Mamlakatimizda nizolarni hakamlik sudlarida hal qilish mexanizmi joriy etilganligi fuqarolarning hamda tadbirkorlik subyektlarining huquqlarini va qonuniy manfaatlarini himoya qilish kafolatlarini ta’minlashda, ishbilarmonlik muhitini yaxshilashda hamda mamlakatimizning investitsiyaviy jozibadorligini oshirishda muhim ahamiyat kasb etmoqda.

Shu bilan birga tahlillar hakamlik sudlari faoliyatini tashkil qilishning qonuniy asoslarini va ular tomonidan qonunchilikka rioya etilishi ustidan nazorat mexanizmlarini takomillashtirish, hakamlik sudlariga qo‘yiladigan talablarni aniqlashtirish, hakamlik sudlari faoliyatini hamda hakamlik muhokamasini xalqaro standartlarga moslashtirish zaruriyati mavjudligini ko‘rsatdi.

Mazkur Qonun bilan O‘zbekiston Respublikasining ayrim qonun hujjatlariga davlat organlari, tashkilotlari va muassasalari, davlat ishtirokidagi korxonalar, shuningdek fuqarolarning o‘zini o‘zi boshqarish organlari hakamlik bitimi taraflari bo‘lishi mumkin emasligini, yer bilan bog‘liq, binolar va inshootlarga egalik huquqini belgilash hamda budjetdan pul undirish bilan bog‘liq nizolar hakamlik sudlari tomonidan hal etilmasligini belgilovchi, shuningdek budjet intizomi mustahkamlanishini, mas’ul shaxslarning javobgarligi kuchaytirilishini nazarda tutuvchi qo‘shimcha va o‘zgartirishlar kiritilmoqda.

Ushbu Qonun hakamlik sudlari faoliyatini tashkil etishning qonuniy asoslarini mustahkamlash, malakali hakamlik sudyalari korpusini shakllantirish hamda budjet mablag‘laridan samarali foydalanilishini ta’minlash uchun xizmat qiladi.

