Oʻzbekiston Respublikasi Oliy Majlisi Senati Iqtisodiyot va moliya vazirligining mamlakat hududlarida xizmatlar sohasini rivojlantirish boʻyicha amalga oshirilgan ishlar haqidagi axborotini eshitib, bu borada muayyan ishlar amalga oshirilganini qayd etadi.

Xususan, joriy yilning yanvar — mart oylarida respublikada bozor xizmatlari hajmi 210,8 trln soʻmni tashkil etgan va oʻtgan yilning mos davriga nisbatan 112,6 foizga oshgan.

Hududlar kesimida xizmatlar sohasida yuqori oʻsish surʼatlari Toshkent shahrida (116,9 foiz), Samarqand (114,0 foiz) va Navoiy (113,1 foiz) viloyatlarida qayd etilgan.

Tarmoqlar kesimida oʻsish surʼatlari aloqa va axborotlashtirish (124,3 foiz), moliyaviy xizmatlar (119,6 foiz) va transport xizmatlari (111,5 foiz) hissasiga toʻgʻri kelgan.

Oʻzbekiston Respublikasi Prezidentining 2025-yil 27-fevraldagi PQ-78-sonli qarori bilan 2025-yilda xizmat koʻrsatish sohasida 3 mln fuqaroni daromadli mehnat bilan taʼminlash vazifasi belgilangan.

Joriy yilning yanvar — mart oylarida hududlarda 11,7 mingta yangi savdo va servis obyekti foydalanishga topshirilgan. Xususan, eng koʻp obyektlar chakana savdo (5,2 mingta) va maishiy xizmat sohalarida (1,4 mingta) ishga tushirilgan. Natijada hududlarda jami 23,3 mingdan ziyod yangi ish oʻrinlari yaratilgan.

Aloqa, axborotlashtirish va raqamli texnologiyalar sohasida hisobot davrida 16,8 trln soʻmlik xizmatlar koʻrsatilib, oʻtgan yilning mos davriga nisbatan oʻsish surʼati 124,3 foizni tashkil etgan.

Qoʻshimcha 19 ming km optik-tolali aloqa liniyalari qurilib, 163,5 mingta uy xoʻjaligi, tadbirkorlik subyektlari va ijtimoiy soha obyektlari keng polosali Internet jahon axborot tarmogʻiga ulanishi taʼminlangan.

Transport sohasida jami 40,4 trln soʻmlik xizmatlar koʻrsatilib, 2024-yilning mos davriga nisbatan oʻsish surʼati 111,5 foizni tashkil etgan. 3 708 ta yoʻnalishda 36,2 mingga yaqin jamoat transport vositalari harakatlanishi yoʻlga qoʻyilgan.

Respublikaga 2,1 mln xorijiy sayyoh tashrif buyurib, 927 mln AQSH dollarlik turizm xizmatlari koʻrsatilgan. “Oʻzbekiston boʻylab sayohat qil!” dasturi doirasida 2,3 mln kishi mamlakat hududlariga borgan. Turizm va unga yondosh sohalar yoʻnalishida 1,8 mingga yaqin yangi ish oʻrinlari yaratilgan.

Hududlarda 155 ta joylashtirish vositasi, jumladan 20 ta mehmonxona, 66 ta xostel, 60 ta oilaviy mehmon uylari faoliyati yoʻlga qoʻyilib, 194 ta turoperator va turagent tashkil etilgan.

Shuningdek, oʻrganish va tahlillar amalga oshirilgan ishlar bilan birga mazkur yoʻnalishda ayrim muammo va kamchiliklar borligini koʻrsatdi.

Xizmatlar sohasida yashirin iqtisodiyotning ulushi oʻtgan yilga nisbatan 19,3 trln soʻmga oshgan. 2025-yilning 1-apreli holatiga 11 771 ta yangi tadbirkorlik subyekti tashkil etilgan boʻlsa-da, 170 696 ta tadbirkor faoliyat koʻrsatmayapti, faoliyat yuritib kelgan 4 241 ta tadbirkor esa, oʻz faoliyatini tugatgan.

