imzoning ochiq kaliti;

elektron raqamli imzoning ochiq kalitidan foydalanishda yordam berishi mumkin boʻlgan elektron raqamli imzo vositalarining nomi;

mazkur sertifikatni bergan Roʻyxatga olish markazining nomi va joylashgan manzili;

elektron raqamli imzodan foydalanish maqsadlari toʻgʻrisidagi maʼlumotlar;

elektron raqamli imzo kalitlari sertifikatlari reyestrining elektron manzili.

Elektron raqamli imzo egasi tashabbusi bilan elektron raqamli imzo kaliti sertifikatiga boshqa maʼlumotlar ham kiritilishi mumkin.

18. Elektron raqamli imzo kaliti sertifikatining amal qilish muddati elektron raqamli imzo roʻyxatga olingan vaqtdan boshlab 24 oydan oshmasligi kerak. Keyinchalik elektron raqamli imzo kaliti sertifikatining amal qilish muddati shartnoma bilan uzaytiriladi, biroq ikki martadan ortiq uzaytirilmaydi.

19. Elektron hujjat shaklidagi elektron raqamli imzo kalitining sertifikati Roʻyxatga olish markazi vakolatli shaxsining elektron raqamli imzosi bilan tasdiqlanadi.

20. Qogʻoz hujjat shaklidagi elektron raqamli imzo kalitining sertifikati ikki nusxada rasmiylashtiriladi. Bunday sertifikatning har bir nusxasi Roʻyxatga olish markazining vakolatli shaxsi tomonidan imzolanishi va Roʻyxatga olish markazining muhri bilan tasdiqlanishi kerak. Elektron raqamli imzo kaliti sertifikatining bir nusxasi elektron raqamli imzo kalitining egasiga beriladi, boshqa nusxasi esa Roʻyxatga olish markazida saqlanadi. Roʻyxatga olish markazida saqlanadigan elektron raqamli imzo kaliti sertifikati nusxasi elektron raqamli imzo egasi tomonidan imzolanishi kerak.

21. Elektron raqamli imzo kaliti sertifikatini berishda Roʻyxatga olish markazi tomonidan elektron raqamli imzo egasiga elektron raqamli imzodan foydalanish va uni saqlash qoidalari toʻgʻrisida, shuningdek elektron raqamli imzo egasining majburiyatlari va javobgarligi toʻgʻrisida toʻliq axborot berilishi kerak.

22. Elektron raqamli imzo kalitini roʻyxatga olish elektron raqamli imzo kaliti sertifikatini Roʻyxatga olish markazining elektron raqamli imzo kalitlari sertifikatlari reyestriga kiritish yoʻli bilan amalga oshiriladi.

23. Roʻyxatga olish markazi yuridik va jismoniy shaxslarning murojaatlariga binoan elektron hujjatlar shaklida va/yoki qogʻoz hujjatlar shaklida elektron raqamli imzo kalitlari sertifikatlarining koʻchirma nusxalarini berishi shart.

24. Yuridik va jismoniy shaxsga beriladigan qogʻoz hujjat shaklidagi elektron raqamli imzo kaliti sertifikati koʻchirma nusxasi Roʻyxatga olish markazining vakolatli shaxsi tomonidan imzolanishi va muhri bilan tasdiqlanishi kerak.

25. Qogʻoz hujjat shaklidagi elektron raqamli imzo kalitining sertifikati koʻchirma nusxasi quyidagi majburiy rekvizitlarni oʻz ichiga oladi:

elektron raqamli imzo kaliti sertifikatining seriyali tartib raqami;

elektron raqamli imzo egasining identifikatsiya maʼlumotlari;

elektron raqamli imzo kalitining sertifikati nashr etuvchisining identifikatsiya maʼlumotlari (Roʻyxatga olish markazi vakolatli shaxsining elektron raqamli imzo kaliti sertifikatidan identifikatsiya maʼlumotlari);

Roʻyxatga olish markazi vakolatli shaxsining elektron raqamli imzo vositalari toʻgʻrisida maʼlumotlar;

elektron raqamli imzo egasining elektron raqamli imzo kaliti va uning shakllantirilishi qoidalari toʻgʻrisidagi maʼlumotlar;

elektron raqamli imzo kalitidan va elektron raqamli imzo kaliti sertifikatidan foydalanish sohalari toʻgʻrisidagi maʼlumotlar;

Roʻyxatga olish markazi vakolatli shaxsining oʻz qoʻli bilan qoʻygan imzosi;

elektron raqamli imzo kaliti sertifikatining amal qilish muddati;

Roʻyxatga olish markazi muhri.

