Pul muomalasini mustahkamlash, milliy valyuta—soʻmning xarid qobiliyatini oshirish va ichki erkin muomalada boʻlishini bosqichma-bosqich taʼminlash maqsadida Vazirlar Mahkamasi qaror qiladi:

1. 1994-yilning 1-avgustidan boshlab Oʻzbekiston Respublikasi hududida jismoniy shaxslar qoʻlidagi naqd soʻmlarni erkin muomaladagi valyutaga almashtirish taʼminlansin.

Markaziy bank ikki hafta muddatda vakil qilingan tijorat banklariga naqd soʻmlarni oʻzlarining valyuta resurslari hisobidan erkin muomaladagi valyuta (EMV)ga almashtirish uchun ruxsatnoma (litsenziya)lar berish toʻgʻrisidagi takliflarni koʻrib chiqsin va Vazirlar Mahkamasiga taqdim etsin.

2. Belgilab qoʻyilsinki:

Oʻzbekiston Respublikasining milliy valyutasi — taqdim etiladigan naqd soʻmlargina EMVga almashtiriladi;

soʻmlarni erkin muomaladagi valyutaga almashtirish punktlari orqali Oʻzbekiston Respublikasi fuqarosi boʻlgan bir jismoniy shaxsga (yoki unga tenglashtirilgan rezidentlarga) almashtirish 1994-yilning oxirigacha 250 AQSh dollariga qadar miqdorni tashkil etishi mumkin;

rezident boʻlmagan shaxslarga soʻmlarni erkin muomaladagi valyutaga almashtirish ulardan ilgari sotib olingan almashtirilgan EMV miqdori doirasida, almashtirish punktining tegishli maʼlumotnomasi taqdim etilgandan keyin amalga oshiriladi;

3. Oʻzbekiston Respublikasi Markaziy banki Moliya vazirligi bilan birgalikda naqd pul muomalasini tartibga solish chogʻida ehtiyoj va taklifni hisobga olgan holda soʻm bilan EMV miqdori oʻrtasidagi eng maqbul nisbatni taʼminlasin.

6. Belgilab qoʻyilsinki, mulkchilik shaklidan qatʼi nazar, jismoniy va yuridik shaxslar:

Oʻzbekiston Respublikasining vakil qilingan banklarida chet el valyutasi uchun schyotlar ochish;

oʻzlarining valyuta schyotlaridan mablagʻ, shuningdek, ular yuzasidan foizlarni belgilangan tartibda chet el valyutasida yoki operatsiya bajarilgan kuni amalda boʻlgan kurs boʻyicha soʻmlarda olish huquqiga egadirlar.

7. Belgilab qoʻyilsinki,

davlatlararo hisob-kitoblar kliring asosida tovarlar va xizmatlarni erkin muomaladagi valyutada baholash yoʻli bilan amalga oshiriladi;

9. Oʻzbekiston Respublikasi Markaziy banki, Tashqi iqtisodiy faoliyat milliy banki, Ichki ishlar vazirligi, Aloqa vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ixtisoslashtirilgan almashtirish punktlarining tegishlicha ishlashlarini, ularning zarur uskunalar bilan jihozlanishi va qoʻriqlanishini, malakali kadrlar bilan butlanishini, almashtirish operatsiyalari qoidalariga rioya etish qattiq nazorat qilinishini taʼminlasinlar.

11. Belgilab qoʻyilsinki, xoʻjalik hisobidagi korxonalarga, tashkilotlar va muassasalarga ish haqi belgilangan tartibda ularning oʻz mablagʻlari doirasida toʻlanadi.

Favqulodda hollarda korxonalarga ish haqi toʻlash uchun kreditlar berish bilan bogʻliq masalalarni hal qilish uchun viloyatlar va Toshkent shahri hokimliklari huzurida maxsus komissiyalar tuzilsin, ularning zimmasiga pul-kredit siyosati boʻyicha Respublika komissiyasi (Oʻzbekiston Respublikasi Moliya vazirligi)ga tegishli takliflarni ishlab chiqish va taqdim etish vazifasi yuklansin. Ushbu masala boʻyicha uzil-kesil qarorni respublika komissiyasi qabul qiladi.

Respublika komissiyasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir hafta muddatda yuqorida koʻrsatilgan maxsus komissiyalarning tashkil etilishini taʼminlasin.

Tijorat banklari ushbu qaror chiqqan kundan boshlab mulkchilik shaklidan qatʼi nazar, xoʻjalik yurituvchi subyektlarga ish haqi toʻlash uchun maqsadli kreditlarni faqat respublika komissiyasining qaroriga binoan bersinlar.

Oʻzbekiston Respublikasi Markaziy banki mazkur topshiriqning bajarilishi ustidan qattiq nazorat oʻrnatsin.

12. Oʻzbekiston Respublikasi Ichki ishlar vazirligi, Prokuraturasi valyuta operatsiyalarini amalga oshirishda belgilangan, tartibga ogʻishmay rioya etilishi ustidan qattiq nazoratni taʼminlasinlar, qoidabuzarlarni amaldagi qonunlarda koʻzda tutilgan qatʼi javobgarlikka tortsinlar.

Oʻzbekiston Respublikasi Adliya vazirligi Markaziy bank bilan birgalikda oʻn kun muddatda Oʻzbekiston Respublikasining valyuta qonunchiligini buzganlik uchun javobgarlikni, shu jumladan, jinoiy javobgarlikni kuchaytirish toʻgʻrisida takliflar tayyorlasin.

13. Vazirliklar va idoralar ikki hafta muddatda oʻzlarining meʼyoriy hujjatlarini mazkur qarorga muvofiq holga keltirsinlar.

14. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.