Vazirlar Mahkamasi qayd qiladiki, respublikaning bir qator hududlarida paxtani qayta ishlash korxonalari zarur darajada texnik-iqtisodiy asoslashlarsiz, paxta tolasini puxta qayta ishlashga, ilg‘or texnologiyalarni qo‘llanishga, respublikaning eksport potensialini oshirishga yo‘naltirilgan qurilishlarning kompleksliligini ta’minlamasdan barpo etilmoqda. Umuman respublika bo‘yicha paxta tolasi balansini zaruriy hisobga olishga rioya qilinmayapti. Bu ko‘p jihatdan ko‘rsatib o‘tilgan masalalarni ishlab chiqishga mas’ul bo‘lgan bosh tashkilotning yo‘qligi bilan bog‘liqdir.

Oqibat natijada bu respublikaning eng muhim boyligi bo‘lgan paxta tolasidan foydalanish samaradorligining pasayishiga olib kelmoqda.

Paxta tolasidan foydalanishda zaruriy muvofiqlashtirishni va balanslanganlikni ta’minlash, uni qayta ishlashning kompleksliligini va puxtaligini oshirish maqsadida Vazirlar Mahkamasi qaror qiladi:

1. Paxtani qayta ishlash sanoatida yagona texnika va texnologiya siyosatini o‘tkazish, paxta tolasini qayta ishlashning kompleksliligini va puxtaligini ta’minlash chora-tadbirlarini muvofiqlashtirish, shuningdek, paxtani qayta ishlash korxonalari qurilishi loyihalarini mustaqil ekspertizadan o‘tkazishni amalga oshirish bo‘yicha bosh tashkilot vazifasi “O‘zmashsanoat” uyushmasining “O‘zengsanloyiha” loyihalash instituti (4-DLI)ga yuklansin.

“O‘zengsanloyiha” loyihalash instituti (4-DLI)ga, barpo etilayotgan korxonaning mulkchilikning shaklidan yoki idoraviy bo‘ysunishidan, shuningdek, mablag‘ bilan ta’minlanish, manbalaridan qat’i nazar, paxtani qayta ishlash korxonalarini qurish, qayta qurish, texnika bilan qayta jihozlash masalalari bo‘yicha kompleks xulosalarni ularning texnik-iqtisodiy jihatdan maqsadga muvofiqligidan kelib chiqqan holda ko‘rib chiqish va berishni amalga oshirish yuklansin.

Bosh vazirning Birinchi o‘rinbosari I.H. Jo‘rabekov, Bosh vazir o‘rinbosarlari Y.F.Paygin, B.S.Hamidov o‘rtoqlar “O‘zengsanloyiha” loyihalash instituti (4-DLI) tuzilmasida tegishli bo‘linmalarni tashkil etish va mustahkamlash bilan bog‘liq bo‘lgan barcha masalalarni hal etsinlar.

2. Paxta tolasidan foydalanish balanslarini ishlab chiqish va nazorat qilish bo‘yicha maxsus Komissiya ilovaga* muvofiq tuzilsin.

Komissiyaga quyidagilar yuklansin:

paxta tolasini ishlab chiqarish va taqsimlash, shu jumladan, MDH mamlakatlariga hamda eksportga chiqarish balanslarini ishlab chiqish;

paxta tolasini qayta ishlash korxonalarini joylashtirish masalalarini ko‘rib chiqish, shuningdek, bosh tashkilot — “O‘zengsanloyiha” loyihalash instituti (4-DLI) xulosalari asosida ruxsatnomalar berish.

3. Belgilab qo‘yilsinki:

paxta tolasini qayta ishlash korxonalarini qurish faqat ko‘rsatib o‘tilgan Komissiya ruxsati bilan amalga oshiriladi;

paxta tolasini qayta ishlash obyektlarini qurish va qayta qurishni banklar tomonidan mablag‘ bilan ta’minlash yuqorida qayd etilgan Komissiyaning ruxsatnomasi hamda obyektni yuqorida qayd etilgan Komissiyaning ruxsatnomasi hamda obyektni qurishning (qayta qurish yoki texnika bilan qayta jihozlashning) texnik-iqtisodiy jihatdan maqsadga muvofiqliligi to‘g‘risida bosh tashkilot — “O‘zengsanloyiha” (4-DLI) tomonidan beriladigan xulosa mavjud bo‘lgandagina amalga oshiriladi.

Belgilangan tartib buzilgan taqdirda loyihalash, qurish bo‘yicha barcha xarajatlar, shuningdek, tuzilgan shartnomalar bo‘yicha jarima sanksiyalari shaxsan mazkur korxonalarni qurish to‘g‘risida qaror qabul qilgan shaxslardan undirib olinsin.

4. “O‘zengsanloyiha” loyihalash instituti (4-DLI) manfaatdor tashkilotlar bilan birgalikda bir oy muddatda, xomashyodan kompleks foydalanish, ishlab chiqarish quvvatlarini samarali band etish, respublikaning eksport potensialini oshirish vazifalaridan kelib chiqqan holda, respublikada paxtani puxta qayta ishlashning butun texnologik siklini qamrab oluvchi korxonalarni joylashtirish, loyihalash va qurish ishlarini tashkil qilish to‘g‘risida takliflar kiritsin.

5. Mazkur qarorning bajarilishini nazorat qilish O‘zbekiston Respublikasining Bosh vaziri A.M.Mutalov va O‘zbekiston Respublikasi Bosh Prokurori B.M.Mustafoyev zimmasiga yuklansin.