“O‘zbekiston Respublikasining xalqaro shartnomalari to‘g‘risida”gi O‘zbekiston Respublikasi Qonunining 22-moddasiga muvofiq:

1. 2023-yil 24-fevral kuni Toshkent shahrida imzolangan O‘zbekiston Respublikasi Hukumati bilan Ozarbayjon Respublikasi Hukumati o‘rtasida O‘zbekiston-Ozarbayjon investitsiya jamg‘armasini tashkil etish to‘g‘risidagi bitim tasdiqlansin.

2. Investitsiyalar, sanoat va savdo vazirligi ushbu xalqaro shartnomani amalga oshirish uchun mas’ul bo‘lgan vakolatli organ etib belgilansin.

3. Belgilansinki:

Investitsiyalar, sanoat va savdo vaziri L. Kudratov va O‘zbekiston Respublikasi Prezidenti huzuridagi Strategik islohotlar agentligi bosh direktori — Tiklanish va taraqqiyot jamg‘armasi ijrochi direktori Sh. Vafayev O‘zbekiston Respublikasi tomonidan O‘zbekiston-Ozarbayjon investitsiya jamg‘armasi direktorlar kengashi a’zolari hisoblanadi;

O‘zbekiston-Ozarbayjon investitsiya jamg‘armasining ustav kapitalida O‘zbekiston Respublikasi Hukumatining ulushi Tiklanish va taraqqiyot jamg‘armasi mablag‘lari hisobidan shakllantiriladi;

O‘zbekiston Respublikasi Prezidenti huzuridagi Strategik islohotlar agentligi bosh direktori — O‘zbekiston Respublikasi Tiklanish va taraqqiyot jamg‘armasi ijrochi direktori Sh. Vafayevga O‘zbekiston-Ozarbayjon investitsiya jamg‘armasining ustavini imzolash vakolati beriladi.

4. Tashqi ishlar vazirligi O‘zbekiston Respublikasi tomonidan ushbu xalqaro shartnomaning kuchga kirishi uchun zarur bo‘lgan davlat ichki tartib-taomillari bajarilganligi hamda uni amalga oshirish uchun mas’ul bo‘lgan vakolatli organ to‘g‘risida Ozarbayjon tomoniga tegishli bildirishnomani yuborsin.

5. Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirganidan keyin uning qoidalari amalga oshirilishi ustidan belgilangan tartibda nazoratni ta’minlasin.

6. Investitsiyalar, sanoat va savdo vazirligi manfaatdor vazirlik va idoralar bilan birgalikda ikki oy muddatda O‘zbekiston Respublikasining “2023-yil uchun O‘zbekiston Respublikasining Davlat budjeti to‘g‘risida”gi Qonuniga tegishli o‘zgartirish va qo‘shimchalar kiritishni nazarda tutuvchi qonun loyihasini Vazirlar Mahkamasiga kiritsin.

7. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.