1-modda. O‘zbekiston Respublikasining 1994-yil 22-sentabrda qabul qilingan 2015-XII-sonli Qonuni bilan tasdiqlangan O‘zbekiston Respublikasining Ma’muriy javobgarlik to‘g‘risidagi kodeksiga (O‘zbekiston Respublikasi Oliy Kengashining Axborotnomasi, 1995-yil, № 3, 6-modda; O‘zbekiston Respublikasi Oliy Majlisining Axborotnomasi, 1995-yil, № 9, 193-modda, № 12, 269-modda; 1996-yil, № 5-6, 69-modda, № 9, 144-modda; 1997-yil, № 2, 56-modda, № 4-5, 126-modda, № 9, 241-modda; 1998-yil, № 3, 38-modda, № 5-6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda, № 7-8, 217-modda; 2001-yil, № 1-2, 23-modda, № 9-10, 165, 182-moddalar; 2002-yil, № 1, 20-modda, № 9, 165-modda; 2003-yil, № 1, 8-modda, № 5, 67-modda, № 9-10, 149-modda; 2004-yil, № 1-2, 18-modda, № 5, 90-modda, № 9, 171-modda; 2005-yil, № 1, 18-modda; O‘zbekiston Respublikasi Oliy Majlisi palatalarining Axborotnomasi, 2005-yil, № 9, 312-modda, № 12, 413, 417, 418-moddalar; 2006-yil, № 6, 261-modda, № 9, 498-modda, № 10, 536-modda, № 12, 656, 659-moddalar; 2007-yil, № 4, 158, 159, 164, 165-moddalar, № 9, 416, 421-moddalar, № 12, 596, 604, 607-moddalar; 2008-yil, № 4, 181, 189, 192-moddalar, № 9, 486, 488-moddalar, № 12, 640, 641-moddalar; 2009-yil, № 1, 1-modda, № 9, 334, 335, 337-moddalar, № 10, 380-modda, № 12, 462, 468, 470, 472, 474-moddalar; 2010-yil, № 5, 175, 179-moddalar, № 6, 231-modda, № 9, 335, 339, 341-moddalar, № 10, 380-modda, № 12, 468, 473, 474-moddalar; 2011-yil, № 1, 1-modda, № 4, 104, 105-moddalar, № 9, 247, 252-moddalar, № 12/2, 365-modda; 2012-yil, № 4, 108-modda, № 9/1, 242-modda, № 12, 336-modda; 2013-yil, № 4, 98-modda, № 10, 263-modda; 2014-yil, № 1, 2-modda, № 5, 130-modda, № 9, 244-modda, № 12, 341, 343-moddalar; 2015-yil, № 6, 228-modda, № 8, 310, 312-moddalar, № 12, 452-modda; 2016-yil, № 1, 2-modda, № 4, 125-modda, № 9, 276-modda, № 12, 383, 385-moddalar; 2017-yil, № 4, 137-modda, № 6, 300-modda, № 9, 510-modda, № 10, 605-modda; 2018-yil, № 1, 1, 4, 5-moddalar, № 4, 224-modda, № 7, 430, 431, 432-moddalar, № 10, 671, 673, 679-moddalar; 2019-yil, № 1, 1, 3, 5-moddalar, № 2, 47-modda, № 3, 161, 165, 166-moddalar, № 5, 259, 261, 267, 268-moddalar, № 7, 386-modda, № 8, 469, 471-moddalar, № 9, 591, 592-moddalar, № 10, 674, 676-moddalar, № 11, 787, 791-moddalar, № 12, 880, 891-moddalar; 2020-yil, № 1, 4-modda, № 3, 203, 204-moddalar, № 7, 449-modda, № 9, 539, 540-moddalar, № 10, 593, 596-moddalar, № 11, 651-modda, № 12, 691-modda; 2021-yil, № 1, 5, 7, 12, 13, 14-moddalar, № 2, 142-modda, № 3, 217-modda, № 4, 290, 293-moddalar, 4-songa ilova, № 8, 800, 802, 803-moddalar, № 9, 903-modda, № 10, 966, 967, 968, 973-moddalar, № 11, 1066-modda; 2022-yil, № 1, 1, 2-moddalar, № 2, 80, 81-moddalar, № 3, 215, 216-moddalar, № 4, 337-modda, № 5, 464, 465, 466, 467-moddalar, № 8, 787-modda, № 10, 981, 984-moddalar, № 12, 1188-modda; 2023-yil, № 3, 184, 185, 188, 189-moddalar, № 4, 265, 266, 268-moddalar, № 5, 319, 320-moddalar, № 7, 533, 534, 535, 537, 539-moddalar, № 8, 634-modda, № 10, 798-modda, № 11, 921, 923, 924-moddalar, № 12, 1004-modda; 2024-yil, № 1, 5, 7, 8, 9-moddalar, № 2, 102, 111, 115, 116-moddalar, № 3, 243, 245-moddalar, № 6, 530, 532-moddalar, № 7, 629-modda, № 8, 826, 829, 831-moddalar, № 9, 954, 964, 965-moddalar, № 10, 1070, 1071, 1073, 1077, 1078, 1083, 1084-moddalar, № 11, 1187, 1188, 1189-moddalar, № 12, 1279, 1280, 1282, 1286, 1287-moddalar; 2025-yil, № 1, 5, 8-moddalar, № 2, 187, 188, 196, 198, 201-moddalar, № 3, 368, 376-moddalar, № 4, 517, 521-moddalar, № 5, 643, 644-moddalar, № 6, 729-modda, № 7, 828, 829, 832-moddalar) quyidagi qo‘shimchalar kiritilsin:

1) quyidagi mazmundagi 175⁹-modda bilan to‘ldirilsin:

Hakamlik sudlarini qonunga xilof ravishda tashkil etish, —

mansabdor shaxslarga bazaviy hisoblash miqdorining besh baravaridan o‘n baravarigacha miqdorda jarima solishga sabab bo‘ladi.

