O‘zbekiston Respublikasi Prezidentining “O‘zbekiston Respublikasi Prezidentining tadbirkorlar bilan to‘rtinchi ochiq muloqotida belgilangan vazifalarni amalga oshirish chora-tadbirlari to‘g‘risida” 2024-yil 30-avgustdagi PF-132-son qarori ijrosini ta’minlash maqsadida Vazirlar Mahkamasi qaror qiladi:

1. Vazirlar Mahkamasining 2020-yil 14-avgustdagi 489-son qarori bilan tasdiqlangan Qo‘shilgan qiymat soligi summasi o‘rnini qoplash tartibi to‘g‘risidagi nizomning 14-bandi quyidagi tahrirda bayon etilsin:

“14. Bojxona organlari tomonidan real vaqt rejimida elektron axborot almashinuvi vositasida soliq organlariga O‘zbekiston Respublikasi Soliq kodeksining 133-moddasiga muvofiq tovarlar bojxona chegarasini kesib o‘tganligi to‘g‘risida taqdim etilgan ma’lumotlar tovarlar eksport qilinganligini tasdiqlash uchun asos bo‘ladi. Bunda eksport operatsiyalarini tasdiqlovchi hujjatlarni soliq organlariga taqdim etish talab etilmaydi.

Eksport operatsiyalari bo‘yicha soliq summasi o‘rnini qoplash to‘g‘risidagi arizaga quyidagi hujjat va ma’lumotlar ilova qilinadi:

ushbu Nizomga 6-ilovaga muvofiq shakldagi tovarlar eksport qilinganligi hamda chet el hamkorlari to‘g‘risidagi ma’lumotlar;

tovarlar eksportga vositachi (ishonchli vakil) orqali vositachilik (topshiriq) shartnomasi bo‘yicha realizatsiya qilinganda, eksportni tasdiqlash uchun komitent (ishonch bildiruvchi) tomonidan qo‘shimcha tarzda soliq to‘lovchining vositachi yoki ishonchli vakil bilan tuzilgan vositachilik shartnomasi yoki topshiriq shartnomasi (shartnomaning ko‘chirma nusxasi);

yo‘lovchilar, bagajlar, yuklar va pochtani xalqaro yo‘nalishda tashish bo‘yicha xizmatlar ko‘rsatilganda — ushbu Nizomga 5-ilovaga muvofiq shaklda to‘ldirilgan yo‘lovchilar, bagajlar, yuklar va pochtani xalqaro yo‘nalishda tashish bo‘yicha yagona xalqaro tashish xujjatlari reyestri.

Eksport operatsiyalari bo‘yicha ma’lumotlar Tashqi savdo operatsiyalarining yagona elektron axborot tizimi hamda soliq va bojxona organlari o‘rtasida axborot almashinuvi tizimida mavjud bo‘lmaganda arizaga quyidagi hujjatlar ilova qilinishi talab etiladi:

kontrakt (kontraktning belgilangan tartibda tasdiqlangan ko‘chirma nusxasi);

tovarlarni O‘zbekiston Respublikasi bojxona hududidan olib chiqish uchun asos bo‘lgan bojxona yuk deklaratsiyasi;

O‘zbekiston Respublikasining bojxona hududidan o‘tkazish punktida joylashgan bojxona organining tovarlar ortilgan transport vositalari bojxona chegarasini kesib o‘tganligini tasdiqlovchi belgisi qo‘yilgan tovarning kuzatuv hujjatlari;

valyuta tushganligini tasdiqlovchi bank ma’lumotnomasi;

tovarlar eksport qilinganligini tasdiqlash uchun amalga oshirilayotgan faoliyatning turiga qarab boshqa hujjatlar”.

2. O‘zbekiston Respublikasi Soliq qo‘mitasi va Iqtisodiyot va moliya vazirligi huzuridagi Bojxona qo‘mitasi bir oy muddatda ushbu qarorga muvofiq amalga kiritilayotgan o‘zgartirishlardan kelib chiqib, axborot tizimlariga tegishli o‘zgartirishlar kiritish choralarini ko‘rsin.

3. Ushbu qarorning bajarilishini nazorat qilish O‘zbekiston Respublikasi Soliq qo‘mitasi raisi Sh.D. Kudbiyev, Iqtisodiyot va moliya vazirligi xuzuridagi Bojxona qo‘mitasi raisi A.Yu. Mavlonov zimmasiga yuklansin.