LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Yevropa tiklanish va taraqqiyot bankining kredit mablag‘laridan samarali foydalanish, metall quyish hajmlarini ko‘paytirish hamda yuk vagonlarining har xil turlarini yig‘ish va ta’mirlash bo‘yicha yangi ishlab chiqarishlarni o‘zlashtirish, “Irgidromash” ochiq aksiyadorlik jamiyatining ishlab chiqarish quvvatlaridan oqilona foydalanish maqsadida Vazirlar Mahkamasi qaror qiladi:
1. O‘zbekiston Respublikasi Davlat mulki qo‘mitasi, Qishloq va suv xo‘jaligi vazirligi hamda “O‘zbekiston temir yo‘llari” davlat-aksiyadorlik kompaniyasining “Irgidromash” ochiq aksiyadorlik jamiyatini “O‘zbekiston temir yo‘llari” davlat-aksiyadorlik kompaniyasi “O‘ztemiryo‘lta’mirmash” korxonasining shu’ba korxonasiga aylantirish, uning bazasida “Dizel lokomotivlari parkini zamonaviylashtirish” investitsiya loyihasining metall quyish qismini amalga oshirish uchun “Irgidromash” ochiq aksiyadorlik jamiyatining asosiy vositalarini mazkur korxona balansiga tekin o‘tkazish to‘g‘risidagi taklifiga rozilik berilsin.
2. O‘zbekiston Respublikasi Qishloq va suv xo‘jaligi vazirligi “Suvsanoatenergo” korxonasi balansidan suv olish inshooti bo‘lgan bug‘qozonxonani va 18-qurilayotgan korxonalar birlashgan direksiyasi balansidan qurilishi tugallanmagan ma’muriy korpusni qoldiq qiymati bo‘yicha “O‘zbekiston temir yo‘llari” davlat-aksiyadorlik kompaniyasining “O‘ztemiryo‘lta’mirmash” korxonasi balansiga o‘tkazishni belgilangan tartibda amalga oshirsin.
3. “O‘zbekiston temir yo‘llari” davlat-aksiyadorlik kompaniyasining “O‘ztemiryo‘lta’mirmash” korxonasi o‘z mulkiga tekin oladigan asosiy vositalar bo‘yicha daromad (foyda) solig‘i to‘lashdan ozod qilinsin.
4. “O‘zbekiston temir yo‘llari” davlat-aksiyadorlik kompaniyasi O‘zbekiston Respublikasi Qishloq va suv xo‘jaligi vazirligining foydalanish va qurilish bo‘linmalari tomonidan “Irgidromash” shu’ba korxonasiga beriladigan buyurtmalarning o‘z vaqtida va sifatli bajarilishini qonun hujjatlarida belgilangan tartibda ta’minlasin.
5. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi to‘g‘risida” 2003-yil 17-apreldagi 185-son qaroriga 3-ilovadan 304 (“Irgidromash”) pozitsiyasi chiqarib tashlansin.
6. Vazirlar Mahkamasining “Yevropa tiklanish va taraqqiyot banki ishtirokida “Dizel lokomotivlari parkini zamonaviylashtirish” loyihasini amalga oshirish chora-tadbirlari to‘g‘risida” 2002-yil 26-dekabrdagi 451-son qarori 2-bandining uchinchi xatboshi quyidagi tahrirda bayon qilinsin:
“Yevropa tiklanish va taraqqiyot bankining kredit mablag‘lari tender asosida kompaniya lokomotivlari uchun yordamchi asbob-uskunalar bilan dizel-generator qurilmalari, shuningdek “Irgidromash” korxonasi bazasida metall quyish uchun asbob-uskunalar sotib olishga yo‘naltiriladi”.