Davlat organlarining, tashkilotlarining va muassasalarining, davlat ishtirokidagi korxonalarning, shuningdek fuqarolar o‘zini o‘zi boshqarish organlarining hakamlik bitimi taraflari bo‘lishi, basharti jinoyat alomatlari mavjud bo‘lmasa, —

mansabdor shaxslarga bazaviy hisoblash miqdorining besh baravaridan o‘n baravarigacha miqdorda jarima solishga sabab bo‘ladi.

Davlat organlari, tashkilotlari va muassasalari, davlat ishtirokidagi korxonalar, shuningdek fuqarolarning o‘zini o‘zi boshqarish organlari tomonidan qonunga xilof ravishda hakamlik sudi qarorlarining ixtiyoriy ijro etilishi, —

mansabdor shaxslarga bazaviy hisoblash miqdorining besh baravaridan o‘n baravarigacha miqdorda jarima solishga sabab bo‘ladi.

Ushbu moddaning birinchi, ikkinchi yoki uchinchi qismlarida nazarda tutilgan huquqbuzarliklarni ma’muriy jazo chorasi qo‘llanilganidan keyin bir yil davomida takroran sodir etish, —

mansabdor shaxslarga bazaviy hisoblash miqdorining o‘n baravaridan o‘n besh baravarigacha miqdorda jarima solishga sabab bo‘ladi”;

2) 245-moddaning birinchi qismi “175⁸” raqamidan keyin “175⁹” raqami bilan to‘ldirilsin;

3) 245²-moddaning ikkinchi qismi “Ushbu Kodeksning” degan so‘zlardan keyin “175⁹” raqami bilan to‘ldirilsin.

2-modda. O‘zbekiston Respublikasining 2006-yil 16-oktabrda qabul qilingan “Hakamlik sudlari to‘g‘risida”gi O‘RQ-64-sonli Qonuniga (O‘zbekiston Respublikasi Oliy Majlisi palatalarining Axborotnomasi, 2006-yil, № 10, 541-modda; 2014-yil, № 5, 130-modda; 2017-yil, № 9, 510-modda; 2018-yil, № 1, 5-modda; 2019-yil, № 3, 166-modda; 2021-yil, 4-songa ilova; 2024-yil, № 2, 105-modda, № 12, 1286-modda) quyidagi o‘zgartirish va qo‘shimchalar kiritilsin:

1) 3-moddaning:

to‘rtinchi xatboshisi quyidagi tahrirda bayon etilsin:

“doimiy faoliyat ko‘rsatuvchi hakamlik sudining nizomi — hakamlik sudini tashkil etgan nodavlat notijorat tashkiloti tomonidan tasdiqlanadigan lokal hujjat bo‘lib, u doimiy faoliyat ko‘rsatuvchi hakamlik sudining huquqiy maqomini, tashkil etilishini, faoliyatini tartibga soladi, shuningdek uning mazkur hakamlik sudini tashkil etgan nodavlat notijorat tashkiloti hamda boshqa yuridik shaxslar bilan o‘zaro munosabatlarini belgilaydi”;

beshinchi xatboshisidagi “yuridik shaxs” degan so‘zlar “nodavlat notijorat tashkiloti” degan so‘zlar bilan almashtirilsin;

o‘n birinchi xatboshisidagi “nodavlat organ” degan so‘zlar “nodavlat tuzilma” degan so‘zlar bilan almashtirilsin;

2) 5-moddaning ikkinchi qismi quyidagi tahrirda bayon etilsin:

“Davlat organlari, tashkilotlari va muassasalari, davlat ishtirokidagi korxonalar, shuningdek fuqarolarning o‘zini o‘zi boshqarish organlari hakamlik sudlarini tashkil etishi hamda hakamlik bitimi taraflari bo‘lishi mumkin emas”;

3) 6-moddaning birinchi, ikkinchi va uchinchi qismlari quyidagi tahrirda bayon etilsin:

“Doimiy faoliyat ko‘rsatuvchi hakamlik sudi nodavlat notijorat tashkiloti tomonidan tashkil etiladi va uning huzurida faoliyat ko‘rsatadi.