26. Elektron hujjatlar shaklidagi elektron raqamli imzo kalitlari sertifikatlarining koʻchirma nusxalarini berishga doir xizmatlar Roʻyxatga olish markazi tomonidan bepul koʻrsatiladi.

27. Qogʻoz hujjat shaklidagi elektron hujjatning tasdiqlangan koʻchirma nusxasida quyidagilar boʻlishi kerak:

elektron raqamli imzo;

elektron hujjatni joʻnatuvchining — yuridik shaxsning nomi yoki jismoniy shaxsning familiyasi, ismi, otasining ismi;

elektron hujjatni joʻnatuvchining pochta manzili va elektron pochta manzili; uning yaratilgan sanasi;

Roʻyxatga olish markazi vakolatli shaxsining oʻz qoʻli bilan qoʻygan imzosi;

Roʻyxatga olish markazi muhri.

28. Qogʻoz hujjat shaklidagi elektron hujjatning koʻchirma nusxasi amaldagi qonun hujjatlari talablariga va davlat standartlariga muvofiq boʻlishi, shuningdek “Elektron hujjatning koʻchirma nusxasi” majburiy belgisiga ega boʻlishi kerak

29. Kalitlar sertifikatlari reyestri qogʻoz va elektron shaklda yuritiladi, elektron raqamli imzodan foydalanuvchilar uchun uning elektron versiyasiga kirish bemalol boʻlishi kerak.

30. Roʻyxatga olish markazi elektron raqamli imzo kalitlari sertifikatlari reyestri oʻz vaqtida yangilanib borilishini taʼminlashi shart. Reyestrdagi oʻzgartirishlar elektron raqamli imzo kaliti sertifikatini berish, toʻxtatib turish va uning amal qilishini tiklash hamda uni bekor qilish vaqtidan boshlab amalga oshirilishi kerak.

31. Reyestrda elektron hujjatlar shaklida berilgan, amalda boʻlgan, toʻxtatib qoʻyilgan va bekor qilingan elektron raqamli imzo kalitlarining sertifikatlari boʻlishi kerak.

32. Roʻyxatga olish markazining kalitlar sertifikatlari reyestrida elektron raqamli imzo egasi toʻgʻrisidagi quyidagi maʼlumotlar koʻrsatiladi:

elektron raqamli imzo egasining familiyasi, ismi va otasining ismi;

pochta manzili;

telefon/faks raqami;

elektron pochta manzili; .

soliq toʻlovchining identifikatsiya raqami;

elektron raqamli imzo kaliti sertifikati amal qilishini uzaytirish, toʻxtatib turish va qayta tiklash, uni bekor qilish asosi va sanasi

33. Roʻyxatga olish markazida elektron hujjat shaklidagi elektron raqamli imzo kaliti sertifikatini saqlash tartibi va muddati Roʻyxatga olish markazi va elektron raqamli imzo egasi oʻrtasida tuziladigan shartnomada belgilanadi.

34. Elektron hujjat shaklidagi elektron raqamli imzo kaliti sertifikatini saqlash muddati tugagandan keyin u Roʻyxatga olish markazining elektron raqamli imzo kalitlari sertifikatlari reyestridan chiqariladi va arxivda saqlash rejimiga oʻtkaziladi.

35. Bekor qilingan elektron hujjat shaklidagi elektron raqamli imzo kaliti sertifikati Roʻyxatga olish markazida kamida uch yilgacha saqlanadi.

36. Qogʻoz hujjat shaklidagi elektron raqamli imzo kaliti sertifikati qonun hujjatlarida belgilangan tartibda saqlanadi.

37. Elektron raqamli imzo kaliti sertifikatining amal qilishini toʻxtatib turish elektron raqamli imzo egasining arizasi asosida amalga oshiriladi.

38. Elektron raqamli imzo kaliti sertifikatining amal qilishini toʻxtatib turish muddati ushbu elektron raqamli imzo kaliti sertifikatining amal qilish muddatidan oshmasligi kerak.

39. Elektron raqamli imzo kaliti sertifikatining amal qilishi toʻxtatib turilganda Roʻyxatga olish markazi Elektron raqamli imzo kalitlari sertifikatlari reyestriga tegishli yozuvni kiritadi hamda uch kun mobaynida bu toʻgʻrisida elektron raqamli imzo egasini yozma ravishda xabardor qiladi.

40. Elektron raqamli imzo kaliti ushbu sertifikatining amal qilishini qayta tiklash elektron raqamli imzo egasining arizasiga asosan elektron raqamli imzo kaliti sertifikatining amal qilishi toʻxtatib turilgan muddat mobaynida amalga oshiriladi.

