Oliy taʼlim sohasida boshqaruv samaradorligini oshirish, istiqbolli va zamonaviy qarashlarga ega rahbar kadrlarni tayyorlash, shuningdek, ilgʻor bilim hamda yuksak malakalarni oʻzida mujassam etgan rektorlar korpusini shakllantirish maqsadida Vazirlar Mahkamasi qaror qiladi:

1. 2026-yil 1-iyuldan boshlab “Yangi Oʻzbekiston” universitetida (keyingi oʻrinlarda — Universitet) davlat oliy taʼlim tashkilotlari rektori (direktori) lavozimiga nomzodlarni tayyorlash boʻyicha “Rektorlar maktabi” dasturi (keyingi oʻrinlarda — Dastur) yoʻlga qoʻyilsin.

2. Belgilansinki:

Dastur davlat oliy taʼlim tashkilotlari rektori (direktori) lavozimiga nomzodlar zaxirasini shakllantirish maqsadida tashkil etiladi;

Dastur doirasida 30 yoshga toʻlgan, kamida magistr akademik darajasiga va oliy taʼlim sohasida kamida 5 yillik ish tajribasiga ega boʻlgan, shu jumladan, 2 yil rahbarlik lavozimlarida ishlagan shaxslar ochiq tanlov asosida oʻqishga qabul qilinadi;

Dastur tinglovchilarida akademik, moliyaviy, ilmiy va innovatsion boshqaruv, sunʼiy intellekt va raqamlashtirish, strategik boshqaruv va transformatsiya yoʻnalishlarida bilim va koʻnikmalar rivojlantiriladi;

Dasturning oʻquv jarayonlari masofaviy (onlayn) va ishlab chiqarishdan ajralgan holda (offlayn) olti oygacha boʻlgan muddatda tashkil etiladi;

Dasturga har yili 80 nafar tinglovchi qabul qilinadi hamda Dastur yakunlari boʻyicha eng yaxshi natija koʻrsatgan 40 nafargacha tinglovchi Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuboriladi.

3. Shunday tartib oʻrnatilsinki, unga koʻra:

a) Oliy taʼlim, fan va innovatsiyalar vazirligi Dastur doirasida davlat oliy taʼlim tashkiloti rektori (direktori) lavozimiga tinglovchilarni oʻqitish boʻyicha davlat buyurtmachisi hisoblanadi;

Bunda Dastur doirasida tinglovchilarning ishlab chiqarishdan ajralgan holda oʻqish davrida ularning asosiy ish joyi boʻyicha lavozimi va amaldagi oʻrtacha ish haqi saqlab qolinadi;

b) Dasturni muvaffaqiyatli tamomlagan tinglovchilarga belgilangan namunadagi sertifikat beriladi va Oliy taʼlim, fan va innovatsiyalar vazirligi tomonidan yuritiladigan davlat oliy taʼlim tashkilotlari rektori (direktori) lavozimiga nomzodlar zaxirasiga kiritiladi;

v) davlat oliy taʼlim tashkilotlari rektori (direktori) lavozimiga nomzodlar faqat Dasturni muvaffaqiyatli tamomlagan va oliy taʼlim tashkilotlari rektori (direktori) zaxirasiga kiritilgan shaxslar orasidan tanlab olinadi.

4. Oliy taʼlim, fan va innovatsiyalar vazirligi, Maktabgacha va maktab taʼlimi vazirligi 2026-yil 1-iyulga qadar:

Dasturga nomzodlarni saralash tartibini tasdiqlasin;

mazkur qarorda belgilangan talablardan kelib chiqib, oʻquv dasturini ishlab chiqsin hamda xalqaro eʼtirof etilgan tashkilotlar reytingida yuqori 200 talik roʻyxatga kirgan oliy taʼlim tashkiloti bilan kelishish choralarini koʻrsin;

Tashqi ishlar vazirligi bilan birgalikda eng yaxshi natija koʻrsatgan tinglovchilarni Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuborish boʻyicha muzokaralar olib borsin hamda tegishli kelishuvlarni imzolasin.

5. Dastur quyidagicha moliyalashtiriladi:

Dastur doirasida tinglovchilarni oʻqitish hamda Dastur yakuni boʻyicha har yili 40 nafargacha tinglovchini Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuborish xarajatlari Davlat budjeti mablagʻlari hisobidan qoplanadi;

tinglovchilarni oʻqitish va xorijiy nufuzli oliy taʼlim tashkilotlariga malaka oshirishga yuborish xarajatlari uchun zarur mablagʻlar Oliy taʼlim, fan va innovatsiyalar vazirligi tomonidan shartnoma asosida Universitetga oʻtkazib beriladi;

bitta tinglovchini oʻqitish xarajatlari miqdori har yili Universitet tomonidan Oliy taʼlim, fan va innovatsiyalar vazirligi hamda Iqtisodiyot va moliya vazirligi bilan kelishilgan holda tasdiqlanadi.

6. Iqtisodiyot va moliya vazirligi 2026-yilda ushbu qarorning ijrosi uchun talab etiladigan mablagʻlarni Oʻzbekiston Respublikasi budjetidan birinchi darajali budjet mablagʻlarini taqsimlovchi sifatida Oliy taʼlim, fan va innovatsiyalar vazirligiga ajratiladigan mablagʻlar doirasida moliyalashtirsin, 2027-yildan boshlab esa Oliy taʼlim, fan va innovatsiyalar vazirligining asoslangan hisob-kitoblariga koʻra har yilgi Davlat budjeti parametrlarida nazarda tutsin.

7. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda maktabgacha va maktab taʼlimi vaziri E.G. Karimova zimmasiga yuklansin.