Doimiy faoliyat ko‘rsatuvchi hakamlik sudi nodavlat notijorat tashkiloti doimiy faoliyat ko‘rsatuvchi hakamlik sudini tashkil etish haqida qaror qabul qilganida, doimiy faoliyat ko‘rsatuvchi hakamlik sudining qoidalarini va kamida uch nafardan iborat hakamlik sudyalari ro‘yxatini tasdiqlaganida tashkil etilgan deb hisoblanadi.

Doimiy faoliyat ko‘rsatuvchi hakamlik sudini tashkil etgan nodavlat notijorat tashkiloti uning tashkil etilganligi to‘g‘risidagi hujjatlar nusxalarini hakamlik sudi joylashgan yerdagi adliya organiga yuboradi”;

4) 9-moddaning ikkinchi qismi quyidagi tahrirda bayon etilsin:

“Hakamlik sudlari ma’muriy, oilaviy va mehnatga oid huquqiy munosabatlardan kelib chiquvchi nizolarni, yer bilan bog‘liq, binolar va inshootlarga egalik huquqini belgilash, budjet tizimi budjetlaridan hamda davlat organlaridan, tashkilotlaridan va muassasalaridan, davlat ishtirokidagi korxonalardan, shuningdek fuqarolarning o‘zini o‘zi boshqarish organlaridan pul mablag‘larini undirish bilan bog‘liq nizolarni, shuningdek qonunda nazarda tutilgan boshqa nizolarni hal etmaydi”;

5) 14-modda:

quyidagi mazmundagi birinchi qism bilan to‘ldirilsin:

“Hakamlik sudyalari O‘zbekiston Respublikasi Adliya vazirligi tomonidan tasdiqlanadigan maxsus dastur asosida o‘quv kursidan o‘tishi hamda o‘z bilimlarini va kasbiy malakasini doimiy ravishda oshirib borishi kerak”;

birinchi — to‘rtinchi qismlari tegishincha ikkinchi — beshinchi qismlar deb hisoblansin;

beshinchi qismining ikkinchi xatboshisidagi “muomalaga layoqatsiz deb topilganligi to‘g‘risida sudning qonuniy kuchga kirgan hal qiluv qarori mavjud bo‘lgan shaxs” degan so‘zlar “muomalaga layoqatsiz deb topilgan shaxs” degan so‘zlar bilan almashtirilsin;

6) 15-moddaning ikkinchi qismidagi “yuridik shaxs” degan so‘zlar “nodavlat notijorat tashkiloti” degan so‘zlar bilan almashtirilsin;

7) 35-modda:

quyidagi mazmundagi uchinchi qism bilan to‘ldirilsin:

“Hakamlik muhokamasida hakamlik sudyasi bo‘lgan shaxs mazkur hakamlik muhokamasida taraflarning vakili sifatida ishtirok etishi mumkin emas”;

uchinchi va to‘rtinchi qismlari tegishincha to‘rtinchi va beshinchi qismlar deb hisoblansin;

8) 38-moddaning uchinchi qismidagi “35-moddasining uchinchi qismida” degan so‘zlar “35-moddasining to‘rtinchi qismida” degan so‘zlar bilan almashtirilsin;

9) 40-moddaning ikkinchi qismidagi “35-moddasining uchinchi qismi” degan so‘zlar “35-moddasining to‘rtinchi qismi” degan so‘zlar bilan almashtirilsin;

10) 46-moddaning birinchi qismi quyidagi tahrirda bayon etilsin:

“Hakamlik muhokamasi tarafi hakamlik sudining hal qiluv qarorini olgan kundan e’tiboran o‘ttiz kun ichida, huquqlari va majburiyatlari haqida hakamlik sudi hal qiluv qarorini qabul qilgan, ishda ishtirok etishga jalb qilinmagan shaxslar esa hakamlik sudi hal qiluv qarori qabul qilinganligi ularga ma’lum bo‘lgan kundan e’tiboran o‘ttiz kun ichida vakolatli sudga ushbu hal qiluv qarorini bekor qilishni so‘rab ariza berish yo‘li bilan hakamlik sudining hal qiluv qarori yuzasidan nizolashishi mumkin”;