41. Elektron raqamli imzo kaliti sertifikati elektron raqamli imzo egasining arizasiga asosan bekor qilinadi. Elektron raqamli imzo kaliti sertifikatini bekor qilish uchun ariza ariza beruvchi tomonidan elektron yoki qogʻoz shaklida beriladi.

42. Elektron raqamli imzo kaliti sertifikati shuningdek Roʻyxatga olish markazi tomonidan elektron raqamli imzo egasining roziligisiz quyidagi hollarda:

ushbu sertifikatning amal qilish muddati tugaganda;

elektron raqamli imzo kaliti sertifikati berilishiga asos boʻlgan hujjatning amal qilishi toʻxtatilganda;

elektron raqamli imzo kalitining egasi “Elektron raqamli imzo toʻgʻrisida”gi Oʻzbekiston Respublikasi Qonuni 10-moddasining ikkinchi qismida nazarda tutilgan oʻz majburiyatlarini bajarmagan hollar aniqlanganda;

elektron raqamli imzo kaliti sertifikatining amal qilishi toʻxtatib turilgan muddat tugaganda va uni qayta tiklash uchun elektron raqamli imzo egasining arizasi mavjud boʻlmaganda bekor qilinadi.

43. Elektron raqamli imzo kaliti sertifikatlarini bekor qilish elektron raqamli imzo egasining arizasi olingan yoki ushbu Nizomning 42-bandida bayon qilingan holatlar vujudga kelgan kunda Roʻyxatga olish markazi tomonidan amalga oshiriladi.

44. Elektron raqamli imzo kaliti bekor qilingandan keyin Roʻyxatga olish markazi tomonidan elektron raqamli imzo kalitlari sertifikatlari reyestriga yozuv kiritiladi va uning egasiga rasmiy bildirishnoma (bekor qilingan sertifikatlar roʻyxati) yuboriladi.

45. Roʻyxatga olish markazi tegishli yopiq kalitga putur yetkazish holati aniqlangan taqdirda, bekor qilingan elektron raqamli imzo kaliti sertifikati egasini xabardor qilgan hamda asoslangan sabablarni koʻrsatgan holda elektron raqamli imzo kaliti sertifikatini bekor qilish huquqiga egadir.

46. Roʻyxatga olish markazi aybi bilan elektron raqamli imzo egasining yopiq kalitiga putur yetkazilganda, Markaz elektron raqamli imzo egasi oldida yetkazilgan moddiy zarar uchun javobgar boʻladi, shuningdek elektron raqamli imzo egasiga yangi elektron raqamli imzo kaliti sertifikatini bepul tayyorlaydi va beradi.

47. Roʻyxatga olish markazi:

Roʻyxatga olish markazidan belgilangan tartibda foydalanish;

Roʻyxatga olish organini axborot texnologiyalaridagi, vositalar tarkibi va joylashuvidagi hamda axborotlashtirish tizimlaridagi, ulardan foydalanishda chora-tadbirlar samaradorligi va axborotlarni muhofaza qilish vositalariga taʼsir qilishi mumkin boʻlgan shart-sharoitlardagi barcha oʻzgarishlar toʻgʻrisida xabardor qilishi shart;

Roʻyxatga olish organiga quyidagilarni taqdim etishi shart:

davlat roʻyxatidan oʻtgan Roʻyxatga olish markazining faoliyati yuzasidan nazorat va monitoringni amalga oshirish uchun zarur boʻlgan hujjatlar;

qonun hujjatlarida belgilangan va cheklangan tartibda boshqa zarur axborotlar, hujjatlar va materiallar;

Roʻyxatga olish markazi vakolatli shaxsining elektron raqamli imzo yopiq kalitidan faqat ularga berilgan ochiq kalitlar sertifikatlari imzosi va bekor qilingan sertifikatlar roʻyxatlari uchun foydalanish;

ushbu Nizomga muvofiq Roʻyxatga olish markazi vakolatli shaxsining yopiq kalitini muhofaza qilish chora-tadbirlarini koʻrish;

elektron raqamli imzo egalarining roʻyxatga olish axborotlarini oshkor qilmaslik, elektron raqamli imzo kalitlari sertifikatlari egalarini identifikatsiyalash uchun foydalaniladigan va tayyorlanayotgan sertifikatlarga kiritiladigan axborotlar bundan mustasno;

roʻyxatga olingan elektron raqamli imzo egasiga uning arizasiga koʻra Oʻzbekiston Respublikasining amaldagi qonun hujjatlariga muvofiq sertifikatlashtirilgan elektron raqamli imzo vositalaridan foydalangan holda yopiq va ochiq kalitlar tayyorlash;

