Oʻzbekiston Respublikasi Prezidentining “Toshkent moliya-qurilish korporatsiyasi (“Toshkentuyjoyinvestqurilish”)ni tugatish toʻgʻrisida” 2000-yil 11-apreldagi PF-2572-son Farmoniga muvofiq hamda Toshkent shahri qurilish tashkilotlarining bozor sharoitlarida samarali faoliyat koʻrsatishini taʼminlash, ularning mustaqilligini kengaytirish va qurilish xizmatlari bozorida raqobat muhitini yaratish maqsadida Vazirlar Mahkamasi qaror qiladi:

1. “Toshkentuyjoyinvestqurilish” Toshkent moliya-qurilish korporatsiyasi boʻyicha tugatish komissiyasi tarkibi 1-ilovaga* muvofiq tasdiqlansin.

Tugatish komissiyasi “Toshkentuyjoyinvestqurilish” korporatsiyasini tugatish, shuningdek, majburiyatlar va huquqiy vorislik masalalarini hal etish ishlari tashkil qilinishini qonun hujjatlarida belgilangan tartibda bir oy muddatda amalga oshirsin.

2. Oʻzbekiston Respublikasi Prezidentining “Toshkent moliya-qurilish korporatsiyasi (“Toshkentuyjoyinvestqurilish”)ni tugatish toʻgʻrisida”gi Farmoniga binoan tugatilayotgan korporatsiya tarkibidagi pudrat qurilish trestlari va tashkilotlari, sanoat va Transport korxonalari hamda boshqa xoʻjalik yurituvchi subyektlar moliya-xoʻjalik faoliyatini amalga oshiruvchi mustaqil yuridik shaxslar hisoblanishi amal qilish uchun qabul qilinsin hamda pudrat ishlarini va boshqa ishlarni amalga oshirish yuzasidan tenderlarda mustaqil ravishda qatnashishga haqlidirlar.

3. Toshkent shahri qurilish industriyasining mulkchilikning barcha shakllaridagi pudrat qurilish tashkilotlari va korxonalarining ular tomonidan toʻliq ixtiyoriy asosda “Toshkentqurilish” qurilish uyushmasini tashkil etish toʻgʻrisidagi taklifi qabul qilinsin.

Quyidagilar “Toshkentqurilish” qurilish uyushmasining asosiy vazifalari etib belgilansin:

pudrat-qurilish ishlari bozorini oʻrganish, marketing tadqiqotlari oʻtkazish, Toshkent shahrini obodonlashtirishning uzoq muddatli dasturlarini ishlab chiqish va amalga oshirish;

uyushma aʼzolariga konsalting, injiniring va axborot xizmatlari koʻrsatish;

uyushma tarkibiga kiruvchi pudrat qurilish tashkilotlari va qurilish industriyasi korxonalari faoliyatini muvofiqlashtirib borish, xizmat koʻrsatuvchi korxonalar va tashkilotlar bilan shartnomaviy kooperativ aloqalarni amalga oshirish;

uyushma aʼzolariga ilgʻor qurilish texnologiyalarini, qurilish ishlab chiqarishini tashkil qilishning zamonaviy usullarini joriy etishda koʻmaklashish;

uyushma korxonalarining xorijiy sarmoyalar jalb etilgan yirik investitsiya loyihalarini amalga oshirishda qatnashish boʻyicha faoliyatini muvofiqlashtirib borish;

uyushma aʼzolariga pudrat ishlarining respublika va tashqi bozorlariga chiqishda koʻmaklashish;

uyushma aʼzolari boʻlgan korxona va tashkilotlar xodimlari malakasini oshirishda amaliy yordam koʻrsatish.

4. “Toshkentqurilish” uyushmasi ijro etuvchi apparati tuzilmasiga 2-ilovaga* muvofiq va uning shtatdagi xodimlari cheklangan sonining 30 nafardan iborat boʻlishiga (xizmat koʻrsatuvchi xodimlarni hisobga olmagan holda) rozilik berilsin. Belgilansinki, uyushma ijro etuvchi apparatiga sarflanadigan joriy xarajatlar uning qatnashchilari ajratadigan mablagʻlar hisobiga qoplanadi.

“Toshkentqurilish” uyushmasi boshqaruvi raisi va uning oʻrinbosariga tegishli ravishda vazir va vazir oʻrinbosari uchun belgilangan moddiy-maishiy va tibbiy xizmat koʻrsatish shart-sharoitlari tatbiq etilsin.