Oʻzbekiston Respublikasi Prezidentining 2025-yil 27-fevraldagi “Xizmatlar sohasi barqaror rivojlanishi uchun qulay shart-sharoitlar yaratishga oid qoʻshimcha chora-tadbirlar toʻgʻrisida”gi PQ-78-sonli qaroriga muvofiq hududlarda xizmatlar sohasini rivojlantirish boʻyicha maqsadli koʻrsatkichlar ijrosi toʻliq bajarilmagan.

Xususan, xizmatlar sohasida maqsadli koʻrsatkichlar Qoraqalpogʻiston Respublikasida 6,6 foizga, Buxoro viloyatida 5,0 foizga, Namangan viloyatida 4,8 foizga, Sirdaryo viloyatida 4,7 foizga, Jizzax viloyatida 4,3 foizga Surxondaryo viloyatida 3,3 foizga, Toshkent va Xorazm viloyatlarida 3,2 foizga bajarilmagan. Tarmoqlar kesimida maqsadli koʻrsatkichlar taʼlim (7,4 foizga), savdo (5,9 foizga), yashash va ovqatlanish (5,4 foizga) va sogʻliqni saqlash xizmatlarida (5,2 foizga) ijro etilmagan.

Hududlar kesimida 163 ta shahar va tumanlarda maqsadli koʻrsatkichlar ijrosini taʼminlamagan, shundan Qoʻngʻirot, Mirzachoʻl, Paxtakor tumanlari hamda Shahrisabz va Guliston shaharlari eng past koʻrsatkichni qayd etilgan.

Shuningdek, 592,8 ming kishining bandligi taʼminlangani boʻyicha “yangiish.mehnat.uz” platformasiga maʼlumotlar kiritilgan boʻlsa-da, amalda soliq idoralari tomonidan faqat 453,4 ming kishining bandligi tasdiqlangan.

Aholi bandligi Toshkent shahrida 61 325 taga, Namangan viloyatida 8 431 taga, Surxondaryo viloyatida 6 969 taga, Buxoro viloyatida 6 335 taga, Xorazm viloyatida 5 013 taga, Sirdaryo viloyatida 3 614 taga va Qoraqalpogʻiston Respublikasida 3 304 taga kam bajarilgan.

Bundan tashqari, hisobotlarda qoʻshib yozish holatlariga yoʻl qoʻyilgan. Jumladan, Toshkent viloyati Oʻrtachirchiq tuman kambagʻallikni qisqartirish va bandlikka koʻmaklashish boʻlimi tomonidan xizmatlar koʻrsatish yoʻnalishida 51 ta yangi ish oʻrni yaratilgani hisobotlarga qoʻshib yozilgan.

Xizmatlar sohasidagi mavjud imkoniyatlar toʻliq ishga solinmagan. Jumladan, 4,6 mingta xizmat koʻrsatish va savdo obyektini tashkil etishga moʻljallangan 902,6 gektar yer maydoni “E-auksion” elektron savdo platformasiga chiqarilgan boʻlsa-da, amalda atigi 111,4 gektarli 1,5 mingta obyekt (33 foiz) sotilgan.

Andijon viloyatining Jalaquduq tumani, Buxoro viloyatining Olot, Qorovulbozor va Shofirkon tumanlari, Qashqadaryo viloyatining Shahrisabz va Yakkabogʻ tumanlari, Navoiy viloyatining Navoiy va Gʻozgʻon shaharlari, Namangan viloyatining Namangan shahar, Mingbuloq, Namangan, Pop, Uychi va Yangiqoʻrgʻon tumanlari, Samarqand viloyatining Jomboy va Pastdargʻom tumanlari, Surxondaryo viloyatining Denov tumani, Sirdaryo viloyatining Guliston va Shirin shaharlari, Fargʻona viloyatining Quvasoy va Qoʻqon shaharlari, Bagʻdod, Qoʻshtepa, Rishton, Soʻx, Toshloq, Uchkoʻprik, Fargʻona va Oʻzbekiston tumanlarida ushbu sohada birorta ham yer maydoni auksion savdolariga chiqarilmagan.

Shuningdek, joriy yilning birinchi choragida respublika boʻyicha 2,5 mingta koʻchma savdo obyekti joyi “k-savdo” platformasi orqali savdolarga chiqarilgan boʻlsa-da, shundan atigi 933 tasi yoki 41 foizi boʻyicha savdolar oʻtkazilgan.