11) 49-modda:

birinchi qismi “ijro etiladi” degan so‘zlardan keyin “bundan ushbu moddaning uchinchi qismida nazarda tutilgan hollar mustasno” degan so‘zlar bilan to‘ldirilsin;

quyidagi mazmundagi uchinchi qism bilan to‘ldirilsin:

“Hakamlik sudining hal qiluv qarori davlat organlari, tashkilotlari va muassasalari, davlat ishtirokidagi korxonalar, shuningdek fuqarolarning o‘zini o‘zi boshqarish organlari tomonidan ixtiyoriy ijro etilishi mumkin emas”.

3-modda. O‘zbekiston Respublikasining 2013-yil 26-dekabrda qabul qilingan O‘RQ-360-sonli Qonuni bilan tasdiqlangan O‘zbekiston Respublikasining Budjet kodeksiga (O‘zbekiston Respublikasi Oliy Majlisi palatalarining Axborotnomasi, 2013-yil, 12-songa 1-ilova; 2014-yil, № 9, 244-modda; 2015-yil, № 12, 452-modda; 2016-yil, № 12, 383, 385-moddalar; 2017-yil, № 6, 300-modda, № 10, 605-modda, № 12, 772-modda; 2018-yil, № 1, 1-modda, № 7, 431, 433-moddalar, № 12, 783-modda; 2019-yil, № 1, 1-modda, № 5, 265-modda, № 8, 470-modda, № 9, 588-modda, № 11, 791-modda, № 12, 884, 891-moddalar; 2020-yil, № 3, 203-modda, № 11, 652-modda, № 12, 691-modda; 2021-yil, № 1, 7, 13-moddalar, 4-songa ilova, № 8, 803, 804-moddalar, № 10, 973-modda, № 12, 1198-modda; 2022-yil, № 5, 464-modda, № 6, 577-modda; 2023-yil, № 4, 272-modda, № 11, 923-modda; 2024-yil, № 9, 958-modda, № 10, 1080-modda, № 12, 1285, 1297-moddalar; 2025-yil, № 2, 201-modda) quyidagi qo‘shimcha va o‘zgartirishlar kiritilsin:

1) 29-moddaning birinchi qismi:

quyidagi mazmundagi o‘ttiz uchinchi xatboshi bilan to‘ldirilsin:

“budjet tizimi budjetlaridan pul mablag‘larini undirish bilan bog‘liq sud muhokamalarida qonunda belgilangan tartibda ishtirok etadi hamda budjet manfaatlarini ko‘zlab sudlarga arizalar, da’vo arizalari va shikoyatlar kiritadi, jinoyat alomatlarini ko‘rsatuvchi ma’lumotlar aniqlangan taqdirda, bu haqda huquqni muhofaza qiluvchi organlarga xabar beradi”;

o‘ttiz uchinchi va o‘ttiz to‘rtinchi xatboshilari tegishincha o‘ttiz to‘rtinchi va o‘ttiz beshinchi xatboshilar deb hisoblansin;

2) 187-modda:

quyidagi mazmundagi uchinchi xatboshi bilan to‘ldirilsin:

“g‘aznachilik bo‘linmalarida ro‘yxatdan o‘tkazilmagan yoki ro‘yxatdan o‘tkazilishi rad qilingan, tovarlarni (ishlarni, xizmatlarni) yetkazib berish to‘g‘risida tuzilgan shartnomalarga, shuningdek ularga kiritilgan o‘zgartirishlar va qo‘shimchalarga asosan tovarlarni (ishlarni, xizmatlarni) qabul qilib olish”;

uchinchi, to‘rtinchi va beshinchi xatboshilari tegishincha to‘rtinchi, beshinchi va oltinchi xatboshilar deb hisoblansin.

