Ўзбекистон Республикасининг «Ичимлик суви таъминоти ва оқова сувларни чиқариб юбориш тўғрисида»ги қонунининг 46-моддаси, Ўзбекистон Республикаси Президентининг 2020 йил 25 сентябрдаги «Ичимлик суви таъминоти ва оқова сув тизимини янада такомиллаштириш ҳамда соҳадаги инвестиция лойиҳалари самарадорлигини ошириш чора-тадбирлари тўғрисида» ПФ-6074 сонли Фармони, Ўзбекистон Республикаси Вазирлар Маҳкамасининг 2024 йил 16 апрелдаги «Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида» 204 сон қарори ҳамда Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 24-моддаларига мувофиқ халқ депутатлари Сурхондарё вилояти Кенгаши қарор қилади:

1. Рақобатни ривожлантириш ва истеъмолчилар ҳуқуқларини ҳимоя қилиш қўмитасининг вилоят ҳудудий бошқармасининг 2025 йил 12 мартдаги 01-05/1732 сонли ҳамда вилоят Иқтисодиёт ва молия бош бошқармасининг 2025 йил 19 мартдаги 22-20-10/104 сонли хулосалари ва «Сурхондарё сув таъминоти» акциядорлик жамиятининг 2025 йил 19 мартдаги 6/316 сонли вилоятдаги сув таъминоти ва оқова сув хизматлари учун тартибга солинадиган нархлари (тарифлари)ни белгилаш тўғрисидаги таклифлари маъқуллансин.

2. Қуйидагилар:

Сурхондарё вилоятида ичимлик суви ва оқова сув хизматлари нархлари (тарифлари) 1-иловага;

дизель ёқилғи билан транспортда ташиб етказилиб бериладиган ичимлик сув нархлари (тарифлари) 2-иловага;

сиқилган газ билан транспортда ташиб етказилиб бериладиган ичимлик сув нархлари (тарифлари) 3-иловага мувофиқ тасдиқлансин.

3. Сурхондарё вилояти ҳокимлиги (А.Амиров), «Сурхондарё сув таъминоти» акциядорлик жамияти (А.Маматқулов) Ўзбекистон Республикаси Президентининг 2022 йил 2 августдаги «Европа тикланиш ва тараққиёт банки иштирокида «Наманган вилояти Чуст, Поп ва Наманган туманлари ичимлик сув таъминотини яхшилаш ҳамда Чуст ва Мингбулоқ туманлари марказларида оқова сув тизимларини қуриш» ҳамда «Оқтош» ва «Пошхурт» ер ости сув манбаларидан сув қувури қуриш йўли билан Сурхондарё вилояти Музработ туманининг сув таъминотини яхшилаш» лойиҳаларини амалга ошириш чора-тадбирлари тўғрисида» ПҚ-342 сон қарорининг 8-иловасига асосан:

ҳар чоракда тегишлилиги бўйича халқ депутатлари туман ва шаҳар Кенгашларига аҳолини ичимлик ва оқова сув билан таъминлаш даражасини ошириш бўйича амалга оширилган ишлар ҳамда келгусидаги режалар тўғрисида;

ҳар ярим йилда халқ депутатлари вилоят Кенгашига аҳолини ичимлик ва оқова сув билан таъминлаш даражасини ошириш бўйича амалга оширилган ишлар ҳамда келгусидаги режалар тўғрисида;

ҳар йили 1 июнга қадар вилоятда ичимлик ва оқова сув хизматлари тарифларини қайта кўриб чиқиш орқали истеъмолчиларга кўрсатиладиган хизматлар сифатини ошириш ҳамда корхона мажбуриятларини ўз вақтида бажаришнинг молиявий манбаларини шакллантириш, ичимлик ва оқова сув тарифларини халқ депутатлари вилоят Кенгашига тасдиқлаш учун киритиб борсин;

истеъмолчилар сонини ва хизмат кўрсатиш ҳажмларини ошириш, дебитор қарздорликларни камайтириш, сув йўқотишлари ҳажмини қисқартириш ҳамда мавжуд қувватларни модернизация қилиш ва техник жиҳозлаш, шунингдек, тўлов интизомини мустаҳкамлаш юзасидан туман ва шаҳарлар кесимида тасдиқланган чора-тадбирлар режаси бўйича ҳар чоракда туман (шаҳар) ҳокимлари томонидан халқ депутатлари вилоят Кенгашига ҳисобот берилишини таъминласин.

4. «Сурхондарё сув таъминоти» акциядорлик жамияти (А.Маматқулов) туман (шаҳар)ларда аниқ манзилли ва муддатли режа-график асосида 2025 йил апрель-май ойларида аҳоли ўртасида ичимлик суви ва оқова сув хизматлари учун тўловларни онлайн амалга ошириш бўйича турли шаклдаги тарғибот тадбирларини ташкил этсин ва натижаси юзасидан 2025 йил 1 июнга қадар халқ депутатлари вилоят Кенгашига ёзма ахборот киритсин.

5. Вилоят Ахборот ва оммавий коммуникациялар бошқармаси (З.Тўраев), «Сурхондарё» вилоят телерадиокомпанияси (Б.Мингбоев), «Сурхон тонги» ва «Заря Сурхана» газеталари таҳририяти (С.Норқобилов)га соҳада амалга оширилаётган ишларни оммавий ахборот воситаларида ва интернет тармоқларида кенг ёритиб бориш тавсия этилсин.

6. Халқ депутатлари Сурхондарё вилояти Кенгашининг 2024 йил 14 мартдаги «Сурхондарё вилоятида ичимлик суви ва оқова сув хизматлари нархлари (тарифлари)ни белгилаш тўғрисида» VI-83-49-8-0-K/24-сонли қарори ўз кучини йўқотган деб ҳисоблансин.

7. Ушбу қарорнинг ижросини назорат қилиш халқ депутатлари вилоят Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (И.Ёқубов) зиммасига юклансин.

8. Мазкур қарор оммавий ахборот воситаларида эълон қилингандан кейин ўн беш кун ўтгач кучга киради.