Qoraqalpogʻiston Respublikasining Kegeyli, Moʻynoq tumanlarida, Andijon viloyatining Boʻston, Jalaquduq, Izboskan, Oltinkoʻl, Paxtaobod, Ulugʻnor, Xoʻjaobod, Shahrixon tumanlarida, Buxoro viloyatining Gʻijduvon tumanida, Jizzax viloyatining Forish tumanida, Qashqadaryo viloyatining Dehqonobod tumanida, Navoiy viloyatining Navoiy va Gʻozgʻon shaharlarida, Namangan viloyatining Davlatobod, Uchqoʻrgʻon, Oltinsoy, Uzun tumanlarida hamda Fargʻona viloyatining Yozyovon va Soʻx tumanlarida esa, koʻchma savdo obyektlari joyi auksionga savdoga chiqarilmagan.

Bundan tashqari, oʻtkazilgan oʻrganishlar Toshkent shahrida avtomobillarning toʻxtash joylari tashkil etilmaganligi xizmatlar sohasidagi obyektlar faoliyatiga salbiy taʼsir koʻrsatmoqda.

Jumladan, Mirobod tumanidagi umumiy ovqatlanish obyektlarining yoʻl yuzida joylashganligi, ularda avtomobillarni toʻxtash joylari tashkil etilmaganligi mijozlarga noqulayliklar va yoʻlda tirbandliklarni yuzaga keltirgan.

Vaholanki, Oʻzbekiston Respublikasi Prezidentining 2023-yil 16-fevraldagi PQ-59-sonli qarorida nazarda tutilgan Davlat budjeti hisobidan yoki davlat-xususiy sheriklik asosida Toshkent shahrida koʻp qavatli avtoturargohlarni qurish tartibi Hukumatga kiritilgan boʻlsa-da, ushbu tartib bugungi kunga qadar tasdiqlanmagan.

Xizmatlar sohasini rivojlantirishda turizm, jumladan ichki turizm muhim ahamiyat kasb etsa-da, ushbu yoʻnalishda avia va temir yoʻl qatnovida yoʻlovchilarni (turistlarni) tashish hamda chipta olish masalalarida muammolar bugungi kungacha saqlanib qolgan.

Xususan, tahlillar koʻrsatganidek, masofaviy “onlayn” dasturlar 1 — 3 kunlik muddat oraligida (15 — 17-may), ayniqsa shanba, yakshanba kunlari Toshkent-Samarqand, Toshkent-Buxoro yoʻnalishlarida “Afrosiyob” tezyurar poyezdiga va shu yoʻnalishdagi boshqa poyezdlarga ham chiptalar mavjud emas. Bunday holat Toshkent-Urganch yoʻnalishida ham kuzatilgan. Shuningdek, Andijondan Xivaga faqat bitta reysda poyezd qoʻyilgan boʻlib, ushbu yoʻnalishda ham chiptalar sotuvda yoʻqligi aniqlangan. Buxoro va Samarqanddan Urganchga va Urganchdan Samarqandga (Urganch-Buxoro faqat 1 ta reys mavjud) aviareyslar yoʻlga qoʻyilmagan.

Toshkent viloyati 3 ta davlat (Qozogʻiston, Qirgʻiziston, Tojikiston) bilan chegaradosh boʻlishiga qaramasdan, chegara oldi hududlarda fuqarolarga, asosan chet el fuqarolariga tibbiy xizmat koʻrsatishga ixtisoslashtirilgan zamonaviy turdagi birorta ham klinika mavjud emas.

Bundan tashqari, respublikamizda 8 877 ta nodavlat tibbiyot tashkiloti aholiga tibbiy xizmat koʻrsatmoqda. Ammo ular tomonidan aholiga koʻrsatiladigan tibbiy xizmatlarning salmogʻi oshgani sari tibbiy xizmat sifatidan norozi boʻlib yozilgan shikoyatlar soni ortgan.

Xususan, hisobot davrida Sogʻliqni saqlash vazirligiga sohadagi xodimlarning xatti-harakati yuzasidan 3 195 marotaba murojaat boʻlgan boʻlsa, tibbiy davolanishni tashkil etish masalalari boʻyicha 6 317 ta murojaat kelib tushgan, umuman olganda murojaatlar soni oʻtgan yilning shu davriga nisbatan 3 foizga koʻpaygan.