4-modda. O‘zbekiston Respublikasining 2018-yil 22-yanvarda qabul qilingan O‘RQ-460-sonli Qonuni bilan tasdiqlangan O‘zbekiston Respublikasining Fuqarolik protsessual kodeksiga (O‘zbekiston Respublikasi Oliy Majlisi palatalarining Axborotnomasi, 2018-yil, 1-songa 1-ilova, № 10, 672-modda; 2019-yil, № 3, 166-modda, № 5, 261-modda, № 9, 592-modda, № 10, 671-modda, № 11, 791, 792-moddalar, № 12, 880-modda; 2020-yil, № 1, 1, 3-moddalar, № 3, 198, 199-moddalar; 2021-yil, № 1, 8-modda, 4-songa ilova, № 8, 803-modda, № 9, 903-modda; 2022-yil, № 3, 213-modda, № 8, 800-modda; 2023-yil, № 4, 269-modda, № 12, 1007-modda; 2024-yil, № 2, 115-modda, № 8, 827-modda, № 9, 964, 969-moddalar, № 11, 1191-modda, № 12, 1280, 1286-moddalar; 2025-yil, № 1, 8-modda, № 3, 373-modda, № 6, 729-modda) quyidagi qo‘shimchalar va o‘zgartirish kiritilsin:

1) 56-moddaning ikkinchi qismi:

quyidagi mazmundagi uchinchi xatboshi bilan to‘ldirilsin:

“arbitrlar, arbitraj tarkibi tomonidan tayinlangan ekspertlar, arbitraj muassasasining xodimlari, hakamlik sudyalari — arbitraj yoki hakamlik muhokamasi davomida o‘zlariga ma’lum bo‘lib qolgan holatlar to‘g‘risida”;

uchinchi xatboshisi to‘rtinchi xatboshi deb hisoblansin;

2) 70-modda quyidagi mazmundagi 4²-band bilan to‘ldirilsin:

“4²) hakamlik muhokamasi davomida ayni shu nizo bilan bog‘liq holda hakamlik sudyasi sifatida ishtirok etgan shaxslar”;

3) 181-moddaning birinchi qismi “sud buyrug‘ining ko‘chirma nusxasini olgan kundan e’tiboran o‘n kunlik muddatda” degan so‘zlardan keyin “huquqlari va majburiyatlari to‘g‘risida sud buyrug‘i qabul qilingan shaxslar esa sud buyrug‘i qabul qilinganligi ularga ma’lum bo‘lgan kundan e’tiboran o‘n kunlik muddatda” degan so‘zlar bilan to‘ldirilsin;

4) 349-moddaning birinchi qismi “qarorni olgan kundan e’tiboran o‘ttiz kun ichida” degan so‘zlardan keyin “huquqlari va majburiyatlari haqida hakamlik sudi hal qiluv qarorini qabul qilgan, ishda ishtirok etishga jalb qilinmagan shaxslar esa hakamlik sudi hal qiluv qarori qabul qilinganligi ularga ma’lum bo‘lgan kundan e’tiboran o‘ttiz kun ichida” degan so‘zlar bilan to‘ldirilsin;

5) 350-modda quyidagi mazmundagi sakkizinchi qism bilan to‘ldirilsin:

“Huquqlari va majburiyatlari haqida hakamlik sudi hal qiluv qarorini qabul qilgan, ishda ishtirok etishga jalb qilinmagan shaxslar hakamlik sudining hal qiluv qarorini bekor qilish to‘g‘risidagi arizaga ushbu modda to‘rtinchi qismining 2 va 3-bandlarida ko‘rsatilgan hujjatlarni ilova qilmagan taqdirda, mazkur hujjatlar sud tomonidan ularni saqlayotgan shaxsdan talab qilib olinadi”.

