O‘zbekiston Respublikasi Oliy Kengashining “O‘zbekiston Respublikasi hududida joylashgan, ittifoq tasarrufida bo‘lgan davlat korxonalarini, muassasalarini va tashkilotlarini O‘zbekiston Respublikasi yurisdiksiyasiga o‘tkazish to‘g‘risida” 1991-yil 22-iyuldagi qaroriga muvofiq Vazirlar Mahkamasi qaror qiladi:

1. O‘rta Osiyo irrigatsiya ilmiy-tadqiqot institutining ilmiy ishlab-chiqarish birlashmasi O‘zbekiston Respublikasi Melioratsiya va suv xo‘jaligi vazirligi tizimiga kiritilsin.

2. Belgilansinki, O‘rta Osiyo irrigatsiya ilmiy-tadqiqot institutining ilmiy-ishlab chiqarish birlashmasi quyidagilarni amalga oshiradi:

O‘zbekiston Respublikasi Qishloq xo‘jaligi vazirligi, O‘zbekiston Respublikasi Davlat suv xo‘jaligi qurilishi qo‘mitasi bilan yaqin hamkorlikda qurg‘oqchil zonadagi sug‘oriladigan yerlarda qishloq xo‘jaligi ekinlaridan programmalashtirilgan kafolatli hosil olinishini ta’minlovchi yer ustidan mexanizatsiyalashtirilgan sug‘orish konstruksiyalarini, ularni qurish va ishlatish texnologiyalarini ishlab chiqish, tajriba uchastkalarida sinovdan o‘tkazish, ishlab chiqarish sharoitlarida joriy etish;

qurg‘oqchil zonada meliorativ tizimlarni qurish va ishlatish uchun yangi texnika yaratish va uni ko‘plab ishlab chiqarish;

drenajlarni, tuproq orasidan va tomchilab sug‘orish tizimlari uchun Yangi konstruksiyalarni va buyumlarni tayyorlash;

Orol dengizi havzasi suv resurslaridan foydalanish samaradorligini oshirishga qaratilgan kompleks tadbirlarni ishlab chiqish va joriy etish hamda Orolbo‘yi muammolarini hal etishda qatnashish;

yangi texnologik jarayonlarni yaratish va ularni qurilishiga keng joriy etish, gidromeliorativ tizimlarni qayta qurish va ishlatish.

3. O‘zbekiston Respublikasining Taraqqiyot istiqbolini belgilash qo‘mitasi, Moliya vazirligi belgilangan tartibda O‘rta Osiyo irrigatsiya ilmiy-tadqiqot institutining ilmiy-ishlab chiqarish birlashmasiga suvni tejash, yerlar melioratsiyasi, Orolbo‘yi muammolari bo‘yicha davlat dasturlarini amalga oshirishda qatnashish uchun zarur kapital mablag‘larni va ilm-fanga budjetdan mablag‘lar ajratishni nazarda tutsinlar.

4. O‘zbekiston Respublikasining Taraqqiyot istiqbolini belgilash qo‘mitasi, “O‘zshartnomasavdo” va O‘zbekiston Respublikasining boshqa ta’minot-sotish tashkilotlari, belgilangan tartibga muvofiq, 1992-yildan boshlab O‘rta Osiyo irrigatsiya ilmiy-tadqiqot institutining ilmiy-ishlab chiqarish birlashmasiga hukumatlararo bitimlar va shartnomalarning ilovalariga kiritilgan birkitilgan nomenklatura bo‘yicha moddiy resurslar ajratishni nazarda tutsinlar.

Hukumatlararo bitimlar va shartnomalarning, ilovalariga kirmagan mahsulotlar bo‘yicha “O‘zshartnomasavdo”, O‘zbekiston Respublikasining boshqa ta’minot-sotish tashkilotlari O‘rta Osiyo irrigatsiya ilmiy-tadqiqot institutining ilmiy-ishlab chiqarish birlashmasiga mahsulot yetkazib beruvchilar bilan xo‘jalik aloqalarini o‘rnatish borasida ko‘maklashsinlar.

5. Melioratsiya va suv xo‘jaligi vazirligi vazirlik tizimiga kiruvchi korxonalar va tashkilotlar ro‘yxatiga o‘zgartirishlar, zarurat bo‘lganda vazirlik to‘g‘risidagi Nizomga aniqliklar kiritsin.