Tijorat banklari tomonidan xizmatlar sohasiga ajratilgan muammoli kreditlar joriy yilning 1-aprel holatiga 2,5 trln soʻmni tashkil etib, qarzdorlik yil boshiga nisbatan 571 mlrd soʻmga oshgan.

Jumladan, kredit qarzdorligi summasi asosan savdo va umumiy ovqatlanish sohasida 2 trln soʻmni tashkil etgan yoki yil boshiga nisbatan 456 mlrd soʻmga koʻpaygan.

Yuqoridagilarni inobatga olib, tadbirkorlikni rivojlantirish borasidagi ishlarni yanada jadallashtirish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 9-moddasiga asosan Oʻzbekiston Respublikasi Oliy Majlisining Senati qaror qiladi:

1. Oʻzbekiston Respublikasi Iqtisodiyot va moliya vaziri oʻrinbosari A. Xaydarovning mamlakat hududlarida xizmatlar sohasini rivojlantirish boʻyicha amalga oshirilgan ishlar haqidagi axboroti maʼlumot uchun qabul qilinsin.

2. Oʻzbekiston Respublikasi Vazirlar Mahkamasi:

Oʻzbekiston Respublikasi Prezidentining 2025-yil 27-fevraldagi “Xizmatlar sohasi barqaror rivojlanishi uchun qulay shart-sharoitlar yaratishga oid qoʻshimcha chora-tadbirlar toʻgʻrisida”gi PQ-78-sonli qaroriga muvofiq hududlarda xizmatlar sohasini rivojlantirish boʻyicha maqsadli koʻrsatkichlar ijrosi ustidan qatʼiy nazorat oʻrnatsin;

bir oy muddatda maqsadli koʻrsatkichlarni bajarmagan 163 ta shahar va tuman hamda ortda qolayotgan Qoʻngʻirot, Mirzachoʻl, Paxtakor tumanlari hamda Shahrisabz va Guliston shaharlarining ushbu masalaga masʼul rahbarlarining masʼuliyatini oshirish choralarini koʻrsin;

uch oy muddatda Davlat budjeti hisobidan yoki davlat-xususiy sheriklik asosida Toshkent shahrida koʻp qavatli avtoturargohlarni qurish tartibini tasdiqlanishini taʼminlansin;

mazkur Qarorda belgilangan vazifalar ijrosi yuzasidan amalga oshirilgan ishlar toʻgʻrisidagi umumlashtirilgan maʼlumotni 2025-yilning 15-avgustiga qadar Oliy Majlis Senatiga kiritsin.

3. Oʻzbekiston Respublikasi Iqtisodiyot va moliya vazirligi tegishli vazirlik va idoralar bilan birgalikda:

hududlarda sohadagi mavjud imkoniyatlarni toʻliq ishga solish, xizmatlar turlarini kengaytirish va sifatini oshirish orqali oʻsish surʼatlarini taʼminlasin;

ikki oy muddatda xizmatlar sohasida yashirin iqtisodiyotning ulushini kamaytirish yuzasidan tadbirlar rejasini ishlab chiqsin va Yashirin iqtisodiyotni qisqartirish boʻyicha komissiyaga kiritsin;

bir oy muddatda hududlarda xizmatlar sohasida faoliyat koʻrsatmayotgan tadbirkorlik subyektlarining muammolarini hal etish orqali ularning faoliyatini tiklash chora-tadbirlari ishlab chiqilishini taʼminlasin;

xizmatlar koʻrsatish yoʻnalishida faoliyat koʻrsatuvchi korxonalarda xodimlarni ishga rasman qabul qilish va “yangiish.mehnat.uz” elektron platformasida qayd etish ustidan nazorat olib borsin;

Turizm qoʻmitasi, Transport vazirligi bilan birgalikda uch oy muddatda Oʻzbekiston boʻylab sayohat qilish va hududlarda ichki turizmni rivojlantirish hamda Samarqand, Buxoro va Xiva shaharlariga avia va temir yoʻl qatnovi yoʻnalishlarini koʻpaytirish masalasini koʻrib chiqsin;

Toshkent shahar hokimligi bilan birgalikda Toshkent shahrining koʻchalarida yoʻl yuzida joylashgan xizmat koʻrsatish sohasi obyektlarida avtomobillarni vaqtincha toʻxtash joylarini tashkil etish choralarini koʻrsin.