5-modda. O‘zbekiston Respublikasining 2018-yil 24-yanvarda qabul qilingan O‘RQ-461-sonli Qonuni bilan tasdiqlangan O‘zbekiston Respublikasining Iqtisodiy protsessual kodeksiga (O‘zbekiston Respublikasi Oliy Majlisi palatalarining Axborotnomasi, 2018-yil, 1-songa 2-ilova, № 7, 433-modda, № 10, 672-modda; 2019-yil, № 3, 166-modda, № 5, 261, 266-moddalar, № 9, 592-modda, № 10, 671-modda, № 11, 791-modda, № 12, 880-modda; 2020-yil, № 1, 1-modda, № 3, 198-modda, № 10, 593-modda; 2021-yil, № 1, 10-modda, 4-songa ilova, № 8, 803-modda, № 9, 903-modda; 2022-yil, № 3, 216-modda, № 5, 463-modda, № 6, 577-modda, № 8, 787-modda; 2023-yil, № 4, 269-modda; 2024-yil, № 2, 111-modda, № 9, 964, 969-moddalar, № 12, 1280, 1286-moddalar; 2025-yil № 3, 373-modda, № 6, 729-modda) quyidagi qo‘shimchalar va o‘zgartirish kiritilsin:

1) 65-modda:

quyidagi mazmundagi uchinchi qism bilan to‘ldirilsin:

“Hakamlik yoki arbitraj muhokamasi davomida ayni shu nizo bilan bog‘liq holda hakamlik sudyasi yoki arbitr sifatida ishtirok etgan shaxslar taraflarning vakili bo‘la olmaydi”;

uchinchi qismi to‘rtinchi qism deb hisoblansin;

2) 147-moddaning birinchi qismi “sud buyrug‘ining ko‘chirma nusxasini olgan kundan e’tiboran o‘n kunlik muddatda” degan so‘zlardan keyin “huquqlari va majburiyatlari to‘g‘risida sud buyrug‘i qabul qilingan shaxslar esa sud buyrug‘i qabul qilinganligi ularga ma’lum bo‘lgan kundan e’tiboran o‘n kunlik muddatda” degan so‘zlar bilan to‘ldirilsin;

3) 223-moddaning birinchi qismi “qarorni olgan kundan e’tiboran o‘ttiz kun ichida” degan so‘zlardan keyin “huquqlari va majburiyatlari haqida hakamlik sudi hal qiluv qarorini qabul qilgan, ishda ishtirok etishga jalb qilinmagan shaxslar esa hakamlik sudi hal qiluv qarori qabul qilinganligi ularga ma’lum bo‘lgan kundan e’tiboran o‘ttiz kun ichida” degan so‘zlar bilan to‘ldirilsin;

4) 224-modda quyidagi mazmundagi sakkizinchi qism bilan to‘ldirilsin:

“Huquqlari va majburiyatlari haqida hakamlik sudi hal qiluv qarorini qabul qilgan, ishda ishtirok etishga jalb qilinmagan shaxslar hakamlik sudining hal qiluv qarorini bekor qilish to‘g‘risidagi arizaga ushbu modda to‘rtinchi qismining 2 va 3-bandlarida ko‘rsatilgan hujjatlarni ilova qilmagan taqdirda, mazkur hujjatlar sud tomonidan ularni saqlayotgan shaxsdan talab qilib olinadi”.

6-modda. O‘zbekiston Respublikasining 2021-yil 22-aprelda qabul qilingan “Davlat xaridlari to‘g‘risida”gi O‘RQ-684-sonli Qonuni (O‘zbekiston Respublikasi Oliy Majlisi palatalarining Axborotnomasi, 2021-yil, № 4, 289-modda; 2024-yil, № 2, 111-modda, № 12, 1288-modda; 2025-yil, № 2, 188-modda, № 4, 519-modda, № 6, 730-modda) 27-moddasining to‘rtinchi qismi “axborot joylashtirish” degan so‘zlardan keyin “shartnomani tegishli g‘aznachilik bo‘linmasida ro‘yxatdan o‘tkazish” degan so‘zlar bilan to‘ldirilsin.

7-modda. O‘zbekiston Respublikasi Adliya vazirligi, Bosh prokuraturasi, Oliy sudi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

8-modda. O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

9-modda. Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.

Ushbu Qonun kuchga kirgan kunda faoliyat ko‘rsatayotgan hakamlik sudlari, hakamlik sudlarini tashkil etgan tashkilotlar o‘z faoliyatini uch oy ichida ushbu Qonunga muvofiqlashtirishi lozim.