kalitlar paydo boʻlishi tartib-qoidasini bajaruvchi dasturiy va/yoki apparat vositalaridan foydalanish boʻyicha talablarga muvofiq kalitni oʻzga maʼlumotlar manbaiga yozib qoʻyish;

kalitlar paydo boʻlishi tartib-qoidasini bajarish va faqat Oʻzbekiston Respublikasi qonun hujjatlariga muvofiq sertifikatlashtirilgan dasturiy va/yoki apparat vositalaridan foydalangan holda kalitlarni oʻzga maʼlumotlar manbaiga yozish;

elektron raqamli imzo egalarining tayyorlanadigan elektron raqamli imzo kalitlari sertifikatlari roʻyxatga olish (seriyali) tartib raqamlarining noyobligini taʼminlash;

elektron raqamli imzo foydalanuvchilarining tayyorlangan ochiq kalitlari sertifikatlaridagi ochiq kalitlar ahamiyatining noyobligini taʼminlash;

toʻliq Internet manzil — URLni Roʻyxatga olish markazi foydalanuvchilarining elektron raqamli imzo kalitlarining nashr etilayotgan sertifikatlari elektron raqamli imzo kalitlari sertifikatlari reyestriga kiritish.

48. Elektron raqamli imzo foydalanuvchisi quyidagi huquqlarga ega:

Roʻyxatga olish markazi tomonidan tayyorlangan, berilgan, toʻxtatib qoʻyilgan, qayta tiklangan va bekor qilingan elektron raqamli imzo kalitlari sertifikatlari roʻyxatlarini olish;

Roʻyxatga olish markazi vakolatli shaxsining elektron raqamli imzo kaliti sertifikatini elektron shaklda olish;

Roʻyxatga olish markazining elektron raqamli imzo kalitlari sertifikatlari reyestrida boʻlgan elektron raqamli imzo kaliti sertifikati koʻchirma nusxasini elektron shaklda olish;

Roʻyxatga olish markazi tomonidan tayyorlangan bekor qilingan elektron raqamli imzo kalitlari sertifikatlari roʻyxatini elektron raqamli imzo kalitlari sertifikatlari maqomini tekshirish uchun qoʻllash.

49. Elektron raqamli imzo egasi elektron raqamli imzo kaliti sertifikatini yangilash uchun soʻrov yuborish huquqiga ega. Soʻrov Roʻyxatga olish markaziga amalda boʻlgan elektron raqamli imzo kaliti sertifikatining amal qilish muddati tugashidan kamida ikki hafta oldin yuborilishi kerak.

50. Roʻyxatga olish tartib-qoidasidan oʻtgan elektron raqamli imzo egalari ushbu Nizom va tegishli shartnoma bilan belgilanadigan hajmda roʻyxatga olish va identifikatsiya axborotini taqdim etishi shart.

51. Elektron raqamli imzo egasi:

yopiq kalitni maxfiy saqlashi, uning yoʻqotilishi, oshkor boʻlishi, oʻzgartirilishi yoki undan ruxsatsiz foydalanishning oldini olish uchun mumkin boʻlgan barcha choralarini koʻrishi;

agar unga ushbu kalitlardan foydalanilayotganligi yoki ilgari boshqa shaxslar tomonidan foydalanilganligi maʼlum boʻlsa, elektron raqamli imzo yopiq kalitlaridan foydalanmasligi;

elektron raqamli imzo yopiq kalitidan faqat sertifikatda belgilangan tegishli sohalarda foydalanish ruxsat berilgan maqsadlarda foydalanishi;

elektron raqamli imzo kaliti sertifikatini bergan Roʻyxatga olish markazini qonun buzilishlari yoki elektron raqamli imzo yopiq kalitiga kirish rejimini buzish mumkinligi toʻgʻrisida xabardor qilishi va elektron raqamli imzo kaliti sertifikatining amal qilish muddatini toʻxtatib turishni yoki uni bekor qilishni talab qilishi;

oʻz vakili hisoblangan yuridik shaxsni qayta tashkil etish yoki tugatish toʻgʻrisida Roʻyxatga olish markaziga xabardor qilishi shart.

52. Elektron raqamli imzo ochiq kalitining foydalanuvchisi elektron raqamli imzo egasi toʻgʻrisidagi shaxsiy maʼlumotlarning muhofaza qilinishini taʼminlashi lozim.

53. Mazkur Nizomni buzganlikda aybdor shaxslar belgilangan tartibda javobgar boʻladilar.