4. Oʻzbekiston Respublikasi Bosh prokuraturasi Iqtisodiyot va moliya vazirligi hamda Kambagʻallikni qisqartirish va bandlik vazirligi bilan birgalikda amalga oshirilgan loyihalarning natijadorligi hamda tashkil etilgan ish oʻrinlarining “yangiish.mehnat.uz” elektron platformasi orqali qabul qilingan maʼlumotlarning haqqoniyligini ustidan qatʼiy nazorat oʻrnatsin.

5. Oʻzbekiston Respublikasi Davlat aktivlarini boshqarish agentligi:

uch oy muddatda xizmatlar sohasidagi mavjud imkoniyatlarni toʻliq ishga solish maqsadida xizmat koʻrsatish va savdo obyektlarini tashkil etishga moʻljallangan yer maydonlarini “E-auksion” elektron savdo platformasiga chiqarish va savdosini tashkil etish choralarini koʻrsin;

Oʻzbekiston Respublikasi Vazirlar Mahkamasi huzuridagi Soliq qoʻmitasi bilan birgalikda koʻchma savdo obyektini joylashtirish uchun vaqtincha foydalanilmayotgan yer uchastkalari “k-savdo” avtomatlashtirilgan axborot tizimi orqali xizmat koʻrsatish sohasidagi tadbirkorlarga sotilishini taʼminlasin.

6. Oʻzbekiston Respublikasi Sogʻliqni saqlash vazirligi tegishli vazirlik va idoralar bilan birgalikda:

sogʻliqni saqlash tizimida xizmatlar sohasini yanada rivojlantirish maqsadida tibbiyot muassasalarida pullik xizmat koʻrsatish jarayoniga malakali mutaxassislarni jalb qilsin hamda aholiga yuqori sifat va tibbiyot-sanitariya standartlariga muvofiq xizmat koʻrsatilishi ustidan nazorat olib borsin;

bir oy muddatda Toshkent viloyatining chegara oldi hududlarida chet el fuqarolarini davolash va ularga diagnostika xizmatlarini koʻrsatish orqali tibbiy xizmatlar eksportini tashkil etish masalasini oʻrganib chiqib, Vazirlar Mahkamasiga takliflar kiritsin.

7. Oʻzbekiston Respublikasi Transport vazirligi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi bilan birgalikda ikki oy muddatda Oʻzbekiston boʻylab sayohat qilish va hududlarda ichki turizmni rivojlantirish hamda Samarqand, Buxoro va Xiva shaharlariga avia va temir yoʻl qatnovi yoʻnalishlarini koʻpaytirish masalasini koʻrib chiqsin hamda tegishli takliflar tayyorlasin.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

hududlarning iqtisodiy oʻsishini taʼminlashda xizmatlar sohasini muhim “drayver”ga aylantirib, oʻsish surʼatlarini taʼminlasin;

tijorat banklari tomonidan xizmatlar sohasiga ajratilgan kreditlar oʻz vaqtida qaytarilishini taʼminlash va muddati oʻtgan muammoli kreditlarni qisqartirish choralarini kuchaytirsin.

9. Qoraqalpogʻiston Respublikasi Joʻqorgʻi Kengesi, xalq deputatlari viloyat, Toshkent shahar va tuman (shahar) Kengashlariga:

hududlarning oʻziga xos xususiyatlaridan kelib chiqib, alohida yondashuvlar asosida xizmatlar sohasini rivojlantirish, tadbirkorlik subyektlarini moliyaviy resurslar va infratuzilma bilan taʼminlash hamda ularga qulay sharoitlar yaratish boʻyicha ishlar ustidan deputatlik nazoratini kuchaytirish;

tegishli hokimlarning hududni ijtimoiy-iqtisodiy rivojlantirish borasidagi hisobotini eshitishda hududda mavjud imkoniyatlarni toʻliq ishga solish orqali xizmatlar sohasini rivojlantirish borasida amalga oshirilayotgan ishlarga eʼtibor qaratish tavsiya etilsin.

10. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Budjet va iqtisodiy masalalar qoʻmitasi (E. Gadoyev) zimmasiga yuklansin.