Oʻzbekiston Respublikasining “Oʻzbekiston Respublikasi Markaziy banki toʻgʻrisida” va “Banklar va bank faoliyati toʻgʻrisida”gi qonunlari asosida qaror qilamiz:

1. Oʻzbekiston Respublikasi Moliya vazirligi va Markaziy bankining 2005-yil 14-yanvardagi 2 va 259-V-sonli qarori bilan tasdiqlangan “Qishloq xoʻjaligi korxonalarining davlat ehtiyojlari uchun xarid qilinadigan paxta va gʻalla yetishtirish xarajatlarini tijorat banklari tomonidan kreditlash tartibi toʻgʻrisidagi nizom”ga (2005-yil 2-fevral, roʻyxat raqami 1448 — Oʻzbekiston Respublikasi qonunlari toʻplami, 2005-yil, 5-6-son, 40-modda, 12-13-son, 95-modda) qoʻshimcha va oʻzgartirishlar ilovaga muvofiq kiritilsin.

2. Ushbu qaror Oʻzbekiston Respublikasi Adliya vazirligida roʻyxatdan oʻtgan kundan oʻn kundan soʻng kuchga kiradi.

1. 4-band quyidagi tahrirda bayon qilinsin:

“4. Kreditlar davlat ehtiyojlari uchun xarid qilinadigan paxta xomashyosi va gʻalla qiymatining 50 foizigacha miqdorida beriladi.

Bunda, kreditlar agrotexnik tadbirlar muddatidan kelib chiqqan holda quyidagi tartibda ajratiladi:

paxta xomashyosi yetishtirish xarajatlarini moliyalashtirish uchun hosil yetishtirilayotgan yilning 1-yanvariga qadar paxta xomashyosi qiymatining 5 foizigacha, 1-apreliga qadar 20 foizgacha, 1-iyunga qadar 35 foizgacha va 1-sentabrga qadar 50 foizgacha;

gʻalla yetishtirish xarajatlarini moliyalashtirish uchun hosil yetishtirilayotgan yilning 1-yanvariga qadar gʻalla qiymatining 20 foizgacha, 1-aprelga qadar 30 foizgacha va 1-iyunga qadar 50 foizgacha.

Qishloq xoʻjaligi korxonasi tomonidan davlat ehtiyojlari uchun yetkazib beriladigan mahsulot hajmining qiymati “Oʻzpaxtasanoat” uyushmasi va “Oʻzdonmahsulot” AK korxonalari (bundan keyingi matnlarda tayyorlov korxonalari) bilan tuzilgan kontraktatsiya shartnomalaridan kelib chiqqan holda oʻrnatiladi.

Kredit miqdorini aniqlash uchun amaldagi xarid narxlari asos qilib olinadi. Yangi xarid narxlari tasdiqlangach, kredit miqdori kredit oluvchining talabiga koʻra qayta hisoblab chiqiladi.”

2. 6-bandning toʻrtinchi xatboshisi quyidagi tahrirda bayon qilinsin:

“Bunda, ishlatilmagan kredit resurslari qishloq xoʻjaligi korxonasi tomonidan tasdiqlangan biznes-rejaga muvofiq gʻalla va paxta yetishtirish bilan bogʻliq boshqa ruxsat etilgan xarajat turlari boʻyicha, shuningdek qishloq xoʻjaligi texnikasi sotib olishga, ichki xoʻjalik irrigatsiya va kollektor-drenaj tarmoqlarini tozalashga ishlatilishi mumkin.”

3. 10-bandning beshinchi xatboshisi quyidagi tahrirda bayon qilinsin:

“debitor-kreditor qarzlar toʻgʻrisida maʼlumotnoma (2a-shakl) va moliyaviy natijalar toʻgʻrisida hisobot (2-shakl).”

4. 11-band quyidagi tahrirda yangi uchinchi xatboshi bilan toʻldirilsin:

“Tijorat banklari berilgan kreditlarning qaytishini taʼminlash maqsadida tayyorlov korxonalari tomonidan berilgan kreditlarni qaytarilishi borasida kafilligini qabul qilishlari mumkin.”

5. 12-banddagi “5 kun” soʻzlari “3 kun” soʻzlari bilan almashtirilsin.

6. 17-bandning birinchi xatboshisidagi “muddatli majburiyatnomalar asosida” soʻzlari olib tashlansin va quyidagi tahrirda beshinchi xatboshi bilan toʻldirilsin:

“Topshirilgan mahsulot uchun yakuniy hisob-kitoblarda tayyorlov korxonalari tomonidan qishloq xoʻjaligi korxonalariga yetkazib berilgan moddiy boyliklar qiymati va avvalgi yillar qarzlarini chegirib qolishga yoʻl qoʻyilmaydi. Ushbu moddiy boyliklar uchun hisob-kitoblar va qarzlarni qaytarish ajratilgan bank kreditlari toʻliq toʻlangach, qishloq xoʻjalik korxonasining toʻlov topshiriqnomalariga muvofiq amalga oshiriladi”.

7. 1-ilova ilovadagi tahrirda berilsin.

8. Mazkur oʻzgartirishlar Oʻzbekiston Respublikasi Qishloq va suv xoʻjaligi vazirligi, “Oʻzagrosugʻurta” DASK va Dehqon va fermer xoʻjaliklari uyushmasi bilan kelishilgan.