O‘zbekiston Respublikasi Prezidentining “O‘zbekiston Respublikasi va Yaponiya o‘rtasida ikki tomonlama hamkorlikni yanada kengaytirish va mustahkamlash chora-tadbirlari to‘g‘risida” 2019-yil 28-dekabrdagi PQ-4553-son qarori ijrosini ta’minlash hamda Qoraqalpog‘iston tibbiyot institutining klinikasida tibbiy xizmat sifatini yaxshilashni nazarda tutgan holda berilayotgan Yaponiya Hukumatining grantlaridan samarali foydalanish maqsadida Vazirlar Mahkamasi qaror qiladi:

1. Quyidagilar:

a) O‘zbekiston Respublikasi Prezidentining 2019-yil 28-dekabrdagi PQ-4553-son qarori bilan tasdiqlangan Investitsiya loyihalari va savdo shartnomalarini o‘z vaqtida ijro etish bo‘yicha amaliy harakatlar rejasi (“yo‘l xaritasi”)ning 21-bandiga muvofiq Yaponiya xalqaro hamkorlik agentligi (JICA) tomonidan Qoraqalpog‘iston tibbiyot institutiga tibbiy uskunalarni yetkazib berilishi belgilanganligi;

b) ushbu amaliy harakatlar rejasi doirasida O‘zbekiston Respublikasi va Yaponiya Hukumati o‘rtasida 2022-yil 1-fevralda O‘zbekiston Respublikasi sog‘liqni saqlash tizimiga grant ajratish to‘g‘risida Hukumatlararo almashinuv notalari va Grant bitimi imzolanganligi, bunda:

“Qoraqalpog‘iston tibbiyot institutining klinikasida tibbiy xizmat sifatini yaxshilash” loyihasini (keyingi o‘rinlarda — loyiha) amalga oshirish maqsadida Yaponiya Hukumatining beg‘araz yordam dasturi doirasidagi qiymati 794 mln Yaponiya iyenasi (7,3 mln AQSh dollariga teng ekvivalentda) miqdoridagi granti hisobidan Yaponiyada ishlab chiqarilgan tibbiy uskunalarni yetkazib berish belgilanganligi;

Yaponiya Hukumati tomonidan Yaponiya xalqaro hamkorlik agentligi (JICA) barcha xaridlarni amalga oshirish va yetkazib berish bo‘yicha vakil etib tayinlanganligi;

O‘zbekiston Respublikasi Sog‘liqni saqlash vazirligi nomiga Yaponiya vakolatli bankida grant bo‘yicha hisob-kitob xizmatlarini amalga oshirish uchun maxsus hisobvaraq ochilishi nazarda tutilganligi ma’lumot uchun qabul qilinsin.

2. “O‘zbekiston Respublikasi Tashqi iqtisodiy faoliyat milliy banki” aksiyadorlik jamiyatiga (keyingi o‘rinlarda — “O‘zmilliybank” AJ) Yaponiyaning vakolatli banki bilan banklararo shartnomani imzolash vakolati berilsin.

“O‘zmilliybank” AJga O‘zbekiston Respublikasi Sog‘liqni saqlash vazirligi nomiga Yaponiyaning vakolatli bankida grant bo‘yicha hisob-kitob xizmatlarini amalga oshirish uchun maxsus hisobvaraq ochilishini ta’minlash tavsiya etilsin.

3. O‘zbekiston Respublikasi Sog‘liqni saqlash vazirligi:

Yaponiya tomoni bilan kelishgan holda loyihani amalga oshirish doirasida grant olish va unga xizmat ko‘rsatish bilan bog‘liq barcha tartibotlarni rasmiylashtirish, shuningdek xaridlar jarayonining borishi bo‘yicha doimiy monitoring olib borsin;

loyiha doirasida yetkazib berilgan tibbiy uskunalar, istisno tariqasida, davlat ro‘yxatidan o‘tkazilmasdan, bojxona qonunchiligi qoidalariga rioya etgan holda, majburiy sertifikatlash sharti bilan bojxona rasmiylashtiruvidan o‘tkazilishini ta’minlasin;

Qoraqalpog‘iston tibbiyot institutining klinikasini elektr energiyasi, suv ta’minoti, kanalizatsiya tizimi va loyihani amalga oshirish uchun zarur bo‘lgan boshqa qo‘shimcha qulayliklar bilan ta’minlasin;

tibbiy uskunalar sifatli saqlanishini, ulardan to‘g‘ri va samarali foydalanilishini hamda loyiha yakunlanganidan so‘ng grant doirasida taqdim etilgan tibbiy uskunalarga texnik xizmat ko‘rsatish hamda tegishli hajmda mablag‘ ajratgan holda ulardan to‘g‘ri va samarali foydalanishni ta’minlasin;

Yaponiya Hukumati granti hisob-kitoblari doirasida xizmat ko‘rsatuvchi Yaponiyaning vakolatli banki foydasiga belgilangan shaklda kafolat xati (Acknowledgement letter) taqdim qilsin;

“O‘zmilliybank” AJ bilan birgalikda Yaponiya Hukumati grantidan samarali foydalanish maqsadida agentlik bitimi doirasida tegishli buyurtmanoma taqdim etilgandan so‘ng besh ish kuni ichida Yaponiya vakolatli bankining vositachilik xarajatlari to‘lab berilishini ta’minlasin.

Bunda, “O‘zbekiston mehr-shafkat va salomatlik” jamoat fondiga loyihani amalga oshirish doirasida Yaponiya vakolatli bankining vositachilik xarajatlarini ushbu fond mablag‘lari hisobidan qoplab berish tavsiya etilsin.

4. Moliya vazirligi Sog‘liqni saqlash vazirligi bilan birgalikda loyihani amalga oshirish uchun zarur bo‘lgan tibbiy uskunalarni tegishli mebellar bilan ta’minlash, shu jumladan kompyuter tomografini o‘rnatish uchun zarur bo‘lgan radiatsiyadan himoya qiluvchi ishlarni bajarish maqsadida jami 43 000 AQSh dollariga teng bo‘lgan mablag‘lar hamda uskunalarni kafolat muddati tugaganidan so‘ng, tashkilotning smeta xarajatlarida nazarda tutiladigan texnik xizmat ko‘rsatish uchun mablag‘larni sog‘liqni saqlash tizimiga ajratilgan O‘zbekiston Respublikasining respublika budjeti va qonunchilik hujjatlari bilan taqiqlanmagan boshqa mablag‘lar hisobidan ajratilishini ta’minlasin.

5. O‘zbekiston Respublikasi Sog‘liqni saqlash vazirligining buyurtmanomalari bo‘yicha:

Tashqi ishlar vazirligi loyihani amalga oshirishda ishtirok etuvchi xorijiy mutaxassislarga kirish vizalari belgilangan tartibda rasmiylashtirilishini;

Ichki ishlar vazirligi loyihani amalga oshirishda jalb qilinayotgan chet el fuqarolariga belgilangan tartibda ko‘p martalik viza muddatlari uzaytirilishini, shuningdek vaqtincha turgan joyi bo‘yicha ro‘yxatga olinishini va uning muddatini uzaytirilishini ta’minlasin.

6. Mazkur qarorning bajarilishini nazorat qilish O‘zbekiston Respublikasi sog‘liqni saqlash vaziri B.A. Musayev zimmasiga hamda Vazirlar Mahkamasining Ta’lim, sog‘liqni saqlash va sport masalalari kotibiyatiga yuklansin.