Vazirlar Mahkamasining Qurilish va qurilish materiallari sanoati kompleksi va Toshkent shahar hokimligi bir oy muddatda qonun hujjatlarida belgilangan tartibda “Toshkentqurilish” uyushmasi taʼsis konferensiyasi oʻtkazilishini va uning ustavi tasdiqlanishini taʼminlasinlar,

5. Oʻzbekiston Respublikasi Davlat mulki qoʻmitasi Vazirlar Mahkamasining Qurilish va qurilish materiallari sanoati kompleksi, tugatilayotgan “Toshkentuyjoyinvestqurilish” korporatsiyasi tarkibiga kirgan hamda ustav jamgʻarmasida davlat ulushi boʻlgan aksiyadorlik jamiyatlari bilan birgalikda davlatga tegishli aksiyalar paketini saqlab qolish maqsadga muvofiq boʻlgan korxonalar va tashkilotlar roʻyxati va aksiyalar miqdori toʻgʻrisidagi taklifni ikki hafta muddatda ishlab chiqsin va Vazirlar Mahkamasiga kiritsin.

6. Tugatilayotgan “Toshkentuyjoyinvestqurilish” korporatsiyasi tarkibiga kirgan pudrat qurilish trestlariga 2000-yilning birinchi yarim yilligi oxirigacha boshqaruvning ortiqcha va bir-birini takrorlovchi boʻgʻinlarini, kam quvvatli boʻlinmalarni tugatgan, ishlab chiqarish va maʼmuriy maydonlarni boʻshatgan holda “trestmaydon” boshqaruv tuzilmasiga oʻtish tavsiya qilinsin.

7. Qoʻrilayotgan obyektlarni budjetdan moliyalash hisobiga kafolatli va oʻz vaqtida mablagʻ bilan taʼminlash maqsadida Vazirlar Mahkamasining Qurilish va qurilish materiallari sanoati kompleksi Oʻzbekiston Respublikasi Moliya vazirligi va Markaziy banki, Toshkent shahar hokimligi bilan birgalikda 2000-yil mobaynida Toshkent shahrining pudrat tashkilotlari tomonidan bajarilayotgan qurilishni mablagʻ bilan uzluksiz va maqsadli taʼminlash mexanizmini tajriba tariqasida sinab koʻrishni amalga oshirsin, bunda:

buyurtmachi, pudrat tashkiloti va budjet mablagʻlari hisobiga amalga oshirilayotgan obyektlar qurilishini kafolatli uzluksiz mablagʻ bilan taʼminlovchi bank oʻrtasida uch tomonlama shartnoma tuzilishi;

pudrat tashkilotlari tomonidan boshqa qurilishlar boʻyicha kreditorlik qarzlarni toʻlash uchun olingan mablagʻlarni jalb qilmasdan qurilishlarni mablagʻ bilan maqsadli taʼminlash uchun buyurtmachilar yoki alohida yirik obyektlar boʻyicha ilova hisob raqamlari ochish nazarda tutilsin.

Qilingan ishlar natijalari toʻgʻrisida Vazirlar Mahkamasiga 2000-yil yakunlari boʻyicha axborot berilsin.

8. “Oʻzuyjoyjamgʻarmabank” Oʻzbekiston Respublikasi Prezidentining 1996-yil 31-yanvardagi PF-1366-son Farmonining 3-bandini soʻzsiz bajarish maqsadida sertifikat uy-joylarning foydalanishga tayyor holda qurilishini Toshkent shahrini rivojlantirishning shaharsozlik talablarini hisobga olgan holda mulkchilikning barcha shakllaridagi pudrat tashkilotlari oʻrtasida faqat tender (tanlov) asosida amalga oshirsin.

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisidagi takliflarni oʻn kun muddatda Vazirlar Mahkamasiga kiritsin.

10. Vazirlar Mahkamasining “Toshkentuyjoyinvestqurilish” Toshkent moliya-qurilish korporatsiyasi faoliyatini tashkil etish toʻgʻrisida” 1994-yil 27-dekabrdagi 622-son qarori, shuningdek, Vazirlar Mahkamasining “Kapital qurilishda boshqaruvning tashkiliy tuzilmasini yanada takomillashtirish chora-tadbirlari toʻgʻrisida” 1998-yil 28-noyabrdagi 500-son qaroriga 1 va 2-ilovalar oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Isayev va Toshkent shahri hokimi K.N. Toʻlaganov zimmasiga yuklansin.