O‘zbekiston Respublikasining “Pochta aloqasi to‘g‘risida”gi Qonuniga muvofiq buyuraman:

1. O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasining 2013-yil 21-oktabrdagi 57-mh-son “Havo kemalarida pochtani tashish qoidalarini tasdiqlash to‘g‘risida”gi qaroriga (ro‘yxat raqami 2530, 2013-yil 26-noyabr) (O‘zbekiston Respublikasi qonun hujjatlari to‘plami, 2013-y., 48-son, 628-modda) ilovaga muvofiq o‘zgartirishlar kiritilsin.

2. Mazkur buyruq O‘zbekiston Respublikasi Transport vazirligi bilan kelishilgan.

3. Mazkur buyruq rasmiy e’lon qilingan kundan e’tiboran kuchga kiradi.

1. Qarorning muqaddimasidagi “O‘zbekiston Respublikasining “Pochta aloqasi to‘g‘risida”gi Qonuni (O‘zbekiston Respublikasi qonun hujjatlari to‘plami, 2009-yil, 17-son, 209-modda), O‘zbekiston Respublikasi Havo kodeksiga (O‘zbekiston Respublikasi Oliy Kengashining Axborotnomasi, 1993-yil, 6-son, 247-modda)” degan so‘zlar “O‘zbekiston Respublikasining Havo kodeksi hamda “Pochta aloqasi to‘g‘risida”gi Qonuniga” degan so‘zlar bilan almashtirilsin.

2. Qoidalarda:

1) muqaddimadan “Umumjahon pochta konvensiyasi, O‘zbekiston Respublikasining “Pochta aloqasi to‘g‘risida”gi Qonuni (O‘zbekiston Respublikasi qonun hujjatlari to‘plami, 2009-y., 17-son, 209-modda) va O‘zbekiston Respublikasining Havo kodeksiga (O‘zbekiston Respublikasi Oliy Kengashining Axborotnomasi, 1993-y., 6-son, 247-modda) muvofiq” degan so‘zlar chiqarib tashlansin;

2) 2-bandda:

to‘rtinchi xatboshi quyidagi tahrirda bayon etilsin:

“havo kemasi — havo bilan o‘zaro ta’sir hisobiga, yer sathidan qaytgan havo bilan o‘zaro ta’sirdan tashqari, atmosferada harakatlanadigan uchish apparati;”;

oltinchi xatboshi quyidagi tahrirda bayon etilsin:

“yozma xat-xabarlar — oddiy va ro‘yxatga olinadigan xatlar, pochta varaqchalari, banderollar, mayda paketlar, ko‘zi ojizlar uchun jo‘natmalar va “M” qoplari;”;

3) 17-banddan “O‘z DSt 1099:2005 “Pochta qoplari. Texnik shartlar” talablariga mos keluvchi” degan so‘zlar chiqarib tashlansin;

4) 21-bandning birinchi xatboshisidan “iz tushirish moslamalarining izlari yoki” degan so‘zlar chiqarib tashlansin;

5) 55-bandning “v” kichik bandidagi “sekogrammalar” degan so‘z “ko‘zi ojizlar uchun mo‘ljallangan jo‘natmalar” degan so‘zlar bilan almashtirilsin.