Keyingi yillarda mamlakatimizda tadbirkorlik faoliyatini va raqobat muhitini yanada rivojlantirishga, isteʼmolchilar huquqlarining ishonchli himoya qilinishini taʼminlashga hamda tadbirkorlik subyektlarini har tomonlama qoʻllab-quvvatlashga qaratilgan keng koʻlamli islohotlar amalga oshirildi.

Shu bilan birga raqobat muhitini rivojlantirish va isteʼmolchilar huquqlarini himoya qilish, tadbirkorlik subyektlariga davlat tomonidan berilgan hamda oʻz muddatida qaytarilmagan kredit mablagʻlarini undirish masalalariga doir daʼvolar, arizalar va shikoyatlar bilan sudlarga murojaat qilish chogʻida tegishli davlat organlarini davlat bojini toʻlashdan ozod etish zarurati yuzaga kelmoqda.

Ushbu Qonun bilan Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasini hamda Oʻzbekiston Respublikasi Iqtisodiyot va moliya vazirligi huzuridagi Tadbirkorlik faoliyatini qoʻllab-quvvatlash davlat jamgʻarmasini sudlarga murojaat qilish chogʻida davlat bojini toʻlashdan ozod etish nazarda tutilmoqda.

Ushbu Qonun tegishli davlat organlariga sudlarga murojaat qilish uchun ajratilgan davlat boji toʻlovidan tejalgan mablagʻlarni tadbirkorlikni rivojlantirish, tadbirkorlik subyektlarining va isteʼmolchilarning huquqlari yanada ishonchli himoya qilinishini taʼminlash uchun yoʻnaltirishga xizmat qiladi.

1-modda. Oʻzbekiston Respublikasining 2020-yil 6-yanvarda qabul qilingan “Davlat boji toʻgʻrisida”gi OʻRQ-600-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2020-yil, № 1, 1-modda, № 3, 201-modda, № 5, 298-modda, № 10, 593-modda, № 12, 691-modda; 2021-yil, № 1, 13-modda, 4-songa ilova, № 7, 661-modda, № 8, 800, 803-moddalar, № 10, 968-modda; 2022-yil, № 2, 76-modda, № 3, 214, 216-moddalar, № 4, 340-modda, № 5, 463, 464, 467-moddalar, № 12, 1186-modda) quyidagi oʻzgartish va qoʻshimchalar kiritilsin:

1) 8-moddaning birinchi qismi:

29-bandi quyidagi tahrirda bayon etilsin:

“29) Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi hamda uning hududiy organlari – oʻz zimmasiga yuklatilgan vakolatlarga muvofiq sudlarga koʻrib chiqish uchun beriladigan daʼvolar va shikoyatlar yuzasidan”;

quyidagi mazmundagi 44-band bilan toʻldirilsin:

“44) Oʻzbekiston Respublikasi Iqtisodiyot va moliya vazirligi huzuridagi Tadbirkorlik faoliyatini qoʻllab-quvvatlash davlat jamgʻarmasi — oʻz huquqlari hamda qonuniy manfaatlarini himoya qilish yuzasidan daʼvolar, arizalar va shikoyatlar bilan sudga murojaat qilganda”;

2) 9-moddaning birinchi qismi:

9-bandi quyidagi tahrirda bayon etilsin:

“9) Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi hamda uning hududiy organlari — oʻz zimmasiga yuklatilgan vakolatlarga muvofiq sudlarga koʻrib chiqish uchun beriladigan daʼvolar, arizalar va shikoyatlar boʻyicha”;

quyidagi mazmundagi 28-band bilan toʻldirilsin:

“28) Oʻzbekiston Respublikasi Iqtisodiyot va moliya vazirligi huzuridagi Tadbirkorlik faoliyatini qoʻllab-quvvatlash davlat jamgʻarmasi — oʻz huquqlari hamda qonuniy manfaatlarini himoya qilish yuzasidan daʼvolar, arizalar va shikoyatlar bilan sudga murojaat qilganda”;

3) 10-moddaning birinchi qismi:

10¹-bandi quyidagi tahrirda bayon etilsin:

“10¹) Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi hamda uning hududiy organlari — oʻz zimmasiga yuklatilgan vakolatlarga muvofiq sudlarga koʻrib chiqish uchun beriladigan arizalar va shikoyatlar yuzasidan”;

quyidagi mazmundagi 18-band bilan toʻldirilsin:

“18) Oʻzbekiston Respublikasi Iqtisodiyot va moliya vazirligi huzuridagi Tadbirkorlik faoliyatini qoʻllab-quvvatlash davlat jamgʻarmasi — oʻz huquqlari hamda qonuniy manfaatlarini himoya qilish yuzasidan arizalar va shikoyatlar bilan sudga murojaat qilganda”.

2-modda. Oʻzbekiston Respublikasi Iqtisodiyot va moliya vazirligi, Raqobatni rivojlantirish va isteʼmolchilar huquqlarini himoya qilish qoʻmitasi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

3-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

4-modda. Ushbu Qonun rasmiy eʼlon qilingan kundan eʼtiboran kuchga kiradi.